Íssksinimaʼtstohkssini 10
Iihtsipáítapiiyoʼpa Áakáʼpistotakiwa Matsowáʼpiiwa Máánssksaahkoyi
1, 2. Áaksikiáʼpiiwa áóʼohtsitsíksikkaʼpistotsiʼsi ksááhkoyi ámohka awahkáóótsiiyssini niitsínihkatooʼpa Armageddon?
IIHTSIPÁÍTAPIIYOʼPA áóʼohtsitsíksikkaʼpistotsiʼsi ksááhkoyi ámohka awahkáóótsiiyssini niitsínihkatooʼpa Armageddon, áakitsikiáʼpiiwa? Ánnikaaki áakiitomatápitstsiiʼpa máániipaitapiiyssini. Ámoksska ííhtsikamotaiksi Armageddon, akáíksistaiʼstamattstohkiyaawa otsitápsstakáánaʼpsssaawa ki otáítapssaawa Iihtsipáítapiiyoʼpa otokákihtsimaani, áakitapíkamotayaawa máánssksaahkoyi. Áaksstonnátsiʼtaamaʼpiiwa ánnikaaki Áʼpistotookiwa áaksstamiitaʼpítsowaʼpohkotsiiwa kanáítapiiksi sokáʼpiistsi!
2 Iihtsipáítapiiyoʼpa Otokákihtsimaani áakááwattaʼtstooma annó ksááhkoyi, ámoksska íkamotaiksi áakaiʼstamattsayaawa ááhkanistaʼpistotsiʼsaawa matsowáʼpiʼnssimaani. Áakáóksisstssatoomiaawa ááhkáʼpoʼtsiʼsaawa sokáʼpiistsi áakohtsitáyiistapaisokopiiyaawa kanáítapiiksi. Ksááhkoyi áakiitomatápanistaʼpistotsiiʼpa anní aanátssksaahkoyi, áaksíkkinaaʼpiiwa, ki áakáíʼtohtssokimmohsiyaawa ánniksska áakiitayáópiiksi.
Áaksstáánitstsiiwa Íkamoʼtaʼpiiwa Annó Ksááhkoyi, Máátáakattsitstsiiʼpa Makáʼpiiwa
3. Áíʼksistaʼpissi Armageddon, tsá áaksstamohpíístapanistssokimmohsoʼpa?
3 Áakohtsíístapanistsiiwa ámostsska ááʼnooksiksistotsiiʼki Makáʼpatoʼsókakihtsimaani. Iihtáwaaniitsipoʼtoayaawa matápii sáyiipitsáátsimoyihkaanistsi ki matápiókakihtsimaanistsi ámostsska máátáakattsitaistsiiyaawa. Máátáakattsitstsiiʼpa makáʼpatoʼsiwa otssáyiipitsiitsinikssiistsi, ámostsska iihtáwaattsíístotoayaawa matápii; ámoksska áítapssiiksi makáʼpatoʼsókakihtsimaanistsi máátáakattsitaʼpaissiyaawa. Kááksskskaʼtsít: matápii ki makáʼpatoʼsókakihtsimaani máátáakattsitaistsiiyaawa ámostsska iihtáípotsimaʼsoʼpiaawa! Áakiitohtssokimmohsoʼpa!
4. Ííhtsitsinikít otáakanistáyoohkiitssksinimaʼtsaahpiaawa matápii.
