Avbe Osẹe Jehova Mwẹ Uhi Ne Iran Lele Vbe Nọ Dekaẹn Na Gha Si Egbe Obọ Ra?

Ma ne Avbe Osẹe Jehova yayi wẹẹ, avbe uhi kevbe ilele ni rre Baibol gha sẹtin ru iyobọ ne ima ya gha ru emwi nọ yẹẹ Osanobua, kevbe wẹẹ, iran gha ya agbọn maan ima vbe ima ghaa lelẹe. (Aizaia 48:17, 18) Ẹ i re ima ẹre ọ mu avbe uhi kevbe ilele na gbọọ, sokpan te ima ya iran ru emwi. Gia ghee vbene eso vbe avbe uhi kevbe ilele na ya dekaẹn emwa ni si egbe obọ hẹ.a

• Osanobua hoo ne ọdọ vbe amwẹ rọnmwẹ egbe sẹ ota. (Matiu 19:6) Rhunmwuda ne Avbe Osẹe Jehova na ghee ẹghẹ na ya si egbe obọ zẹvbe emwi na ru a ke ru orọnmwẹ, ma i zẹdẹ yae ku hiehie.

• Emwa ni sẹ ni gha ru orọnmwẹ ẹre ọ khẹke ni gha si egbe obọ. Emwa vberriọ “gberra ẹghẹ ne egbe ya ru igbama rriorriorrio nẹ.”​—1 Kọrint 7:​36.

• Te ọ khẹke ne emwa ni si egbe obọ gha re emwa ni gha sẹtin ru orọnmwẹ. Emwa eso sọ ebe orọnmwẹ nẹ zẹvbe nọ gua uhi arriọba ro, ọrheyerriọ vbe aro Osanobua, iran i mwẹ asẹ ne iran khian ya dọlegbe ru orọnmwẹ, rhunmwuda, Osanobua gi ima rẹn wẹẹ, emwi ọkpa kẹkan nọ gha sẹtin ya ọdọ vbe amwẹ sọ ebe orọnmwẹ ọre vbe ọkpa vbe uwu iran gha fi owẹ ye oha.​—Matiu 19:9.

• E Baibol gbe uhi ne Ivbi Otu e Kristi ni khian ru orọnmwẹ wẹẹ, te ọ khẹke ne iran rọnmwẹ ọmwa ne iran gba rre ugamwẹ ọkpa. (1 Kọrint 7:​39) Avbe Osẹe Jehova yayi wẹẹ, ẹ i re te uhi na guan kaẹn ọmwa nọ ya aro nọ ghaan ghee ugamwẹ iran, sokpan te ọ guan kaẹn ọmwa ne ima gba mwẹ iyayi kevbe imamwaemwi ọkpa, ọmwa nii ghi vbe gha zẹ owẹ lele avbe imamwaemwi na; deba ọni, ọ ghi vbe gha re ọmwa nọ dinmwiamẹ nẹ zẹvbe Osẹe Jehova. (2 Kọrint 6:​14) Ke ẹghẹ gha dee, ẹre Osanobua ke gbe uhi ne eguọmwadia ẹre wẹẹ, ne iran gu ọmwa ne iran gba mwẹ iyayi ọkpa ru orọnmwẹ. (Gẹnẹsis 24:3; Malakai 2:​11) Ere rrọọ deghẹ a na lele uhi na, uhiẹn, emwa ni gualọ otọ emwi sayọ wa vbe kue ye ọna.b

• Te ọ khẹke ne emọ gha họn ẹmwẹ ne evbibiẹ iran. (Itan 1:8; Kọlọsi 3:​20) Nọ ne emọ ni ye gu evbibiẹ iran rre owa, te iran gha họn ẹmwẹ ne evbibiẹ iran vbọ gha de ọghe na gha si egbe obọ. Ọna sẹtin vbe dekaẹn inu ukpo ne emọ nii khian gha ye, iran ke suẹn gha gu ọmwa si egbe obọ kevbe emwi eso ne iran gha sẹtin ru, kevbe ne iran i khian ru.

• Dọmwadẹ Osẹe Jehova ẹre ọ khian zẹ ne egbe ẹre deghẹ irẹn gha gu ọmwa si egbe obọ, kevbe ọmwa nọ gha gu si egbe obọ. Sokpan na miẹn wẹẹ, iran ma rhie owẹ gberra adia nọ rre Baibol. Ọna wa gua ilele nọ rre Baibol ro, nọ khare wẹẹ: “Dọmwadẹ ọghẹe ẹre ọ khian mu ihẹ nọ bi ye ọre izabọ.” (Galetia 6:5, e futnot) Ọrheyerriọ, vbọ gha de ọghe na gha si egbe obọ, Osẹe Jehova ni bun keghi gualọ ibude vbe obọ Avbe Osẹe Jehova ọvbehe ni wẹro, ni vbe mwẹ ẹmwẹ iran vbe orhiọn.​—Itan 1:5.

• Emwi ni bun ne emwa ru vbe iran ghaa si egbe obọ keghi re orukhọ nọ wegbe. Vbe igiemwi, e Baibol gbe uhi ne ima, ne ima lẹẹ ne uyinmwẹ alama oghẹ. Ẹ i wa re emwi ọdọ vbe amwẹ ọkpa ẹre a guan kaẹn mwa, ọ vbe dekaẹn uyinmwẹ esankan ughughan ne emwa ni ma he ru orọnmwẹ na mwẹ obọ, vbe na ghee, ne iran na ya obọ rrarra ẹgẹn ọghe iran, ne iran na loo unu ra onisan ru emwi ọdọ vbe amwẹ. (1 Kọrint 6:​9-​11) Uhiẹn, deghẹ emwa ni ma he ru orọnmwẹ na gha ru emwi eso nọ gha gua ẹgẹn iran kpa, agharhemiẹn wẹẹ, a i khian kae ba alama oghẹ, “uyinmwẹ osọnnọ” ẹre nọ vbe aro Osanobua. (Galetia 5:​19-​21) E Baibol vbe gbe ikhan ye na gha ta ẹmwẹ nọ gua ẹgẹn kpa, “ẹmwẹ osọnnọ” ẹre nọ vbe aro Osanobua.​—Kọlọsi 3:8.

• Ekhọe ima sẹtin mu ima rẹrẹ. (Jerimaia 17:9) Ọ sẹtin ya ọmwa ru emwi nọ rẹn wẹẹ, ọ ma khẹke. Ne ọna ghẹ mieke na sunu, ọ ma khẹke ne emwa ni si egbe obọ ọkpa gha rre eke nọ divbiẹ. Iran sẹtin vbe zẹ ọre vbe iro wẹẹ, uwu ẹbu avbe ọse ni vbe mwẹ uyinmwẹ esi ẹre iran khian na gha miẹn egbe, ra iran sẹtin rhie ọmwa lele egbe ẹghẹ ke ẹghẹ ne iran khian ya miẹn egbe. (Itan 28:26) Te ọ khẹke ne Ivbi Otu e Kristi ni re okhiọnkpa ni gualọ ọmwa ne iran khian gu yin yẹrẹro wẹẹ, ẹbe wa rrọọ deghẹ ọmwa na gha gualọ ọmwa nọ khian rhie ra nọ khian rọnmwẹ vbe intanẹt, katekate deghẹ ọmwa na gha gu ọmwa nọ ma rẹn si egbe obọ.​—Psalm 26:4.