Ovbi Okhuo Nọ Dẹgbẹ Rhiọkpaegbe

Vbuwe ẹghẹ ne amẹ ma ya rhọọ vbe otọ Izrẹl, e Jehova keghi tama Elaija wẹẹ: ‘Gha rrie Zẹrafat. Okhuo ọkpa nọ dẹgbẹ nọ rre evba gha rhie evbare nuẹ.’ Elaija ghi sẹ onurho orere ẹvbo nii, ọ keghi miẹn okhuo ọkpa nọ dẹgbẹ ne obọ ma sẹ ọre. Nene okhuo kegha koko erhan. Elaija na wẹẹ ne ọ sa amẹ ne irẹn wọn. Vbe nene okhuo khian ghi ya sa amẹ gie ẹre, Elaija keghi tama rẹn wẹẹ: ‘Lahọ u ghi vbe rhie ebrẹd ba re rre.’ Sokpan nene okhuo na tama rẹn wẹẹ: ‘I i mwẹ ebrẹd ne I khian rhie nuẹ. Irhuarhua kevbe ofigbọn kherhe nọ ghi kẹ, ẹre I khian ya le evbare ne imẹ vbe ọmọ khian re.’ Elaija keghi tama rẹn wẹẹ: ‘E Jehova yan rẹn wẹẹ, deghẹ u na rhie evbare mẹ, irhuarhua kevbe ofigbọn i khian ghi fo vbe owa ruẹ, a te miẹn wẹẹ amẹ dọlegbe suẹn gha rhọọ.’

Ẹre nene okhuo na gha rrie owa, ọ na ya le evbare ne akhasẹ ọghe Jehova. Irẹn vbe ovbi ẹre na gele gha miẹn evbare re vbuwe ẹghẹ ne amẹ ma ya rhọọ. Evbare ma gele fo vbe owa re, zẹvbe ne Jehova khare.

Vbe ọ ma he kpẹẹ vba, ovbi okhuo nọ dẹgbẹ nii na suẹn gha khuọnmwi. Ọ ghi zẹ khuọnmwi, ọ na ghi wu. Okhuo nii keghi rinmwian Elaija nọ ru iyobọ ne irẹn. Elaija keghi mu ọmọ nii vbe obọ iyẹe. Ọ na muẹn hin egedege ọghe owa nii. Ọ ghi sẹ evba, ọ na muẹn lovbiẹ ye ukpo. Elaija keghi na erhunmwu gie Jehova wẹẹ: ‘Lahọ e Jehova, huẹn ọmọ na kpaegbe.’ Te ọ khian wa kpa emwa nibun odin deghẹ e Jehova na huẹn ọnrẹn kpaegbe rhunmwuda wẹẹ, egbe emwi vberriọ ma he sunu ẹdẹ. Gberra ọni, okhuo nọ dẹgbẹ nii kevbe ọvbi ẹre i re Ivbi Izrẹl.

Nene ọmọ na gele rhiọkpaegbe! Ẹre Elaija na tama iyẹe wẹẹ: ‘Ghee oo! Ovbuẹ rhiọkpaegbe.’ Okhuo nii na ghọghua. Ọ na tama Elaija wẹẹ: ‘Ọguọmwadia Osanobua ẹre u gele khin. Obọ e Jehova ẹre ẹmwẹ hia ne u ta ke rre.’