-
Vbọ Re Arriọba Osanobua?Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 31
Vbọ Re Arriọba Osanobua?
Emwi ne Baibol wa mobọ guan kaẹn ọre Arriọba Osanobua. Arriọba na ẹre Jehova khian ya muẹn sẹ, emwamwa ne irẹn mwẹ ne agbọn na ke otọ gha dee. Vbọ re Arriọba Osanobua? Vbe ima ya rẹn hẹ wẹẹ, ọ khaevbisẹ nẹ? De emwi nọ he ru? De emwi nọ khian ru vbe odaro? Ma gha miẹn ewanniẹn ọghe avbe inọta na vbe iruẹmwi na kevbe iruẹmwi eva ni lelẹe.
1. Vbọ re Arriọba Osanobua? Gha re Ọba ọghe Arriọba na?
Arriọba na keghi re arriọba ne Osanobua ne Jehova tobọre mu gbọọ. Jesu Kristi ọre Ọba ọghe Arriọba na, ẹrinmwi ẹre ọ ke khaevbisẹ. (Matiu 4:17; Jọn 18:36) E Baibol khare wẹẹ, Jesu “gha rriọba . . . ẹdẹdẹmwẹdẹ.” (Luk 1:32, 33) Zẹvbe Ọba ọghe Arriọba Osanobua, te Jesu khian khaevbisẹ yan emwa hia vbe otagbọn na.
2. De emwa ni khian deba e Jesu khaevbisẹ?
Ẹi re Jesu ọkpa ẹre ọ khian khaevbisẹ. Emwa ni zẹ urhuẹvbo ughughan kevbe ni ke agbẹnvbo ughughan rre, ẹre ọ khian deba e Jesu khaevbisẹ yan agbọn na. (Arhie Maan 5:9, 10) Inu ẹre iran khin? Ke ẹghẹ ne Jesu ya gha rre agbọn na do fi ẹghẹ ne ima ye na, ọkhọngborrie emwa ẹre ọ he do khian erhuanegbe ẹre. Sokpan, vbe uwu iran na, arhunmwu 144,000 ọkpa, ẹre ọ khian deba re khaevbisẹ vbe ẹrinmwi. (Tie Arhie Maan 14:1-4.) Iran nikẹre ghi gha rre uhunmwu otagbọn na; iran na, ẹre Arriọba na khian gha kha yan.—Psalm 37:29, NW.
3. De vbene Arriọba Osanobua ya maan sẹ ọghe emwa nagbọn hẹ?
Emwa eso ni khaevbisẹ te mwẹ ekhọe na ya ru emwi esi, sokpan iran i mwẹ ẹtin ne iran ya ru emwi hia nọ gele rre iran ekhọe. U ke rẹn emwi nọ sunu, emwa ọvbehe rhihe iran nẹ. A sẹtin miẹn wẹẹ, emwa ni rhihe iran na, i mwẹ ekhọe na ya ru emwi esi. Nọ ne Jesu nọ re Ọba ọghe Arriọba Osanobua, ọmwa rhọkpa i rrọọ nọ khian rhihe ẹre. Arriọba ne Osanobua mu gbọọ keghi re nai khian sẹtin khọn mu otọ. (Daniẹl 2:44) Jesu gha kha yan otagbọn hia. Ẹi khian gha gbe ewanmwẹ ghee obọ ọkpa. Ọba nọ mwẹ ahoẹmwọmwa, nọ mwẹ ekhọe esi kevbe nẹi bu ohiẹn eku, ẹre Jesu khin. Ọ gha vbe ru iyobọ ne emwa ne irẹn khian gha kha yan, ne iran do gha mwẹ egbe ekhọe ne irẹn mwẹ.—Tie Aizaia 11:9.
GUALỌ OTỌ RE SAYỌ
Gia ziro yan evbọzẹe ne Arriọba Osanobua na maan sẹ arriọba emwa nagbọn.
4. Arriọba nọ sẹ arriọba hia ẹre ọ khian kha yan otagbọn hia
Ke ẹghẹ gha dee, a ma he miẹn ọba nọ mwẹ ẹtin vbe na ghee Jesu Kristi. Tie Matiu 28:18, iyeke ọni, uwa ghi ziro yan inọta na:
De vbene ọdakha ọghe Jesu ya sẹ ọghe emwa nagbọn hẹ?