4 Matápiókakihtsimaani ki otánistáókitsiihtaahpiaawa máátáakattsitaistsiiyaawa, áaksstáánitstsiiʼpa iihtáwaahkomimmotsspa íssksinimaʼtstohkssini ííhtoʼtstsiiwa Iihtsipáítapiiyoʼpa. “Kítohkanáóhkoiksi Jehovah áakohkanáíssksinimaʼtsiiwaiksi.” (Isaiah 54:13) Áóʼohtáíssksinimaʼtsaahsaawa matápii ámohka sokáʼpiiwa íssksinimaʼtstohkssini kanáísstoyiiwa, “áaksstámohtohtoiʼtsiiwa ksááhkoyi Jehovah otssksínimaʼtstohkssini niʼtóyi niitánistohtookimissi ómahksíkimiwa.” (Isaiah 11:9) “Ánniksska iitayáópiiksi ksááhkoyi áakáíssksinimaʼtsaayaawa íkamoʼtaʼpiiwa,” máátáakattáíssksinimaʼtsaayaawa makáʼpiiwa. (Isaiah 26:9) Áakohtáwaahkomimmayaawa kanáíksistsikoyi iʼtáámiksimsstaanistsi ki iʼtáámaʼpiistsi.—Acts 17:31; Philippians 4:8.
5. Áaksikiáʼpiiwa makáʼpiiwa ki áaksikííhtoayaawa makáʼpitapiiksi?
5 Áakohtsíístapssawaitsitaistsiiʼpa iksimíʼnikkssini, satáʼpiiwa, áʼpawaatápiksistakiiksi, áíkamoʼsiiksi, tsááhtaoʼ kanáómiaʼnistssáómmitaʼpiiwa. Máátáakattsitstsiiʼpa ííhtáókohkoyiwa makáʼpiistsi. Proverbs 10:30 iitssínaiiʼpa: “Amá áíkamoʼtaʼpaissiwa máátáakonawaisttohkohpiʼyiwa, Amá makáʼpitapiwa áakanóóhkssawattsitaʼpaissiwa annó ksááhkoyi.”
Áaksskssopoyáʼpssokinaapiootsspa
6, 7. (a) Iihtsipáítapiiyoʼpa Otokákihtsimaani tsá anistápiiwa áakssikáaattsstooma áíiyikiʼtsiiʼpi? (b) Jesus tsá niitáíʼstamattstohkima otáakssikaʼpissaawa ámostsska otáíʼtaʼpaissi annó ksááhkoyi?
6 Ánnikaaki máánssksaahkoyi, matóómínaawa ki matóómaakííwa otsitsáómaʼpimmahsaawa Áʼpistotookiwa áakitsskanistsiiwa, máátáakattsitstsiiʼpa makáʼpiiwa. Iihtsipáítapiiyoʼpa Otokákihtsimaani áakssikáaattsstooma isttsíístomssini ki ómahkitapiwaʼssini. Ánnohk ksistsikóyi, ímakóóhksiʼnakaisokimmohsiiniki kitáakohkattohtsíssinokoo ómahkítapiwaʼssini, kitááhkssawattáísokssapssi, kitááhkáókaʼpohpiikinssi, kitááhkssawattáyoohtsimssi, ááhkáómatapómahkinainaattsissi kotokísi, kitsipsstóʼkiistsi ááhkssawáttaʼpoʼtakssaawa ki kitáakonawaiʼni.
7 Ámostsska iihtáípoináóhkoyoʼpistsi ííhtoʼtstsiistsi kitotóómiksísstonnoona ki kitotóómínninnoona áakiitskiiʼpiaawa, máátáakattsitaistsiiyaawa. Kítaiʼsaakiáíssksiniihpa Jesus otánistáótoiʼtsikatahsi áísttsíístomiiksi matápii otáíʼtaʼpaisssi annó ksááhkoyi? Naatóyssínaakssini iitssínaiiʼpa: “Sskááʼkaitapiiksi otsítohtowáaakkiyaawa, ííhpitoʼtooyaawa ámoksska máátaipóómatooyiiksi, áákanaiksi, náápstsiiyiksi, máátáíʼpoyiiksi, ki stsíkiiksi áísttsíístomiiksi, ki íítsitoʼtsísttohkihtsaayaawa ohkátsistsi, ki íítssokináápiiwaiksi. Ámoksska sskááʼkaitapiiksi stámsskáíʼpisatsiʼtakiyaawa otaʼyáínoahsaawa ámoksska máátáíʼpoyiiksi otómatápiʼpoyssaawa ki otssawáttohkoikissaawa áákanaiksi ki ááhkáóhkottsipoomatooʼsaawa máátaipóómatooyiiksi ki otayáapssaawa náápstsiiyiksi.”—Matthew 15:30, 31.
