Vbene Ahoẹmwọmwa Ya Ru Iyobọ Ne Ima, Ne Ohan Ghẹ Gha Mu Ima

1. De emwi eso nọ ya emwa mu ohan?

GI IMA guan kaẹn emwi nọ sunu daa etẹn ima eso. Ọtẹn Nokpia Nestor kevbe ọvbokhan rẹn ighẹ María, kegha hoo ne iran ya ga vbe eke na na gualọ iyobọ etẹn.b Ọna rhie ma wẹẹ, te iran khian hia ne iran ya arrọọ ọghe iran khian ne khuẹrhẹ, ne iran mieke na sẹtin ru vberriọ. Sokpan ohan kegha mu iran wẹẹ, iran i khian gha ghọghọ deghẹ iran na ya arrọọ ọghe iran khian ne khuẹrhẹ. Otọ na na mu awua ye iwinna ima ẹre Biniam na khian Osẹe Jehova, rhunmwuda ọni ohan kegha muẹn wẹẹ, a gha vbe zẹ irẹn kpokpo. Ọ na vbe gha muẹn roro, emwi ne ẹgbẹe ọre gha ru, vbe iran gha họn wẹẹ, Osẹe Jehova ẹre irẹn ghi khin. Ọna ẹre ọ ghi ya ohan muẹn sẹ. Ọbo ebo keghi tama Ọtẹn Nokhuo Valérie wẹẹ, ọ khuọnmwi emianmwẹ na tie ẹre cancer, e cancer na tua sẹrriọ wẹẹ, ọ gha lọghọ a ke sẹtin gbe ẹre, na kha na, ọ ma vbe miẹn ọbo ebo nọ mu egbe nọ khian ya mwa ẹre egbe vbene ẹi khian na mu esagiẹn ye ọre egbe. Ọna keghi ya e Valérie gha roro ẹre wẹẹ, irẹn i khian miẹn uhunmwu.

2. Vbọzẹ nọ na khẹke ne ima gha begbe?

² Emwi vbenian vbe ya uwẹ mu ohan ra? Ọ wa ya ima nibun mu ohan. Adeghẹ ima ma begbe, ọna sẹtin ya ima ru emwi nọ ma khẹke, nọ gha ya ima khian rree ne Jehova. Ọna ọre emwi ne Esu wa gualọ zẹẹ. Esu vbe hia nọ ya ohan gha mu ima, ne ima mieke na rhie owẹ gberra iyi ọghe Jehova. Ọkpa vbe iyi na ọre iwinna ikporhu iyẹn nọ maan. (Arhie 12:17) Ọmwa nọ mwẹ ekhọe atosi ẹre Setan khin, erriọ vbe ya mwẹ ẹtin. Sokpan, u gha sẹtin mudia gbain, ne obọ Esu ghẹ vba ruẹ. Odẹ vbo?

3. Vbọ khian ru iyobọ ne ima, ne ima ghẹ gha mu ohan?

³ Ma gha gele yayi wẹẹ e Jehova hoẹmwẹ ima, kevbe wẹẹ, ọ rre ima iyeke, obọ Esu i sẹtin vba ima. (Psm 118:6) Vbe igiemwi, ọmwa nọ gbẹn Psalm 118 wa miẹn ọlọghọmwa nibun nọ ya iro han rẹn. Ọ wa gha mwẹ eghian nibun, uhiẹn emwa eso ni hin usi wa vbe gha gu ẹre ru eghian (uviẹn 9, 10). Ẹghẹ eso vbe gha rrọọ nọ ya kakabọ gha si osi (uviẹn 13). Ọ vbe gha mwẹ asẹ ọkpa ne Jehova ya gbe ẹre hin ọkhọ rre (uviẹn 18). Ọrheyerriọ, ọsihuan na, na ye kha wẹẹ: “Ohan i ghi mu mwẹ.” Vbọ ru iyobọ nẹẹn ne orhiọn ọnrẹn na sotọ? Ọ rẹnrẹn wẹẹ, e Jehova wa kakabọ hoẹmwẹ irẹn agharhemiẹn wẹẹ, ọ gbe irẹn hin ọkhọ rre. Ọ wa gha mwẹ ilẹkẹtin wẹẹ, e Jehova mu egbe nọ ya ru iyobọ ne irẹn vbe uwu ọlọghọmwa ne irẹn rhirhi gha ye, rhunmwuda ọ hoẹmwẹ irẹn.​—Psm 118:29.