Ẹghẹ hia ẹre arriọba emwa nagbọn ya fi werriẹ, dọmwadẹ ọghẹe vbe mwẹ ako nọ kha yan. Erriọ ẹre Arriọba Osanobua ye ra? Tie Daniẹl 7:14, iyeke ọni, uwa ghi ziro yan avbe inọta na:
Vbọzẹ nọ na re emwi ọyẹnmwẹ, ne a na miẹn wẹẹ, ai khian khọn Arriọba Osanobua mu otọ?
Vbọzẹ nọ na sẹ ima ọyẹnmwẹ, ne ima na rẹn wẹẹ Arriọba na, gha vbe kha yan otagbọn hia?
5. Ọ khẹke ne arriọba ọvbehe rhihe arriọba emwa nagbọn
Vbọzẹ nọ na khẹke ne Arriọba Osanobua rhihe ọghe emwa nagbọn? Kpee VIDIO na, iyeke ọni, uwa ghi ziro yan inọta nọ lelẹe.
Ke ne emwa nagbọn ke kha yan egbe iran, vbe a he lae miẹn?
Tie Asan-Ibo 8:9, iyeke ọni, uwa ghi ziro yan avbe inọta na:
Uwẹ yayi wẹẹ, ọ khẹke ne Arriọba Osanobua rhihe ọghe emwa nagbọn ra? Vbua gu kha vberriọ?
6. Emwa ni khian khaevbisẹ vbe Arriọba Osanobua rẹn vbene emwi ye ima hẹ
Rhunmwuda ne Ọba mwa ighẹ Jesu na ka gha re ọmwa nagbọn, ọ mwẹ “ẹnina ọmwa,” ọ rẹn ako ne ima na vburriẹ. (Hibru 4:15) Ikpia vbe ikhuo ni re 144,000 ẹre ọ khian deba e Jesu khaevbisẹ. “Urhuẹvbo ughughan kevbe otọ ẹvbo ughughan” ẹre Jehova ke hannọ iran zẹ.—Arhie Maan 5:9, NW.
Jesu kevbe emwa ni khian deba re kha, rẹn vbene emwi ye emwa nagbọn hẹ. Ọna mu ruẹ orhiọn sotọ ra? Vbua gu kha vberriọ?
Agbẹnvbo ughughan ẹre Jehova ke hannọ ikpia vbe ikhuo ni khian deba e Jesu khaevbisẹ
7. Uhi Arriọba Osanobua maan sẹ ọghe arriọba emwa nagbọn
Arriọba keghi yi uhi ne emwa ne iran kha yan. Te iran yi avbe uhi na, ne emwa gha miẹn ere vbọ, nọ vbe gha gbogba ga iran. Arriọba Osanobua vbe mwẹ uhi nọ khẹke ne emwa hia ni rre ototọ re gha lele. Tie 1 Kọrinti 6:9-11, iyeke ọni, uwa ghi ziro yan avbe inọta na:
Vbe uwẹ a yayi wẹẹ agbọn na khian gha ye hẹ, deghẹ emwa hia na gha lele uhi ọghe Osanobua?a
Uwẹ yayi wẹẹ ọ khẹke ne Jehova yi avbe uhi vbenian ne emwa ni rre ototọ Arriọba ọghẹe ra? Vbua gu kha vberriọ?
Vbe ima ya rẹn hẹ wẹẹ, emwa nẹi ka lele avbe uhi na, gha sẹtin fi werriẹ?—Ghee uviẹn 11.
Arriọba keghi yi uhi ne emwa ne iran kha yan. Te iran yi avbe uhi na, ne emwa gha miẹn ere vbọ, nọ vbe gha gbogba ga iran. Sokpan uhi ọghe Arriọba Osanobua ẹre ọ maan sẹ, emwa ne Arriọba na kha yan wa miẹn ere vbọ, erriọ vbe ya gbogba ga iran
ỌMWA SẸTIN NỌ WẸẸ: “Vbọ re Arriọba Osanobua?”
