IRUẸMWI 18

Vbene A Ya Rẹn Ivbiotu E Kristi Ọghe Ẹmwata Hẹ

Na Printi Ladian

Emwa ni wa bun, ẹre ọ tie egbe iran Ivbiotu e Kristi. Sokpan iyayi kevbe ilele ọghe iran lughaẹn ne egbe. Vbe ima khian ghi ya rẹn Ivbiotu e Kristi ọghe ẹmwata hẹ?

1. Vbe a ya Ovbiotu e Kristi kha?

Ivbiotu e Kristi ọre erhuanegbe Jesu Kristi. (Tie Iwinna 11:26.) De vbene iran ya rhie ẹre ma wẹẹ, erhuanegbe Jesu ẹre iran khin? Jesu khare wẹẹ: “Adeghẹ uwa ya emwi ne I maa uwa re gha ru emwi, erhuanegbe mwẹ wa gele khin.” (Jọn 8:31) Ọna rhie ma wẹẹ, te ọ khẹke ne Ivbiotu e Kristi ọghe ẹmwata gha lele imamwaemwi ọghe Jesu. Vbe na ghee Jesu, emwi nọ rre Baibol, ẹre iran maa emwa re.—Tie Luk 24:27.

2. De vbene Ivbiotu e Kristi ọghe ẹmwata ya rhie ahoẹmwọmwa ma hẹ?

Jesu tama erhuanegbe ẹre wẹẹ: “Wa gha hoẹmwẹ egbe zẹ vbene imẹ hoẹmwẹ uwa.” (Jọn 15:12) Vbe Jesu a ya rhie ẹre ma hẹ wẹẹ, irẹn hoẹmwẹ erhuanegbe ẹre? Ọ ghaa mwẹ ẹghẹ ne iran, ọ ghaa rhie igiọdu ne iran, ọ vbe gha ru iyobọ ne iran. Uhiẹn, ọ na vbe wu ne iran. (1 Jọn 3:16) Erriọ vbe ye, ahoẹmwọmwa ne Ivbiotu e Kristi ọghe ẹmwata mwẹ i re ọghe okpunu. Te iran rhie ẹre ma vbe ẹmwẹ ne iran ta kevbe uyinmwẹ ọghe iran.

3. De iwinna ne Ivbiotu e Kristi ọghe ẹmwata rhiegba yi?

Jesu keghi waa iwinna ne erhuanegbe ẹre. “Ọ keghi gie iran ladian ne iran ya kporhu Arriọba Osanobua.” (Luk 9:2) Ẹi re ehe ugamwẹ ọghe iran ọkpa, ẹre Ivbiotu e Kristi nẹdẹ na gha kporhu, iran vbe gha yo owa emwa kevbe ehe ne a na mobọ miẹn emwa. (Tie Iwinna 5:42; 17:17, NW.) Erriọ Ivbiotu e Kristi ọghe ẹmwata vbe ru ẹre vbe ẹdẹnẹrẹ. Ne iran na hoẹmwẹ ogieva iran, iran keghi ya izọghae loo ẹghẹ kevbe ẹrhiọn ya tama emwa vbekpa ẹmwẹ ifuẹko kevbe ayayẹro ni rre Baibol.—Mak 12:31.

GUALỌ OTỌ RE SAYỌ

Gia ziro yan alughaẹn nọ rre Ivbiotu e Kristi ọghe ẹmwata kevbe emwa nẹi lele imamwaemwi kevbe igiemwi ọghe Jesu.

4. Iran keghi hia ne iran rẹn ẹmwata ni rre uwu e Baibol

Ivbiotu e Kristi eva ni ghaa rrọọ vbe orre nokaro gha tie ebe na kiri, ne iran mieke na rẹn ẹmwata nọ rre Baibol. — Ivbiotu e Kristi nẹdẹ kegha ya aro nọ ghaan ghee Ẹmwẹ Osanobua

Ẹi re emwa hia ni wẹẹ iran re Ivbiotu e Kristi, ẹre ọ ya aro nọ ghaan ghee ẹmwata ni rre Baibol. Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: Vbene Emwa Ya Mu Ugamwẹ Ivbiotu E Kristi Rhia Hẹ (5:11)

De vbene esọsi eso he ya mu idobo ye emwa egbe hẹ, ne iran ghẹ rẹn imamwaemwi e Kristi?

Ẹmwata nọ rre Ẹmwẹ Osanobua, ẹre Jesu ghaa maa emwa re. Tie Jọn 18:37, iyeke ọni, uwa ghi ziro yan inọta na:

De vbene Jesu wẹẹ ima khian ya rẹn Ivbiotu e Kristi ni re “ọghe ẹmwata” hẹ?

5. Iran keghi ta ẹmwata ni rre Baibol ma emwa

Ivbiotu e Kristi ni ghaa rrọọ vbe orre nokaro gha kporhu ma emwa vbe owa iran. — Iran kegha kporhu ma emwa

Jesu ke kpa gha rrie ẹrinmwi, ọ keghi waa iwinna ne erhuanegbe ẹre; iwinna nii ẹre iran wa ye ru do fi ẹdẹnẹrẹ. Tie Matiu 28:19, 20, NW kevbe Iwinna 1:8, iyeke ọni, uwa ghi ziro yan avbe inọta na:

De vbene iwinna ikporhu khian da otọ sẹ hẹ? Vbọ khian vbe kpẹẹ sẹ hẹ?