4. De emwi eso ne ima i khian mu ohan rẹn deghẹ ima na gele yayi wẹẹ e Jehova hoẹmwẹ ima?

⁴ Ọ khẹke ne dọmwadẹ ima gele yayi wẹẹ, e Jehova hoẹmwẹ ima. Ọ mwẹ emwi eha nọ mobọ ya ohan mu emwa, (1) ohan ọghe vbene a khian ya kpemehe ne ẹgbẹe ọghomwa hẹ, (2) ohan ọghe emwa nagbọn, kevbe (3) ohan ọghe uwu. Sokpan deghẹ ima na gele yayi wẹẹ e Jehova hoẹmwẹ ima, ohan ọghe avbe emwi na, i khian gha mu ima. Rhunmwuda ne etẹn ne ima guan kaẹn vbe okhuẹn nokaro ban na yayi wẹẹ, e Jehova hoẹmwẹ iran, ẹre ọ zẹe ne ohan ma na ghi gha mu iran.

OHAN ỌGHE VBENE A KHIAN YA KPEMEHE NE ẸGBẸE ỌGHOMWA HẸ

5. De emwi eso nọ gha sẹtin ya uhunmwuta ẹgbẹe gha si osi? (Ghee efoto nọ rre odaro ebe na.)

⁵ Uhunmwuta ẹgbẹe nọ re Ovbiotu e Kristi rẹnrẹn wẹẹ, ọ khẹke ne irẹn kpemehe ne ẹgbẹe ọghe irẹn. (1 Tim 5:8) Adeghẹ uhunmwuta ẹgbẹe ẹre u khin, ẹi mwẹ u ma gha fian afianma wẹẹ, a sẹtin rhie ruẹ obọ sotọ vbe iwinna, vbe uwu ẹghẹ emianmwẹ dan na. U sẹtin gha si osi wẹẹ, vbua khian ya sẹtin kpemehe evbare ẹdẹ ne ẹgbẹe ruẹ hẹ, vbua khian na miẹn igho ne u khian ya ha osa igho owa? U sẹtin vbe gha mu ohan wẹẹ, a gha ghi rhie ruẹ obọ sotọ vbe iwinna, u i khian ghi miẹn iwinna ọvbehe. Vbe na ghee Nestor kevbe María, na ka ya unu kaẹn sin, u sẹtin gha roro ẹre wẹẹ, agbọn gha wa lọghọ ruẹ deghẹ u na ya arrọọ ruẹ khian ne khuẹrhẹ. E Setan ya iziro vbenian si emwa nibun hin ugamwẹ e Jehova rre nẹ.

6. De iziro ne Setan hoo ne ima gha mwẹ?

⁶ E Setan hoo ne ima gha roro ẹre wẹẹ, e Jehova i gbaroghe ima, kevbe wẹẹ, ẹi khian ru iyobọ ne ima ya kpemehe ne ẹgbẹe ọghe ima. Rhunmwuda ọni, ma sẹtin gha roro ẹre wẹẹ, ọ khẹke ne ima ru emwi eso na ghẹ mieke na rhie ima obọ sotọ vbe iwinna, ọ gha khọnrẹn wẹẹ, ọ gha ya ima rhie owẹ gberra ilele ni rre Baibol.

7. De emwi ne Jesu tama ima?

⁷ E Jesu nọ re ọmwa nọ ghi rẹn Erhae sẹ, gi ima rẹn wẹẹ Osanobua ne ima ga “rẹn emwi ne [ima] gualọ, [ima] ke nọ rẹn.” (Mat 6:8) Vbe deba ọni, e Jesu rẹnrẹn wẹẹ, e Jehova mu egbe nọ khian ya kpemehe emwi ne ima gualọ ne ima. Zẹvbe Ivbiotu e Kristi, ivbi Osanobua ẹre ima khin, irẹn ọre Uhunmwuta ẹgbẹe ọghe ima. Rhunmwuda ọni, ma gha sẹtin gha mwẹ ilẹkẹtin wẹẹ, ọ gha ru emwi ne irẹn tama avbe uhunmwuta ẹgbẹe vbe ebe 1 Timoti 5:8.

