Psalm 46:10​—“Wa Dobọ Igbinna Yi, Ne Uwa Vbe Rẹn Wẹẹ Mẹ Ọre Osanobua”

“Wa dobọ igbinna yi, ne uwa vbe rẹn wẹẹ, mẹ ọre Osanobua. A gha rhie uyi mẹ vbe uwu avbe agbẹnvbo hia; a gha rhie uyi mẹ vbe uhunmwu otagbọn hia.”​—Psalm 46:​10, New World Translation.

“Wa dobọ igbinna yi ne uwa vbe rẹn wẹẹ mẹ ọre Osanobua nọ yo sẹ vbe avbe agbẹnvbo hia, nọ yo sẹ vbe uhunmwu otagbọn.”​—Psalm 46:​10, E Baibol Ẹdo.

Emwi Ne Psalm 46:10 Demu

Osanobua hoo ne emwa hia gha ga irẹn, kevbe ne iran yẹrẹro wẹẹ, irẹn ẹre ọ mwẹ asẹ na ya kha yan uhunmwu otagbọn hia. Ọmwaikọmwa nọ hoo nọ gha rrọọ vbe etẹbitẹ, te ọ gha kue yọ wẹẹ, Osa nọ mwẹ ẹtin ẹre Jehova khin kevbe wẹẹ, ọ vbe mwẹ asẹ na ya khaevbisẹ.​—Arhie Maan 4:11.

“Wa dobọ igbinna yi, ne uwa vbe rẹn wẹẹ mẹ ọre Osanobua.” Odẹ na ya zedu abọ nokaro ọghe ako na vbe Baibol eso ọre “wa mudia hii.” Ọna keghi ya emwa ni bun do gha roro ẹre wẹẹ, emwi na ya ẹmwẹ na kha ọre ne iran hẹko gbe ọghe iran ye egbe, ra ne iran hunwan vbe iran ghaa rre esọsi. Vbọrhirhighayehẹ, ẹmwẹ Hibru na zedu ẹre nọ re “wa dobọ igbinna yi, ne uwa vbe rẹn wẹẹ mẹ ọre Osanobua,” keghi re adia ne Jehovaa tobọre rhie ne emwa ni rre agbẹnvbo hia, nọ ya tama iran ne iran ghẹ ghi gbodan ghee irẹn kevbe ne iran miẹn ọnrẹn yi wẹẹ, irẹn ọkpa ẹre ọ sẹ na gha rhie ugamwẹ na.

Egbe adia vbenian vbe rre ebe Psalm 2. Vbe ako nii, Osanobua keghi ru eyan wẹẹ, irẹn gha werriẹ aro daa emwa ni gbodan ghee irẹn. Sokpan, irẹn gha gbogba ga emwa ni kue ne irẹn gha khaevbisẹ yan iran, irẹn ghi vbe rhie ẹtin kevbe ẹwaẹn ne iran. Rhunmwuda ne iran na “lẹgbinna” Osanobua, iran keghi sọyẹnmwẹ, te orhiọn iran wa vbe sẹ otọ.​—Psalm 2:​9-12.

“A gha rhie uyi mẹ vbe uwu avbe agbẹnvbo hia; a gha rhie uyi mẹ vbe uhunmwu otagbọn hia.” Vbe ẹghẹ nọ gberra, a keghi rhie uyi gie Jehova vbe ẹghẹ nọ na loo ẹtin ẹnrẹn nọkhua ya gbogba ga emwa rẹn. (Ẹksodọs 15:​1-3) Vbe odaro, a gha rhie uyi gie Jehova vbe odẹ nọ kakabọ hin usi, vbe ẹghẹ ne emwa hia vbe uhunmwu otagbọn na khian na gbe uhunmwu ke otọ ne ọdakha ọghe Jehova, iran ghi vbe gha rhie ugamwẹ ne irẹn ọkpa.​—Psalm 86:​9, 10; Aizaia 2:11.

Emwi Ughughan Ni Ginna Ebe Psalm 46:10

Ebe ọkpa keghi tie Psalm 46 “ihuan na ya rhie uyi gie Osanobua rhunmwuda ẹtin nọ mwẹ kevbe nọ na vbe gbogba ga emwa rẹn.” Emwa Osanobua ghaa so ihuan nọ rre ebe Psalm 46, te iran rhie ẹre ma wẹẹ, iran mu ẹtin yan e Jehova wẹẹ, ọ gha gbogba ga iran, kevbe wẹẹ, ọ gha ru iyobọ ne iran. (Psalm 46:​1, 2) Te avbe ẹmwẹ na ye iran ẹre rre wẹẹ, e Jehova gu iran rrọọ vbe ẹghẹ hia.​—Psalm 46:​7, 11.

Ne iran mieke na gha mwẹ amuẹtinyan nọ wegbe wẹẹ, e Jehova mwẹ ẹtin nọ khian ya gbogba ga iran, ebe Psalm na keghi rhie igiọdu ne iran, ne iran gha mu iwinna ọyunnuan ne Jehova he ru roro. (Psalm 46:8) Uhiẹn, ako na keghi ya iran bẹghe ẹre wẹẹ, Osanobua mwẹ ẹtin nọ khian ya ru ẹre ne okuo dobọ yi. (Psalm 46:9) Vbene ẹmwata, e Jehova gele ru ẹre ne okuo dobọ yi vbe ẹghẹ nẹdẹ, odẹ nọ ya ru ọna, ọre nọ na gbogba ga emwa rẹn vbe obọ avbe agbẹnvbo ni lẹga iran, ni ghaa gu iran khọn. Sokpan, e Baibol gi ima rẹn wẹẹ, vbe nẹi khian ghi kpẹẹ gbe, Osanobua gha vbe ru vberriọ vbe odẹ nọ sẹ ọna, vbe ẹghẹ nọ khian ya ru ẹre ne okuo dobọ yi vbe uhunmwu otagbọn hia.​—Aizaia 2:4.

E Jehova ye ru iyobọ ne eguọmwadia ẹre vbe ẹdẹnẹrẹ ra? Ẹẹn. Uhiẹn, ukọ ighẹ Pọl keghi rhie igiọdu ne Ivbi Otu e Kristi ne iran gha mwẹ ilẹkẹtin wẹẹ, e Jehova gha ru iyobọ ne iran. (Hibru 13:6) Ẹmwẹ nọ rre ebe Psalm 46 ya ima mwẹ ilẹkẹtin wẹẹ, Osanobua gele mwẹ ẹtin nọ khian ya gbogba ga ima. Ẹmwẹ nọ rre ako na ru iyobọ ne ima ya gha ghee Osanobua zẹvbe “ugue kevbe ẹtin ima.”​—Psalm 46:1.

Ghee vidio ne kuẹi na, ne u mieke na rẹn emwi ughughan ne ebe Psalm guan kaẹn.