Nyɛ́ Mɔ̀ Gèɖèpɔ́ɔ̀ Ɓǎto Ɓěɛ́?

Jízɛ̀ Kɛ́ɖɛ́ì mɔ̀ Jɛ̀hóvà dyú-gàà kè ɔ ɖɛ̀ɓɛ̀ ɓǎto xwɛ̃́ìn bũ̌in. Hwɛ̀ ɓɛ́ Jízɛ̀ ké ma dà ɓóɖó-kpàà kɔ̃ cĩ́ɛɛ, ɔ mɔ̀ ma kpé-ɓéɖé-zùù, ké ɔ cĩ́ ma ɖé dyɔún. (Jɔ̃́ɔ́ 17:5) Púɛɛ, ɔ dyi ma ɓóɖó-kpàà kɔ̃ ɓɛ́ ɔ ké ma jǎà ɓá Gèɖèpɔ́ɔ̀ jè dyíɛɛ nyɔǔn tɛ̀mɛ̀ìn. (Jɔ̃́ɔ́ 18:37) Ké ɖeɛɛ, ɔ tò ma ɔ fɛ̀ɛ̀ɔ̀ ɓɛ́ ɔ ké nyɔ ɓě nyuà Gèɖèpɔ́ɔ̀ wuɖuɛɛ nàmàǔn kè gĩɔ xwaún póìn. (Wóɖómà 6:23) Ɓó kàǔn wɛ̃ɛ, Jízɛ̀ mɔ̀ Kã́á ɓó Gèɖèpɔ́ɔ̀ Kã́á-ɓòɖò ɓɛ́ ɔ mɔ̀à dyɔún-gɔ̌mànà ɓɛ́ ɔ muà Páɖédǎ ɓóɖó-kpàà kɔ̃ dyàùn wɛ̃ɛ bìì.—Wɛ̀ɖɛ̀ɓèɖésĩ̀ɔ̀ 19:16.

Ínjà ɓěɔ̀ mɔ̀ Gèɖèpɔ́ɔ̀ ɓǎto ɓě ɖekè. Ínjà ɓěɔ̀ fɛ̀ɛ̀ se ma gbɔ dè nɔ̄ ɓóɖó-kpàà kɔ̃ kà nyɔǔn-dyù nìà kɛ. Gèɖèpɔ́ɔ̀ mɛ ma wa ɖé dyɔún hwɛ̀ ké ɔ mɛ ma ɓóɖó-kpàɔ̀. (Jóɓò 38:4-7) Ínjà méɔ̀ùn ɓě nì ɓó. (Dànyá 7:10) Gèɖèpɔ́ɔ̀ dyɔún-ɓǎto ɓě nìà kɛ mɔ́ ɓɛ́ nyɔǔn ké jǎà ɓá Jɛ̀hóvà jè dyíɛɛ dyí dyuò.—Wɛ̀ɖɛ̀ɓèɖésĩ̀ɔ̀ 14:6, 7.

Gèɖèpɔ́ɔ̀ ɓéɖé ɓǎto ɓě nɔ̄ ɓóɖó-kpàà kɔ̃ ɖekè, ké ɔ ɖáìn wa ɔ zàse ɓě. Nyɔ ɓɛ́ ɔ nyu zàse ɖé tɔ̀ɔ̀-ɓìɔ̀ dyúa kɛɛ, cɛ̃ ɖɛ ɓɛ́ ɔ dyuò dyí ɓá nyɔ ɖò mɔɔ ɖɛ ɖò jè dyíɛ. Jɛ̀hóvà Zàse ɓě cɛ̃ ɖɛ wa dyuò dyí ɓá Jɛ̀hóvà kè ɔ hwòɖǒɛ̀-gbɔ-po-ɖɛ̀ jè dyíɛɛ nyɔ tɔ̀ɔ̀ ɓě gbo. (Àzédyà 43:10) Jɛ̀hóvà Zàse ɓěɔ̀ mɔ́ ɓɛ́ wa ké m̀ gbo kpá ɓɛ́ m̀ ké jǎà ɓá Jɛ̀hóvà jè dyíɛɛ cɛ̃́, kà ínjà ɓěɔ̀ mɔ́à kɛ. Wa mɔ́ ɓɛ́ m̀ ké Jɛ̀hóvà ɓǎto jǔ ɖekè.