8. (a) De emwi nọ khian ru iyobọ ne ima, ne ohan ọghe vbene ima khian ya kpemehe ne ẹgbẹe ọghe ima ghẹ gha mu ima? (Matiu 6:​31-33) (b) Vbe ima khian ya ya egbe taa ọdọ vbe amwẹ na, nọ mu evbare gie ọtẹn nokhuo ọkpa, zẹvbe nọ rre efoto na?

⁸ Deghẹ ima na gele yayi wẹẹ, e Jehova hoẹmwẹ ima kevbe ẹgbẹe ọghe ima, ọ gha ya ima gha mwẹ ilẹkẹtin wẹẹ, ọ gha kpemehe emwi ne ima gualọ. (Tie Matiu 6:​31-33.) E Jehova wa hoo nọ kpemehe emwi ne ima gualọ. Vbene ẹmwata, Osa nọ mwẹ ahoẹmwọmwa kevbe nọ zẹ emwi obọ ẹre Jehova wa khin! Vbe Jehova yi uhunmwu otagbọn na, ẹi re emwi na ya yin agbọn ọkpa ẹre ọ yi, ọ vbe yi emwi nọ gha ya emwa nagbọn gha rri orhiẹnrhiẹn agbọn. (Gẹn 2:9) Ọ gha khọnrẹn wẹẹ emwi kherhe ẹre ima mwẹ ne ima ya gaga egbe, ọ khẹke ne ima kọe ye orhiọn wẹẹ, obọ e Jehova ẹre emwi hia ne ima mwẹ ke rre. (Mat 6:11) Ọ vbe khẹke ne ima kọe ye orhiọn wẹẹ, afiangbe ne ima khian miẹn vbe obọ e Jehova, maan sẹ emwi ne ima rhirhi sẹ rae, kevbe wẹẹ, ọ gha vbe ya arrọọ ọghe etẹbitẹ san ima ẹse vbe odaro. E Nestor kevbe María keghi do bẹghe ẹre wẹẹ, ẹmwata ẹre ọna wa khin.​—Aiz 65:​21, 22.

9. De emwi ne ima miẹn ruẹ vbe okha ọghe Nestor kevbe María?

⁹ E Nestor vbe María ni rre Colombia wa gha mwẹ emwi hia ne iran gualọ, iran mwẹ owa obọ iran, iran vbe mwẹ iwinna nọ maan. Iran khare wẹẹ: “Ma kegha hoo ne ima ya arrọọ ọghe ima khian ne khuẹrhẹ, ne ima mieke na rhiegbe ye iwinna ugamwẹ sayọ, sokpan ohan kegha mu ima wẹẹ, ma i khian gha ghọghọ deghẹ ima i miẹn igho loo sẹ omwa.” Vbọ ghi ru iyobọ ne iran? Iran kegha muẹn roro, odẹ ughughan ne Jehova he ya rhie ẹre ma wẹẹ, irẹn hoẹmwẹ iran. Rhunmwuda ne iran na yayi wẹẹ e Jehova gha gbaroghe iran, iran keghi sẹ iwinna ne iran na miẹn igho ọrhẹnrhẹn rae. Iran keghi khiẹn owa ọghe iran, iran na ghi si gha rrie eke na na gualọ iyobọ etẹn vbe ẹvbo nii. Iran zẹdẹ gbe I ma rẹn ye emwi ne iran ru na ra? E Nestor khare wẹẹ: “Ma keghi do bẹghe ẹre wẹẹ, ẹmwata ẹre ẹmwẹ nọ rre ebe Matiu 6:33 wa khin. Ma wa mwẹ emwi hia ne ima gualọ. Ọyẹnmwẹ nọ ghi sẹ ima nian i gia gie!”

