Tsá Anistápiiwa Iihtsipáítapiiyoʼpa Otokákihtsimaani?

1. Tsá anistápiiwa Iihtsipáítapiiyoʼpa Otokákihtsimaani?

Iihtsipáítapiiyoʼpa Otokákihtsimaani iitáakohtooʼpa sspóóhtsi. Áakohtsíssitapiiwa ááhkiitaanistsíssi otánistsitsííhtatooʼsi sspóóhtsi ki ksááhkoyi, máátáakattsitstsiiʼpa matápio­kákihtsi­maanistsi. Káátsiʼtáámitsinikatooʼpa Iihtsipáítapiiyoʼpa Otokákihtsimaani, iikssokáʼpiiwa. Máátáttsisamowa Iihtsipáítapiiyoʼpa Otokákihtsimaani áakitssapístotsima nínaawa otáísstaahsi ááhksináánssi sopoyáʼpokákihtsimaani. Áakohtomóípiaayaawa kanáómiaʼnistsitapiiksi iitáípaitapiiksi ksááhkoyi.​—Okstóót Daniel 2:44; Matthew 6:9, 10; 24:14.

Áakitsitstsiiʼpa okákihtsimaani áaksstsinaiʼtstsiiʼpa ohkínníínaawa. Jehovah iitsípoʼtoyiiwáyi ohkóyi Jesus Christ, ááhkitohkínniinaawaʼssi Otokákihtsimaani.​—Okstóót Revelation 11:15.

Issáʼtsit áísaiksisttoohsini Tsá Anistápiiwa Iihtsipáítapiiyoʼpa Otokákihtsimaani?

2. Jesus máakitsitooma ááhkanistápssi Ohkínníínaawa?

Iihtsipáítapiiyoʼpa Ohkóyi iitsítooma ááhkanistápssi Ohkínníínaawa, íkkináaʼpitapiwa ki áíkamoʼtokákihtsimaawa. (Matthew 11:28-30) Máttsskonátaʼpssiwa ááhkohkottohtoʼtáísspommoyiiwa matápii sspóóhtsi, ánnimáyi áakohtoʼtáókakihtsimaawa. Otáíʼssksipáítapiiyssi, iitsspomóowa ki iitsitópiiwa Iihtsipáítapiiyoʼpa niitóóhtsi oʼtsísi. (Hebrews 10:12, 13) Iihtsipáítapiiyoʼpa onawáóhkotsiiwa ááhkomatapokákihtsimaahsi.​—Okstóót Daniel 7:13, 14.

3. Takáá áakohpokokákihtsi­maa­miiwa Jesus?

Ámoksska niitsínihkatayaawa “naatowáʼpssiiksi” áakitáóhpokokákihtsimaamiiyaawa Jesus sspóóhtsi. (Daniel 7:27) Jesus otsskskímaiksi isstákaanaʼpssiyaawa, ánniksáyi iitóómitsipoʼtoayaawa ááhkanistápssaawa naatowáʼpssiiksi. Jehovah ánnohk saakiohtoʼtáísspíísaoʼtakiwa áísstákanaaʼpssiiksi nínaiksi ki aakííksi ááhkitsínssaawa ámoksska naatowáʼpssiiksi. Niʼtóyi Jesus, áakitápssksipáítapiiyaawa sspóóhtsi ki áakohkotáyaawa naatoyítapiistómsiistsi.​—Okstóót John 14:1-3; 1 Corinthians 15:42-44.

Tsá niitsítapiiyaawa áaksspomóoyiiksi? Jesus áániiwa otáakonnátsitapiiyssaawa niitsínihkatsiiwaiksi “onnátohsimmiksi ohkanipóyiiksi.” (Luke 12:32) Áakanistsímmiaawa 144,000. Áakáóhpokokákihtsimaamiiyaawa Jesus ki áakáókakihtsimaatoomiaawa ksááhkoyi.​—Okstóót Revelation 14:1.

4. Íkiaʼpiiwa Jesus otómatapokákihtsimaahsi?

Iihtsipáítapiiyoʼpa Otokákihtsimaani iitómatápihtsiiwa 1914.a Jesus otánistápssi Ohkínníínaawa iitsitapinnísssáísskoyiiwa Makáʼpatoʼsiwa ki otokáʼpatoʼsiimiksi ksááhkoyi. Makáʼpatoʼsiwa stámohtsíítaʼpokiʼtakiwa ki iitómatápitsihtakiwa áʼsokaʼpiiwa kanáóʼtakssksaahkoyi. (Revelation 12:7-10, 12) Matápii stámohtsitsíítaʼpokohkoyiyaawa. Awahkáóótsiiyssiistsi, áíponaakiiksi, isttsíístomssiistsi, ki ksááhkoyi otáakáʼpohpiʼyssi, ámostsska iitsínohtooʼpiaawa “otáakanistsínakohsi” áíiʼtaʼpáakoʼtssataʼpissi Iihtsipáítapiiyoʼpa otsitáakomatapokákihtsimatooʼsi ksááhkoyi.​—Okstóót Luke 21:7, 10, 11, 31.

5. Iihtsipáítapiiyoʼpa Otokákihtsimaani tsá anistápiiwa áakssopoksístotsima?

Iihtsipáítapiiyoʼpa Otokákihtsimaani iihtáómoipiyiiwaiksi naatowáʼpoʼtakssini kanáóʼtakssksaahkoyi sskááʼkaitapiiksi ki kanáómiaʼnistsitapiiksi. Sskááʼkaitapiiksi íkkináaʼpitapiiksi aanistáíʼtoyiiyaawa Jesus. Iihtsipáítapiiyoʼpa Otokákihtsimaani áakohtsikamotsíípiiwaiksi ááʼnooksistotsiʼsi otánistokaʼpissi annó ksááhkoyi. Ikkamáakohtsiistapohkoikiiniki Iihtsipáítapiiyoʼpa Otokákihtsimaani kitáaksstsinaiʼssksinimaʼtsookoo kitááhkaanistáíʼtoahsi Jesus.​—Okstóót Revelation 7:9, 14, 16, 17.

Iihtsipáítapiiyoʼpa otánistotóómitsiihtatahsi matápii áakiitánistsiiwa, Otokákihtsimaani aanistsísamokákihtsimatooʼsi ksááhkoyi 1,000 ísstoyiimistsi. Kanáóʼtakssksaahkoyi áakanistápiiwa matsowáʼpiʼnssimaani. Kiánnikáyi Jesus áakitsskohkótsiiwa Ónni Okákihtsimaani. (1 Corinthians 15:24-26) Takáá kitáakohkottohtsítsinikoawa Iihtsipáítapiiyoʼpa Otokákihtsimaani?​—Okstóót Psalm 37:10, 11, 29.