Vbe Ivbi Izrẹl ghi kpa hin Oke Sainai rre, iran keghi la ato ọghe Paran gberra gha rrie ako ọkpa na tie ẹre Kedẹs. E Jehova keghi tama e Mosis wẹẹ: ‘Zẹ ọkpa ọkpa vbe uwu avbe ọkaolotu ẹwae 12 ne iran ya ba otọ e Kena ghee, rhunmwuda, ọni ọre otọ ne I ru eyan rẹn wẹẹ, I gha mu ne Ivbi Izrẹl.’ E Mosis keghi zẹ ikpia 12, ọ na tama iran wẹẹ: ‘Uwa gha rrie otọ e Kena, ne uwa ya ghee ẹre deghẹ ọ gha maan emwi okọ. Uwa ghi vbe ghee ẹre, deghẹ emwa ni rre evba wegbe ra iran vburriẹ, kevbe deghẹ ibọkpọ ẹre iran ye ra deghẹ owa ekẹn nọ.’ Ikpia 12 na keghi kpa gha rrie Kena. Usun iran na keghi re Kelẹb vbe Jọsua.

Vbe iyeke ikpẹdẹ 40, iran iweva na keghi werriegbe rre, vbene iran na kọlọ avbe ọmọ erhan nibun gha dee. Iran keghi tama e Mosis kevbe Ivbi Izrẹl nikẹre wẹẹ: ‘Otọ nọ maan wa nọ, sokpan emwa ni rre ẹvbo nii wegbe gbe, erriọ ogba ekẹn ọghe iran wa vbe ya yo.’ E Kelẹb keghi kha wẹẹ: ‘Ma gha sẹtin khọnmiotọ yan iran. Gia wa gha khian nia!’ Uwẹ rẹn evbọzẹe ne Kelẹb na ta ẹmwẹ na ra? Rhunmwuda wẹẹ e Kelẹb vbe Jọsua mu ẹtin yan e Jehova. Sokpan iran igbe nikẹre keghi kha wẹẹ: ‘Ẹn o! Iran ni rre otọ nii zogọ gbe, te iran yevbe arhuan! Erriọ ima yevbe atete vbe eke ne iran ye.’

Iro keghi han Ivbi Izrẹl. Iran na suẹn gha vian, iran na gha kha wẹẹ: ‘Gi ima zẹ ọmwa ọvbehe nọ su ima werriegbe gha rrie Igipt. Vbọsiẹ ne ima khian na gha rrie ẹvbo na khian na gbele ima rua?’ E Jọsua vbe Kelẹb keghi kha wẹẹ: ‘Uwa ghẹ he ẹmwẹ ye Jehova obọ, uwa ghẹ gi ohan mu uwa. E Jehova gha gbogba ga ima.’ Sokpan Ivbi Izrẹl ma họn. Iran na te gha hoo ne iran gbe Jọsua vbe Kelẹb rua!

De emwi ne Jehova ghi ru? Ọ keghi tama e Mosis wẹẹ: ‘Vbene I hia ne Ivbi Izrẹl sẹ, iran i ye họn ẹmwẹ mẹ. Te I khian sẹ iran rae ye uwu ato na vbe ọwara ukpo 40, emwa ẹre iran khian wu yi. Ivbi iran ọkpa kevbe Jọsua vbe Kelẹb ẹre ọ khian gha rre otọ ne I ru eyan rẹn wẹẹ I gha mu ne iran.’

Ẹghẹ eso ghi gberra, vbe Ivbi Izrẹl ye rre uwu ato, e Kora, e Datan, Abiram, kevbe orhunmwu 250 ọvbehe keghi sọtẹ dae Mosis. Iran keghi kha wẹẹ: ‘Egbe ruẹ wọọ ima nẹ! U ma sẹ nọ gha su ima, ẹi re Erọn ẹre ọ vbe khẹke nọ gha re ogiohẹn. Ẹi re uwa ọkpa ọre eguọmwadia e Jehova, eguọmwadia ọghẹe ẹre ima nikẹre vbe khin.’ Ẹko ma rhiẹnrhiẹn e Jehova ye emwi ne iran ru na. Te Jehova ghaa ghee ẹre wẹẹ, irẹn ẹre iran sọtẹ daa!

E Mosis keghi tama e Kora kevbe emwa ni yẹrike wẹẹ: ‘Uwa viọ ọkpan na ya wan erhẹn lele egbe gha die ibọkpọ vba akhuẹ, uwa ghi viọ eturari ye uwu ẹre. E Jehova gha gi ima rẹn ọmwa ne irẹn zẹ, nọ gha su emwa rẹn.’

Ẹdẹ ghi gbe, e Kora kevbe orhunmwu 250 ni yẹrike keghi bu e Mosis gha rrie nene ibọkpọ. Iran na gha giẹn eturari vba vbene a miẹn wẹẹ ohẹn ẹre iran khin. E Jehova keghi tama e Mosis vbe Erọn wẹẹ: ‘Uwa wannọ egbe hin uwu ẹbu e Kora vbe ikpayẹ ọre rre.’

Agharhemiẹn wẹẹ, e Kora bu e Mosis gha rrie ibọkpọ nẹ, e Datan vbe Abiram kevbe ẹgbẹe iran na ye gha rre owa. E Jehova keghi tama Ivbi Izrẹl ne iran wannọ egbe hin eke ne ibọkpọ ọghe Kora, Datan, kevbe Abiram ye rre. Ivbi Izrẹl keghi ru vberriọ vbobọvbobọ. E Datan, Abiram, kevbe ẹgbẹe iran na gha rre odaro ibọkpọ ọghe iran. Otọ na wa vaa vbe udemwurri, ẹre ọ na minọ iran hia re! Erhẹn na wa ke ẹrinmwi rre do giẹn e Kora kevbe orhunmwu 250 ni yẹrike vbe eke ne iran ghaa ye vbuwe ibọkpọ.

Vbe iyeke ọni, e Jehova keghi tama e Mosis wẹẹ: ‘Wẹẹ ne ọkpa ọkpa vbuwe avbe ọkaolotu ẹwaẹ ọghe Ivbi Izrẹl viọ ọkpọ ọkpa ọkpa rre, iran ghi gbẹnnẹ eni iran yọ. Sokpan u ghi gbẹn eni Erọn ye ọkpọ nọ ke uniẹn ọghe Livai rre. U ghi viọ avbe ọkpọ nii hia ye uwu ibọkpọ, ọmwa ne ọkpọ ọre ghi zẹ obobo, ọre ọmwa ne I zẹ nọ gha re ogiohẹn.’

Ẹdẹ ghi gbe, e Mosis keghi viọ avbe ọkpọ ni ladian, ọ na do ma avbe ọkaolotu Izrẹl re. Ọkpọ ọghe Erọn keghi zẹ obobo, ọ na vbe mọ ọmọ erhan almọnd nọ vboro. Odẹ vbenia, ẹre Jehova ya rhiẹre ma wẹẹ, Erọn ẹre irẹn zẹ nọ gha re ogiohẹn.