OHAN ỌGHE EMWA NAGBỌN

10. Vbọzẹ ne emwa nagbọn na mu ohan egbe?

¹⁰ Ẹi re eban emwa nagbọn ke suẹn gha ru egbe khọọ. (Asan 8:9) Vbe igiemwi, emwa ni rre asẹ keghi loo asẹ ne iran mwẹ ghee ihan, avbe izigan keghi yin uyinmwẹ atosi, emwa eso vbe rre owebe, ni vbe ya obọ yẹnyẹn ihua iran mu otọ, iran ghi vbe gha rhovbiẹ iran, emwa eso vbe ya obọ dan mu emwa iran vbe uwu ẹgbẹe. Ẹi khabe ne emwa na mu ohan egbe! Sokpan, ma ghaa mu ohan emwa nagbọn, e Setan sẹtin la evba la ima egbe. Odẹ vbo?

11-12. De vbene Esu ya loo ohan ọghe emwi ne emwa gha ru ima he, ya mu idobo ye ima egbe?

¹¹ E Setan hoo ne ima gha mu ohan emwa nagbọn sẹrriọ wẹẹ, ima i ghi họn ẹmwẹ ne Jehova, ma ghi vbe dobọ ikporhu yi. E Setan vbe loo avbe arriọba ya kpokpo ima, iran ghi vbe mu awua ye iwinna ima. (Luk 21:12; Arhie 2:10) Vbe agbọn Esu ne ima ye na, emwa nibun keghi vbe na iyẹn ohoghe vbekpa Avbe Osẹe Jehova. Emwa nibun ni ya iyẹn ohoghe na yi, sẹtin gha ya ima gbogiẹ, iran sẹtin kue gha gu ima khọn. (Mat 10:36) Emwi ne Esu ru na i zẹdẹ kpa ima odin hiehie, rhunmwuda, ọ ka ru ẹre nẹ vbe ẹghẹ ọghe avbe ukọ ọghe Jesu.​—Iwinna 5:​27, 28, 40.

¹² Gberra ne ima guan kaẹn na, odẹ ọvbehe ye rrọọ ne Esu ya zẹ eguọmwadia e Jehova kpokpo. Emwa eso keghi mu ohan rhunmwuda iran ma rẹn emwi ne ẹgbẹe iran khian ru vbe iran gha họn wẹẹ, iran khian Osẹe Jehova. Nọ ne iran, a wa ya ugbemwẹ yan iran ẹre ọ maan sẹ wẹẹ, ẹgbẹe ọghe iran gbodan ye ugamwẹ ọghe iran. Iran kakabọ hoẹmwẹ ẹgbẹe ọghe iran, iran vbe hoo ne iran do ga e Jehova. Ọ wa da iran vbe emwa iran vbe uwu ẹgbẹe ghaa ta ẹmwẹ dan vbekpa Osanobua kevbe Avbe Osẹe Jehova. Ẹmwata nọ wẹẹ, Osẹe Jehova ẹre emwa eso ni te ka gha gbodan ghee etẹn iran vbe uwu ẹgbẹe ghi khin nian. Sokpan de emwi ne ima gha ru deghẹ ẹgbẹe ọghe ima na kha wẹẹ, ọ ma ghi kan iran kan ima rhunmwuda wẹẹ, Osẹe Jehova ẹre ima ghi khin?

13. Ma gha gele yayi wẹẹ e Jehova hoẹmwẹ ima, vbọ khian ya ru iyobọ ne ima hẹ, deghẹ ẹgbẹe ọghe ima na yangbe ima? (Psalm 27:10)

¹³ Ẹmwẹ nọ rre ebe Psalm 27:​10, gha wa fu ima ẹko rre deghẹ ima na gha muẹn roro. (Tie ẹre.) Deghẹ ima na gha yerre wẹẹ, e Jehova kakabọ hoẹmwẹ ima, ohan i khian gha mu ima vbe emwa ghaa kpokpo ima. Ma vbe rẹn wẹẹ, ẹi mwẹ ọ ma san ima ẹse ye izinegbe ne ima mwẹ. E Jehova gha kpemehe emwi na ya yin agbọn ne ima, ọ gha fu ima ẹko rre, ọ gha vbe ru iyobọ ne ima, ne ima mieke na sikẹ ọre sayọ. Ọmwa ọvbehe i rrọọ nọ gha sẹtin ru ena hia ne ima! E Biniam ne ima ka guan kaẹn sin, keghi do bẹghe ẹre wẹẹ, ẹmwata ẹre ọna wa khin.