De ewanniẹn ne u gha rhie ne ọmwa vberriọ?
OLIKA ẸMWẸ
Arriọba Osanobua keghi re arriọba na mu gbọọ vbe ẹrinmwi, nọ khian gha kha yan otagbọn hia.
Ogbewerriẹ
De emwa ni khian khaevbisẹ vbe Arriọba Osanobua?
De vbene Arriọba Osanobua ya maan sẹ ọghe emwa nagbọn hẹ?
De usun emwi ne Jehova hoo ne emwa ni khian gha rre ototọ Arriọba ọghẹe gha ru?
RUẸ SAYỌ
Ghee emwi ne Jesu khare vbekpa ehe ne Arriọba Osanobua ye.
Vbọzẹ ne Avbe Osẹe Jehova na yayi wẹẹ, Arriọba Osanobua ẹre ọ khẹke ne iran gha sinmwi oseghe na, ighẹ ẹi re ọghe emwa nagbọn?
Tie emwi ne Baibol tae vbekpa arhunmwu 144,000 ne Jehova hannọ zẹ, ni khian deba e Jesu khaevbisẹ.
Vbọ ya okhuo ọkpa nọ ghaa rre eghan do yayi wẹẹ, Osanobua ọkpa ẹre ọ khian sẹtin wabọ uyinmwẹ agbọmwa ekueku rua?
“Vbene I Ya Do Rẹn Ọmwa Nọ Gha Sẹtin Wabọ Uyinmwẹ Agbọmwa Ekueku Rua” (Awake!, November 2011)
-
-
Arriọba Osanobua Suẹn Gha Kha Nẹ!Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 32
Arriọba Osanobua Suẹn Gha Kha Nẹ!
Ukpo 1914 ẹre Arriọba Osanobua suẹn gha kha vbe ẹrinmwi. Ukpo nii, ọre omuhẹn ọghe ẹdẹ okiekie ọghe arriọba emwa nagbọn. Vbe ima ya rẹn hẹ? Gia ziro yan ẹmwẹ akhasẹ ni rre Baibol, emwi ughughan ni sunu ke ukpo 1914 gha dee kevbe odẹ ne emwa ghi ya yin ke ẹghẹ nii gha dee.
1. De emwi ne Baibol ta yotọ?
Ebe Daniẹl tae yotọ wẹẹ, Arriọba Osanobua gha suẹn gha kha vbe ufomwẹ ọghe ẹghẹ ne Baibol tie ẹre “igba ihinrọn.” (Daniẹl 4:16, 17, NW) Orre nibun ghi gberra nẹ, Jesu na vbe tie igba ihinrọn na, “ẹghẹ na buru ọghe agbẹnvbo,” ọ na vbe gi emwa rẹn wẹẹ, ẹghẹ na kha na ma he sẹ ufomwẹ. (Luk 21:24, NW) Vbe iruẹmwi na, ma gha bẹghe ẹre wẹẹ, ukpo 1914 ẹre igba ihinrọn nii sẹ ufomwẹ.
2. De emwi ughughan ni sunu ke ukpo 1914 gha dee? De vbene emwa ghi vbe ya yin hẹ ke ẹghẹ nii gha dee?
Erhuanegbe Jesu keghi nọ e Jesu wẹẹ: “De emwi nọ gha sunu ne ima gha ya rẹn ighẹ ẹghẹ ne u ya dee sẹ nẹ, kevbe wẹẹ a sẹ ufomwẹ agbọn nẹ?” (Matiu 24:3) Jesu na ghi tama iran emwi ughughan ni khian gha sunu, vbe irẹn gha ghi suẹn gha kha nẹ zẹvbe Ọba vbe ẹrinmwi. Ọ ya unu kaẹn okuo, ukhunmwu kevbe igbohiotọ. (Tie Matiu 24:7.) E Baibol vbe tae yotọ wẹẹ, te odẹ ne emwa khian ya gha yin vbe “ẹdẹ okiekie” khian wa ya agbọn gha lọghọ. (2 Timoti 3:1-5) Ena hia ka wa sunu dee yi, sokpan ke ukpo 1914 gha dee, ọ na wa tua sayọ.
