Íssksinimaʼtstohkssini 11

Máánssksaahkoyi Akáómatapáakohtooʼpa

1, 2. Tsá niitánistáóniiʼpa otánistaʼsissi ámohka Naatóyssínaakssini ikááyissitsinikssini?

IIHTSIPÁÍTAPIIYOʼPA otomáánssksaahkoyi akáómatapáakohtooʼpa ánnohk, ímaksíístapaokaʼpissi Makáʼpatoʼsiwa otánistáókakihtsimatooʼpi annó ksááhkoyi. Ánnohk Iihtsipáítapiiyoʼpa iihtáísspíísaoʼtakiwa kanáómiaʼnistsitapiiksi ááhkohtsitomatapaakohtooʼsi ámoksska áakiitayáópiiksi máánssksaahkoyi, ánnikaaki máátáakattanistaawattaʼpaissiyaawa otánistáípaitapiihpiaawa ánnohk. Naatóyssínaakssini 2 Peter 3:13 iitssínaiiʼpa ámohka máániipaitapiiyssini niitsínihkatooʼpa “máánssksaahkoyi.”

² Naatóyssínaakssini ikááyissitsinikssini máttsitssinaiiʼpa: “Sakóíksistsikoistsi [ánnohk iitáípaitapiiyoʼpi] . . . , akáítapii áakáítapooyaawa ki áakáwaaniiyaawa: ‘Poohsapóók, áakiitohkanáítapaamisaooʼpa Jehovah otsíístakiimi (otsíkamoʼtáátsimoyihkaani), . . . Áakohtsitáíʼstamattsookiwa otánistaʼpaissspi, Ki áakiitohtáíssapiksikkaʼyoʼpa ohsokóístsi.’”​—Isaiah 2:2-3.

3. (a) Takáá akáómatapiitanistsiiwa Isaiah otsikááyissitsinikssini? (b) Tsá niitánistohtsitsinikatooʼpa ámohka ísakóísinaiʼpi Naatóyssínaakssini?

³ Ámohka ikááyissitsinikssini akáómatapiitanistsiiwa ámoksska áísapáatoomiksi ‘Iihtsipáítapiiyoʼpa otánistaʼpaissspi ki iitáísapiksikkaʼyiiksi ohsokóístsi.’ Ííhtsitsinikatayaawa ámoksska áíkkinaaʼpssiiksi otánistaʼpaissspiaawa ísakóísinaiʼpi Naatóyssínaakssini iitssínaiiʼpa “sskááʼkaitapiiksi . . . iihtóʼtsitapiyaawa kanáómiaʼnistsitapiiksi ki íyoohkíítsitapiiksi ki matápiiksi ki íyoohkíítsiʼpowahsiistsi,” ohkanáóhpapiimotsiiyiyaawa kanáóʼtakssksaahkoyi, ohkanáítapáátsimoyihkaayaawa Iihtsipáítapiiyoʼpa. Ki Naatóyssínaakssini máttsitssinaiiʼpa: “Ámoksska ííhtssaksiyaawa ísskáíʼpoinaohkoyssini.” Ámoksska áaksikamotááhpihkatoomiaawa áíʼssikaʼpissi otánistokaʼpiihpi ánnohk.​—Revelation 7:9, 14; Matthew 24:3.

Niitáʼpohpapíímotsiiyssini Kanáóʼtakssksaahkoyi

4, 5. Máakáakohkottohkanaohpapíímotsiiyiyaawa Jehovah Otátohkáʼtohtaaniksi?

⁴ Ííksstonnátakaitapiyaawa Jehovah Otátohkáʼtohtaaniksi nóóhkáísapaatoomiksi Iihtsipáítapiiyoʼpa otánistaʼpaissspi ki otssksínimaʼtstohkssiistsi. Áísstakatoomiaawa ki otsitsikíʼtsimiaawa omáánistáípaitapiiyssini oʼtstsíssi Iihtsipáítapiiyoʼpa otomáánssksaahkoyi. Otánistáíʼtsiʼsoaawayi kanáíksistsikoyi Iihtsipáítapiiyoʼpa otokákihtsimaanistsi, áwaiʼstamáttstohkimiaawa otáóksisstssiʼtsiʼsoaawayi Áʼpistotookiwa otánistáókakihtsimaahsi ánnohk ki anníhka máánssksaahkoyi. Ímakóóhkiitsitapissaawa, niʼtóyi niitáíʼtsimiaawa okákihtsimaanistsi​—ánnistsska íítohkooniiʼpistsi Iihtsipáítapiiyoʼpa Otsíʼpowahsini. Ámohka iihtsíístapiitáʼpohpapiimotsiiyiyaawa kanáóʼtakssksaahkoyi, áaksstámohkottaniioʼpa Iihtsipáítapiiyoʼpa áʼpistotsima ámohka máániipáítapiiyssini.​—Isaiah 54:13; Matthew 22:37, 38; John 15:9, 14.

