Abọ 8

Gbaengbe Ne Ugamwẹ Ohoghe; Ya Egbe Ba Ugamwẹ Ẹmwata

1. Vbe nọ dekaan ugamwẹ, de azẹ ne emwa hia gha ru ne egbe iran?

JESU khare wẹẹ: ‘Ọmwa nẹi rre obọ ọghomwẹ, te ọ gbodan ghee mwẹ.’ (Matiu 12:30) Deghẹ ima i rre obọ ọghe Jehova, ọni ọre obọ ọghe Esu ma ye. Emwa nibun keghi roro ẹre wẹẹ iran ga Osanobua vbe odẹ nọ kueyi sokpan, e Baibol khare wẹẹ, e Setan ẹre ọ “mu otọ agbọn hia rẹrẹ.” (Arhie Maan 12:9) Emwa nibun yayi wẹẹ, Osanobua ẹre iran ga sokpan Esu ẹre iran gele ga! Te emwa hia gha ru azẹ deghẹ Jehova nọ re ‘Osa ọghe ẹmwata’ ẹre iran gha ga ra e Setan nọ re “erha ohoghe.”—Psalm 31:5; Jọn 8:44.

Kpa Hin Ugamwẹ Ohoghe Rre

2. De odẹ ọkpa ne Setan ya mu idobo ye emwa egbe ne iran ghẹ sẹtin ga e Jehova?

² Atamuolọyan nọ ghi maan sẹ ẹre ima ru vbe ima yan rẹn wẹẹ, ma gha ga e Jehova rhunmwuda ọ gha ya ẹko rhiẹnrhiẹn ọnrẹn. Sokpan te Setan khọ ẹko emwa ni ga Osanobua, erriọ vbe ya si ọlọghọmwa ye iran egbe. Odẹ ọkpa ne irẹn ya ru ọna keghi re ozan kevbe igbodan nọ ke obọ ẹgbẹe kevbe avbe ọse rre. Jesu keghi kha wẹẹ: ‘Ẹgbẹe ọmwa ghi do khian eghian nọ khọ ẹko ọmwa sẹ.’—Matiu 10:36.

3. Deghẹ ẹgbẹe ruẹ ra avbe ọse ruẹ gbodan ye odẹ nu ya ga Osanobua, de emwi nọ khẹke nu ru?

³ Emwi vbenia gha sunu daa ruẹ, vbua khian ru? Emwa nibun rẹnrẹn wẹẹ iran i rre ugamwẹ ẹmwata sokpan iran ma hoo ne iran kpa hin ugamwẹ nii rre. Iran keghi roro ẹre wẹẹ iran gha ru vberriọ, ọni rhiema wẹẹ te iran yangbe ẹgbẹe iran. Ẹwaẹn rre ọna ra? U gha rẹn wẹẹ etẹn ni sikẹ ruẹ vbuwe ẹgbẹe loo ikpukhunmwu ni wegbe, ẹre tu gha yobọ sekhae ne iran? Wẹ tobọ uwẹ gha deba iran gha loo ẹre ra?

4. De emwi ne Jọsua tama Ivbi Izrẹl ne iran ru?

⁴ E Jọsua keghi rhie igiọdu ne Ivbi Izrẹl ne iran mu ugamwẹ ohoghe kevbe erre avbavbotọ ọghe erha iran odede fua. Ọ keghi kha wẹẹ: ‘Uwa gha mwẹ imuohan ọghe Jehova ne uwa gha ga vbuwe imudiase kevbe ẹmwata. Wa mianmian avbe ẹbọ ne avbe erha uwa odede te gha ghoo vbe Mẹsopotamia kevbe Igipt ne uwa gha ga e Jehova ọkpa kẹkan.’ (Jọsua 24:14) Jọsua ghaa mwẹ ẹkoata dae Jehova, rhunmwuda ọna, e Jehova keghi fiangbẹe. Ma gha ya egbe tae Jọsua, e Jehova gha vbe fiangbe ima.—2 Samuẹl 22:26.

Imamwaemwi Ọghe Ugamwẹ—Ọghe Ẹmwata Kevbe Ọghe Ohoghe

Osa Ne Agbeha: Ugamwẹ nibun keghi maa emwa re wẹẹ Osanobua keghi re ọkpa vbuwe osa eha nọ rre uwu ọkpa. Iran keghi kha wẹẹ “Osa ne Erha, Osa ne Ọmọ kevbe Orhiọn Nọhuanrẹn keghi re Osanobua ọkpa ẹi re eha.”