3. Vbọzẹ ne emwi hia na ghi wa rhia yọ rhia yọ, ke ne Arriọba Osanobua ya suẹn gha khaevbisẹ?
Vbe a da wa mu e Jesu ye ukpo Ọba, ọ na gu Esu kevbe avbe ugbogiorinmwi khọn vbe ẹrinmwi. Ọkpa ma gbe ifuẹn ne Esu vbe okuo nii. E Baibol khare wẹẹ: “A keghi fi ẹre fi agbọn kẹ kevbe avbe odibo ẹre hia.” (Arhie Maan 12:9, 10, 12) Ohu wa kakabọ mu Esu nia, rhunmwuda, ọ rẹnrẹn wẹẹ a gha rherhe gbe irẹn rua. Ọna ẹre ọ si ẹre nọ na si obalọ kevbe usẹ ye emwa egbe vbe otagbọn hia. Ẹi khabe ne agbọn na lighua! Arriọba Osanobua gha sọfurre ye ọlọghọmwa na hia.
GUALỌ OTỌ RE SAYỌ
Gia ziro yan vbene ima ya rẹn hẹ wẹẹ, ukpo 1914 ẹre Arriọba Osanobua suẹn gha khaevbisẹ kevbe odẹ ne ọna ya dekaẹn ima.
4. Ẹmwẹ akhasẹ ni rre Baibol ni dekaẹn 1914
Osanobua keghi ru ẹre, ne Nebukadneza ne ọba ọghe Babilọn mina miẹn emwi eso ni khian sunu vbe odaro. Imina nii kevbe odẹ ne Daniẹl ya rhan otọ re, ya ima rẹn wẹẹ, ọ dekaẹn ọdakha ọghe Nebukadneza kevbe Arriọba Osanobua.—Tie Daniẹl 4:17.a
Tie Daniẹl 4:20-26, iyeke ọni, uwa ghi ya isama nọ rre ipapa 133 zẹ ewanniẹn ye avbe inọta na:
(A) De emwi ne Nebukadneza miẹn vbe imina?—Ghee uviẹn 20 kevbe 21.
(B) Vbọ ghi sunu daa okperhan nii?—Ghee uviẹn 23.
(C) Vbọ khian ghi sunu vbe “igba ihinrọn” nii gha sẹ ufomwẹ nẹ?—Ghee uviẹn 26.
Vbene Imina Ọghe Okperhan Ya Dekaẹn Arriọba Osanobua Hẹ
NENE ẸMWẸ AKHASẸ (Daniẹl 4:20-36)
Arriọba
(A) Okperhan
Vbe arriọba nii dobọ yi
(B) “Tọn erhan nii gbotọ,” ne “igba ihinrọn gberra”
A werriegbe mu arriọba nii gbọọ
(C) “U gha ye do gha re ọba”
Vbe ẹghẹ okaro ne ẹmwẹ akhasẹ na ya mwẹ amusẹ . . .
(D) De ọmwa ne okperhan nii mudia ye ihe ẹre?—Ghee uviẹn 22.
(E) De vbene arriọba ọghẹe ya dobọ yi hẹ?—Tie Daniẹl 4:29-33.
(F) Vbọ ghi sunu daa e Nebukadneza vbe “igba ihinrọn” nii ghi sẹ ufomwẹ nẹ?—Tie Daniẹl 4:34-36.
ẸGHẸ OKARO NỌ YA MWẸ AMUSẸ
Arriọba
(D) E Nebukadneza, Ọba ọghe Babilọn
Vbe arriọba nii dobọ yi
(E) Ukpo 606 B.C.E. ghi gberra nẹ, emwẹmwẹ na la e Nebukadneza egbe, ọ ma ghi sẹtin kha vbe ọwara ukpo ihinrọn
A werriegbe mu arriọba nii gbọọ
(F) Aro na ghi gbannọ e Nebukadneza, ọ na werriegbe do gha khaevbisẹ
Vbe ẹghẹ nogieva ne ẹmwẹ akhasẹ na ya mwẹ amusẹ . . .