⁵ Jehovah Otátohkáʼtohtaaniksi máátohpowaanssiyaawa otáakohkottohpapíímotsiiyssoaawayi kanáóʼtakssksaahkoyi. Íssksinímiaawa otohtsíístapanistsissi Iihtsipáítapiiyoʼpa otohtáísspommoahsaawa ísskonátaʼpiiwa otáátoyóttakssini ki otánistaiʼtsiʼsaawa otokákihtsimaanistsi. (Acts 5:29, 32; Galatians 5:22, 23) Iihtsipáítapiiyoʼpa niitánistáakohtooma. Otáániihpi Jesus, “nínaawa otsitáaksskohpiʼyihpi Iihtsipáítapiiyoʼpa máátáakitsskohpiʼyiwa.” (Luke 18:27) Iihtsipáítapiiyoʼpa áʼpistotsima sspóóhtsi ki annó ksááhkoyi áakomáánistsitaistsiiyaawa, ohkáttaʼpistotsima ámohka máániipáítapiiyssini áakáóhkattomaanistsitaistsiiwa.

6. Máakohkottaniioʼpa otsípisataʼpissi Jehovah Otátohkáʼtohtaaniksi otánistáóhpapiimotsiiyssoaawayi?

⁶ Jehovah otáakanistáókakihtsimatooʼsi anníhka máánssksaahkoyi áakohkottsitoniiʼpa ánnohk otánistohtáómoipiahsi matápii anníhka máánssksaahkoyi, ámoksska áakohtomatápaakohtooʼpa máánssksaahkoyi. Máaksipisataʼpiiwa Jehovah Otátohkáʼtohtaaniksi otsíítaʼpohpapíímotsiiyssoaawayi? Máátsitstsiiʼpa ohtáakohkottayákiitsipoʼtoahpiaawa, ímakóóhkiitsitapissaawa, tsááhtaoʼ otánistawáátsimoyihkaahpiaawa. Jehovah Otátohkáʼtohtaaniksi ííksstonnátakaitapiyaawa ki iitayáópiiyaawa oʼtsítsskanistsoistsi 235 ksááhkoistsi, máátáakohkottohtayákiitsipoʼtoayaawa otánistáíʼtomanistsiksimsstaahpiaawa. Otánistáóhpapiimotsiiyssoaawayi, máátomáíkakanistsitstsiiʼpa, iitáʼpipisataʼpiiwa​—iihtsíístapitstsiiwa Iihtsipáítapiiyoʼpa otsitsííhtaani.​—Isaiah 43:10, 11, 21; Acts 10:34, 35; Galatians 3:28.

Áakanistónoayaawa Iihtsipáítapiiyoʼpa Otsitapíímiksi

7. Jesus tsá áániiwa otáakanistáónoahpiaawa otáíkamoʼtssksinimaʼtsaiksi?

⁷ Tsá áakanistohkoissksiniiʼpa Iihtsipáítapiiyoʼpa matápii iihtáyissitapiiwa ááhkohtomatápaakohtooʼsi máánssksaahkoyi? Takáá iihtsíístapanistsiiwa Jesus otsíʼpowahsiistsi íítohkooniʼpi John 13:34, 35? Áániiwa: “Kitáakohkotohpoaawa máánokákihtsimaani, kitááhkáwaakomimmotsiiyssoaayi; niʼtóyi kitánistáwaakomimmohpoaawayi, kiistówaawa niʼtóyi kitáakohkattanistáwaakomimmotsiihpoaawa. Ámohka áakohkottsíístapssksinimiaawa kitáíssksinimaʼtsoohsoaayi, ikkámohkanáwaakomimmotsiiyssoaayi.” Jehovah Otátohkáʼtohtaaniksi iitáómaiʼtakiyaawa Jesus otsíʼpowahsiistsi ki iitáánistaiʼtsimmiaawa. Otánistáwaiʼstamattstohkssi Iihtsipáítapiiyoʼpa Otsíʼpowahsini, “ííksstonnátaakomimmotsiiyiyaawa.” (1 Peter 4:8) “Stámistotóóhsatoomiaawa áákomimmotsiiyssini, káátaiʼtománistaʼpaissiyaawa máátáísikahksipoʼtoohsiyaawa.” (Colossians 3:14) Iihtáóhpapíímotsiiyiyaawa áákomimmotsiiyssini iihtáípoʼtsinnayaawa kanáóʼtakssksaahkoyi.

