Takáatsiksi Iihtsipáítapiiyoʼpa?

1. Máakáísstsinaiʼtapaatsi­moyih­kaoʼpa Iihtsipáítap­iiy­oʼpa?

Ikámoʼtsitapiwa Iihtsipáítapiiyoʼpa ohkanaʼpáístotsima ohkaniitáístsiistsi annó ksááhkoyi ki sspóóhtsi, káátanistsínihkatawa Áʼpistotookiwa. Ááhsitaʼpaisiiwa isskóóhtsika ki áakááhsitaʼpaisiiwa íssoohtsika. (Psalm 90:2) Iihtsíístapitstsiiwa iʼtáámitsinikssiistsi iitohkóóniiʼpiaawa Naatóyssínaakssini. (1 Timothy 1:11) Iihtsipáítapiiyoʼpa iihkókkiwa ipáítapiiyssini, noohkánistssokaʼpiiwa ááhkáítapaatsimoyihkaoʼsi.​—Okstóót Revelation 4:11.

2. Tsá anistápitapiwa Iihtsipáítapiiyoʼpa?

Máátomaikákitstsiiʼpa matápii inoyííwa Iihtsipáítapiiyoʼpa, tská anistápssiwa Naatoyítapiwa, iyóóhkiitstsiiwa oistómi piiyóʼtsitssokaʼpiiwa otánistaʼpaisspi. (John 1:18; 4:24) Áakanóóhkohkottohtssksiniiʼpa otánistápitapiiyssi Iihtsipáítapiiyoʼpa kaakáíssaʼtsiiʼki otáʼpistotakssiistsi. Iihtssksíniiʼpa Iihtsipáítapiiyoʼpa otokákssi ki otákomimmapiiyipitsiiyssi kaakáíssaʼtsiiʼki otánistaʼpistotsiʼsi itsííyipokoiʼnssimaanistsi ki áípisatssáísskiistsi. Stámohtsiʼtóóhkainakowa otsskonátaʼpssi áakitáíssaʼtsiiʼpa otánistómahkaʼpistotsiʼsi sspóóhtsi.​—Okstóót Romans 1:20.

Áakáttohkottssksiniiʼpa otánistápitapiiyssi Iihtsipáítapiiyoʼpa kaakáókstooʼki Naatóyssínaakssini. Iihtsipáítapiiyoʼpa iitssínaimaistsi otáyááhsiʼtsiiʼpi ki otáíkaiʼtsiiʼpi, otánistáístotoahsi matápii ki otánistáísskskaʼtakssi.​—Okstóót Psalm 103:7-10.

3. Kítaiʼnihkaʼsimiwa Iihtsipáítapiiyoʼpa?

Jesus áániiwa: “Kínninnoona sspóóhtsi, kitsínihkaʼsimi ááhkátowaʼpissi.” (Matthew 6:9) Naamíʼtokskaawa otsínihkaʼsimi Iihtsipáítapiiyoʼpa, noohkákaowa niitáyoohkíítsinihkatahpi. Iyáápiiʼpowahsini Iihtsipáítapiiyoʼpa niitáínihkatawa “Jehovah” ki áínakóóhkiitohtakowa iyóóhkiitsiʼpówahsiistsi. Tókskammiksi matápii niitáwaanistoomiaawa otsínihkaʼsimi “Yahweh.”​—Okstóót Psalm 83:18.

Iihtsipáítapiiyoʼpa otsínihkaʼsimi iihtsáóʼtsiiʼpa aakáóistsi Naatóyssínaakssiistsi ki iitsítsstáánitohtoomiaawa Lord tsááhtaoʼ God. Oʼtsítskanistsówa 7,000 otsítstsiihpi otsínihkaʼsimi otáísttsitsáísinaiʼsi Naatóyssínaakssini. Jesus iihtáyissitapiiwa Iihtsipáítapiiyoʼpa otsínihkaʼsimi otohtáíssksinimaʼtsaahsaiksi matápii Iihtsipáítapiiyoʼpa.​—Okstóót John 17:26.

Issáʼtsit áísaiksisttoohsini Kítaiʼnihkaʼsimiwa Iihtsipáítapiiyoʼpa?

4. Jehovah kítaoʼohtáíkiiwa kiistónnoona?

Kítaaʼnistápanissina Jehovah otssáwohtáíkissi kiistónnoona aʼyáókohkoyoʼki? Tókskammiksi matápii niitáíksimsstaayaawa otsitotáʼpissi Iihtsipáítapiiyoʼpa aʼyáókohkoyoʼki, ááhkitohkóíssksiniʼsi ikkamáánistsissi kitomáíʼtakssinnooni, noohksáánistsiiwa.​—Okstóót James 1:13.

Iihtsipáítapiiyoʼpa iihkotsííwa nínaawa ááwattsitsííhtaani. Kítaʼyáíniiyiʼtsiiʼpa ááhkawattsitsííhtaatooʼsi ááhkáítapaatsimoyihkaoʼsi Iihtsipáítapiiyoʼpa? (Joshua 24:15) Noohksiikakáítapiiyaawa iihtáókaʼpissitapiiyaawa otáwattsitsííhtaanoaawayi, matápii iikohtáóksistotootsiiyiyaawa ki iikohtáókohkoyiyaawa. Jehovah iikohtáwaakánawa áakitáínima matápii áakitáwaakánotsiiyiyaawa.​—Okstóót Genesis 6:5, 6.

Iihtsipáítapiiyoʼpa Jehovah iihtáíkiiwa kiistónnoona ki áísstakkiwa ááhkáíʼtaamipaitapiiyoʼsi. Máátáttsisamowa áakitsssikáaattsiiwaiksi ánniksska áwaakánakiiksi matápii ki máátáakattsitstsiiʼpa ókohkoyssini. Ikippáísskáakanistsiʼtsima matápii ááhkáókohkoyssaawa, Issksinimáʼtstohkssini 8 áakitohkóíssksiniiʼpa ohtáísskáakanistsiʼsi ááhkitáístsissi ókohkoyssini.​—Okstóót 2 Peter 2:9; 3:7, 13.

5. Tsá áakánistohkottoʼtssatsiksoʼkowammawa Iihtsipáítapiiyoʼpa?

Jehovah áwammokiwa ááhkáítapaatsi­moyih­kaoʼsi, áakitáóhkottoʼtssatsiksoʼkow­ammawa. Iihtáíkiiwa kiistónnoona. (Psalm 65:2; 145:18) Áakohkottssíínima kitsípahtsaʼpssinnoonistsi imaksípahtsaʼpssoʼki, issksiníma otáíiyikaʼkimaoʼsi ááhkanistáíʼtoahsi. Máátáíkamoʼtaʼpaissoʼpa áakánoohkohkottoʼtssat­sik­soʼ­kowam­mawa Iihtsipáítapiiyoʼpa.​—Okstóót Psalm 103:12-14; James 4:8.

Jehovah iihkókkiwa ipáítapiiyssini áakoohkáótoomipoʼtoawa ki áakoohkáwaakomimmawa. (Mark 12:30) Kitáakohkottaiʼstamáttsaawa kitáwaakomimmahsi Iihtsipáítapiiyoʼpa ikkámohtáíssksinimaʼtsookoiniki ki ikkamáánistaiʼtoainiki, aʼyáístotsimmiiniki ámostsska áaksiistapáísskonataʼpiiwa kitánistáíksoʼkowammahsi.​—Okstóót 1 Timothy 2:4; 1 John 5:3.