(G) De emwa ne okperhan nii mudia ye ihe ẹre?—Tie 1 Krọnikol 29:23.
(H) De vbene arriọba ọghe avbe ọba ni ghaa kha yan Ivbi Izrẹl ya dobọ yi hẹ? Vbe ima ya rẹn hẹ wẹẹ, a ma he werriegbe mu arriọba na gbọọ, vbe Jesu rre agbọn?—Tie Luk 21:24, NW.
(I) De ẹghẹ na ghi ya dọlegbe mu arriọba na gbọọ? De ehe ne a na muẹn gbọọ?
ẸGHẸ NOGIEVA NỌ YA MWẸ AMUSẸ
Arriọba
(G) Avbe ọba ni ghaa kha yan Ivbi Izrẹl vbe ototọ ọdakha ọghe Osanobua
Vbe arriọba nii dobọ yi
(H) A keghi fuẹn e Jerusalẹm rua, erriọ ẹre ọdakha ọghe avbe ọba ni kha yan Ivbi Izrẹl ghi ya dobọ yi vbe ọwara ukpo 2,520
A werriegbe mu arriọba nii gbọọ
(I) Jesu keghi suẹn gha kha zẹvbe Ọba ọghe Arriọba Osanobua vbe ẹrinmwi
De vbene igba ihinrọn nii kpẹẹ sẹ hẹ?
Ako eso vbe Baibol keghi ru iyobọ ne ima ya rẹn otọ ako ọvbehe. Vbe igiemwi, ebe Arhie Maan khare wẹẹ, igba eha vbe ukhiọnmwẹ ọre ikpẹdẹ 1,260. (Arhie Maan 12:6, 14, NW) Igba eha vbe ukhiọnmwẹ vbe ihe eva, ọre igba ihinrọn. A gha ghi roro ẹre kugbe, igba ihinrọn ghi do gha re ikpẹdẹ 2,520. Ugbẹnso, e Baibol ya ikpẹdẹ ọkpa rhihe ukpo ọkpa. (Ẹzikiẹl 4:6) Ilele na keghi wa guaero, igba ihinrọn na guan kaẹn vbe ebe Daniẹl. Igba ihinrọn nii keghi mudia ye ihe ukpo 2,520.
5. Agbọn fi werriẹ ke ukpo 1914 gha dee
Jesu tae yotọ, vbene emwi khian gha ye hẹ vbe agbọn na, vbe irẹn gha rri Ọba nẹ. Tie Luk 21:9-11, iyeke ọni, uwa ghi ziro yan avbe inọta na:
De ne aro ruẹ he sẹ vbe uwu avbe emwi na sunu yi na? De ne ehọ ruẹ he vbe họn vbọ?
Ukọ e Pọl tae yotọ, uyinmwẹ ne emwa nibun khian gha yin, vbe ọ ghaa bu ufomwẹ ọghe arriọba emwa nagbọn. Tie 2 Timoti 3:1-5, iyeke ọni, uwa ghi ziro yan inọta na:
De ne aro ruẹ he sẹ vbe uwu avbe uyinmwẹ na?
6. Emwi nọ khẹke ne Arriọba Osanobua gua ima kpa ya ru
Tie Matiu 24:3, 14, iyeke ọni, uwa ghi ziro yan avbe inọta na:
De iwinna ne kpataki nọ so igiẹ yọ wẹẹ, Arriọba Osanobua suẹn gha kha nẹ?
Vbua khian ya sẹtin gha mwẹ obọ vbe iwinna na hẹ?
Arriọba Osanobua suẹn gha kha nẹ, vbe nẹi khian ghi kpẹẹ gbe, ọ gha suẹn gha kha yan otagbọn na hia. Tie Hibru 10:24, 25, iyeke ọni, uwa ghi ziro yan inọta na:
Vbọ khẹke ne dọmwadẹ ima ru, ugbẹnvbe a miẹn wẹẹ ufomwẹ agbọn na “sẹ otọ fo nẹ”?
U gha rẹn emwi nọ gha sẹtin ru iyobọ ne emwa ọvbehe kevbe nọ gha sẹtin miẹn iran fan, de emwi ne u gha ru?