6. Iran keghi rhie emwi ne iran maa emwa re ye uyinmwẹ

Vbọ ya okpia ọkpa na tie ẹre Tom yayi wẹẹ, irẹn gele miẹn odẹ ẹmwata nẹ? Kpee VIDIO na, iyeke ọni, uwa ghi ziro yan inọta ni lelẹe.

E VIDIO: Ẹmwẹ Ugamwẹ Na Ghi Khan Mwẹ (5:20)

Vbọ ya ẹmwẹ ugamwẹ khan e Tom vbe vidio na?
Vbọ yae yayi wẹẹ irẹn gele miẹn odẹ ẹmwata nẹ?

Uyinmwẹ ọmwa, ẹre a ya rẹn aro ọmwa nọ khin. Tie Matiu 7:21, iyeke ọni, uwa ghi ziro yan inọta na:

De nọ yẹẹ Jesu sẹ? Na gha ya unu tae kẹkan wẹẹ Ivbiotu e Kristi ẹre ima khin nọ ra, ra na gha rhie ẹre ma vbe uyinmwẹ ima?

7. Iran hoẹmwẹ egbe

Ẹgbẹe ọkpa ni re Ivbiotu e Kristi ni ghaa rrọọ vbe orre nokaro, mu evbare gie ẹgbẹe ọvbehe ni vbe re Ivbiotu e Kristi. — Iran vbe hoẹmwẹ egbe

Ivbiotu e Kristi mu egbe ne iran ya wu ne etẹn ne iran gba ga ra? Kpee VIDIO na, iyeke ọni, uwa ghi ziro yan inọta ni lelẹe.

E VIDIO: Ọ Keghi Mu Egbe Nọ Ya Wu (2:55)

Vbe vidio na, vbọ ya e Lloyd mu egbe nọ ya wu ba ẹmwẹ Ọtẹn Nokpia Johansson?
Uwẹ ma ghee ẹre wẹẹ, emwi nọ khẹke ne Ovbiotu e Kristi ọghe ẹmwata ru, ẹre ọ ru nii ra?

Tie Jọn 13:34, 35, iyeke ọni, uwa ghi ziro yan avbe inọta na:

De obọ nọ khẹke ne erhuanegbe Jesu (Ivbiotu e Kristi ọghe ẹmwata) ya gha mu emwa ni ke ẹvbo ọvbehe rre?
De obọ nọ khẹke ne iran ya mu emwa ni ke ẹvbo ọvbehe rre vbe ẹghẹ okuo?

EMWA ESO KEGHI KHA WẸẸ: “Ugamwẹ Ivbiotu e Kristi i khian sẹtin gha re ugamwẹ ẹmwata, rhunmwuda, uyinmwẹ atosi ne iran yin khọọ sẹ ọghe emwa ni ma rẹn Osanobua.”

De ako ọghe Baibol ne u gha sẹtin tie ma ọmwa, nọ gha ru iyobọ nẹẹn ya rẹn Ivbiotu e Kristi ọghe ẹmwata?

OLIKA ẸMWẸ

Ivbiotu e Kristi ọghe ẹmwata keghi ya ilele ni rre Baibol ru emwi, iran hoẹmwẹ egbe, iran vbe ta ẹmwata ni rre Baibol ma emwa.

Ogbewerriẹ

De emwi ne iyayi ọghe Ivbiotu e Kristi ọghe ẹmwata hẹnhẹn egbe yan?
De uyinmwẹ na ya rẹn Ivbiotu e Kristi ọghe ẹmwata?
De iwinna ne Ivbiotu e Kristi ọghe ẹmwata rhiegba yi?

Ẹdẹ na ruẹ iruẹmwi na fo:

Emwi Ne U Gha Ru

Deghẹ u gha sẹtin, mu otuẹ gha rrie abotu ọghe Avbe Osẹe Jehova nọ sikẹ ruẹ sẹ.

Emwi Ọvbehe Ne U Gha Ru:

Your other goal

RUẸ SAYỌ

Ruẹ sayọ vbekpa emwa eso ni hia ne iran gha ya egbe taa e Jesu Kristi kevbe ne iran gha ya imamwaemwi ọghẹe ru emwi.

Avbe Osẹe Jehova—De Aro Emwa Ne Ima Khin? (1:13)

Ghee vbene okhuo ọkpa nọ ka gha re ohẹn esọsi, ya do gha ga Osanobua hẹ vbe uwu ẹbu emwa ni gae vbe odẹ ọghe ẹmwata.

“Iran Keghi Ya E Baibol Rhie Ewanniẹn Ye Inọta Hia Ne I Ghaa Mwẹ!” (The Watchtower, April 1, 2014)

Ghee vbene Ivbiotu e Kristi ọghe ẹmwata ya rhie ahoẹmwọmwa ma etẹn ne iran gba ga, ni gualọ iyobọ.

Iyobọ Na Ru Ne Etẹn Ima Ne Oguomiẹrẹ Sunu Daa—Abọ Ne Kuẹi Vbọ (3:57)

Ghee vbene Ivbiotu e Kristi nẹdẹ kevbe Ivbiotu e Kristi ọghe ẹmwata ni rrọọ vbe ẹghẹ na nia, ya ru emwi ne Jesu wẹẹ a khian ya rẹn erhuanegbe irẹn.

“De Ama Na Ya Rẹn Ivbiotu E Kristi Ọghe Ẹmwata?” (The Watchtower, March 1, 2012)