8. Tsá níítohtáónoayaawa Iihtsipáítapiiyoʼpa otsitapíímiksi ámohka naatóyssínaakssiistsi 1 John 3:10-12?

⁸ Máttsitssinaiiʼpa 1 John 3:10-12: “Iihtsipáítapiiyoʼpa okóʼsiksi ki Makáʼpatoʼsiwa okóʼsiksi áakohtónoayaawa ámohka: Máátáístotsimiksi íkamoʼtaʼpiiwa máátohtoʼtsitapiyaawa Iihtsipáítapiiyoʼpa, niʼtóyi ámohka máátáwaakomimmiiwa otsitapííma. Ámohka sináákssini kitáísttsitsáyoohtsiʼsi, ááhkáwaakomimmotsiiyoʼsi; ááhkssawáítotoisapssoʼsi Cain, iihtóʼtsitapiwa makáʼpatoʼsiwa ki iitsíʼnitsiiwa otsitapííma.” Káátsikkinaaʼpitapiyaawa Iihtsipáítapiiyoʼpa otsitapíímiksi áóhpapíímotsiiyiyaawa kanáóʼtakssksaahkoyi.

Áakattánistonoahpiaawa

9, 10. (a) Tsá anistápaʼpoʼtakssini áakohtonoayaawa Iihtsipáítapiiyoʼpa otáʼpoʼtomookiiksi ánnohk sakóíksistsikoistsi? (b) Matthew 24:14 tsá níítsitánistsiiwa Jehovah Otátohkáʼtohtaaniksi?

⁹ Máttsstsíki áakattánistonoayaawa Iihtsipáítapiiyoʼpa otáʼpoʼtomookiiksi. Jesus otánistsikááyissitsinikatooʼsi áíʼssikaʼpissi makáʼpiiwa, áániiwa áakákaowa áakohtsskskoiʼpi otáakánistaʼpaisissi sakóíksistsikoistsi. (Íssaʼtsít Íssksinimaʼtstohkssini 9.) Ámohka niʼtókskayi ikááyissitsinikssini íítohkooniiʼpi Matthew 24:14, iitssínaiiʼpa: “Ámohka iihtáíʼtaamitsinikatooʼpi Okákihtsimaani áakohtáyiinapsskoayaawa kanáítapii kanáóʼtakssksaahkoyi áakitohkanáyoohtsimiaawa kanáómiaʼnistsitapiiksi, kiánnikayi áakitssikaʼpiiwa.”

¹⁰ Kítaoʼmáíniiʼpa ááhkaniststsissi ámohka ikááyissitsinikssini? Áa. Otáísttsitsáómatapaʼpissaawa sakóíksistsikoistsi íítomatápaʼpiiyaawa 1914, Jehovah Otátohkáʼtohtaaniksi iihtáíʼtaamitsinikiyaawa Iihtsipáítapiiyoʼpa Otokákihtsimaani, iitáyiinapsskoyiiyaawa ookóówanoaawa kanáítapii kanáóʼtakssksaahkoyi, Jesus otánistáíʼstamattsaahpiaawa. (Matthew 10:7, 12; Acts 20:20) Iiksstonnátakáítapii ámoksska Otátohkáʼtohtaaniksi áóksisawaaatsiiyaawa kanáómiaʼnistóóhkiitsitapiiksi, iihtáíʼpowatsiiyaawa máánssksaahkoyi. Jehovah Otátohkáʼtohtaaniksi otáátowáʼpoʼtakssoaawayi kitánistohkottoʼtsiiʼpa ámoyi sináákiaʼtsisi, máttáísinaimiaawa ki íítawáániitskahtoomiaawa sstonnátakáóistsi sináákssiistsi, ámostsska sináákssiistsi iihtáítsinikatooʼpa Iihtsipáítapiiyoʼpa Otokákihtsimaani. Kítaiʼssksinimahpa stsíkiiksi annó kanáóʼtakssksaahkoyi ááhkitáóksisawaaatahsaawa matápii ookóówanoaawa, ki ááhkohtsitáyiinapsskoahsaawa Iihtsipáítapiiyoʼpa Otokákihtsimaani? Mark 13:10 iitssínaiiʼpa ámohka náátowáʼpoʼtakssini ki íssksinimaʼtstohkssini áaksstsínaoʼtoomitstsiiwa, kiánnikayi áakitssikaʼpiiwa.