ỌMWA SẸTIN NỌ WẸẸ: “Vbọzẹ ne Avbe Osẹe Jehova na wa mobọ guan kaẹn ukpo 1914?”
Vbua khian tama ọmwa vberriọ?
OLIKA ẸMWẸ
Ẹmwẹ akhasẹ ni rre Baibol, vbene iran ya sunu ọkade ọkade, kevbe vbene emwi ghi ye hẹ vbe agbọn na, so igiẹ yọ wẹẹ, Arriọba Osanobua khaevbisẹ nẹ. Ma ghaa tama emwa vbekpa Arriọba na, ma na vbe gha yo iko, te ima rhie ẹre ma wẹẹ ima yayi wẹẹ, ọ suẹn gha kha nẹ.
Ogbewerriẹ
Vbọ ghi sunu vbe ufomwẹ ọghe igba ihinrọn ne ebe Daniẹl guan kaẹn?
Vbọ ya ruẹ yayi wẹẹ, ukpo 1914 ẹre Arriọba Osanobua suẹn gha khaevbisẹ?
Vbua khian ya rhie ẹre ma hẹ wẹẹ, u yayi ighẹ Arriọba na khaevbisẹ nẹ?
RUẸ SAYỌ
Tie emwi ne avbe ọtokha kevbe emwa ọvbehe tae vbekpa afiwerriẹ ni he rhie egbe ma ke ukpo 1914 gha dee.
“Vbene Uyinmwẹ Emwa Nagbọn Ya Ya Uhukpa Kulo Hẹ” (Awake!, April 2007)
Ghee vbene ẹmwẹ akhasẹ nọ rre Matiu 24:14 ya fi ẹdagbọn okpia ọkpa werriẹ hẹ.
“Ẹmwẹ Baseball Na Gbe Ẹre I Te Wa Mu Yan Uhunmwu!” (The Watchtower No. 3 2017)
Vbe ima ya rẹn hẹ wẹẹ, ẹmwẹ akhasẹ nọ rre ebe Daniẹl uhunmwu ẹnrẹn 4 dekaẹn Arriọba Osanobua?
“De Ẹghẹ Ne Arriọba Osanobua Ya Suẹn Gha Khaevbisẹ? (Abọ 1)” (The Watchtower, October 1, 2014)
Vbọ rhie ẹre ma wẹẹ, ukpo 1914 ẹre “igba ihinrọn” ne ebe Daniẹl uhunmwu ẹnrẹn 4 guan kaẹn sẹ ufomwẹ?
“De Ẹghẹ Ne Arriọba Osanobua Ya Suẹn Gha Khaevbisẹ? (Abọ 2)” (The Watchtower, November 1, 2014)
a Ya ghee uhunmwuta eva nokiekie ni rre abọ ọghe Ruẹ Sayọ vbe iruẹmwi na.
-
-
Emwi Ne Arriọba Osanobua Khian RuSọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 33
Emwi Ne Arriọba Osanobua Khian Ru
Arriọba Osanobua kha nẹ. Ọ gha rherhe do fi emwi hia werriẹ vbe agbọn na. Gia ziro yan emwi eso ne u gha sọyẹnmwẹ ọnrẹn vbe Arriọba na.
1. De emwi ne Arriọba Osanobua khian ru, ne ọfurre kevbe ibuohiẹn ata gha rre agbọn na?
Jesu, nọ re Ọba ọghe Arriọba Osanobua, gha fuẹn emwa dan kevbe arriọba emwa nagbọn vbe okuo Amagẹdọn. (Arhie Maan 16:14, 16) Ẹghẹ nii, ẹmwẹ akhasẹ na, ghi gele mwẹ amusẹ: “Vbe ọ ma he kpẹẹ wan, a gha ho emwa dan bẹkun.” (Psalm 37:10) Arriọba na, ẹre Jesu khian ya ru ẹre, ne ọfurre kevbe ibuohiẹn ata gha rre otagbọn na hia.—Tie Aizaia 11:4.
