Vbe Adam vbe Ivi ghi kpa hin ogba ọghe Idẹni rre nẹ, iran na do biẹlẹ emọ nibun. Ovbi iran ne ọdiọn ighẹ e Keni na gha re ọgbugbo vbene ovbi iran nukpogieva ighẹ Ebẹl na gha re ọsuohuan.

Ẹdẹ ọkpa ghi rre, e Keni vbe Ebẹl na do ru izọese gie Jehova. Uwẹ rẹn emwi nọ re izọese ra? Ọ keghi re ẹse ne kpataki. E Jehova keghi miẹn izọese ọghe Ebẹl yi, sokpan ọ ma miẹn ọghe Keni yi. Ohu na do gha mu e Keni. E Jehova keghi ya obọ sekhae nẹ wẹẹ ohu dan nọ muẹn gha yae ru emwi nọ wegbe. Sokpan e Keni ma họn.

Nọghayayerriọ, e Keni na tama Ebẹl wẹẹ: ‘Do lele mwẹ gha rrie ugbo.’ Vbe iran eveva ghi sẹ ugbo, e Keni na gbe ovbi iyẹe rua. Vbe uwẹ a yayi wẹẹ e Jehova khian ru e Keni hẹ? E Jehova keghi rri e Keni oya, ọ na khu ẹre gha rrie ẹvbo nọ rree. E Keni i khian ghi sẹtin werriegbe bu ẹgbẹe ọre gha dee.

De emwi ne ima miẹn ruẹ vbe ọna? Ohu sẹtin gha mu ima deghẹ emwi eso ma na sunu vbene ima te roro ẹre yi. Adeghẹ ima na bẹghe ẹre wẹẹ ohu mu ima—ra emwa ọvbehe na gi ima rẹn wẹẹ ọmwa ne ohu mu ẹre ima khin—ọ khẹke ne ima rherhe winna yan rẹn na ghẹ do miẹn wẹẹ ọviẹn ọghe ohu ẹre ima ghi khin.

Rhunmwuda ne Ebẹl na hoẹmwẹ e Jehova kevbe ne ọ na gha ru emwi esi, e Jehova i khian mianmiaẹn. Osanobua gha huẹn ọnrẹn kpaegbe vbe ẹghẹ ne ọ khian ya ye uhunmwu otagbọn na khian e paradais.

Vbene ẹghẹ ya khian, emwa na do gha bun vbe uhunmwu otagbọn. Emwa dan ẹre ọ bun sẹ. Uhiẹn, odibosa eso na vbe do gha ru emwi dan. Iran na kpa vbe ẹrinmwi gha die agbọn; iran keghi mu akpa ọghe emwa nagbọn yọ. U rẹn emwi nọ si ẹre ne iran na gha dee ra? Te iran do gha munọ ikhuo ni rre otagbọn na, ne aro iran viẹn yi.

Ikhuo ne avbe odibosa nii rhie re na do biẹlẹ. Emọ ne iran biẹlẹ na do gha re arhuan. Iran na gha rhie ikuaengbe ne emwa. E Jehova ma hoo ne egbe emwi vberriọ gha sunu. Ẹre ọ si ẹre ne ọ na wẹẹ irẹn gha ya okuo amẹ guọghọ emwa dan nii rua.

Sokpan ọ ghaa mwẹ okpia ọkpa nọ ghaa ru emwi esi. Okpia na keghi hoẹmwẹ e Jehova. Eni okpia na ọre Noa. Okhuo ọkpa ẹre ọ ghaa mwẹ, okhuo nii na biẹlẹ emọ eha nẹ, eni ivbi ẹre ọre, Siẹm, Ham, kevbe Jafẹt. Ivbi ẹre eha na, na vbe gha mwẹ ikhuo ọkpa ọkpa. E Jehova keghi tama e Noa nọ bọ okọ nọkhua, ne irẹn vbe ẹgbẹe ọre mieke na miẹn fan vbe Okuo Amẹ nii. Okọ nii keghi yevbe ẹkpẹti nọ gha sẹtin khian vbe uhunmwu amẹ. E Jehova na vbe wẹẹ ne Noa viọ avbe aranmwẹ la uwu okọ nii, ne iran mieke na vbe miẹn fan.

E Noa na wa suẹn okọ nii na bọ vbobọvbobọ. Odẹ ukpo 50 ẹre Noa vbe ẹgbẹe ọre ya bọ okọ nii. Vbene Jehova wẹẹ ne iran ya bọ okọ nii, erriọ ẹre iran wa ya bọ ọre zẹẹ. E Noa na vbe gha ya obọ sekhae ne emwa vbe ẹghẹ nii wẹẹ Okuo Amẹ dee. Sokpan iran ma rhie.

Vbe okiekie, e Noa vbe ẹgbẹe ọre na do la uwu okọ. Gia ghee emwi nọ ghi sunu.