Áóyiʼtsiiʼpa Náátoʼkayi Ómahkáákohkimaani

11. Tsá anistápiiwa Jehovah Otátohkáʼtohtaaniksi máttáísapistotsimiaawa áakiitánistaiʼtsimiaawa Iihtsipáítapiiyoʼpa otokákihtsimaani?

¹¹ Jehovah Otátohkáʼtohtaaniksi otánistaiʼtsiʼsoaawayi Iihtsipáítapiiyoʼpa otokákihtsimaanistsi ki otokákiiʼpowahsiistsi ohkáttohtáísapistotsiiʼpa Makáʼpatoʼsiwa ohtsístoʼkayi otómahkáákohkimaani. Áwaakohkimaawa matápii otáakssawáísstakatahsaawa ki otáakssawanistaiʼtoahsaawa Iihtsipáítapiiyoʼpa áakiitáókohkoyiyaawa, Makáʼpatoʼsiwa íísayiwa. (Job 2:1-5) Jehovah Otátohkáʼtohtaaniksi ííksstonnátakaitapiyaawa iihtóʼtsitapiyaawa kanáómiaʼnistsitapiiksi, ohkanáísstakatoomiaawa ki ohkanáánistaiʼtsimiaawa Iihsipáítapiiyoʼpa otokákihtsimaani. Ohkáttáípahtsaʼpssiyaawa nóóhkáítapssiyaawa Iihtsipáítapiiyoʼpa ísstohkanáísspokakihtsimaani, ímakohtáyissinahkiaawa Makáʼpatoʼsiwa otokáʼpitsííhtaanistsi.

12. Ámoksska Átohkáʼtohtaaniksi takáá áyiimatoomiaawa otómaiʼtakssoaawayi?

¹² Ánnohk ksistsikóyi, ámoksska sstonnátakaitapiiksi Jehovah Otátohkáʼtohtaaniksi ohkáttanistáísstakatsiiyaawa Iihtsipáítapiiyoʼpa niʼtóyi otátohkáʼtohtaaniksi ísskoohtsika. Abel, Noah, Job, Abraham, Sarah, Isaac, Jacob, Deborah, Ruth, David, ki Daniel iitsíninihkatayaawa Naatóyssínaakssini. (Hebrews, niitánistsskskoiʼpi 11) Naatóyssínaakssini iitánistsitsinihkatayaawa ‘otsstonnatakáítapiisaawa ámoksska átohkáʼtohtaaniksi ísstakaanaʼpssiiksi.’ (Hebrews 12:1) Ámoksska ki Jesus otáíssksinimaʼtsaiksi áómaanistáítapsstakanaʼpssiiyaawa Iihtsipáítapiiyoʼpa. Ki Jesus aiʼstamáttstohkima otsíkamoʼtaʼpissi otánistsstakaanaʼpsspi, áakohkottsíímatawa.

13. Tsá niitsíkamoʼtaʼpiiwa Jesus otánistohtsiʼpoyihpi Makáʼpatoʼsiwa?

¹³ Ííhtsikamoʼtaʼpiiwa Jesus otánistohtsitsinikatahpi Makáʼpatoʼsiwa otaʼyáísitsipssatahsi ámoksska naatóyaapiikoaiksi: “Ánnohk kinóóhkáíssaaksiʼnikkihpoaawa, nikaakóóhkohtsitsiniki íkamoʼtaʼpiiwa ííhtoʼtstsiiwa Iihtsipáítapiiyoʼpa. . . . Kínnoaawa Makáʼpatoʼsiwa, ki kitáísstaahpoaawa kitááhkáístotsiʼsoaawayi kínnoaawa otsitsííhtaanistsi. Ámohka áíksimiʼnikkiwa otáóʼmatapaʼpsssi, ki ipáóotsimatooma íkamoʼtaʼpiiwa, tská máátsitohkooniiʼpa íkamoʼtaʼpiiwa otánistaʼpaissspi. Áakiitssayiwa, ííhtoʼtsiʼpoyiwa otánistapitapiihpi, sayíípitsiwa ki omatápáʼtstooma sayíssini.”​—John 8:40, 44.