14. Vbe ima miẹn ruẹ vbe okha ọghe Biniam?

¹⁴ E Biniam ye khian Osẹe Jehova, agharhemiẹn wẹẹ, ọ rẹnrẹn wẹẹ irẹn gha miẹn ukpokpo nibun. E Biniam wa rẹn wẹẹ, e Jehova hoẹmwẹ irẹn. De vbene ọna ya ru iyobọ nẹẹn hẹ, ne ohan ọghe emwa nagbọn ghẹ gha muẹn. Ọ keghi kha wẹẹ, “ukpokpo ne I miẹn vbe obọ arriọba i re na na. Sokpan emwi nọ ghi ya ohan mu mwẹ sẹ ọre emwi ne ẹgbẹe mwẹ gha ru, vbe iran gha họn wẹẹ I khian Osẹe Jehova. I rẹnrẹn wẹẹ, ọ gha wa ya ohu mu erha mwẹ nẹi ga e Jehova, kevbe wẹẹ, emwa eso vbe uwu ẹgbẹe mwẹ ghi do gha ghee mwẹ sila sila.” Vbọrhirhighayehẹ, e Biniam kegha mwẹ ilẹkẹtin wẹẹ, ẹi mwẹ e Jehova ma gbaroghe emwa nọ hoẹmwẹ ọnrẹn. E Biniam na vbe kha wẹẹ: “I keghi muẹn roro vbene Jehova he ya ru iyobọ ne emwa nẹi miẹn igho loo sẹ omwa, emwa na khẹko ẹre, kevbe emwa na zẹ kpokpo. I rẹnrẹn wẹẹ, I gha rhikhan mu e Jehova, ọ gha wa fiangbe mwẹ. Ẹi re avbiẹ inugba iran mu mwẹ khui, iran na vbe rriọ mwẹ oya. Vbe uwu ẹghẹ na, I keghi do bẹghe ẹre wẹẹ, e Jehova i sẹ nọ re ọghẹe rae deghẹ iran na mudia gbain.” Ena hia keghi do ya e Biniam rẹn wẹẹ, Erha ne Erha ẹre Jehova khin, erriọ eguọmwadia e Jehova vbe ya mudia nẹẹn zẹvbe ẹgbẹe.

OHAN ỌGHE UWU

15. Vbọzẹ ne ohan uwu na mu ima?

¹⁵ E Baibol gi ima rẹn wẹẹ eghian ẹre uwu khin. (1 Kọr 15:​25, 26) Ma i zẹdẹ hoo ne ima ya ehọ họn ẹmwẹ uwu, ọna ẹre ọ si ẹre ne ohan na mu ima vbe ima ra emwa ne ima hoẹmwẹ ọnrẹn ghaa khuọnmwi. Vbọzẹ ne ohan uwu na mu ima? Rhunmwuda e Jehova ma te yi ima ne ima gha wu, ọna ẹre ọ si ẹre ne ima na hoo ne ima gha rrọọ vbe etẹbitẹ. (Asan 3:11) Ẹi re emwi dan deghẹ ima na gha mu ohan uwu, rhunmwuda ọ gha sẹtin ru iyobọ ne ima, ne ima ghẹ ru emwi nọ gha mu arrọọ ọghe ima ye ikpadede. Vbe igiemwi, ọna sẹtin ru iyobọ ne ima ya gha rri evbare vbe nọ khẹke, ma ghi vbe gha ku iku isasegbe. Ma ghaa khuọnmwi, ọ sẹtin vbe ya ima bu ọbo ebo, ma ghi vbe rri ukhunmwu nọ khẹke. Ọ ghi vbe ya ima gban egbe ne emwi ke emwi nọ gha mu arrọọ ọghe ima ye ikpadede.

