Iʼtáámitsinikssiistsi Kítaiiʼtapohtóʼtstsiiyaawa Iihtsipáítapiiyoʼpa?

1. Takáá Iisínaima Naatóyssínaakssini?

Naatóyssínaakssini iitsiʼtáámitsinikatooʼpa íssoohtsika, matápii otsitáakitomanistáí­paitapiiys­saawa annó ksááhkoyi. (Psalm 37:29) Niitsóyaawa 66 pokaatóys­sínaaks­siistsi, ámoistsi iipóʼtstooʼpiaawa iitohtssápanistsówa Naatóyssínaakssini. Iihtsipáítapiiyoʼpa iihtsíssitapiiwa 40 isstákaanaʼpssiiksi nínaiksi ááhkssínaiʼsaawa Naatóyssínaakssini. Ánnohk anistsísamowa 3,500 ísstoyiimistsi Moses otsitssínaiiʼpi niisitóistsi matóómohpokaatóy­ssínaak­ssiistsi. Ánnohk anistsísamowa 1,900 ísstoyiimistsi issksksímawa John otsitssínaiiʼpi isakoyssínaiiʼpi pokaatóyssínaakssini. Ámoksska iisínaimiksi Naatóyssínaakssini, takáá otsiksímsstaani iisínaimiaawa? Iihtsipáítapiiyoʼpa iihtsíssitapiiwa otaatowóttakssini ááhkitápohtooʼsi otsiksímsstaanistsi ánniksska iisínaimiksi Naatóyssínaakssini. (2 Samuel 23:2) Máátssínaimiaawa otsiksímsstaanoaawayi iisínaimiaawa Iihtsipáítapiiyoʼpa otsiksímsstaanistsi, káátohkottáánioʼpa Jehovah iisínaima Naatóyssínaakssini.​—Okstóót 2 Timothy 3:16; 2 Peter 1:20, 21.

Issáʼtsit áísaiksisttoohsini Takáá Iisínaima Naatóyssínaakssini?

2. Tsá áakánistssksiniiʼpa Naatóyssínaakssini otánistsíssi?

Issksíniiʼpa Naatóyssínaakssini otohtóʼtstsissi Iihtsipáítapiiyoʼpa tská iihtáíkamoʼtsíkayissitsinikatooʼpa íssoohtsika. Máátsitstsiiʼpa nínaawa ááhkohkottáánisttsissi. (Joshua 23:14) Isstohkanáísskonátaʼpssiwa Iihtsipáítapiiyoʼpa, niʼtsitápiwa áakohkottsitapikayísssapiwa matápii otáakánistaʼpaisissi íssoohtsika.​—Okstóót Isaiah 42:9; 46:10.

Iihtsipáítapiiyoʼpa otáátoyssínaakssini niʼtsitáyoohkíítsiiwa, iitápohtooʼpa kanáómiaʼnistsiʼpowahsiistsi ki iitápohkanawáániitohtooʼpa kanáóʼtakssksaahkoyi. Iiksikáíssiwa Naatóyssínaakssini noohkitsíkamoʼtsítsinikatooʼpa isspssksínimáʼtstohkssini. Ámoksska 40 iisínaimiksi Naatóyssínaakssini máttsitssapíʼtootsiiyiyaawa otssínaiiʼpoaawayi.a Iihtsipáítapiiyoʼpa otákomimmapiiyipitsiiyssini, stámitsiʼtóóhkainakowa Naatóyssínaakssini, ki iiksskonátaʼpiiwa otsiʼpówahsini, matápii iihtáyiistapáísoksipaitapiiyaawa. Ámostsska ománaʼpiistsi, stámohtomaiʼtakiyaawa sstónnatakáítapiiksi Naatóyssínaakssini otánistápissi Iihtsipáítapiiyoʼpa Otsiʼpówahsini.​—Okstóót 1 Thessalonians 2:13.

Issáʼtsit áísaiksisttoohsini Tsá Áakánistssksiniiʼpa Naatóyssínaakssini Otánistsissi?

3. Tsá anistápiiwa Naatóyssínaakssini?

Naatóyssínaakssini iitsítsinikatawa Iihtsipáítapiiyoʼpa otánistáíʼtaa­mitsini­katooʼsi otánistáwaakomimmahsi ki otánistáíssokitsííhtatahsi kanáítapii. Naatóyssínaakssiistsi iitsítsinikatawa nínaawa otáíʼtsipoʼtoahsi matsowáʼpiʼnssimaani ki otánistáʼtstooʼsi ki otáakánistsskoʼtsiiʼpi matsowáʼpiʼnssimaani íssoohtsika.​—Okstóót Revelation 21:4, 5.

Iihtsipáítapiiyoʼpa Otsiʼpówahsini iitsínohtooʼpa okákihtsimaanistsi, ikámoʼtssksinimáʼt­stohks­siistsi, ki isskapíímotsiiyssiistsi. Naatóyssínaakssini máttohtsítsinikatawa Iihtsipáítapiiyoʼpa otánistáístotoahsi matápii​—máttohtsítsinikatawa Iihtsipáítapiiyoʼpa otánistápitapiihpi. Naatóyssínaakssini kitáakohtsspommookoo kitááhkohtssksinoahsi Iihtsipáítapiiyoʼpa. Kitáakohtaiʼstamáttsookoo kitááhkanistáwakkaamahsi Iihtsipáítapiiyoʼpa.​—Okstóót Psalm 19:7, 11; James 2:23; 4:8.

4. Tsá kitáakánistohkottot­sista­piʼtsiiʼpa Naatóyssínaakssini?

Ámoyi sináákiaʼtsisi kitáakohtsspommookoo kitááhkohtotsistapiʼtsiʼsi Naatóyssínaakssini, kitáakánistáíssksinimaʼtsookoo Jesus otánistáíssksinimaʼtstohkihpi. Iihtáíkamoʼtsitsinikiwa Naatóyssínaakssini ááhkitssksiniʼsi “otánistápanissina Naatóyssínaakssiistsi.”​—Okstóót Luke 24:27, 45.

Iiksipisátáʼpiiyaawa iʼtáámitsinikssiistsi iihtóʼtstsiistsi Iihtsipáítapiiyoʼpa, noohksiikakáítapii máátohtáíkiiyaawa tsááhtaoʼ áísstsimiʼtsimiaawa. Minohtssawááhsiʼtakit, kitáaksstámomanistohtáíssksinimaʼtsookoo Iihtsipáítapiiyoʼpa kitáakitohkottomanistáíʼtaamipaitapiiyi.​—Okstóót John 17:3.