8, 9. Ííhtsitsinikít otáakánistsiʼtaamaʼpissi anníhka máánssksaahkoyi áíʼsawattsitstsiiʼki isttsíístomssini.
8 Áaksstonnátsiʼtaamaʼpiiwa ánnihka máánssksaahkoyi máátáakattsitstsiiʼpa iihtáípoináóhkoyoʼpistsi! Máátáakattonawaohtaokohkoyoʼpa isttsíístomssini. “Ánniksska iitayáópiiksi máátáakattawaaniiyaawa: ‘Nitáísttsiistomi.’” “Ánnikaaki ámoksska náápstsiiyiksi oápsspoaawayi áaksikayinnayaawa, ki ámoksska máátáyoohtsimiiksi áakitsikayinniiʼpiaawa ohtóókiwaistsi. Ánnikaaki ámohka máátaipóómatoowa áakiitánistáísspiksikkohpaʼwaniwa ánni áwákaasiiwa, ki ámohka máátáíʼpoyiwa matsiníyi áakiitohtáípapisawa otsiʼtáámiʼtakssi.”—Isaiah 33:24; 35:5, 6.
9 Kitáaksstaiʼtaamiʼtsiiʼpa kanáíkskanaotonniwa kitááhkáíʼtaamipookakssi kitssksíniʼsi kitsikáíitaʼpaisokimmohsi? Áaksstáóʼohkohtsiksimatsiʼtakiyaawa ómahkitapiiksi otsikáísskaʼsitapissaawa, otsítomáísoksistomssaawa ki ááhkitsskitoʼtstsissaawa otánistsíkamoʼtaʼpsssaawa Adam ki Eve otsítsaomáípahtsaʼpsssaawa? Naatóyssínaakssini iitsíksisttoyiwa: “Otokísa ááhksskiitapstsissi otsitáʼsitapiihpi; ááhksskitapoohsi otsítomáísoksistomihpi, otsitáʼsitapiihpi.” (Job 33:25) Áaksííkiʼtaamaʼpiiwa áóʼohkottsíístaapiksistahkiaawa aawápsspiinaoʼsaʼtsiistsi, iihtáyoohtsimioʼpistsi, iihtáóhpattsoohsoʼpistsi, iihtáínakatohsoʼpistsi, ki saaámistsi! Iitáísokinakioʼpistsi, áísokinakiiksi, ki áóhpiikinaisokinakiiksi máátáakattohtáónawayissitapiioʼpa.
10. Áaksikííhtatoohpa iʼnssíni?
10 Matápiiksi áakiitáísokimmohsiyaawa máátáísstaayaawa ááhksiʼnssaawa, ki máátáakattaiʼniyaawa. Ánnikaaki matápii máátáakattohtsíssinayaawa ipahtsáʼpssini ki iʼnssíni. Christ “áaksstsínaiʼtoʼtohkinniinaawaʼsiwa Iihtsipáítapiiyoʼpa áíʼtsistááhtsipoʼtoahsi otokááhtomaanistsi ohkátsistsi. Ki ámohka ísakooyitstsiiwa kaahtomááni, iʼnssíni máátáakattsitaistsiiwa.” “Áʼpistotookiwa áómatskahtooma omáánistáípaitapiiyssini.”—1 Corinthians 15:25, 26; Romans 6:23; máttssaʼtsít Isaiah 25:8.
11. Revelation tsá niitánistohtsístsaiʼtsinikatooʼpa niitáakánistohtsíístapohkoikissaawa matápii anníhka máánssksaahkoyi?
