Vbene A Ya Guẹ Sayọ Vbe Iwinna Ikporhu—Vbene A Ya Suẹn Gha Gu Ọmwa Ziro Ne Ẹkpotọ Mieke Na Kie Ne Ima Ya Kporhu

Ne Jesu na suẹn gha gu okhuo e Sameria nii guan, ẹre ọ zẹe ighẹ ọ sẹtin kporhu ma rẹn vbe ẹkpotọ ghi kie. Vbọ khian ya ima guẹ sayọ vbe odẹ ne ima ya gu emwa ne ima ma he ka miẹn ẹdẹ guan?

• Gha soyaya mu emwa, u ghi vbe hia ne u gu iran guan. Agharhemiẹn wẹẹ egbe wọọ e Jesu, ọ na ye suẹn gha gu okhuo nii guan, vbene ọ na tama rẹn wẹẹ ne ọ sa amẹ ne irẹn wọn. U sẹtin ka mumu ogiẹ tuẹ ọre, u ghi guan kaan vbene ẹdẹrriọ ye hẹ, ọre ovẹn ẹre ọ yunmwu ra amẹ ẹre ọ rhọọ; u sẹtin vbe guan kaan emwi eso ne ọ da sunu. Yerre wẹẹ emwi nọ si ẹre ne u na guẹ guan, ọre ne uwa eveva mieke na suẹn gha ziro, rhunmwuda ọni, u ghi hia ne u ta ẹmwẹ nọ gha yẹẹ ọre. Ghẹ gi ẹre da ruẹ deghẹ ọ ma zẹyọ ruẹ re. Ọ gha de vberriọ, u ghi gualọ ọmwa ọvbehe gu guan. Rinmwian e Jehova nọ rhie udinmwẹ nuẹn.—Neh 2:4; Iwinna 4:29.

• Gualọ ẹkpotọ nọ khẹke ne u khian ya suẹn gha kporhu, ghẹ ya okhirhikhirhi ru ẹre. Fẹko zin egbe ne ẹkpotọ ne u khian ya kporhu ma ọmwa ne u gu guan tobọre kie. U gha wẹẹ ne u ya okhirhikhirhi kporhu ma rẹn, ẹmwẹ ne u ta sẹtin khan ọmwa nii, ẹghẹ nii, ẹi ghi hoo ne ọ danmwehọ ruẹ. Adeghẹ uwẹ vbe ọmwa te suẹn gha ziro nẹ, sokpan ọ ma kẹ ruẹ ya kporhu ma rẹn, uwa ke guan fo, ghẹ gi orhiọn gbe yọ ruẹ iwu. Adeghẹ ohan mu ruẹ ne u ya kporhu vbe ẹkpotọ gha kie nuẹn, u ghi hia ne u ka ruẹ vbene a ya gu ọmwa guan hẹ vbene u i khian na kporhu ma rẹn. [Kpee vidio 1, iyeke ọni, a ghi ziro yan rẹn.]

• Hia ne u kie ẹkpotọ yọ ne u ya kporhu ma ọmwa ne u gu guan, odẹ ọkpa ne u khian ya ru ọna ọre ne u ta emwi eso ne u yayi ma rẹn, ọni sẹtin gua ọmwa nii kpa ya nọ ruẹ ọta. Ẹmwẹ ne Jesu tae, ẹre ọ gua okhuo nii kpa ya gha nọ e Jesu ọta. Vbe ẹghẹ ne Jesu ghi ya gha kporhu ma rẹn, ọta ne okhuo nii nọ rẹn ẹre ọ ghaa rhie ewanniẹn yi. [Kpee vidio 2, iyeke ọni, a ghi ziro yan rẹn. U ghi vbe kpee vidio 3, iyeke ọni, a ghi ziro yan rẹn.]