Imamwaemwi vbenia i rre uwu e Baibol. Jehova ọkpa ọre Osanobua. 1 Kọrinti 8:6 khare wẹẹ: “Sokpan Osanobua ọkpa ma mwẹ.” Jehova ọre Osa Ne Udazi. Jesu i re Osanobua, sokpan “Ovbi Osanobua ọre Jesu khin.” (1 Jọn 4:15) Orhiọn nọhuanrẹn i vbe re Osanobua. Ẹi mwẹ akpa ọghe ọmwa amaiwẹ. Ọ keghi re ẹtin ne Osanobua loo.—Iwinna 1:8; Ẹfisọs 5:18.
Evbọ Rrọọ: Ugamwẹ nibun maa emwa re wẹẹ, evbọ rrọọ keghi re emwi nọ rre uwu ọmwa nagbọn nẹi sẹtin wu. E Baibol khare wẹẹ, evbọ rrọọ keghi re ọmwa nagbọn tobọre, nọnaghiyerriọ, evbọ rrọọ sẹtin wu.—Gẹnẹsis 2:7; Ezikiẹl 18:4.
Ẹrinmwi Erhẹn: Ugamwẹ ohoghe vbe maa emwa re wẹẹ, evbọ rrọọ ọghe emwa dan keghi rrioya ọghe ohanabe vbe ẹrinmwi erhẹn vbe etẹbitẹ. Sokpan e Baibol khare wẹẹ emwa ni wulo nẹ “ma rẹn emwi rhọkpa.” (Asan-Ibo 9:5) E Baibol vbe maa ima re wẹẹ “ahoẹmwọmwa ọre Osanobua khin.” (1 Jọn 4:8) E Jehova ne Osa nọ mwẹ ahoẹmwọmwa i khian sẹtin ye erhẹn gha giẹn emwa rhumwuda te ọ rri iran oya.

Ẹkpẹti: De emwi ne Baibol maa ima re vbekpae imamwaemwi ọghe Osa Ne Agbeha, evbọ rrọọ kevbe ẹrinmwi erhẹn?

Guọghọ Emwi Na Loo Vbe Ugamwẹ Ohoghe

Okhuo na gha giẹn emwi ne ọ te ya zẹ ọbo edunna

5. Vbọzẹ nọ na khẹke ne ima guọghọ emadogua ọghe orhiọn dan ne ima mwẹ?

⁵ A gha kpa hin ugamwẹ ohoghe rre, te ọ wa vbe khẹke na guọghọe rua emadogua ọghe orhiọn dan ne ima mwẹ vbe na ghe ẹbo, akpalode, oroka kevbe emwiobọ na ya ẹbo kpe. Ọna keghi ru ekpataki rhunmwuda ọ rhiema wẹẹ, e Jehova ẹre ima ghi ya egbe kọ.

6. De emwi ne Ivbiotu e Kristi nokaro ru vbekpae ebe ne iran ya zẹ ọbo edunna?

⁶ Gia ghee emwi ne Ivbiotu e Kristi nokaro ru vbe iran ghi tamuolọyan rẹn nẹ wẹẹ iran gha ga Osanobua vbe odẹ ọghe ẹmwata. E Baibol keghi kha wẹẹ: “Nibun vbe iran ni te ka zẹ ọbo edunna yi, keghi viọ ebe iran ladian, iran keghi sirra emwa hia giẹn ehia.”—Iwinna 19:19.

7. Avbe ugbogiorinmwi ghaa kpokpo ima, de emwi nọ kheke ne ima ru?

⁷ Emwa eso ni ka gha rre oro azẹn kevbe ni ka gha mwẹ obọ vbe ẹbo na ru, ni ghi do suẹn gha ga e Jehova sẹtin suẹn gha miẹn ukpokpo vbe obọ avbe ugbogiorinmwi. Emwi vbenia gha sunu daa ruẹ, ya urhu nọ laa da tie eni e Jehova vbe erhunmwu. Ọ gha ru iyobọ nuẹ.—Itan 18:10; Jems 4:7.

8. De aro ne Ivbiotu e Kristi ya ghee ẹbọ, amazẹ kevbe efoto na loo vbe ugamwẹ ohoghe?

⁸ Ọ ma khẹke ne emwa ni hoo ne iran ga e Jehova gha mwẹ amazẹ, ẹbọ ra efoto na loo vbe ugamwẹ ohoghe. Nọ nẹ Ivbiotu e Kristi ọghe ata, ‘ugamwẹ iran keghi hẹnhẹn egbe yan amuẹtinyan, ẹi re emwi ne iran bẹghe.’ (2 Kọrinti 5:7) Iran keghi lele uhi ọghe Osanobua nọ gbodan ye ugamwẹ ne emwa na loo avbe amazẹ.—Ẹksodọs 20:4, 5.

