Ọ ghaa mwẹ okpia ọkpa nọ ghaa ga e Jehova vbe otọ ọghe Uz. Eni ẹnrẹn ọre Job. Okpia na wa kakabọ fe, ọ vbe mwẹ emọ nibun. Ọ wa gha zẹ emwi obọ ne ivbiogue, ikhuo ni dẹgbẹ kevbe emọ nẹi mwẹ erha mwẹ iye. Ne a na miẹn wẹẹ ọmwa esi ẹre Job khin, te ọni ghi rhiema wẹẹ, ẹi khian ghi miẹn ọlọghọmwa ra?

E Job ma rẹn wẹẹ e Setan ghee irẹn. E Jehova keghi khama e Setan wẹẹ: ‘U ma bẹghe ọguọmwadia mwẹ ighẹ e Job? Orhunmwu ọkpa i rrọọ nọ yevbe ọre vbe uhunmwu otagbọn. Ọ họn ẹmwẹ mẹ, ọ vbe ru emwi esi.’ Sokpan e Setan keghi wanniẹn Osanobua wẹẹ: ‘Ẹmwata nọ wẹẹ e Job họn ẹmwẹ nuẹ. Sokpan rhunmwuda ne u na fiangbe ẹre, ne u na gbaroghe ẹre, ne u na viọ otọ nibun kevbe aranmwẹ nibun nẹ, ẹre ọ si ẹre ne ọ na ga ruẹ. U gha miẹn ẹre emwi nọ mwẹ, u gha miẹn wẹẹ ẹi khian ghi ga ruẹ.’ Ẹre Jehova na ghi tama e Setan wẹẹ: ‘U sẹtin danmwẹ e Job ghee, sokpan ghẹ gbe ẹre rua.’ Vbọsiẹ ne Jehova na kue ne Setan danmwẹ e Job ghee? E Jehova rẹnrẹn wẹẹ e Job i khian de ye edanmwẹ nii.

E Setan na ya ọlọghọmwa ughughan danmwẹ e Job. Okaro, ọ na gie Ivbi e Sabia ne iran ya do ẹmila kevbe ekẹtẹkẹtẹ ọghe Job viọ. Vbe iyeke ọni, erhẹn na giẹn ohuan hia ne Job mwẹ. Ivbi e Kialdia na vbe do e kamẹl ọghẹe hia viọ. Na kha na, iran na gbele eguọmwadia e Job hia ni ghaa gbaroghe emwi irri ọghẹe. Nọ ghi wa khọọ sẹ, ọre ne owa na wa de yan ivbi e Job hia vbe iran koko rri evbare. Iran hia na wulo. Ena hia wa balọ e Job sẹ ugboloko sokpan ọ ma sẹ e Jehova rae.

E Setan na wẹẹ e Job ma he rrioya sẹ, ẹre ọ na mu emianmwẹ kun ẹnrẹn. Ẹtẹ na do gba e Job egbe hia. Obalọ ne Job ghaa ye i re nekherhe. E Job ma rẹn eke ne ọlọghọmwa na hia ke rre. Sokpan ọ na ye gha ga e Jehova. Ọna wa ya ẹko rhiẹnrhiẹn Osanobua.

Vbe iyeke ọni, e Setan keghi gie ikpia eha bu e Job, ne iran ya danmwẹ ọnrẹn ghee. Iran keghi tama e Job wẹẹ: ‘Rhunmwuda orukhọ ne u ru lẹre, ẹre ọ si ẹre ne Osanobua na rri ruẹ oya.’ E Job keghi wanniẹn iran wẹẹ ‘I ma ru orukhọ rhọkpa.’ Ẹre Job na suẹn gha roro ẹre wẹẹ, e Jehova ẹre ọ si avbe ọlọghọmwa na kevbe wẹẹ Osanobua ma ya obọ esi mu irẹn.

Igbama okpia ọkpa na tie ẹre Elihu na fẹko gha danmwehọ emwi ne iran ta. Ẹre ọ na ghi khama iran wẹẹ: ‘Ẹmwẹ ne uwa hia ta sin ma gba. E Jehova ẹre ọ sẹ ima hia. Ẹi khian sẹtin ru emwi nọ ma gba. Ọ bẹghe emwi hia ni sunu, ọ vbe ru iyobọ ne emwa, vbe iran ghaa rre uwu ọlọghọmwa.’

Vbe iyeke ọni, e Jehova keghi tama e Job wẹẹ: ‘De eke ne uwẹ ghaa ye vbe I yi agbọn kevbe ẹrinmwi? Vbọsiẹ ne u na kha wẹẹ emwi ne I ru ma gba? U gha guan vbene u ma na rẹn vbene emwi ya sunu hẹ.’ E Job keghi miẹn kue wẹẹ ẹmwẹ ne irẹn ta ma khẹke. Ọ na khama Osanobua wẹẹ: ‘Ọ ma te khẹke ne I ta emwi ne I tae. I te ka họn vbekpa ruẹ nẹ, sokpan eban ẹre imẹ ghi rẹn ruẹ. Ai miẹn emwi ne uwẹ i sẹtin ru. Lahọ yabọ mwẹ.’