16. De vbene Setan ya ya ẹmwẹ uwu kpe ohan ye ima egbe hẹ?

¹⁶ E Setan rẹnrẹn wẹẹ, ima i ya arrọọ ọghe ima ku. Ọ khare wẹẹ, ima mu egbe ne ima ya ru emwi ke emwi ne ima mieke na gha rre agbọn, uhiẹn ya sẹ egbe emwi nọ gha ya ima khian oghian e Jehova. (Job 2:​4, 5) Ohoghe ẹre ọna wa khin! Sokpan, rhunmwuda ne Setan na re ọmwa “nọ khaemwisẹ yan uwu,” ọ keghi ya ẹmwẹ uwu kpe ohan ye ima egbe, ne ima mieke na sẹ e Jehova rae. (Hib 2:​14, 15) Ugbẹnso, emwa eso ne Setan loo, ghi gha yan wẹẹ, iran gha gbe eguọmwadia e Jehova rua, deghẹ iran ma na siẹn ugamwẹ ọghe iran. Ugbẹnso, ma sẹtin gha khuọnmwi emianmwẹ nọ wegbe, e Setan sẹtin wa loo ẹkpotọ na, ọ ghi hia nọ ya ima ru emwi nọ gha sọnnọ e Jehova. Avbe ọbo ebo kevbe emwa ima vbe uwu ẹgbẹe nẹi Osẹe Jehova, sẹtin gha kpikpi ima ne ima mu esagiẹn ye egbe, vbene ima na rẹn wẹẹ ima gha ru vberriọ te ima rra uhi Osanobua. Ọmwa sẹtin vbe gha kpikpi ima, ne ima gbaroghe egbe ima vbe odẹ nọ ma gua ilele ọghe Baibol ro.

17. Zẹvbe nọ rre ebe Rom 8:​37-39, vbọzẹ nọ ma na khẹke ne ima gha mu ohan uwu?

¹⁷ Ẹmwata nọ wẹẹ, ai miẹn ọmwa nọ hoo nọ wu, sokpan ma rẹnrẹn wẹẹ, emwi rhọkpa i khian sẹtin wannọ ima hin ahoẹmwọmwa e Jehova rre, ya sẹ egbe uwu. (Tie Rom 8:​37-39.) Avbe ọse ọghe Jehova gha wu, ẹi mianmian iran, ọ ghi yevbe na miẹn wẹẹ te iran wa ye rre agbọn. (Luk 20:​37, 38) Ọ wa hoo nọ huẹn iran kpaegbe. (Job 14:15) Ẹse nọkhua ẹre Jehova ru ne ima, ne ima mieke na “gha mwẹ arrọọ ọghe etẹbitẹ.” (Jọn 3:16) Ma rẹnrẹn wẹẹ, e Jehova kakabọ hoẹmwẹ ima, erriọ vbe ya gbaroghe ima. Deghẹ ima na gha khuọnmwi ra deghẹ emwa na gha ya ẹmwẹ uwu kpe ohan ye ima egbe, ọ ma khẹke ne ima sẹ e Jehova rae, ẹghẹ na ẹre ọ khẹke ne ima ya rhikhan mu e Jehova, rhunmwuda ọ gha rhie ẹrhiọn kevbe ẹwaẹn ne ima, ọ ghi vbe fu ima ẹko rre. Erriọ e Valérie vbe ọdafẹn ọnrẹn wa ru ẹre zẹẹ.​—Psm 41:3.