Gha Gu Emwa Ọghe Osanobua Mu Obọ

Okhuo na vbe ovbi ẹre nokhuo nekherhe gha le evbare

9. De ibude ne Baibol rhie ne ima deghẹ ima hoo ne ima gha re umẹwaẹn?

⁹ E Baibol khare wẹẹ: “Gha gu umẹwaẹn mu obọ, wẹ gha vbe do khian umẹwaẹn.” (Itan 13:20) Deghẹ ima hoo ne ima gha re umẹwaẹn, te ọ khẹke ne ima gha gu Avbe Osẹe Jehova mu obọ rhunmwuda iran ẹre ọ rre odẹ nọ su rrie arrọọ.—Matiu 7:14.

10. De iyobọ ne Avbe Osẹe Jehova ru ne emwa ni hoo ne iran ga e Jehova?

¹⁰ Avbe Osẹe Jehova keghi mwẹ ẹmwẹ emwa ọvbehe vbe orhiọn, ọna ẹre ọ si ẹre ne iran na ye Baibol ru iyobọ ne emwa ni mwẹ ekhọe esi, ne iran do rẹn odẹ ọghe ẹmwata nọ su rrie arrọọ ọghe etẹbitẹ. Iran muegbe ne iran ya gu ruẹ gha ruẹ e Baibol ọghọhẹ. Iran gha rhie ewanniẹ ye inọta ruẹ hia, iran gha vbe maa ruẹ re vbe nu gha ya loo adia ni rre Baibol hẹ vbe arrọọ ọghuẹ.—Jọn 17:3.

11. De iyobọ nu gha miẹn vbe iko ugamwẹ ọghe Avbe Osẹe Jehova?

¹¹ U gha yo iko ugamwẹ ọghe iran ne iran do vbe Ọgua Arriọba, u gha do rẹn sayọ vbekpae ilele ọghe Jehova. Ọ gha vbe ya ruẹ deziẹn vbe ugamwẹ ẹmwata, a ghi vbe maa ruẹ re, vbe nu gha ya ru iyobọ ne emwa ọvbehe hẹ ya rẹn ẹmwata ni rre Baibol.—Hibru 10:24, 25.

12. De vbene erhunmwu gha ya ru iyobọ nuẹ hẹ ya ga Osanobua?

¹² Zẹvbe nu ya ruẹ sayọ vbekpae emwamwa kevbe ahoo ọghe Jehova, u do gha rẹn ọnrẹn sayọ; ọna ẹre ọ khian ghi gua ruẹ kpa ya gha gbọyẹmwẹ ye avbe akpa ne mose ne irẹn mwẹ. Ọ khẹke nu gha mwẹ ahoo nu ya gha ru emwi nọ yẹẹ ọre ẹi re emwi nẹi yẹẹ ọre. Yerre wẹẹ, u gha sẹtin nọ e Jehova vbe erhumwu, nọ ru iyobọ nuẹ, nu ya sẹtin gha ru emwi nọ maan kevbe nu gha gbaengbe ne emwi dan.—1 Kọrinti 6:9, 10; Filipai 4:6.

Ẹgbẹe na gha tie Baibol kugbe — De vbene u khian ya sẹtin gha ga Osanobua vbe odẹ ọghe ẹmwata?

13. De vbe nu gha ya sẹtin ya ẹko rhiẹnrhiẹn e Jehova?

¹³ Zẹvbe ne asikẹgbe nu gu e Jehova mwẹ ya wegbe sayọ, u do bẹghe ẹre wẹẹ, ọ khẹke nu ya egbe fiohan nẹẹn kevbe nu dinmwiamẹ zẹvbe ọkpa vbe Osẹe Jehova. Ẹko gha rhiẹnrhiẹn e Jehova vbe u gha ghi khian ọkpa vbe usun emwa rẹn. (Itan 27:11) U do gha rre usun emwa ni sọyẹnmwẹ rhunmwuda eyan ọghe Osanobua: “I gha bọ owa mwẹ ye ehe ne iran ye. I ghi yin ehe ne iran ye. Mẹ ghi gha re Osanobua iran, iran ghi gha re emwa mwẹ.”—2 Korinti 6:16.