2. De vbene emwi khian gha ye hẹ vbe a ghaa ru ahoo ọghe Osanobua nẹ vbe agbọn na?
Vbe Arriọba Osanobua, “emwa esi ẹre ọ ra yin uhunmwu otagbọn na, iran ghi vbe gha rrọọ vbe etẹbitẹ.” (Psalm 37:29, NW) Muẹn roro vbene ọ khian gha ye hẹ, vbe u ghaa rre agbọn ne emwa hia na re emwa esi, iran ghi hoẹmwẹ e Jehova, iran ghi vbe hoẹmwẹ egbe! Ai ghi khuọnmwi, emwa hia ghi gha rrọọ vbe etẹbitẹ.
3. De emwi ne Arriọba Osanobua khian ru vbe a gha fuẹn emwa dan nẹ?
A gha ghi fuẹn emwa dan nẹ, Jesu ghi kha zẹvbe Ọba vbe ukpo 1,000. Vbe uwu ẹghẹ nii, irẹn kevbe arhunmwu 144,000 ni khian deba re kha, ghi ru iyobọ ne emwa nagbọn ya do khian emwa ni gbae. Vbe ufomwẹ ukpo 1,000 na, Jesu ghi werriegbe mu nene Arriọba ye Erhae obọ. Sokpan vbe ẹghẹ na kha na, otagbọn hia khian e paradais nẹ. Emwa ni khian vbe gha rre agbọn vbe ẹghẹ nii, ghi gha sọyẹnmwẹ rhunmwuda iran lele uhi e Jehova. Ẹghẹ nii, eni e Jehova ghi gele do khian “nọhuanrẹn” vbe odẹ na ma he miẹn egbọre ẹdẹ. (Matiu 6:9, 10) Ọ ghi gele do vẹ ne emwa hia rẹn wẹẹ, Ọba nọ mwẹ ekhọe esi kevbe nọ ya obọ esi mu emwa nọ kha yan, ẹre Jehova khin. E Jehova ghi wabọ Esu rua, kevbe avbe ugbogiorinmwi kẹ kevbe emwa ọvbehe ni sọtẹ daa ọdakha ọghẹe. (Arhie Maan 20:7-10) Afiangbe etẹbitẹ, ẹre emwa khian gha sọyẹnmwẹ ọnrẹn vbe Arriọba Osanobua.
GUALỌ OTỌ RE SAYỌ
Gia ziro yan evbọzẹe ne ima gha na sẹtin mu ẹtin yan Osanobua wẹẹ, ọ gha ya Arriọba ọghẹe mu eyan hia ni rre Baibol sẹ vbe odaro.
4. Arriọba Osanobua gha wabọ arriọba emwa nagbọn rua
“Agbọn na ne emwa eso na wa mwẹ ẹtin, emwa ọvbehe ghi gha sẹ usẹ lele iran.” (Asan-Ibo 8:9) E Jehova gha ya Arriọba ọghẹe wabọ re rua, ọlọghọmwa hia ne uyinmwẹ agbọmwa ekueku he si.
Tie Daniẹl 2:44 kevbe 2 Tẹsalonaika 1:6-8, iyeke ọni, uwa ghi ziro yan avbe inọta na:
De emwi ne Jehova kevbe Ovbi ẹre ighẹ Jesu khian ru arriọba emwa nagbọn re kevbe emwa ni ye iran ike?
De emwi ne u he ruẹ vbekpa e Jehova kevbe Jesu, nọ ya ruẹ mwẹ ilẹkẹtin wẹẹ, iran gha bu ohiẹn ata vbe odaro?
5. Jesu ẹre ukpo Ọba gele khẹke
Zẹvbe Ọba ọghe Arriọba Osanobua, Jesu gha ru iyobọ ne emwa ne irẹn kha yan vbe odẹ ughughan. Kpee VIDIO na, ne u ya rẹn vbene Jesu he ya rhie ẹre ma hẹ wẹẹ, irẹn hoo ne irẹn ru iyobọ ne emwa kevbe wẹẹ, Osanobua rhie ẹtin nẹẹn nọ khian ya ru vberriọ.