18. De emwi ne ima miẹn ruẹ vbe okha ọghe Valérie?

¹⁸ Vbe ẹghẹ ne Valérie na gha rre ukpo 35, ọbo ebo keghi tama rẹn wẹẹ, ọ khuọnmwi emianmwẹ nọ wegbe, na tie ẹre cancer. Gia guan kaẹn vbene ahoẹmwọmwa nọ mwẹ ne Jehova ya ru iyobọ nẹẹn, nẹ ghẹ ghi mu ohan uwu. Ọ wẹẹ: “Vbe imẹ vbe ọdafẹn mwẹ ghi họn wẹẹ I mwẹ cancer, iro na wa han ima. Ọbo ebo na tama mwẹ wẹẹ, a ma na mwaan mwẹ egbe, I i khian miẹn uhunmwu. I gu ọbo ebo nibun guan, sokpan iran wẹẹ I ma na mu esagiẹn iran i mwa mwẹ egbe. Ohan na wa gha mu mwẹ. Sokpan rhunmwuda ne I na rẹn wẹẹ, Osanobua gbe uhi yọ, ne ima ghẹ mu esagiẹn, I ma kue ne iran mu esagiẹn mẹ! Ke na ya biẹ mwẹ, ẹre Jehova ke rhie ẹre ma wẹẹ irẹn hoẹmwẹ mwẹ. Te ẹkpotọ ghi kie mẹ nian, ne I ya rhie ẹre ma wẹẹ I hoẹmwẹ ọnrẹn. Ẹghẹ ke ẹghẹ ne avbe ọbo ebo ya tama mwẹ wẹẹ, te emianmwẹ mwẹ ghi tua yọ, I ghi tama egbe mwẹ wẹẹ, I i khian ya ekhue mu e Jehova. Sokpan vbe okiekie a keghi mwaan mwẹ egbe vbene I ma na mu esagiẹn. Agharhemiẹn wẹẹ, I zẹdia khuọnmwi, e Jehova ye ru iyobọ ne imẹ vbe ọdafẹn mwẹ ya sẹtin zinegbe. Vbe igiemwi, vbe iko ọkpa ne ima do vbe ufomwẹ uzọla, I ke rẹn wẹẹ I mwẹ cancer, ma keghi ruẹ ebe Owa Ọkhẹ ọkpa nọ khare wẹẹ, ‘Meeting Today’s Adversities With Courage.’c Ebe Owa Ọkhẹ na wa gele ru iyobọ ne ima. Te ima wa gha tie ẹre yan egbe yan egbe. Egbe avbe uhunmwuta vbenian ne ima ghaa tie, iko kevbe ikporhu na yo vbe ẹghẹ hia wa gele ru iyobọ ne ima, ne ima ghẹ gha si osi gbe kevbe ne ima sẹtin gha ru azẹ nọ khẹke.”

EMWI NỌ GHA RU IYOBỌ NE IMA, NE IMA GHẸ GHA MU OHAN

19. De emwi nọ khian sunu vbe nẹi khian ghi kpẹẹ gbe?

¹⁹ E Jehova ru iyobọ ne etẹn nibun nẹ vbe uhunmwu otagbọn hia ya sẹtin la ọlọghọmwa ne iran ye gberra, kevbe ne iran vbe ya ekhue mu Esu. (1 Pit 5:​8, 9) Uwẹ gha vbe sẹtin ru vberriọ. Vbe nẹi khian ghi kpẹẹ gbe, e Jehova gha loo e Jesu kevbe emwa ni khian deba ẹre kha ya “fuẹn iwinna Esu rua.” (1 Jọn 3:8) Vbe iyeke ọni, eguọmwadia Osanobua ni rre uhunmwu otagbọn na ghi gha re nọ “fe vbe obọ ukpokpo kevbe ohan.” (Aiz 54:14; Mai 4:4) Sokpan ọ ghi te sẹ ẹghẹ nii, ọ khẹke ne ima hia vbe odẹ ke odẹ ne ima ghẹ ghi gha mu ohan.

20. De emwi nọ khian ru iyobọ ne ima ya mu ohan fua?

²⁰ Ọ khẹke ne ima gha mwẹ ilẹkẹtin nọ wegbe wẹẹ, e Jehova hoẹmwẹ ima kevbe wẹẹ, ọ gha gbaroghe emwa rẹn. Emwi nọ gha ya ima gha mwẹ ilẹkẹtin na, ọre deghẹ ima na gha muẹn roro vbene Jehova he ya gbogba ga eguọmwadia ẹre vbe ẹghẹ nọ gberra, kevbe deghẹ ima na vbe gha tama emwa ọvbehe vbekpa ẹre. Ọ ma khẹke ne ima vbe mianmian vbene Jehova he ya ru iyobọ ne ima hẹ, vbe ima rre uwu ọlọghọmwa. Vbe ẹtin e Jehova, ma gha sẹtin mudia gbain vbene ohan i na mu ima!​—Psm 34:4.