Iihtsipáítapiiyoʼpa Tsá Niitáítsiihtatooma Ksááhkoyi?

1. Iihtsipáítapiiyoʼpa máakaʼpistotsima ksááhkoyi?

Jehovah iihkótsiiwaiksi nínaiksi ki aakííksi ksááhkoyi, kookóówaninnooni. Matóómaʼpistotoaiksi, Adam ki Eve, iihtáʼpistotoayaawa ááhkitakáókoʼsaawa annó ksááhkoyi máátsitssínaiiʼpa otáaksspomóohsaawa​—Iihtsipáítapiiyoʼpa ákaiksistsit­áʼpisto­takiwa sspóóhtsi naatyítapiiksi. (Job 38:4, 7) Iihtsipáítapiiyoʼpa máʼtoyiiwáyi matóóminaawa ki iitsitsípoʼtoyiiwáyi matsowáʼpiʼnssimaani niitsínihkatooʼpa pisátsiʼnsimaani Eden. (Genesis 2:15-17) Jehovah iihkotsííwa ki ókoʼsiksi otáakanistohkottomanist­sitáíʼtaam­ipaitapiiys­saawa ksááhkoyi.​—Okstóót Psalm 37:29; 115:16.

Ámohka pisátsiʼnsimaani Eden niʼtánistáʼpaistotsiiʼpa matsowáʼpiʼnssimaani. Matóómaʼpistotoaiksi matápii áʼyiistapáwaakáókoʼssaawa áakitsiistapáómahkaʼpistotsiiʼpa matsowáʼpiʼnssimaani áakonawaitóʼtakstsiiwa ksááhkoyi. (Genesis 1:28) Máátáakonawaanooksistotsiiʼpa ksááhkoyi, matápii áakomanistaokóówatoomiaawa.​—Okstóót Psalm 104:5.

Issáʼtsit áísaiksisttoohsini Iihtsipáítapiiyoʼpa Máakaʼpistotsima Ksááhkoyi?

2. Ksááhkoyi ánnohk máakssawanistápiiwa matsowáʼpiʼnssimaani?

Adam ki Eve máátaanistsíʼtoyiiyaawa Iihtsipáítapiiyoʼpa, Jehovah káátohtsáísskoyiiwaiksi pisátsiʼnsimaani. Matsowáʼpiʼnssimaani stámiitáʼtstooʼpa, nínaawa máátohkottsitotóísapaʼpistotakiyaawa. Naatóyssínaakssini iitssínaiiʼpa: “Ksááhkoyi iitapomátskahtooʼpa makáʼpitapii.”​—Job 9:24.​—Okstóót Genesis 3:23, 24.

Jehovah kítaoʼmáípoʼtsima otánistotóóm­itsiih­tatahsi matápii? Saa! Isstohkanáísskonátaʼpssiwa. Máátáakohkottsskohpiwa. (Isaiah 45:18) Íssoohtsika áakiitánistsiiwa Iihtsipáítapiiyoʼpa otánistssokitsííhtatahsi matápii.​—Okstóót Psalm 37:11, 34.

3. Tsá áakanistattsítáak­áak­ohtooʼpa Matsowáʼp­iʼnssimaani?

Matsowáʼpiʼnssimaani áakiitáakohtooʼpa Iihtsipáítapiiyoʼpa ohkóyi Jesus aʼyáóʼohkíniinaawaʼsatooʼsi ksááhkoyi. Ámohka awahkáóótsiiyssini niitsínihkatooʼpa Armageddon, Jesus áakotoomááatsiiwa naatoyítapiiksi ki áakitáánooksiksistotoyiiwa máátaanistáíʼtoyiiksi Iihtsipáítapiiyoʼpa. Kiánnikáyi Jesus áakitotoyóʼkiyiiwáyi Makáʼpatoʼsiwa, áakanistsísamiyoʼkiaawa 1,000 ísstoyiimistsi. Iihtsipáítapiiyoʼpa otsitapíímiksi áakánoohksikamotaayaawa, Jesus áakáísskskammiiwaiksi ki áaksikamotsíípiiwaiksi. Ámoksska ikamótaiksi áakomanistsitáíʼtaamipaitapiiyaawa ksááhkoyi, áakanistápiiwa Matsowáʼpiʼnssimaani.​—Okstóót Revelation 20:1-3; 21:3, 4.

4. Tsá anistsíísi áakitsssikaʼpiiwa ókohkoyssini?

Tsá anistsíísi Iihtsipáítapiiyoʼpa áakitsssikáaattsstooma makáʼpiiwa annó ksááhkoyi? Jesus iihkotákiwa “otáakanistsinakohsi” sakóíksistsikoistsi. Máátáaksikamotaayaawa matápii ikkamómanistáókaʼpissi ksááhkoyi, otánistokaʼpissi stámohtsiʼtóóhkanainakowa otsitáípaitapiiyoʼsi “otsitáaksssikaʼpissi otánistaʼpaisissi ánnohk.”​—Okstóót Matthew 24:3, 7-14, 21, 22.

Jesus áóʼohtoʼtáókihtsimaahsi sspóóhtsi ámostsska 1,000-ísstoyiimistsi, kiánnikáyi áakitsssikáaattsstooma ókohkoyssini annó ksááhkoyi. (Isaiah 9:6, 7; 11:9) Jesus Ohkínníínaawa ki áakohkáttsssíínima otsípahtsaʼpssoaawayi matápiiksi áwaakomimmiiksi Iihtsipáítapiiyoʼpa. Otsííkííhpi Jesus, Iihtsipáítapiiyoʼpa áakohkottohtsssikáaattsstooma isttsíístomssini, ómahkitapiwaʼssini, ki iʼnssíni.​—Okstóót Isaiah 25:8; 33:24.

5. Takáá áakitáípaitapiiwa áóʼtstsissi Matsowáʼpiʼnssimaani?

Matápii aanistáíʼtoyiiksi Iihtsipáítapiiyoʼpa áakitáípaitapiiyaawa Matsowáʼpiʼnssimaani. (1 John 2:17) Jesus issksksímiiwaiksi otsitapíímiksi ááhkaʼpáíssam­mah­saiksi íkkináaʼpitapiiksi ki ááhkitohtáíssksinimaʼ­tsaah­saawa ááhkanistáóhkot­tsiksoʼ­kowam­mah­saawa Iihtsipáítapiiyoʼpa. Ánnohk ksiistsikóyi, Jehovah áísspommoyiiwaiksi sstónnatakáítapiiksi ááhkitáóhkottsipaitapiiyssaawa ánnihka Matsowáʼpiʼnssimaani áóʼtstsissi annó ksááhkoyi. (Zephaniah 2:3) Jehovah Otátohkaʼtohtaaniksi Okákihtsimááʼpioyiistsi iitáíssksinimaʼtsaayaawa ohkíímiiksi ki iyóomiiksi ki okóʼsiiksi ááhkanistáísokotoiʼtsikattsiiyssaawa. Pookáíksi ki okóʼsiiksi iitáwaatsimoyihkaayaawa ki iitáíssksinimaʼtsaayaawa ááhkanistáóhkoyikissaawa iʼtáámitsinikssiistsi.​—Okstóót Micah 4:1-4.