Ọ mwẹ ẹvbo ọkpa na ghaa tie ẹre Ọọ (Ur). Ẹvbo na keghi sikẹ e Babẹl kevbe wẹẹ emwa ni rre ẹvbo na i ga e Jehova. Sokpan ọ ghaa mwẹ okpia ọkpa vbe Ọọ nọ ghaa ga e Jehova. Eni okpia na ọre Ebraham.

E Jehova keghi tama Ebraham wẹẹ: ‘Kpa vbe ẹvbo ne u ye, ne u sẹ emwa ruẹ rae gha rrie ẹvbo ne I gha ma ruẹ re.’ Vbe iyeke ọni, Osanobua keghi yan rẹn wẹẹ: ‘U gha khian agbẹnvbo nọkhua, I gha fiangbe emwa nibun vbe uhunmwu otagbọn hia rhunmwuda ruẹ.’

Agharhemiẹn wẹẹ Ebraham ma rẹn eke ne Jehova wẹẹ ne ọ gha rrie, ọ na ye mu ẹtin yan e Jehova. Rhunmwuda ọni, Ebraham vbe ọvbokhan rẹn ighẹ e Sera, erha Ebraham ighẹ e Tẹra, kevbe ovbi ọtiọnrẹn ighẹ e Lọt keghi kun ihẹ kpa gha rrie ẹvbo ne Osanobua wẹẹ ne iran gha rrie.

Ukpo 75 ẹre Ebraham ghaa ye vbe irẹn vbe ẹgbẹe ọre sẹ ẹvbo ne Jehova wẹẹ ne iran gha rrie. Eni ẹvbo nii ọre Kena. Osanobua keghi ru eyan na ma Ebraham vbe evba wẹẹ: ‘I gha mu otọ na hia ne u bẹghe na, ne ivbuẹ.’ Na kha na, Ebraham vbe ọvbokhan rẹn ighẹ e Sera khian ọmaẹn nẹ vbene iran ma na he biẹ. De vbene eyan ọghe Jehova khian ghi ya mwẹ amusẹ hẹ?

Ẹi ghi re eban Ebraham vbe Sera ghi ya rọnmwẹ egbe. Iran na kpa vbe ẹvbo nọ te fu iran egbe rre. Iran na gha rre ibọkpọ vbe ẹvbo ọvbehe. Ne Sera gha te ya gha vian, ọ keghi mu ẹtin yan e Jehova.

Ugbẹnvbe Sera zẹ gualọ ọmọ, ọ ma miẹn, ọ na ghi tama Ebraham wẹẹ: ‘E Hega ne ọguọmwadia mwẹ gha biẹ, ovbimwẹ vbe nọ.’ Vbe ọ ghi zẹ kpẹẹ, e Hega na do biẹ. Eni ovbi ẹre ọre Ismẹl.

Vbe Ebraham ghi rre ukpo 99 kevbe vbe Sera rre ukpo 89, orhunmwu eha na do tuẹ iran. Ebraham na wẹẹ ne iran do tota ye ototọ erhan rri evbare. U rẹn emwa ni do tuẹ iran ra? Avbe odibosa ẹre iran ghaa khin! Iran keghi tama Ebraham wẹẹ: ‘Vbenia vbe ukpo nọ dee, ọvbokhan ruẹ gha biẹ ọmọ okpia.’ E Sera na gha danmwehọ iran vbe uwu ibọkpọ nọ ghaa ye. Ọ na fẹko giẹ kua, ẹre ọ na kha wẹẹ: ‘Mẹ gha sẹtin ya egbe ọmaẹn biẹ ra?’

Vbe ukpo nọ lelẹe, e Sera na gele biẹ ọmọ okpia vbene odibosa tae yotọ. Ebraham na gha tie ọmọ nii Aizik. Emwi ne a ya eni nii kha ọre “Ogiẹ.”

Vbe Aizik ghi rre odẹ ukpo isẹn, e Sera na do bẹghe ẹre wẹẹ Ismẹl ya ovbi irẹn gbogiẹ. Ne Sera mieke na gbogba ga ovbi ẹre, ọ na tama Ebraham nọ khu e Hega kevbe ovbi ẹre Ismẹl fua vbe owa. Ebraham ma te ka kue yọ. Sokpan e Jehova na tama Ebraham wẹẹ: ‘Danmwehọ e Sera. I gha gu ruẹ gbaroghe Ismẹl. Sokpan egbe Aizik ẹre eyan mwẹ khian na mwẹ amusẹ.’