11 Ísakooyssinaakssini íítohkooniiʼpi Naatóyssínaakssini ííhtsistsaiʼtsinikatawa otánistsikímmapiiyipitsiʼsi Iihtsipáítapiiyoʼpa otáóhkotahsaawa ki otáakanistohtohkoikissaawa matápii anníhka Matsowáʼpiʼnssimaani, iitssínaiiʼpa: “Ki (Iihtsipáítapiiyoʼpa) áakiitssaapiniwa áwasaiʼniiksi, ki iʼnssíni máátáakattsitstsiiʼpa, tsááhtaoʼ óyimmáhsiiksi tsááhtaoʼ áípiwasaiʼniiksi tsááhtaoʼ áísttsohkoyiiksi. Ámostsska máátáakattsitaistsiiyaawa.”—Revelation 21:3, 4.
Iʼnííksi Áakáíssksipaitapiiyaawa
12. Jesus tsá niitáíʼstamattstohkima Iihtsipáítapiiyoʼpa otáóhkotahsi ísskonataʼpiiwa ááhkiitohkottohtssksipaitapiiyattsaahsi iʼnííksi?
12 Jesus ísokinaapiyiiwa áísttsíístomiiksi ki máátaipóómatooyiiksi, ki máttohkottssksipaitapiiyattsiyiiwa iʼnííksi. Iihtsipáítapiiyoʼpa ííhkotsiiwa niitáʼpsskonátaʼpiiwa Ohkóyi ááhkiitáóhkottssksipaitapiiyattsaahsi iʼnííksi ki ámohka áíʼstamáttstohkima. Kítaiʼsaakiaissksiniiʼpa niitánistsítsinikatahpi Jesus otáíʼtapoohsi ámohka nínaawa ookóówani, otána akáóhkaʼpssiyináyi? Jesus áánistsiiwa amí aakííkoana akáíʼniwa: “Iʼnákaakííkoana, kitáwaanist, niipowáóot!” Iikiáʼpiiwa? “Ámohka aakííkoana stámohpíístapipowaoowa ki iitómatapiksikkaʼyiwa.” Matápii otáíʼnoahsaawa, “stámiitáʼpipisatsiʼtakiyaawa.” Máátohkottsiitsííhtatoomiaawa otánistsiʼtáámiʼtakssaawa!—Mark 5:41, 42; máttssaʼtsít Luke 7:11-16; John 11:1-45.
13. Tsá anistápitapiyaawa ámoksska áakssksípaitapiiyattsaiksi?
13 Anníhka máánssksaahkoyi, “áakiitssksípaitapiiyattsaayaawa íkamoʼtsitapiiksi ki máátsikamoʼtsitapiiksi.” (Acts 24:15) Ánnikaaki Jesus áakitohtsissitapiiwa Iihtsipaitapiiyoʼpa ótohkotahpi ísskonátaʼpiiwa ááhkiitohtáíssksipaitapiiyattsaahsaawa iʼnííksi, tská áániiwa, “Niistówa ánnakaoʼka íssksipaitapiiyssini ki ipáítapiiyssini. Ánnahka iitáómaiʼtakiwa niistówa, imaksíʼnisa, áakssksipaitapiiwa.” (John 11:25) Máttaniiwa: “Ánniksska akááyáakihtsaayiiksi [ámoksska Iihtsipáítapiiyoʼpa saakiáíssksinoyiiksi] áakoohtsimiyaawa [Jesus] áíʼpoyisi ki áakiitssákssksstsimmiaawa.”—John 5:28, 29.
14. Otssawáttáakiitaistsissi iʼnssíni, tsá anistápiistsi áakanistápipoʼtsiiʼpiaawa?
14 Áaksstonnátsiʼtaamaʼpiiwa annó ksááhkoyi aoʼtáaatsiimahsaawa otsítapíímoaawaiksi ámoksska íssksipáítapiiyattsaiksi! Máátáakattsitaokstakioʼpa iitáítsinikíísinaakioʼpistsi ámoksska iʼnííksi ááhkattsitohtáíkkihkiniiʼtakioʼsi. Ááhkamaʼpsstáániitstsiiʼpa: áísaisttooyiwa otáakitstsissi amá áakssksípaitapiiyattsaawa kitáwaakomimmawa, kitááhksstamiitáʼpohtsiʼtaamssi. Máátáakattáóhkanaatayaawa iʼnííksi, máátáakattsitstsiiʼpa otsitáísstssahpiaawa iʼnííksi, tsááhtaoʼ otsitáyaakihtsaahpiaawa iʼnííksi!
