Osanobua keghi gie Mosis vbe Erọn ne iran ya tama e Fero wẹẹ: ‘Adeghẹ u ma kue ne emwa mwẹ kpa, I gha ruẹ ne ikian ne awa gba otọ ruẹ hia.’ Ikian ne awa keghi gba owa Ivbi Igipt hia ke ọghe ovbiogue kevbe ọghe ọdafẹn. Ọ na gba ehe hia vbe otọ Igipt. Sokpan ọ ma sẹ eke ne Ivbi Izrẹl ghaa ye vbe Gosiẹn. Ke orueghe nogienẹ kpa, Ivbi Igipt ọkpa ẹre avbe orueghe na ghi gha dekun. E Fero na ghi rinmwian e Mosis vbe Erọn wẹẹ: ‘Lahọ uwa gu mwẹ rinmwian e Jehova nọ ruẹ ne avbe ikian na kpa. I gha kue ne emwa ruẹ kpa.’ Sokpan e Jehova ghi ru ẹre ne avbe ikian nii kpa, e Fero ma ghi gi Ivbi Izrẹl kpa. De ẹghẹ ne Fero khian ya gha mwẹ ẹwaẹn?

E Jehova keghi kha wẹẹ: ‘Deghẹ e Fero ma kue ne emwa mwẹ kpa, aranmwẹ ọghe Ivbi Igipt gha suẹn gha khuọnmwi, iran ghi vbe wulo.’ Ẹdẹ ghi gbe, aranmwẹ ọghe iran keghi suẹn gha wulo. Sokpan nọ wu vbe aranmwẹ ọghe Ivbi Izrẹl ma gha rrọọ. Vbọrhirhighayehẹ, e Fero ma ye họn ẹmwẹ ne Osanobua.

Ẹre Jehova na ghi tama e Mosis nọ werriegbe bu e Fero. E Jehova keghi tama rẹn nọ sirra e Fero bọnmwẹ emuẹn ghee odukhunmwu. Emuẹn nii keghi khian ebubẹ. Nene ebubẹ keghi hoho gba ehe hia. Ugbẹnvbe ebubẹ nii ghi hoho sẹ eke ne Ivbi Igipt kevbe aranmwẹ ọghe iran ye, emwi keghi munọ iran egbe. Ọrheyerriọ, e Fero ma gi Ivbi Izrẹl kpa.

E Jehova keghi werriegbe gie Mosis bu e Fero, nọ ya tama rẹn wẹẹ: ‘U ma ye kue ne emwa mwẹ kpa. Ẹdẹ nakhuẹ, I gha ruẹ ne esia rhọọ yan otọ ọghe uwa.’ Ẹdẹ ghi gbe, e Jehova keghi tue esia kevbe erhẹn yan otọ nii hia. Egbe emwi vbenia ma he ka sunu vbe otọ Igipt ẹdẹ. Avannukhunmwu keghi munọ erhan hia gbotọ, ọ keghi rria emwi okọ ọghe Ivbi Igipt rua. Sokpan emwi rhọkpa ma sunu daa Ivbi Izrẹl vbe Gosiẹn. Ẹre Fero na ghi kha wẹẹ: ‘Lahọ rinmwian e Jehova nọ ruẹ ne ena hia dobọ yi! Ọ gha dobọ yi nẹ, uwa sẹtin kpa.’ Sokpan avannukhunmwu nii kevbe amẹ nọ rhọọ ghi dobọ yi nẹ, e Fero keghi fi ekhọe werriẹ.

Vbe iyeke ọni, e Mosis keghi kha wẹẹ: ‘Nia te irhiso khian rri emwi okọ ọghe uwa ni ghi dekẹ.’ Oghẹn ọghe irhiso keghi rri emwi okọ ọghe iran, ne avannukhunmwu ma mu rria. E Fero na ghi kha wẹẹ: ‘Lahọ rinmwian e Jehova nọ ruẹ ne avbe irhiso na kpa.’ Sokpan vbe Jehova ghi ruẹ nẹ, e Fero ma ye họn ẹmwẹ.

