Takáatsiksi Jesus Christ?

1. Tsá niitómatapipáítapiiwa Jesus?

Máátsitotoisápssiwa matápii, Jesus anistápssiwa naatoyítapiwa iitáyáópiiwa sspóóhtsi otsítsaomaitáí­pokaa­waʼssi annó ksááhkoyi. (John 8:23) Iihtsipáítapiiyoʼpa iitóómaʼpistotoyiiwáyi ki iitsspómmoyiiwáyi ónni ááhkohkanaʼpáístotsiʼsi ohkaniitáístsiistsi. Jehovah ááwattaʼpistotoyiiwáyi Jesus káátanistsínihkatawa Iihtsipáítapiiyoʼpa “otááwattaʼpistotakssini” ohkóyi. (John 1:14) Jesus áíʼpowatomoyiiwáyi Iihtsipáítapiiyoʼpa, káátanistsínihkatawa “Iʼpówahsini.”​—Okstóót Proverbs 8:22, 23, 30; Colossians 1:15, 16.

2. Jesus máakitápiksisa­poowa ksááhkoyi?

Iihtsipáítapiiyoʼpa iitápipoʼtoyiiwáyi Ohkóyi ámohka aakííwa iihtsitápiwa Jews máátohkaaniaʼsiwa áánistawa Mary, ánnayi iikóʼsiimiwáyi iihtóʼtsipokaawaʼsiwa. Jesus ónni máátanistápssiwa matápii. (Luke 1:30-35) Jesus iihtsitápiksisapoowa ksááhkoyi (1) ááhkohtáíkamoʼtssksinimaʼtstohkssi Iihtsipáítapiiyoʼpa, (2) ááhkaiʼstamáttstohkssi ááhkanistáístotsiʼsi Iihtsipáítapiiyoʼpa otsitsííhtaani imakáókohkoyoʼki, ki (3) “ááhkohtsikamotsíípiaahsi” akáítapiiksi otsíkamoʼtsipáítapiiyssini.​—Okstóót Matthew 20:28.

3. Máaksstsinaiʼkamotsíí­piootsspa?

Ikamotsíípstakssini anistápanissina, áaksstsinaiʼtstsiiʼpa iihtsipónihtaoʼpi ááhkohtsitsikamotsíípiaahsi matápii ohtáíʼnihpi. (Exodus 21:29, 30) Iʼnssíni ki ómahkitapiwaʼssini Iihtsipáítapiiyoʼpa máátsitsííhtatooma.Tsá níítssksiniiʼpa? Iitotóómitsinikatooʼpa “pahtsáʼpssini” Naatóyssínaakssini iitssínaiiʼpa, Iihtsipáítapiiyoʼpa áánistsiiwa matóóminaawa, Adam, ikkamípahtsaʼpssiiniki kitáakohtsíʼni. Adam ikkámssayipahtsáʼpssisi, máátáakonawaiʼniwa. (Genesis 2:16, 17; 5:5) Naatóyssínaakssini iitssínaiiʼpa, “iihtsíístapitstsiiʼpa” iʼnssíni Adam. Iihtáíʼnioʼpa pahtsáʼpssini, Adam iihkotsííwa ókoʼsiksi pahtsáʼpssini, káátaiʼnioʼpa. Adam ohpítskikkiwa iʼnssíni, áaksstsinaoʼohtsikamotsíípiootsspa.​—Okstóót Romans 5:12; 6:23.

Takáá áakoohkohtsikamotsíípiookiwa iʼnssíni? Áíʼnioʼki iitohtáíponihtatooʼpa kitsípahtsaʼpssinnoonistsi. Matápii máátsikamoʼtsitapiiyaawa máátáakohkottohtsikamotsíípiiyaawa stsíkiiksi otsípahtsaʼpssoaawayi.​—Okstóót Psalm 49:7-9.

4. Jesus máaksiʼniwa?

Kiistónnoona máátsikamoʼ­taʼps­soʼpa, Jesus noohksíkamoʼtaʼpssiwa. Máaksstsináíʼniwa​—máátonawáípahtsaʼpssiwa. Iihtsipáítapiiyoʼpa otsstónnatáwaakomimmahsi matápii iitssksksímiiwáyi ohkóyi ááhkohtsstáániʼnssi kiistónnoona. Jesus iihtáánistsiʼtoyiiwa Ónni otsstónnatohkattáwaa­komim­mokissi ki iitohtomátskahtooma otsipáítapiiyssini kitsípahtsaʼpssinnoonistsi.​—Okstóót John 3:16; Romans 5:18, 19.

Issáʼtsit áísaiksisttoohsini Jesus Máaksiʼniwa?

5. Jesus áíkííwaatsiksi ánnohk?

Jesus otáíʼtaʼpaisssi ksááhkoyi, áísokináápiwa áísttsiistomiiksi, áíssksipáítapiiyáttsiiwa iʼnííksi, ki áíkamotsíípiiwa matápii áókohkoyiiksi. Iihtáíʼstamáttsookiwa otáaksikííhtoahsi matápii aanistáíʼtoyiiksi Iihtsipáítapiiyoʼpa íssoohtsika. (Matthew 15:30, 31; John 5:28) Jesus otáíʼnssi, Iihtsipáítapiiyoʼpa iitánistssksipáítapiiyáttsiiwa naatoyítapiwa. (1 Peter 3:18) Jesus otáíʼssksipáítapiiyssi ikíppitoʼtssatópiiwa Iihtsipáítapiiyoʼpa niitóóhtsi oʼtsísi ki Jehovah onawáóhkotsiiwa ááhkohkínniinaawaʼsatooʼsi kanáóʼtakssksaahkoyi. (Hebrews 10:12, 13) Jesus ánnohk iitohkínníínaawaʼsiwa sspóóhtsi, ki iitáómaiʼtakiiksi iihtáyiinapsskakiyaawa ámostsska iʼtáámitsinikssiistsi kanáóʼtakssksaahkoyi.​—Okstóót Daniel 7:13, 14; Matthew 24:14.

Máátáttsisamowa, Jesus áakohtsitsíssitapiiwa otohkínníínaawaʼssini, áakohtsssikáaattsstooma ókohkoyssini ki áakáttsssikáaattsiiwa áóksistotoyiiksi matápii. Matápii aanistáíʼtoyiiksi ki iitáómaiʼtakiiksi Jesus áakitapíkamotaayaawa annó ksááhkoyi anistápissi matsowáʼpiʼnssimaani.​—Okstóót Psalm 37:9-11.