Gèɖèpɔ́ɔ̀ Ɓǎto Ɓě Mu Páɖédǎ Mú Cĩ́ìn

Páɖédǎ se nìɛ̌ mu kà ɓóɖó-kpà à cĩ́à kɔ̃ zɛ̃̌ɛ̀ kɛɛ nìà kɛ. Gèɖèpɔ́ɔ̀ seɛ ma mɔ́ ɓɛ́ fũ̀à-fṹá-ɖɛ̀ kè wìì-ɖɛ̀ kè nyɔ-ɖɛ-puà-puà ɔ kè gǎ ké ɓóɖó-kpàà kɔ̃in dyíìn. Ðé dyúa kɛɛ, Gèɖèpɔ́ɔ̀ muɛ nyuùn ɓɛ́ ɓóɖó-kpàà ké páɖédǎ jǔ. Xwɛ̌ Páɖédǎ mu nììn nyɛ́? Ɓěà dyé ɖɛ Báɓòɔ̀ cɛ̃ kɛ.

Dyí-sɛ́ɖɛ́ìn-nyɔ̀ ɓě. Páɖédǎ mu Gèɖèpɔ́ɔ̀ ɓǎto ɓěɛ̀ ɓíɖí jǔùn. Wa mu ɖɛ nɔ̀mɔ̀ dyíin nyuùn ɓó wa mǔè ɓě bìì. Wa mu cĩ́ìn kà Gèɖèpɔ́ɔ̀ gma ɓěɔ̀ nyuà cɛ̃ɛ kɛ.—Nɔ́ɔ́ 2:21.

Ðii-ɖɛ̀ ɓáún-ɓáún. Ðé Páɖédǎ múɛɛ, mɔ́ se kpáuń mu fɔɔ. Báɓòɔ̀ ɖá, “Ðii-ɖɛ̀ ɓáún-ɓáún mɛ nì ɔ ɓóɖóɔ̀ kɔ̃.”—Wɛ́ɖɛ́ 72:16.

Gbǒ nɔ̀mɔ̀ kɔ̃in ɓě kè múà-kũ̀à. Ðé Páɖédǎ múɛɛ, xwéɖé-dù séín mu wa mìɔùn nììn gbǒ kɔ̃̀ùn. Nyɔǔn séín mu kũ̀à ɓɛ́ ɔ dyà múà jɛ́ɛ́ kɛɛ nyuùn.—Àzédyà 65:21-23.

Gìɖìǐ ɖé ɓóɖó-kpà gànáà kɔ̃. Nyɔ ɓě se to vɔ̃ɔ́ mu ɖe ɓɛ́ wa kéɛ mú sè. Gèɖèpɔ́ɔ̀ Wuɖuɔ̀ ɖá, “[Gèɖèpɔ́ɔ̀] po to ɓě ɓɔ́í ɖé ɓóɖó-kpàà dà séín.”—Wɛ́ɖɛ́ 46:8, 9.

Dyi-káná-káná. Báɓòɔ̀ ɖá, “Ké nyɔ séín ɓě ɓɛ́ wa cĩ́ ɖé [Páɖédǎ] múɛɛ ɖò se wɛ́ɛ mu ɖe fɔɔ.” (Àzédyà 33:24) Ké ɖeɛɛ, nyɔ ɖò se dyéɖéín dyi kpèɛ̌n mu mɔɔ ɖùǔn sṹɛ mu mɔɔ kɔ́ɖɔ́ɔ mu mɔɔ ɓoo-ɓoo jǔɛ mu ɖe.—Àzédyà 35:5, 6.

Nyɔ-ɖɛ-puà-puà kè wìì-ɖɛ̀ ɔ kè mɛ́-mɛ́ dyi-zi-zi. Gèɖèpɔ́ɔ̀ Wuɖuɔ̀ ɖá, “Mɛ́-mɛ́ ɖò se nìɛ̌ mu ɖe. Kpé-po-po ɖò se nìɛ̌ mu ɖe. Vĩ̌-vĩ̌ ɖò se nìɛ̌ mu ɖe. Nyɔ-ɖɛ-puà-puà ɖò se nìɛ̌ mu ɖe. Sepóɛɖé ɖɛ ɓě nì ma kĩ́ín nyɛɛ ɖǎ dyi zi.”—Wɛ̀ɖɛ̀ɓèɖésĩ̀ɔ̀ 21:4.

Ðɛ-gbà-nyu-nyɔ̀ ɓě se nìɛ̌ mu ɖe. Báɓòɔ̀ ɖá, “Gèɖèpɔ́ɔ̀ mu hwòɖǒ-kɔ̃in-nyìnììn-nyɔ̀ ɓěɔ̀ ɓóɖóɔ̀ kɔ̃ zàùn. Ɔ mu se-jǎà-ɖɛ̀-nyu-nyɔ̀ ɓěɔ̀ ɖé ɓóɖóɔ̀ mú zàùn kà nyɔ zàà ɓáá-ɖɛ̀ ɖò hwuɖuɛ.”—Nɔ́ɔ́ 2:22.

Nyɔ ɓě mu mú ɖɛɓɛìn ɖɛ̀ɓɛ̀ìn, ké wa mu kpéín dyéìn dyèìn. Se-dyí-sɛ́ɖɛ́ìn-ɖɛ̀ kè nyɔ-dyi-pĩ́à-pĩ́à kè ɖɛ-séín-mɔ́-mɔ́ ɔ kè nyɛ́ín-nyɛ́ín se nìɛ̌ mu ɖe. Nyɔ ɓě mu dyúáɖò nììn, ké wa mu cĩ́ìn kà Gèɖèpɔ́ɔ̀ gma ɓěɔ̀ nyuà cɛ̃ɛ kɛ.—Àzédyà 26:9.