Orukhọ Nọ Deghẹ A Na Gha Fi Etẹtẹ Ra?

Ewanniẹn ne Baibol rhie ye inọta na

Vbene ẹmwata, e Baibol ma mobọ guan kaẹn etẹtẹ na fi. Sokpan, ma gha mu ukpa mu uwerhẹn ghee avbe ilele ni rre Baibol, ọ gha ru iyobọ ne ima ya rẹn wẹẹ, vbe aro Osanobua, orukhọ nọ deghẹ a na gha fi etẹtẹ.​—Ẹfisọs 5:​17.a

• Arovbẹmwẹ ẹre ọ ya emwa ni bun fi etẹtẹ, uyinmwẹ na i yẹẹ Osanobua. (1 Kọrint 6:​9, 10; Ẹfisọs 5:​3, 5) Igho ọghe emwa ni gbokhuẹre, ẹre emwa ni fi etẹtẹ hoo ne iran gha rhie ba ọghe iran, sokpan e Baibol wẹẹ ne ima ghẹ ya aro ye emwi ẹrrẹe.​—Ẹksodọs 20:17; Rom 7:7; 13:​9, 10.

• Ọ gha khọnrẹn we igho kherhe ẹre ima loo ya fi etẹtẹ, ọ sẹtin ya ima do hoẹmwẹ igho gberra egbe, ọna sẹtin rhie ikuanegbe ne ima.​—1 Timoti 6:​9, 10.

• Emwa ni fi etẹtẹ yayi wẹẹ, ne iran na mwẹ uhunmwu nọ maan ra ẹhi nọ maan, ẹre ọ zẹe ne ọkpa na gbe ifuẹn ne iran. Vbọrhirhighayehẹ, vbe aro Osanobua, uyinmwẹ igẹbọ ẹre ọna khin, te uyinmwẹ vbenian wa sọnnọ Osanobua.​—Aizaia 65:11.

• E Baibol rhie igiọdu ne ima, ne ima wegbe obọ, ẹ i re ne aro ima gha viẹn ye emwi ni kpọlọ, vbene ima ma na mu egbe ne ima ya winna. (Asan-Ibo 2:​24; Ẹfisọs 4:​28) Emwa ni lele ibude na nọ rre Baibol gha “rri ere okhuan ne iran khuaẹn.”​—2 Tẹsalonaika 3:​10, 12.

• Etẹtẹ na fi keghi si osuan, emwa ni fi etẹtẹ, ọghe enegbe iran ọkpa ẹre iran rẹnrẹn, e Baibol gbodan ye uyinmwẹ vbenian.​—Galetia 5:​26.