Niitáʼpíkkinaaʼpssksaahkoyi
15. Micah otsikááyissitsinikssini tsá áakanistssopokanistsiiwaatsiksi?
15 Áaksstámiitaʼpohkanaikkinaaʼpiiwa ípaitapiiyssini. Awahkáóótsiiyssini, áísstaiksi ááhkáwahkaootsiiyssaawa, ki áʼpaistotakiiksi iihtáíimíkihtaʼtsskaoʼpi máátáakattsitaistsiiyaawa. Máakanistáʼpiiwa? Iihtánistáʼpiiwa kanáómiaʼnistsitapiiksi máátáakattohtáwaaniitsipoʼtoohsiyaawa otánistápitapihpiaawa, tsááhtaoʼ ohtoʼtóóhpiaawa, tsááhtaoʼ otánistsínaahpiaawa. Ánnikaaki áakiitanistsiiwa ámohka iʼpówahsini, “iyóóhkiitsitapii máátáakattaitapsspinnimiaawa innísttoana iyóóhkiitsitapii, máátáakattssksinimiaawa ááhkanistáwahkaootsiiyssaawa.”—Micah 4:3.
16. Iihtsipáítapiiyoʼpa tsá áakanistsíítaʼpssikaaattsstooma awahkáóótsiiyssiistsi?
16 Kitááhkamaʼpipisatsiʼtsiiʼpa ámohka áakiitáísskskaʼtakioʼpa otááhsawááwahkaootsiiyssaawa nínaawa. Nóóhkohtáókohkoyiyaawa matápiiksi matápiókakihtsimaani ki makáʼpatoʼsókakihtsimaani. Iihtsipáítapiiyoʼpa Otokákihtsimaani áómatapokakihtsimatooʼsi máánssksaahkoyi, anní áakanistaʼpiiwa: “Poohsapóók ki íítssaʼtsík Jehovah otáíkiihpi . . . Áíssikáaattsstooma awahkáóótsiiyssiistsi kanáóʼtakssksaahkoyi. Áakssinnoʼtsima aksipínnakssini ki áakaaníítohpattsiima saapápistaʼtsisa; Áaksstssiiwaiksi awahkáóótsainakaʼsiiksi.”—Psalm 46:8, 9.
17, 18. Anníhka máánssksaahkoyi, tsá áakanistáíksoʼkowammotsiiyiyaawa nínaawa ki itáíksowáʼpaomaahkaiksi?
17 Nínaawa ki itáíksowáʼpaomaahkaiksi áakáíksoʼkowammotsiiyiyaawa, niʼtóyi otánistaʼpaisssaawa Eden. (Genesis 1:28; 2:19) Iihtsipáítapiiyoʼpa áániiwa: “Ánnikaaki ksistsikóyi nitáakokákihtomoayaawa matápii ki iʼsímiiksi itáíksowáʼpaomaahkaiksi, Ki kanáómiaʼnistsipiʼkssiiksi iitáʼpawááwaniiksi sspóóhtsi ki iitáʼpawááwaiʼskapiiksi ksááhkoyi; . . . Ki nitáakohpáísttohkihtsaayaawa íkkinaaʼpiiwa.”—Hosea 2:18.