Kitáaksikiihpa?

14. Tsá áakáómatapanistaakohtooʼpa ámohka máánssksaahkoyi ánnohk?

¹⁴ Iihtsipáítapiiyoʼpa Jehovah áakáómatapohtaakohtooma ámohka máánssksaahkoyi Otátohkáʼtohtaaniksi ánnohk ki stámiistapáísskonataʼpiiwa. Kanáísstoyiiwa sstonnátakáítapiiksi áítapssiyaawa Iihtsipáítapiiyoʼpa otokákihtsimaani, iihtáyissitapiiyaawa otááwattsitsííhtaanoaawayi ki íkamoʼtssksinimaʼtstohkssini. Iitáítsinssiyaawa ámoksska matápiiksi áakiitaʼpaissiiksi máánssksaahkoyi, áítapssiyaawa ísstohkanáísspiiwa Iihtsipáítapiiyoʼpa otokákihtsimaani, ki iihtáwaiʼstamattstohkiyaawa Makáʼpatoʼsiwa otssáyipitsiitapiʼsi.

15. Tsá anistápiiwa ámohka áwayakiitsipoʼtakssini, áakiitomatápaʼpiiwa ánnohk kitsipáítapiiyssinnooni?

¹⁵ Aʼyáítapsssaawa Iihtsipáítapiiyoʼpa otokákihtsimaani, áakiitsitapípoʼtoayaawa Christ “niitóóhtsi oʼtsísi” áwayakiitsipoʼtoahsi “ómahkihkiniiksi” ki “miistákiómahkihkiniiksi.” Jesus otáóʼohtsikááyissitsinikssi sakóíksistsikoistsi, iikááyissaniiwa: “Kanáómiaʼnistsitapiiksi áakohkanáítapipiaayaawa ostóyi, ki áakitáwayakiitsipoʼtoyiiwa matápii, niʼtóyi ámoksska áísskskammiiksi ómahkihkiniiksi niitánistáwayakiitsipoʼtoahsi ómahkihkiniiksi ki miistákiómahkihkiniiksi. Ki iitápipoʼtoyiiwa ómahkihkiniiksi ámoyi niitóóhtsi oʼtsísi, miistákiómahkihkiniiksi nóóhkitápipoʼtoyiiwaiksi otsííyaʼksisaawa.” Máátáísspihkaʼsiiksi matápii niitánistsitsinikatayaawa anní ómahkihkiniiksi, ámoksska ísspommoyiiyaawa ki ííhpokáʼpaissiimiiyaawa Christ osskániksi ki áítapssiyaawa Iihtsipáítapiiyoʼpa Otokákihtsimaani. Ámoksska miistákiómahkihkiniiksi iiksísstookiyaawa ki máátayisstsiiyaawa matápii máátsiksoʼkowammiiyaawa Christ osskániksi ki máátsitapssiyaawa Iihtsipáítapiiyoʼpa Otokákihtsimaani. Iihtsíístapikiaʼpiiwa? Jesus áániiwa: “Ámoksska [miistákiómahkihkiniiksi] iitápssikahksipoʼtoayaawa otsitáakaanooksiksistotoahpiaawa, íkamoʼtsitapiiksi [ómahkihkiniiksi] nóóhkiitápssikahksipoʼtoayaawa omáánistáípaitapiiyssini.”​—Matthew 25:31-46.