I Fan Egbe Fua Vbe Obọ Ẹtin Ọghe Avbe Ugbogiorinmwi

Vbe asọn ọkpa vbe imẹ vbe arowa mwẹ vbiẹ, I keghi họn vbe urhu ọkpa tie eni mwẹ igba eha. Uhukpa, ihie owa na waa ye iheva, emwi nọ yevbe na ghee ibọlu nọ baa vbe erhẹn na ke odukhunmwu dee yọ mwẹ ẹko. Ọdafẹn mwẹ ma zẹdẹ rẹn emwi nọ ghaa sunu. Erriọ egbe mwẹ ya suẹn gha yọn vbe ọwara uki nibun.

Uki ehan ghi gberra nẹ, urhu nii na werriegbe tie mwẹ. Awarọkpa nii, ọ na yevbe odin amẹ ẹre owa ima ghi ye. Ẹre ẹyẹn nọkhua na ke uwu amẹ nii ladian, ọ na kinnọ yọ mwẹ obọ. Vbene I hia sẹ ne I sanmwẹ ọnrẹn fua, I ma sẹtin. Orrirri na gbe kuọ mwẹ. Uhukpa, amẹ nii kevbe ẹyẹn nọkhua na ru gbẹnnẹ, mẹ na ghi dee gbotọ vbe na miẹn wẹẹ, te a ke odukhunmwu fi mwẹ fua. Vbe ughaẹdẹ eso, I na kuọ. Urhu nii na werriegbe tama mwẹ wẹẹ, ne I gha rrie arọ ẹbọ ne a na mu emwa egbe rran nọ wa rre ẹvbo ima. I ghi nọ rẹn eni ẹnrẹn, ọ na tama mwẹ evba ye eni ẹnrẹn kha, ọni ọre “e nọ fe nẹi mwẹ ọmọ.” Ọ na tama mwẹ wẹẹ, iren gha rhie ẹtin mẹ na ya mu emwa egbe rran; lekpae ọni, I do khian ọmwa nọ fe.

Emwa ni khuọnmwi na gha ke ehe ughughan rre. Vbene iran te sẹ owa mwẹ, ọ mwẹ ughegbe na ye ẹbo kpe ne I ya bẹghe iran. Ọmwa gha wa rre, I wẹẹ nọ rhan atatabọ re rua, I wa gbe atatabọ mwẹ yọ re atatabọ, awarọkpa nii, I wa rẹn aro emianmwẹ nọ khuọnmwi ra ọlọghọmwa nọ mwẹ kevbe emwi ne I khian loo ya sọfurre yọ. Orhiọn dan nii ẹre ọ vbe tama mwẹ inu igho ne I gha fian emwa re.

Rhunmwuda ne ukhunmwu mwẹ na gha sẹ, emwa na gha ya emwi nibun gu mwẹ, ẹre igho na do kpọkua. I na do khian “e nọ fe” sokpan I na do rẹn emwi na ya ẹmwẹ na kha: ‘nẹi mwẹ ọmọ.’ Ẹghẹ ke ẹghẹ ne I ya biẹ, ne I biẹ lele ghi wu. Ọna wa gha si obalọ yọ mwẹ egbe. Vbe ukpo 12 ne I ya ga orhiọn dan na, ivbi mwẹ ni wulo kegha re ehan.

I na suẹn gha na erhunmwu gie Osanobua nọ ru iyobọ mẹ. I na gele rhiegba ye erhunmwu ne a na. Ẹdẹ ọkpa ghi rre, Avbe Osẹe Jehova na sobọ vbe ẹkhu mwẹ. Te I ka wa khulo iran sokpan ẹdẹrriọ, I na danmwehọ iran. Emwi ne iran maa mwẹ re vbe ẹdẹrriọ ẹre ọ ya mwẹ rẹn wẹẹ, ugbogiorinmwi ẹre I ga. I na wa yan rẹn wẹẹ, Ii ghi mwẹ obọ vbe orhiọn dan na gu mu obọ.

I ghi tama orhiọn da nii, ọna ye obọ sekhae mẹ. Sokpan I na tama rẹn wẹẹ: “Ọghe imẹ vbe ruẹ fo nẹ.”

I na giẹn avbe oguẹga hia ne I ya fi iha, ẹre I na suẹn gha gu Avbe Osẹe Jehova ruẹ e Baibol. Ukpo 1973 ẹre I dinmwiamẹ. Emọ isẹn ne egbe gba na ẹre I ghi mwẹ nia. Ọdafẹn mwẹ na vbe do khian ọkpa vbe Osẹe Jehova.—Josephine Ikezu ẹre ọ ta okha na.

Ẹkpẹti: De vbene okhuo ọkpa ya sẹtin fan egbe ẹre hin obọ ẹtin ọghe avbe ugbogiorinmwi rre?