18 Tsá áakanistsíkkinaaʼpiiwa? “Amá makóyiwa áaksstámiʼnakohpokitaopiimiiwa amí pokómahkihkiniiwa, Ki amá pókimiwa miistákiómahkihkiniiwa áakáóhpokitaopiimiiwa amí sisákkomahkatayowa, Ki amá onistááhsa ki amá áímmoyóhkokinomitaawa ki amá aawápohsiwa itáíksowáʼ-scpaomaahkaawa áóhkanaiʼtomanistaʼpaissiyaawa; Ki amá iʼnákssaahkomaapiwa áakáínawaʼsatsiiwaiksi.” Itáíksowáʼpaomaahkaiksi áakohkanáíkkinaaʼpaissiyaawa, nínaawa tsááhtaoʼ stsíkiiksi itáíksowáʼpaomaahkaiksi máátáakattsstonnootsiiyiyaawa. “Áímmoyóhkokinomitaawa áakáóhkattooyiwa matoyííyi niʼtóyi amá áísaayoohkomiwa”!—Isaiah 11:6-9; 65:25.
Ksááhkoyi Áakitápohtssawaaʼpistotsiiʼpa Matsowáʼpiʼnssimaani
19. Ksááhkoyi tsá áakitápohtssawaaʼpistotsiiʼpa?
19 Kanáóʼtakssksaahkoyi áakitápohtssawaaʼpistotsiiʼpa matsowáʼpiʼnssimaani, matápii áakookóówatooma. Jesus káátohkottsiksisttowatsiiwa ámohka nínaawa iitáómaiʼtakiwa ostóyi: “Áakohpokitaʼpaissoʼpa anníhka Matsowáʼpiʼnssimaani.” Naatóyssínaakssini iitssínaiiʼpa: “Saokióóhtsi ki ihkítssksaahkoyi áakiitsiʼtaamohkomiyaawa, ki spátsikoyi áakiʼtaamaʼpiiwa ki áakiitánistawaapistsisskitsiiwa anní pisátssaisskiyi . . . Áakiitsípakksskaayaawa aohkíístsi saokióóhtsi, ki spátsikoyi áakitstsiiwa aʼsíítahtaanistsi.”—Luke 23:43; Isaiah 35:1, 6.
20. Máakssawáttohtayissinayaawa matápii ipóniaakssini?
20 Iihtsipáítapiiyoʼpa Otokákihtsimaani omatápokákihtsimatooʼsi annó, máátáakattsitstsiiʼpa áíponiaakiiksi. “Áaksskaaʼkaowa napayíʼnssimaani annó ksááhkoyi; áakattsitáísspsaisskiiyaawa miistákistsi.” “Áaksiikáísokssaisskihssoyiyaawa miistsííksi oyʼssátaiksi, ki ksááhkoyi áakáísokssaisskiiwa, ki áaksstámiitaʼpikkinaaʼpiiwa annó ksááhkoyi.”—Psalm 72:16; Ezekiel 34:27.
21. Áaksstaaʼttsitstsiiʼpa iitáísitokaʼpaopiiksi, íkkihkináʼpipaitapiiksi iitayáópiiksi ómahkakáítapisskoistsi, ki sáómmitáʼpiiwa?
21 Máátáakattsitstsiiʼpa ikímmataʼpssiiksi, iitáísitokaʼpaopiiksi, íkkihkináʼpipaitapiiksi iitayáópiiksi ómahkakáítapisskoistsi, ki sáómmitáʼpiiwa. “Áakáókooysskaayaawa ki áakiitsitáípsstsisttotsiyaawa, Ki áakiitáíʼnssimaayaawa ki áakiitááwattoowatoomiaawa otsíʼnssimatooʼpoaawayi. Máátáakattaokooysskomoyiiyaawa stsíkiiksi, ki máátáakattaiʼnssimatomoyiiyaawa stsíkiiksi ááhkiitóówatooʼsaawa.” “Áakitáístaahtopiiyaawa otsiistsíímoaiksi oyʼssátaiksi, Ki máátáakattsitstsiiʼpa matápii ááhkáísstonnoahsaawa.”—Isaiah 65:21, 22; Micah 4:4.
