RHIE OBỌ LELẸE
IRUẸMWI 7
Ghẹ Gi Egbe Wọọ Ruẹ
Ilele: “Iran na gha ma emwa emwi . . . , iran na vbe gha kporhu iyẹn nọ maan . . . vbene egbe ma na wọọ iran.”—Iwinna 5:42.
Emwi Ne Pọl Ru
1. Ghee VIDIO na, ra u ghi tie Iwinna 19:8-10. Iyeke ọni, u ghi mu avbe inọta na roro:
Vbe ẹghẹ ne emwa eso na gha gbe Pọl odan, de vbene ọ ya rhie ẹre ma hẹ wẹẹ, irẹn ma gi egbe emwa ni hoo ne iran rẹn ẹmwata wọọ irẹn?
Inugba ẹre Pọl werriegbe bu iran ni hoo ne iran rẹn ẹmwata? Inu ẹghẹ ẹre ọ ru ẹre la?
Vbe Ima Miẹn Ruẹ Vbe Obọ E Pọl?
2. Te ima gha loo ẹrhiọn kevbe ẹghẹ, ne ima mieke na sẹtin werriegbe mu otuẹ gie emwa ne ima ka kporhu ma, ne ima vbe sẹtin suẹn gha gu iran ruẹ e Baibol.
Ya Egbe Taa E Pọl
3. Mu otuẹ gie ọmwa vbe ẹghẹ ne u rẹnrẹn wẹẹ, ọ gha ya miẹn obọ. Nọ egbuẹ wẹẹ: ‘De ẹghẹ nọ ya miẹn obọ? De ehe ne I gha na miẹn ọnrẹn ne ima miehe na sẹtin guan?’ Hia ne u mu otuẹ gie ẹre vbe ẹghẹ ne u rẹnrẹn wẹe uwa gha ya sẹtin guan, ọ gha khọnrẹn wẹẹ, ẹ i te re ẹghẹ nọ te rrọ ruẹ orhiọn.
4. Nọ rẹn ẹghẹ nọ hoo ne u ya werriegbe miẹn ọnrẹn. Ẹghẹ ke ẹghẹ ne uwẹ vbe ọmwa ya guan fo, u ghi nọ rẹn ẹghẹ nọ hoo ne u ya werriegbe rre. Hia ne u gha khian vbe ẹghẹ ne uwa gba kue yi.
5. Gha mwẹ ilẹkẹtin wẹẹ ọmwa nii hoo nọ danmwehọ. Adeghẹ u i kẹ miẹn ọmwa ne u kporhu ma vbe owa, ra ẹ i mobọ miẹn obọ, ghẹ wa rherhe kha wẹẹ, ọmwa vberriọ ma hoo nọ danmwehọ. (1 Kọr 13:4, 7) Ye gha mu otuẹ gie ẹre, sokpan, u ghi hia ne u gha loo ẹghẹ ruẹ ẹse.—1 Kọr 9:26.