Ukpo nibun ẹre Jọsua ya su Ivbi Izrẹl; ọ ghi rre ukpo 110, ọ na wu. Ẹghẹ ne ọ ya gha su Ivbi Izrẹl, te iran hia wa gha ga e Jehova. Sokpan e Jọsua ghi wu nẹ, iran na suẹn gha ga ẹbọ, vbe na ghee Ivbi e Kenan. Rhunmwuda ne Ivbi Izrẹl na sẹ e Jehova rae, ọ na kue ne Jabin ne ọba ọghe Kenan gha ya agbọn lọghọ iran. Ivbi Izrẹl keghi rinmwia e Jehova nọ ru iyobọ ne iran. Ẹre Jehova na ghi rhie ọkaolotu ọghe ọgbọn ne iran; eni ọkaolotu nii ọre Barak. Irẹn ẹre ọ khian ru iyobọ ne iran ya werriegbe bu e Jehova gha dee.

E Dẹbora ne akhasẹ keghi gie na tie Barak. E Jehova keghi tama e Dẹbora nọ tama e Barak wẹẹ: ‘Viọ ikpia 10,000, ne uwa bu e Jabin vbe ẹzẹ ọghe Kisiọn. Obọ uwa gha vba e Sisaria nọ re ọkaokuo ọghe Jabin.’ E Barak keghi tama e Dẹbora wẹẹ: ‘I gha yo deghẹ u na lele mwẹ.’ Ẹre Dẹbora na ghi kha wẹẹ: ‘I gha lele ruẹ yo. Sokpan, ọ khẹke ne u rẹn wẹẹ, ẹi re uwẹ ẹre ọ khian gbe Sisaria rua. E Jehova tae nẹ wẹẹ, okhuo ẹre ọ khian gbe ẹre rua.’

E Dẹbora keghi lele Barak kevbe ivbiyokuo ẹre gha rrie uhunmwu Oke Tabọ, ne iran ya muegbe okuo. Vbe Sisaria ghi họn vbekpa re, ọ na mwamwa ikẹkẹ okuo ọghẹe kevbe wẹẹ ọ na si ivbiyokuo ọghẹe koko vbe iya nọ rre ototọ oke nii. E Dẹbora keghi tama e Barak wẹẹ: ‘Ẹrẹna ẹre Jehova khian rhie akhọnmiotọ nuẹ.’ E Barak kevbe ikpia 10,000 ni lelẹe khian keghi tuorre vbe uhunmwu oke ne iran bu e Sisaria vbe ivbiyokuo ẹre.

E Jehova keghi ruẹ ne ẹzẹ ọghe Kisiọn khian orogho. Ikẹkẹ okuo ọghe Sisaria na ziẹn ye uwu orogho nii. E Sisaria keghi lẹẹ sẹ ikẹkẹ okuo ọghẹe rae. E Barak kevbe ivbiyokuo ẹre, keghi gbele ivbiyokuo e Sisaria hia rua, sokpan obọ ma vba e Sisaria! Ọ na ya lẹre ye uwu ibọkpọ ọghe okhuo ọkpa na tiẹre Jaẹl. Okhuo na keghi sa e miliki nẹ wọn. E Jaẹl na vbe ya ukpọn gue ẹre vbe eke ne ọ lovbiẹ yi. Vbe ọ ma he kpẹẹ vba, ovbe keghi rhie Sisaria rhunmwuda egbe nọ wọọ re. E Jaẹl na fẹko sikẹ e Sisaria, ọ na so ise ye ọre uhunmwu. Erriọ ẹre Sisaria ya wu.

Vbe Barak ghi gualọ e Sisaria khian, e Jaẹl keghi ladian vbe uwu ibọkpọ ọghẹe, ọ na tama e Barak wẹẹ: ‘La uwu owa, ne u do ghee ọmwa ne u gualọ.’ Vbe Barak ghi la uwu ibọkpọ nii, ọ na bẹghe ikun e Sisaria vbe otọ. Ẹre Barak vbe Dẹbora na so ihuan urhomwẹ gie Jehova rhunmwuda akhọnmiotọ nọ rhie ne Ivbi Izrẹl. Vbe ọwara ukpo 40 nọ ghi lelẹe, ọfunmwegbe ẹre ọ ghi gha rre otọ ọghe Izrẹl.