22. Naatóyssínaakssini tsá niitánistsitsinikatooma Iihtsipáítapiiyoʼpa otáakánistohtaatowaʼpistotsiʼsi ksááhkoyi otokákihtsimaani?
22 Matápiiksi áakohtáátowaʼpistotoayaawa ámo-scstsska, ki stsíkiistsi, oʼtstsíssi Matsowáʼpiʼnssimaani. Psalm 145:16 iitssínaiiʼpa: “[Iihtsipáítapiiyoʼpa] Kitáíkayinniiʼpa koʼtsísi ki kitohtáísapistotoayaawa kanáípaitapiiksi nóóhkánistapitsííhtaahpiaawa.” Káátsitssinaiiʼpa Naatóyssínaakiikaayissitsinikssini: “Íkkinaaʼpitapiiksi áaksináanatoomiaawa ksááhkoyi, ki áaksstonnátohtsiʼtaamaʼpssiyaawa otsstonnátsikkinaaʼpissi. . . Íkamoʼtsitapiiksi áaksináanatoomiaawa ksááhkoyi, ki áakomáánistsitayaopiiyaawa.”—Psalm 37:11, 29.
Niitáakánistssksikamoʼtohtooʼpi Isskóóhtsika
23. Iihtsipáítapiiyoʼpa Otokákihtsimaani tsá áakanistsíkamoʼtohtooma niitánistókohkoyoʼpi?
23 Iihtsipáítapiiyoʼpa Otokákihtsimaani áakssksíkamoʼtohtooma niitánistáókohkoyihpiaawa matápii áakitsskókstakioʼpa otánistsísamitaʼpaissspiaawa annó, naáómahksikiipippoisstoyiimiistsi. Otáakanistáíʼtaamaʼpssspiaawa ánnikaaki áaksipiiyóʼtsitskaatoomiaawa otánistáókohkoyihpiaawa matápii otááʼwattáókakihtsimatohssaawa. Áípaitapiiksi ánnikaaki máátáakattohtaiksimsstaayaawa otánistókohkoyihpiaawa. Matápii otánistáísokaopiihpiaawa ki otánistáísoksiksimsstaahpiaawa áakohtssiiniiʼpiaawa otánistókohkoyihpiaawa.
24, 25. (a) Isaiah tsá niitánistsikááyissitsinikatooma otáakanistaʼpaisissi? (b) Máakssksiniiʼpa otssawáttáakohtaiksimsstaoʼsi niitánistókohkoyoʼpi?
24 Iihtsipáítapiiyoʼpa áákomimmapiiyipitsiwa áániiwa: “Nitáakaʼpistotaki maanííwa sspóóhtsi [maanííwa okákihtsimaani iitáakohtooʼpa sspóóhtsi áakohtáókakihtsimatawa matápii] ki maanííwa ksááhkoyi [íkamoʼtsitapiiksi]; Ki isskóóhtsika otánistáʼpaissspiaawa máátáakattaissksinimiaawa, Máátáakattsitaissksipoihtsiyiiyaawa ósskitsipahpoaawayi. Stámohtomáánistaiʼtaamaʼpssik ámostsska nitáʼpistotakssiistsi.” “Kanáóʼtakssksaahkoyi áakáíssikopiiwa, máátattsitstsiiʼpa ipiwáʼpiiwa. Matápii otánistáíʼtaamaʼpsssaawa íítohtáíʼtaamipapisayaawa.”—Isaiah 14:7; 65:17, 18.
25 Iihtsipáítapiiyoʼpa Otokákihtsimaani áakohtsskáápoʼkohtooma otánistsísamokaʼpiihpi annó ksááhkoyi. Otánistsstonnátsikimmokissi áakomáánistawaatowaʼpistotookiwa máatáakattsitohtaiksimsstaoʼpa niitánistókohkoyoʼpi. Niitánistókohkoyoʼpi áakohtsíkkinayiistapstsiiwa kitsíksimsstaaninnooni, máátáakattohtaikioʼpa ááhkáíssksiniʼsaawa.
