Gha Ru Ahoo Ọghe Jehova

Ma kpọnmwọn ne u na zẹ ẹghẹ kọ ya tie ebe ẹmu na, ne u mieke na rẹn aro emwa ne Avbe Osẹe Jehova khin, iwinna ne ima ru kevbe emwamwa ne ima ya ga e Jehova. Ma yayi wẹẹ, emwi ne u ruẹ re vbe ebe ẹmu na, ya ruẹ rẹn wẹẹ, Avbe Osẹe Jehova ẹre ọ ru ahoo ọghe Jehova vbe ẹdẹnẹrẹ. Ma rhie igiọdu nuẹn ne u ye gha ruẹ emwi vbekpae Osanobua, ne u gha tama emwa vbuwe ẹgbẹe ruẹ emwi ne u ruẹ kevbe ne u gha yo iko ọghe Avbe Osẹe Jehova vbe ẹghẹ hia.—Hibru 10:23-25.

Vbene u ya mwẹ irẹnmwi sayọ vbekpae Jehova, u ghi do gha bẹghe ẹre wẹẹ, Jehova gele hoẹmwẹ ruẹ. Ọna ẹre ọ khian ghi gua ruẹ kpa ya gha mwẹ ahoẹmwọmwa daa re. (1 Jọn 4:8-10, 19) Sokpan, vbua khian ya gha rhie ahoẹmwọmwa na ma hẹ vbe arrọọ ruẹ? De afiangbe ne u gha miẹn deghẹ u na gha lele ilele ọghe Osanobua? De emwi nọ gha ya ruẹ do deba ima vbe ugamwẹ Osanobua? Ọtẹn nọ ya e Baibol maa ruẹ emwi gha zẹ ewanniẹn ye avbe inọta na. Ewanniẹn ọghe avbe inọta na, gha ru iyobọ ne uwẹ vbe ẹgbẹe ruẹ ya gha ru emwi nọ gha ya Osanobua hoẹmwẹ uwa vbe etẹbitẹ.—Jud 21.

Ma rhie igiọdu nuẹn ne u ye gha mwẹ alaghodaro sayọ vbe odẹ ọghe ẹmwata. Ebe na, gha ru iyobọ nuẹn: “How to Remain in Godʹs Love.”