Emwi Eso Ni Rre Ebe Na Tie Ẹre Sọyẹnmwẹ Arrọọ Vbe Etẹbitẹ! Ni Gha Sẹtin Ru Iyobọ Ne Ima

Avbe vidio kevbe inọta ni rre ebe na tie ẹre Sọyẹnmwẹ Arrọọ Vbe Etẹbitẹ! yẹẹ ruẹ na loo ra? Avbe abọ na tie ẹre “Emwa Eso Keghi Kha Wẹẹ,” “Emwi Ne U Gha Ru,” kevbe “Ruẹ Sayọ” vbe yẹẹ ruẹ na loo ra? De emwi ọvbehe ni rre ebe na, ni gha ru iyobọ nuẹn vbe u ghaa gu ọmwa ruẹ e Baibol?​—Mat 28:19, 20.

Ayahọmwaehọ Ni Rre Intanẹt: Deghẹ ebe na print nọ rrọọ, ẹre u hoo ne u ya gu ọmwa ruẹ e Baibol, de vbene u khian ya miẹn avbe vidio kevbe ayahọmwaehọ nikẹre ni rre intanẹt vbe ihe ọkpa hẹ? U gha mu ebe na ladian vbe efoni ruẹ, u ghi zẹ ọkpa vbe abọ enẹ ni rrọọ. Iyeke ọni, u ghi gha rrie ototọ eke na gbẹnnẹ uhunmwuta hia ni rre abọ nii yi. U gha miẹn avbe vidio kevbe ayahọmwaehọ hia ni rre abọ ne u ye nii. (Ghee efoto 1.)

Abọ na tie ẹre “Printed Edition”: U ghaa loo ebe na vbe JW Library, ya gu ọmwa ruẹ e Baibol, u sẹtin gha fi ẹre werriẹ khian e “Printed Edition” zẹvbe ne uwa ya ruẹ emwi, ne u mieke na sẹtin gha bẹghe ẹre, zẹvbe nọ wa ye, vbe ebe na print nọ rrọọ. U gha khian ru ọna, u ghi ya obọ kaẹn dọt eha ni rre odukhunmwu vbe oberhọmwa, iyeke ọni, u ghi ya obọ kaẹn “Printed Edition.” Ọna gha ru iyobọ nuẹn ya gha muẹn roro, vbene emwi ne uwa ziro yan ya dekaẹn uhunmwuta ọghe iruẹmwi nii hẹ. Deghẹ u hoo ne u fi ẹre werriẹ khian vbene ọ ka gha ye, u ghi werriegbe ya obọ kaẹn dọt eha nii, iyeke ọni, u ghi ya obọ kaẹn “Digital Edition.”

“I Mu Egbe Ra?”: Emwi na gbẹnnẹ ye ẹkpẹti eva ni rre ufomwẹ ebe na, guan kaẹn emwi ne ọmwa gha ru nọ mieke na sẹtin gha kporhu, kevbe nọ mieke na sẹtin dinmwiamẹ. (Ghee efoto 2.)

Ẹndnot: Avbe Ẹndnot keghi rhan otọ olika ẹmwẹ eso ni ru ekpataki. Deghẹ u na gha mwẹ ebe na vbe efoni ra ekọmputa ruẹ, u gha miẹn e link nọ gha rhie ruẹ werriegbe gha rrie iruẹmwi ne uwa na dobọ yi. (Ghee efoto 2.)