26. Iihtsipáítapiiyoʼpa máakáakohtssksiponihtakiwa niitánistókohkoyoʼpi?
26 Ámostsska iihtsíʼpoyoʼpistsi Iihtsipáítapiiyoʼpa áákohtssksiponihtakiwa niitánistókohkoyoʼpi annó ksááhkoyi. Íssksinima máátsitotaʼpiihpa kiistónnoona ííhpipokaawaʼsoʼpa ipahtsáʼpssini, ííhtoʼtstsiiwa kitotóómínninnoona ki kitotóómiksísstonnoona. Máátsitotaʼpiihpa kiistónnoona otsítsipokaawaʼsoʼsi makáʼpatoʼsókakihtsimaani annó ksááhkoyi, Adam ki Eve ikkamóóhkanistsiʼtoahsaawa Iihtsipáítapiiyoʼpa áaksstáánitapipokaawaʼsoʼpa matsowáʼpiʼnssimaani. Otsskáíʼkimmokissi Iihtsipáítapiiyoʼpa áakohtssksiponihtakiwa niitánistókohkoyoʼpi.
27. Tsa áakánistapaʼpanistsiiyaawa ámostsska ikááyissitsinikssiistsi anníhka máánssksaahkoyi?
27 Ánnikaaki máánssksaahkoyi, kanáítapii áakitsípaitapiimatoomiaawa otsitáakssopoksipoʼtoahpiaawa niitánistsikááyissitsinikatooʼpi Romans 8:21, 22: “Áʼpistotoawaiksi áakohkáttohtsipoʼtoayaawa ipahtsáʼpssini, ki áakáíʼtaamiʼtsimiaawa Iihtsipáítapiiyoʼpa ááhkáókoʼsimohssaawa. Íssksiniiʼpa áʼpistotoawaiksi otáísttsóhkomssaawa ki otáísttsohkoyssaawa.” Matápii áakiitsínimiaawa áíʼsopokániststsissi ámohka áátsimoyihkaani: “Ááhkóóhkoʼtstsissi Kitokákihtsimaani. Ááhkóóhkaniststsissi kitánistsitsííhtatooʼpi sspóóhtsi, niʼtóyi annó ksááhkoyi.” (Matthew 6:10) Áakiʼtomániststsiiwa sspóóhtsi annó ksááhkoyi anistáʼpissi Matsowáʼpiʼnssimaani, áaksstonnátsiʼtaamaʼpiiwa.
[Isínaiksi íítohkooniiʼpa sináákssini 23]
Anníhka máánssksaahkoyi, ómahkitapiiksi áaksskaʼsitapiyaawa, otsítomáísoksistomssaawa
[Isínaawa íítohkooniiʼpa sináákssini 24]
Anníhka máánssksaahkoyi, máttáakattsitstsiiʼpa áísttsíístomiiksi ki máátaipóómatooyiiksi
[Isínaawa íítohkooniiʼpa sináákssini 25]
Anníhka máánssksaahkoyi, iʼnííksi áakiitssksípaitapiiyattsaayaawa
[Isínaawa íítohkooniiʼpa sináákssini 26]
‘Máátáakattssksinimiaawa awahkáóótsiiyssini’
[Isínaiksi íítohkooniiʼpa sináákssini 27]
Anníhka Matsowáʼpiʼnssimaani, matápii ki itáíksowáʼpaomaahkaiksi máátáakattaisstonnootsiiyiyaawa
[Isínaawa íítohkooniiʼpa sináákssini 27]
‘Iihtsipáítapiiyoʼpa áaksikáyinnima oʼtsísi ki áakohtsitáísapistotoyiiwa kanáípaitapiiksi nóóhkánistapitsííhtaahpiaawa’
[Isínaawa íítohkooniiʼpa sináákssini 28]
Áakohtssksíponihtattsspa Iihtsipáítapiiyoʼpa Otokákihtsimaani niitánistókohkoyoʼpi