Emwi ne Jesu ru vbe ọ rre agbọn na, ya ima rẹn emwi ne Arriọba Osanobua khian ru ne emwa nagbọn. Vbe uwu avbe afiangbe na gbẹnnẹ ladian na, de ne uwẹ wa mobọ ya aro yi? Tie avbe ako e Baibol ni ginna avbe afiangbe na.
VBE JESU RRE AGBỌN NA, . . .
JESU GHA KE ẸRINMWI . . .
ọ keghi dobọ ogbigbi ẹhoho yi.—Mak 4:36-41.
dọlọe yi, emwi hia ni te rhia vbe otagbọn na.—Aizaia 35:1, 2.
ọ keghi rhie evbare ne emwa nibun vbe odẹ ọghe ọyunnuan.—Matiu 14:17-21.
wabọ ohanmwẹ rua vbe otagbọn na.—Psalm 72:16.
ọ keghi mu emwa nibun ni khuọnmwi egbe rran.—Luk 18:35-43.
ru ẹre, ne egbe rran emwa hia.—Aizaia 33:24.
ọ keghi huẹn emwa ni wulo kpaegbe.—Luk 8:49-55.
wabọ uwu hin agbọn na rre, ọ ghi vbe huẹn emwa ni wulo kpaegbe.—Arhie Maan 21:3, 4.
6. Arriọba Osanobua gha ya agbọn maan emwa hia vbe odaro
Arriọba na gha muẹn sẹ, emwamwa ne Osanobua mwẹ ne emwa nagbọn ke otọ gha dee. Emwa nagbọn gha sọyẹnmwẹ arrọọ ọghe etẹbitẹ vbe paradais vbe otagbọn na. Kpee VIDIO na, ne u miẹn vbene Jehova ya loo e Jesu ya mu emwamwa ọghe irẹn sẹ hẹ.
Tie Psalm 145:16, iyeke ọni, uwa ghi ziro yan inọta na:
Vbọ ye ruẹ hẹ vbe ekhọe ne u na rẹn wẹẹ, e Jehova gha ‘ya ẹko ẹre vuọn iran’ ighẹ emwi hia ne evbayi hia gualọ?
EMWA ESO KEGHI KHA WẸẸ: “Ma hia gha ku obọ kugbe, ma gha sẹtin sọfurre ye ọlọghọmwa ọghe agbọn na.”
De ọlọghọmwa ne Arriọba Osanobua khian sọfurre yi, ne arriọba emwa nagbọn i sẹtin sọfurre yi?
OLIKA ẸMWẸ
Arriọba Osanobua gha ru emwi hia ne Osanobua mwẹ vbe orhiọn. Ọ gha fi agbọn na werriẹ khian e paradais, nọ khian vuọn ne emwa esi ni khian gha ga e Jehova vbe etẹbitẹ.
Ogbewerriẹ
De vbene Arriọba Osanobua khian ya ya eni Osanobua khian nọhuanrẹn hẹ?
Vbọzẹ ne ima gha na sẹtin yaeyi wẹẹ, Arriọba Osanobua gha mu eyan hia ni rre Baibol sẹ?
Vbe uwu emwi hia ne Arriọba Osanobua khian ru ne ima, de nọ yẹẹ ruẹ sẹ, ne uwẹ wa mobọ ya aro yi?
RUẸ SAYỌ
Gualọ otọ emwi na ya Amagẹdọn kha.
Ruẹ vbekpa emwi ni khian sunu vbe uwu ẹghẹ “orueghe nọkhua” ne Jesu guan kaẹn.—Matiu 24:21.
Ghee vbene avbe ẹgbẹe gha ya sẹtin muẹn roro hẹ, afiangbe ne iran khian sọyẹnmwẹ ọnrẹn vbe Arriọba Osanobua.
Vbe okha nọ mwẹ uhunmwuta na, “Inọta Nibun Kegha Kpokpo Mwẹ Vbe Orhiọn,” u gha miẹn vbene okpia ọkpa nọ ghaa sọtẹ daa arriọba, ya do miẹn ewanniẹn ọghe avbe inọta ni ghaa kpokpo ẹre vbe orhiọn.
“E Baibol Fi Arrọọ Werriẹ” (The Watchtower, January 1, 2012)
-