De Ọmwa Nọ Mu Ọtu Ọghe Uwa Gbọọ?

Otu ọghe Avbe Osẹe Jehova nọ rrọọ vbe ẹdẹnẹrẹ, keghi suẹn vbe ufomwẹ ọghe orre nogie 19. Vbe ẹghẹ nii, ẹbu nekherhe ọghe emwa ni ruẹ Baibol ni rre ọkpẹn Pittsburgh, Pennsylvania vbe United States, keghi suẹn gha zanzan e Baibol ọkadeokade. Iran keghi ye imamwaemwi ọghe esọsi ya tae imamwaemwi nọ gele rre uwe Baibol. Iran na ghi suẹn gha gbẹnnọẹn kevbe iran na vbe gha ruẹ ladian vbe ebe iyẹn, kevbe ebe nọ rre vbe ukiuki na ghi tiẹre The Watchtower—Announcing Jehovah’s Kingdom.

Okpia ọkpa na gha tiẹre Charles Taze Russell, kegha re ọkpa vbe usun ẹbu nekherhe nii ni ghaa ruẹ Baibol ni mwẹ ẹkoata. Agharhemiẹn wẹẹ, e Russell ẹre ọ ghaa re ọkalotu vbe iwinna imamwaemwi ọghe Baibol vbe ẹghẹ nii, kevbe wẹẹ, irẹn ẹre ọ ghaa re ọgbenbe nokaro ọghe ne Watchtower, ẹi re irẹn ọ mu otu ọghe Avbe Osẹe Jehova gbọọ, kevbe wẹẹ, otu na i vbe rẹ ọghe ọgbọn. Emwi ne Russell kevbe iran nikẹre nọre Emwa Ni Ruẹ E Baibol zẹvbe na gha tie iran vbe ẹghẹ nii gha khu khian, ọre, na yae wewe imamwamwi ọghe Jesu Kristi kevbe ne iran yegbe tae iko ọghe Ivbiotu e Kristi nọ gha rrọọ vbe orre nokaro. Ugbẹnvbe a miẹn wẹẹ, Jesu ẹre ọ muẹn gbọọ, ighẹ ugamwẹ ọghe Ivbiotu e Kristi, ma keghi ghee irẹn zẹvbe ọmwa nọ mu otu ọghomwa gbọọ.—Kọlose 1:18-20.