1 Peter

21 Niitsííwa, ámohka mohsokóyi kitsitapínihkatsspoaawa, tská Christ iihtókohkoyiwa kiistówaawa, iitskíma kitááhkánistoʼtssatssapaatooʼsoaawayi otánistsíksikkaʼyihpi. 22 Máátsípahtsaʼpssiwa, tsááhtaoʼ máátohtsípsstsiksistotakiwa maoóyi. 23 Otaʼyáóhkookssitsipssatahsi, máátssksipoʼtóksiʼpoyiwa. Otaʼyáókohkoyssi, máátsitstsiiʼpa ohkáámatsiiwa, nóóhkomaanistáítapomatskaohsiwa ánnahk Tókskamma áíkamoʼtokakihtsimaawa. 24 Iihtáyiistahtooma kitsípahtsaʼpssinnoonistsi otáíʼtohkitsípoʼtsiʼsi oistómi miistsísi, ááhkamáʼpohkitsíístapohtooʼsi kitsípahtsaʼpssinnoonistsi ki ááhkáíkamoʼtsipaitapiiyoʼsi. Ki “kítohtssokináápiotsspoaawa otsskítsistotoahsi.”