Ẹre Jehova na ghi khama e Mosis wẹẹ: ‘Niẹn obọ ruẹ daa iso.’ Vbe ọwarọkpa nii, ehe hia na so ebiebi kankankan. Vbe ọwara ikpẹdẹ eha, Ivbi Igipt ma sẹtin bẹghe emwi rhọkpa. Sokpan ebiebi na ma sẹ eke ne Ivbi Izrẹl ghaa ye.

E Fero keghi tama e Mosis wẹẹ: ‘Uwẹ kevbe Ivbi Izrẹl sẹtin gha khian. Sokpan uwa sẹ aranmwẹ ọghe uwa rae.’ Ẹre Mosis na wanniẹn e Fero wẹẹ: ‘Te ima gha viọ aranmwẹ ọghe ima lele egbe rhunmwuda ẹre ima khian ya zọ ese gie Osanobua.’ E Fero ghi họn ẹmwẹ na, ohu keghi muẹn. Ọ na tama e Mosis wẹẹ: ‘Ladian vbe odaro mwẹ rre! I gha ghi dọlegbe miẹn ruẹ mwa, I ghi gbuẹ rua.’

E Mosis keghi tama e Fero wẹẹ irẹn i khian ghi werriegbe rre. Sokpan e Mosis ke kpa, ọ na tama e Fero wẹẹ: ‘Emọ ikpia hia ni ghi re ọmọ ọdiọn nẹ vbe otọ Igipt gha wulo, ke ovbi e Fero ne ọdiọn ya sẹ egbe ivbi eviẹn ni rre Igipt.’

E Jehova keghi tama Ivbi Izrẹl wẹẹ ne iran le evbare ne kpataki. Ọ na tama iran wẹẹ: ‘Uwa gbe oteghe ohuan ọkpa ra ovbi ẹwe ọkpa, ne uwa ya esagiẹn ọghẹe wuo onurho owa ọghe uwa. Uwa ghi tọn rẹn ya rri eka na ma gua. Uwa rhọ emwi uwa yotọ rhunmwuda asọn na ẹre I khian miẹn uwa fan.’ Uwẹ yayi wẹẹ Ivbi Izrẹl gha sọyẹnmwẹ rhunmwuda iyẹn ne iran họn na ra?

Vbe ọ ghi rre ogiasọn, e Jehova keghi gie odibo ọkpa gha rrie otọ Igipt. Emọ ọdiọn ni rre owa na ma na ya esagiẹn wuo onurho keghi wulo. Sokpan odibosa ma ya obọ kaan ọmọ rhọkpa nọ rre owa ne a na ya esagiẹn wuo onurho. Emọ ọdiọn ọghe Ivbi Igipt hia keghi wulo, ke ovbi ọdafẹn ya sẹ egbe ovbiogue. Ọkpa nọ wu vbe Ivbi Izrẹl ma gha rrọọ.

Uhiẹn, ovbi e Fero ne ọdiọn na wa vbe lae. E Fero ma ghi sẹtin zin ọna. Ẹre ọ na ghi tama e Mosis vbobọvbobọ: ‘Uwa do kpa hin ẹvbo na rre, ne uwa ya ga Osa ọghe uwa. Uwa viọ avbe aranmwẹ lele egbe ne uwa gha khian!’

Vbe ogiasọn nii, Ivbi Izrẹl keghi ladian vbe otọ Igipt vbene iran na mwamwa egbe zẹvbe nọ gua dọmwadẹ ẹgbẹe ro. Ivbi Izrẹl hia ni kpa vbe otọ Igipt vbe ẹdẹrriọ kegha re ikpia 600,000 kevbe ibiẹka kevbe ikhuo nibun. Emwa eso ne ẹi re Ivbi Izrẹl keghi vbe lele iran kpa, ne iran mieke na deba iran ga e Jehova. Ivbi Izrẹl keghi ghọghua!

Iran kegha do Ugie Alagberra vbe ukpo ukpo, ne iran mieke na ya yee ẹre rre ẹdẹ ne Jehova miẹn iran fan.