IRUẸMWI 11

Oyaya

Rom 12:11

UHUNMWU ẸMWẸ: Gha ya oyaya guan, ne u mieke na gua ekhọe ọghe emwa ni danmwehọ ruẹ kpa.

Gi ọta ruẹ gha yẹẹ ruẹ. Vbe ẹghẹ ne u ya muegbe ọta ruẹ, gha muẹn roro vbene ọ ru ekpataki sẹ hẹ ighẹ uhunmwu ẹmwẹ ne u hoo ne u rhie ladian. Ọ khẹke ne u rẹn ototọ ẹmwẹ ne u khian ya guan sẹrriọ wẹẹ, u ghi sẹtin wa gha tae, a gha wẹẹ te u ma ghee ebe.
Gha mu ẹmwẹ iran ni khian danmwehọ ruẹ roro. Ọ khẹke ne u vbe gha roro ẹre vbene ẹmwẹ ne u khian tie ra ẹmwẹ ne u khian ya guan, khian ya ru iyobọ ne emwa ọvbehe hẹ. Ẹghẹ nii, u ghi do roro ẹre vbene u khian ya ta ẹmwẹ nii hẹ, ne emwa ni khian danmwehọ ruẹ mieke na gbọyẹmwẹ yọ.
Gi ọta ruẹ gha mwẹ oyọnyọn. Ya oyaya guan. Gha ya obọ gbekhakha vbe odẹ ọghe abiọmwabiẹ. Ọ khẹke na bẹghe ẹre vbe ugbaro ruẹ, vbene ọ ye hẹ vbe ekhọe ruẹ ighẹ ẹmwẹ ne u ya guan.

Ọ ma khẹke nọ wa gha mwẹ odẹ ọkpa ne u ya gbe ekhakha. Ọ ghaa yerriọ, emwa i ghi rhie ekhọe daa ẹmwẹ ne u ta. Gie vbene u ya gbe ekhakha gua ẹmwẹ ne u ta ro. Ẹghẹ nọ mobọ khẹke ne u ya gha ya oyaya guan, ọre vbe u ghaa niania uhunmwu ẹmwẹ ne u hoo ne u rhie ladian, kevbe vbe u ghaa hoo ne u gua emwa kpa, ne iran ya ẹmwẹ ne u ta ru emwi. Ọna ma wa rhiema wẹẹ, ne u wa kakabọ gha ya oyaya guan, ke omuhẹn ọghe ọta ruẹ ya sẹ ufomwẹ. Ọ ghaa yerriọ, egbe sẹtin wọọ emwa ni danmwehọ ruẹ.