E Jehova keghi tama e Mosis wẹẹ: ‘Gha die uhunmwu oke. I gha gbẹnnẹ avbe uhi mwẹ ye uhanhan okuta nuẹ.’ E Mosis keghi ya gbe ikpẹdẹ 40 kevbe asọn 40 vbe evba. E Jehova keghi gbẹnnẹ Uhi Igbe ye uhanhan okuta, ẹre ọ na mu ne Mosis.

Ivbi Izrẹl ghi zẹ khẹ e Mosis, ọ ma rre, iran na gha roro ẹre wẹẹ ọ kpa sẹ iran rae nẹ. Ẹre iran na ghi tama Erọn wẹẹ: ‘Ma gualọ ọmwa nọ khian gha su ima. Do ma osa ne ima!’ Erọn keghi kha wẹẹ: ‘Uwa viọ igoru ọghe uwa mẹ.’ Ọ keghi ya avbe igoru nii ru ẹmila igoru. Ivbi Izrẹl keghi kha wẹẹ: ‘Ẹmila igoru na ọre Osa ọghe ima, nọ miẹn ima fan vbe Igipt!’ Iran keghi suẹn gha ga ẹmila igoru nii, iran na vbe do ugie nẹ. Emwi ne Ivbi Izrẹl ru na maan ra? Ẹn o, iran ka yan rẹn nẹ wẹẹ e Jehova ọkpa ẹre iran khian ga. Emwi ne iran ru na rhiema wẹẹ iran ma ghi mu eyan nii sẹ.

Vbe Jehova ghi bẹghe emwi ne iran ru, ọ na tama e Mosis wẹẹ: ‘Do tuorre bu emwa ruẹ. Iran ma ghi họn ẹmwẹ mẹ, iran gha ga ẹbọ.’ E Mosis keghi tuorre vbe uhunmwu oke bu iran, vbene ọ na da uhanhan okuta eva yi mwẹ obọ.

Vbe Mosis ghi sikẹ agọ ọghe iran, ọ na gha họn vbe iran so ihuan. Ọ na bẹghe iran vbe iran gbe vbe odaro ẹmila igoru nii, iran na vbe gha mu uhunmwu gbotọ nẹ. Ohu keghi mu e Mosis. Ọ na ya ohu fi uhanhan okuta nii gbotọ, ẹre ọ na wagha. Ọ na wa zẹgiẹ ya guọghọ ẹmila igoru nii. Ọ na ghi nọ Erọn wẹẹ: ‘Vbe iran na ya sẹtin fi ruẹ ekhọe werriẹ hẹ, ne u na do ozere na?’ Erọn keghi kha wẹẹ: ‘Lahọ ghẹ gui. U rẹn vbene emwa ruẹ ye hẹ. Te iran ghaa gualọ osa ne iran gha ga, ẹre I na ghi ranran igoru ọghe iran ya ru ẹmila igoru na!’ Ọ ma te khẹke ne Erọn ru egbe emwi vberriọ. E Mosis keghi werriegbe gha rrie uhunmwu oke ne ọ ya rinmwia e Jehova ne ọ yabọ iran.

E Jehova keghi yabọ emwa ni muegbe ne iran ya họn ẹmwẹ nẹ. U miẹn vbene ọ ru ekpataki hẹ ne Ivbi Izrẹl lele adia ọghe Mosis ra?

Vbe Mosis ghi rre Oke Sainai, e Jehova keghi tama rẹn nọ bọ ibọkpọ ne kpataki. Ibọkpọ na ọre ogiukpo ne Ivbi Izrẹl khian na gha ga Osanobua. Iran gha vbe sẹtin mu ibọkpọ na lele egbe vbe iran gha rrie ehe ọvbehe.

E Jehova keghi tama e Mosis wẹẹ: ‘Tama iran, ne iran viọ emwi ne iran gha sẹtin viọ rre, ne iran ya bọ ibọkpọ na.’ Ivbi Izrẹl keghi viọ igoru, esiliva, oze, avbe okuta ighobioye kevbe emwi itegbe. Iran vbe viọ oru, eto ovbiohuẹ (e linẹn), ohian ọghe aranmwẹ kevbe emwi nibun ọvbehe rre. Emwi ne iran viọ rre bun sẹrriọ wẹẹ e Mosis na do tama iran wẹẹ: ‘Ọni sẹ! Uwa ghẹ ghi viọ emwi ọvbehe rre.’

Owinna nibun keghi deba iran bọ ibọkpọ nii. E Jehova ẹre ọ rhie ẹwaẹn ne iran ya ru iwinna nii. Emwa eso kegha do oru kevbe ukpọn, vbene eso na gha mwamwa avbe okuta, eso na vbe gha ya igoru winna, vbene eso na gha kaa erhan.

Iran keghi bọ ibọkpọ nii vbene Jehova wẹẹ ne iran bọe zẹẹ. Iran keghi ya ukpọn fiaẹn ye ihe eva, obọ ọkpa na gha re Ehe Nọhuanrẹn, ọbo nọkpa na gha re Ehe Nọ Huan Sẹ Ehia. Ehe Nọ Huan Sẹ Ehia vbọ, ẹre ẹkpẹti ile na ya erhan akesia kevbe igoru ru ghaa ye. Erhan ọmukpa ọghe igoru, e teburu kevbe aka ne a na zọ ese kegha rre Ehe Nọhuanrẹn vbọ. Uwawa oze kevbe aka nọ kpọlọ kegha rre ẹghodo ọghe ibọkpọ nii. Ivbi Izrẹl gha bẹghe ẹkpẹti ile nii, iran ghi yerre eyan ne iran ru ma e Jehova. Uwẹ rẹn emwi nọ re ile ra? Ọ keghi re eyan ne kpataki.

E Jehova keghi zẹ Erọn vbe ivbi ẹre ne iran gha ga zẹvbe ohẹn vbe ibọkpọ nii. Iran ẹre ọ khian gha gbaroghe ẹre, iran ghi vbe gha ru izọese gie Jehova vba. Erọn ọkpa nọ re ogiohẹn ẹre ọ khian sẹtin la Ehe Nọ Huan Sẹ Ehia vbe ibọkpọ nii. Uhukpa vbe ukpo ẹre ọ ya la evba, nọ ya ru izọese gie Osanobua rhunmwuda orukhọ ọghẹe, ọghe ẹgbẹe ọre kevbe ọghe agbẹnvbo ọghe Ivbi Izrẹl.

Vbe ọ ghi rre ukpo ọkpa ne Ivbi Izrẹl kpa hin Igipt rre, iran keghi bọ ibọkpọ nii fo. Ibọkpọ ẹre ọ ghi gha re ako ne iran na ga e Jehova.

E Jehova keghi ruẹ ne uyi ọghẹe vuọn ibọkpọ nii, vbene ọ na ya okuku gue ẹre. Okuku gha gue ibọkpọ nii, Ivbi Izrẹl ghi gha rre eke ne iran ye zẹẹ. Okuku gha kpa vbe evba, iran ghi rẹn wẹẹ ọ khẹke ne iran vbe kpa vbe eke ne iran ye rre. Iran ghi vbe mu ibọkpọ nii lele egbe gha rrie ehe ne okuku nii rhirhi gberra ghee.