16. Kitáaksstsínaiʼkiihpa ikkámsstainiki kitááhkitayáópissi anníhka matsowáʼpiʼnssimaani oʼtstsíssi?

¹⁶ Niitáʼpanistsiiwa, Iihtsipáítapiiyoʼpa áíkimmokiwa! Máátáítsisamowa áakiitáákohtooma matsowáʼpiʼnssimaani annó ksááhkoyi, áaksstonnátsiʼtaamaʼpiiwa. Kitáíʼsstaahpa kitááhkitayáópissi ámohka Matsowáʼpiʼnssimaani? Ikkámsstainiki kitááhkiitáʼpaisssi kitáaksstsínaiʼstamattstohkiiʼpa kitáíyiniʼyitsiʼsi Jehovah otáóhkokkissi, kitááhkohtáíssksinimaʼtsookoohsi ostóyi ki kitááhkanistaiʼtsiʼsi kitssksínimaʼtsookooyi. “Aʼpáíssammis Jehovah otsitssáákiohkottohkoonoahpi. Ínihkatsimatsís otsitssáákioʼtssataʼpaissspi. Amá makáʼpínaawa áaksstamitskima otánistáʼpaissspi Ki amá makáʼpínaawa ááhkitskiʼsi otsiksímsstaanistsi; Áaksstamsskitapoowa Jehovah, áaksikimmiiwáyi.”​—Isaiah 55:6, 7.

17. Máakáónaʼpiiwa kitááhkssksiniʼsi kitáakaʼpoʼtomoawa?

¹⁷ Iikáónaʼpiiwa, áakáákssikaʼpiiwa otánistaʼpaisissi ánnohk. Iihtsipáítapiiyoʼpa Otsíʼpowahsini okakiáániiwa: “Mináwaakomiʼtsít otánistaʼpaissoaawayi ki otaʼpáísskiiʼpoaawayi annó ksááhkoyi. Ikkámitstsiiʼki áwaakomiʼtsimiksi annó ksááhkoyi, máátáaksinaanatoomiaawa Iihtsipáítapiiyoʼpa otáákomimmotsiiyssini . . . Tská, otánistaʼpaissoaawayi ki otaʼpáísskiiʼpoaawayi annó ksááhkoyi áakáánooksiksistotsiiʼpiaawa, áakanóóhkomáánistaipaitapiiwa ánnahka áístotsimiksi Iihtsipáítapiiyoʼpa otsitsííhtaani.”​—1 John 2:15-17.

18. Tsá anistápiiwa kitáaksstsínaiʼkiihpa kitááhkohkottsitáwaaksistooyiʼtsiʼsi kitááhkitayáópissi Iihtsipáítapiiyoʼpa otsitsowáʼpiiwa máánssksaahkoyi?

¹⁸ Iihtsipáítapiiyoʼpa otsitapíímiksi iihtáíssksinimaʼtsaayaawa ánnohk otsitáakohkottsitomáánistaipaitapiiyssaawa oʼtstsíssi máánssksaahkoyi. Áwaatowaʼpssksinimaʼtsaayaawa ááhkitssksiniʼsaawa ááhkanistohkottaʼpistotsiʼsaawa matsowáʼpiʼnssimaani. Kiikóóhksináánistohpinnaana kitááhkiitaʼpsssoaawayi Iihtsipáitapiiyoʼpa Otokákihtsimaani ki kitááhkiitáísspommihtaahsoaawayi Iihtsipáitapiiyoʼpa otáʼpoʼtakssini ámohka iihtáíkamotsiipsstakioʼpa, iitáʼpoʼtsiiʼpa ánnohk kanáóʼtakssksaahkoyi. Kitáaksstámohpokokakisskskaʼtsiiʼpiaawa Naatóyssínaakssini Jehovah Otátohkáʼtohtaaniksi, ki kitáakitohkoissksiniiʼpa Iihtsipáítapiiyoʼpa kitáíkimmiissi ki otááhkssikáaattsstooʼsi ókohkoyssini. Aʼyáókakisskskaʼtsimmiiniki Naatóyssínaakssini kitáakitomatápiksistaʼpssatooʼpa máánssksaahkoyi. Kiánnikayi kitáakohkottsitáwaaksistooyiʼtsiiʼpa Iihtsipáítapiiyoʼpa kitááhkáísakakimmiissi ki kitááhkitomáánistaipaitapiiyssi anníhka matsowáʼpiiwa máánssksaahkoyi.

[Isínaawa íítohkooniiʼpa sináákssini 31]

Jehovah Otátohkáʼtohtaaniksi niitáʼpohpapíímotsiiyiyaawa kanáóʼtakssksaahkoyi

[Isínaawa íítohkooniiʼpa sináákssini 32]

Iihtsipáítapiiyoʼpa otomáánssksaahkoyi akáómatapáakohtooʼpa ánnohk