E Setan ghi danmwẹ e Job fo nẹ, e Jehova keghi mu e Job egbe rran. Emwi ne Osanobua ghi viọ ne Job vbe okiekie, ẹre ọ bun sẹ emwi ne Job te ka gha mwẹ. E Job keghi tọ ẹse wu ẹse. E Jehova keghi fiangbe Job rhunmwuda e Job họn ẹmwẹ ne irẹn agharhemiẹn wẹẹ emwi ghaa lọghọ. Adeghẹ ọ rhiẹnrhiẹn ra deghẹ ọ rriara, uwẹ gha ye gha ga e Jehova vbene Job ru ẹre ra?

Ivbi Izrẹl ẹre a ghi gha tie Ivbi e Jekọb vbe otọ Igipt. E Fero ọvbehe ẹre ọ ghi gha kha yan otọ Igipt vbe Jekọb vbe Josẹf ghi wu nẹ. E Fero ọghe ọgbọn na, na gha mu ohan wẹẹ Ivbi Izrẹl gha do bun sẹ Ivbi Igipt. Ẹre ọ na ghi ya Ivbi Izrẹl khian eviẹn. Ọ na wẹẹ ne iran gha manọ e biriki ra e blọk kevbe ọ na vbe gha loo iran ya winna vbe ugbo. Sokpan vbene Ivbi Igipt ya gha loo Ivbi Izrẹl, erriọ Ivbi Izrẹl ya gha bun sayọ. Ọna keghi wa ya ohu mu e Fero. Ọ na gie wẹẹ, ne a wa gbele emọ ikpia ne Ivbi Izrẹl rhirhi biẹ. Uwẹ ma yayi wẹẹ, ọna ya ohan mu Ivbi Izrẹl ra?

Ovbi Izrẹl ne okhuo ọkpa na tie ẹre Jokebẹd keghi biẹ ọmọ okpia ne mose mose. Rhunmwuda ọ ma hoo ne iran gbe irẹn ọmọ rua, ọ keghi mu nene ọmọ ye uwu okhuae. Ọ na mu okhuae nii lẹre ye uwu irunmwu nọ rre ọkpẹn Ẹzẹ e Nail. Ọtiẹn ọmọ na nokhuo na tie ẹre Miriam, keghi mudia ye ọkpẹn evba nọ mieke na rẹn emwi nọ khian ghi sunu.

Ovbi e Fero nokhuo ghi do khuẹ vbe ẹzẹ, ọ na bẹghe nene okhuae. Ọ ghi ghee uwu ẹre, ọ keghi bẹghe ọmọmọ ọkpa vbe ọ viẹ. Ohan nene ọmọ keghi to ẹre. E Miriam na do nọ rẹn wẹẹ: ‘Ne I ya gualọ okhuo nọ gha gu ruẹ koko ọmọ na ra?’ Ugbẹnvbe ovbi Ọba ghi kueyọ, e Miriam na ya tie iyẹe ighẹ e Jokebẹd rre. Ovbi e Fero keghi tama e Jokebẹd wẹẹ: ‘Mu ọmọ na, ne u ya koko ẹre mẹ, I gha ha ruẹ osa.’

Nene ọmọ ghi waan sẹ nẹ, e Jokebẹd keghi muẹn gie ovbi e Fero. Ovbi e Fero ẹre ọ ghi tobọre koko ọmọ na, ọ na gha tie ẹre Mosis. Zẹvbe okoro, ai miẹn emwi ne Mosis gualọ ne ẹi khian sẹ ọre obọ. Sokpan e Mosis ma mianmian e Jehova. ọ rẹnrẹn wẹẹ Ovbi Izrẹl ẹre irẹn gele khin, ighẹ irẹn i re Ovbi Igipt. Ọ na wẹẹ e Jehova ẹre irẹn khian ga.

Vbe Mosis ghi rre ukpo 40, ọ kegha hoo nọ ru iyobọ ne emwa rẹn. Vbe ọ ghi miẹn Ovbi Igipt ọkpa gbe Ovbi Izrẹl, e Mosis keghi gbe Ovbi Igipt nii rua. Ọ na mu ikun ẹnrẹn lẹre ye uwu izekhae. E Fero ghi họn emwi nọ sunu, ọ keghi hia nọ gbe Mosis rua sokpan e Mosis na lẹẹ gha rrie otọ e Midian. E Jehova kegha gbaroghe Mosis vbe evba.