Vbe asẹ ọkpa, ukhunmwu kegha fi vbe otọ Izrẹl. Okhuo ọkpa na tiẹre Naomi, ọdafẹn ọnrẹn kevbe emọ ikpia eva ne iran mwẹ, keghi kpa gha rrie otọ e Moab. Vbene ẹghẹ ya khian, ọdafẹn e Naomi keghi wu. Ivbi iran nikpia eva keghi viọ ikhuo e Moab rọnmwẹ. Eni ikhuo nii ọre Rut kevbe Ọfa. Vbe ọ ma he kpẹẹ vba, ivbi ẹre nikpia na, na vbe wulo.

Vbe Naomi ghi họn wẹẹ, ukhunmwu nọ te fi vbe otọ Izrẹl fo nẹ, ọ na wẹẹ irẹn rrie owa. E Rut kevbe Ọfa keghi lele Naomi. Sokpan vbe iran ghi zẹ khian, e Naomi na tama iran wẹẹ: ‘Ikhuo esi ẹre uwa ghaa khin ne ivbi mwẹ kevbe wẹẹ uwa wa vbe gha ya obọ esi mu mwẹ. I hoo ne uwa werriegbe gha rrie Moab, ne uwa ya rọnmwẹ ọdọ.’ Iran keghi kha wẹẹ: ‘Ma hoẹmwẹ ruẹ! Ima ma hoo ne ima sẹ ruẹ rae.’ Sokpan e Naomi na ye gha tama iran wẹẹ, ne iran gha rrie owa. Vbe okiekie, Ọfa na gele gha rrie owa sokpan e Rut ma kpa. E Naomi keghi tama e Rut wẹẹ: ‘Ọfa ne ọrue ruẹ kpa nẹ, uwẹ wa vbe lelẹe, ne uwa bu emwa uwa kevbe ẹbọ ọghe uwa.’ Sokpan e Rut keghi tama rẹn wẹẹ: ‘I i khian sẹ ruẹ rae. Emwa ruẹ ẹre ọ khian gha re emwa mwẹ, Osa ruẹ ghi vbe gha re Osa mwẹ.’ Vbe uwẹ a yayi wẹẹ, ọ ghaa ye Naomi hẹ, vbe ọ họn ẹmwẹ na?

E Rut vbe Naomi keghi sẹ otọ Izrẹl vbe ẹghẹ ne iran ya gha fian ọka irhuarhua (ẹghẹ ọka). Vbe ẹdẹ ọkpa, e Rut na ya rhọ emwiokọ na rhọ sẹrae vbe ugbo ọghe okpia ọkpa na tie ẹre Boaz ne ovbi e Rehab. Na kha na, e Boaz họn nẹ wẹẹ e Rut keghi re ovbi e Moab nọ lele Naomi rre. Ọ na tama emwa ni winna lelẹe wẹẹ, ne iran sẹ ọka eso rae ye otọ ne Rut miẹn rhọ.

E Rut ghi sẹ owa vbe ota nii, e Naomi keghi nọ rẹn wẹẹ: ‘De ugbo ọmwa ne u yo vbe ẹrẹna?’ E Rut keghi kha wẹẹ: ‘Ugbo ọghe okpia ọkpa na tie ẹre Boaz nọ.’ E Naomi keghi tama rẹn wẹẹ: ‘Ọtiẹn arowa mwẹ ẹre Boaz khin. Wa gha lele ibiẹka ikhuo nikẹre yo ugbo ọghẹe. Emwi rhọkpa i khian sunu daa ruẹ.’

E Rut na ye gha yo ugbo e Boaz, a te miẹn wẹẹ ẹghẹ emwiorhọ fo. Aro e Boaz keghi dae wẹẹ, okhuo nọ wegbe obọ kevbe nọ mwẹ uyinmwẹ esi ẹre Rut khin. Vbe ẹghẹ nii, deghẹ okpia na wu vbene ọ ma na biẹ, ọkpa vbe etiọnrẹn ghi rrie ọvbokhan rẹn rọnmwẹ. Ọni ẹre ọ siẹre ne Boaz na rhie Rut. E Rut keghi biẹ ọmọ okpia ọkpa na tie ẹre Obẹd nọ ghi do gha re erha Ọba e Devid nọkhua. Avbe ọse Naomi na gha ghọghọ. Iran na kha wẹẹ: ‘Vbe okaro, e Jehova keghi rhie Rut nuẹ, ne ọ wa ru iyobọ nuẹ ke ẹghẹ gha dee. Nia, u mu eyẹ nẹ. Ekpọnmwẹ vbe urhomwẹ nọ ne Jehova.’