CƐ̃́Ɛ́-ÐƐ̀ 18

Nyɔ Ɓèɔ̀ Mɛ Cɛ̃́ Ðɛ Ðò

1 Kɔ̀ɖéíntĩ̀ɔ̀ 9:19-23

SṸÌN-XWÍNÍÍN: Nyuɛ ɓɛ́ nyɔ ɓè m̀ wùɖùà gboɛɛ ké hwìɖìi poìn, ɓɛ́ wa kéɛ dyé kà wa cɛ̃́ ɖɛ kpa ɖɛ ɖòɛ.

Ɔ NYU-KÀ:

Poìn ɖɛ nyɔ ɓè m̀ wùɖùà gboɛɛ dyuò dyí kĩ́ín nyɛɛ jè hwìɖìi. Ɓɔ́ ɖɛ wa dyuò dyí kĩ́ín nyɛɛ kɔ̃in kpaa pu, kɛɛ kpá wa gbo ɓɛ́ wa ké ɖɛ m̀ nìà jè cɛ̃iń nyɛɛ dya gmɔ̀ ɖé hwìè ɖìè ɖò mú.

Kpàìn fɔ̀nɔ̀-hwòɖò ɓè ɓɛ́ nyɔ ɓè dyuò dyíɛɛ pɛɖɛ, kɛɛ m̀ mɛ mɛɛ̀ ɔ jù ké m̀ dyi fɔ̀nɔ̀-hwòɖò ɖìè ɓè jè kɔ̃in zaìn nììn.
Ðe ɖɛ múin, ké nàìn ɖɛ hwìɖìi. Ɔ dyi kpáa ɓɛ́ìn ní, cɛ̃ jàà-ɖɛ̀ ɓè ɓɛ́ nyɔ ɓè dyuò jè ɖɛ wè, mɔɔ ɖɛ ɓè nì kpáuń kàùn wɛ̃ɛ jè, ɓɛ́ m̀ ké fɔ̀nɔ̀-hwòɖò jɛ́ɛ́ ɓè ɖɛ dyí poìn. Poìn nì wáɖáá-wùɖùɔ̀ kè kà wáɖáá-wùɖùɔ̀ kè jàà-ɖɛ̀ ɓè m̀ mɔ́à jè cɛ̃ɛ dyiɛ nyu gbo muɛ̀n nyɛɛ jè hwìɖìi kóɖó-kóɖó.

Kà nì muà wáɖáá-wùɖùɔ̀ múin gmɔìn nyɛɛ, nyuɛ ɓɛ́ m̀ mìɔùn ké ɖɛ hwìɖìi poìn dyììn ɖé dyi-diè-ɖɛ̀ ɓè mɔ̀à, ‘ɖɛ́ kɛ́ kè xwíníínɔ̀ nyɛ́ kɔ̃̀ jè kɛ́ kè tiɔ̀ nyɛ́ kɛ́ kè dɛ̀ kɛ́ kè nyɛ́ kɛ́ ɔ kè xwɛ̀ kɛ́’ kɛɛ m̀ mìɔùn dyi-diè-diè mú. Po kpé ɖé nì ɖɛ-tɛ̀mɛ̀ìn-tɛ̀mɛ̀ìnɔ̀ mú dyììn ɖé dyi-diè-ɖɛ̀ ɓèa ɖíɛ́ ɓè dyi-diè-diè kè wa gɔ̃̀-jù-jù mú ɖé nì wuɖu-wáɖá-wáɖá gànáɔ̀ mú.
Tɛ̀mɛ̀ìn kà ɖɛ m̀ nìà cɛ̃iń nyɛɛ kpa ɖɛ kɛ. Zaìn kà Baɓoɔ fɔ̀nɔ̀-hwòɖò ɓè ɓɛ́ìn nyɔ ɓèɔ̀ gbo kpáa ɖé waà cĩ́-cĩ́ɔ̀ mú wé séín nyɛɛ jè kɔ̃in. Cɛ̃ fũ̀à-fṹá-ɖɛ̀ jɛ́ɛ́ ɓè kè kpeɖe jɛ́ɛ́ ɓè ɔ kè nyuu-ɖɛ̀ jɛ́ɛ́ ɓè ɓɛ́ wa kpa ɖɛ ɖé nyɔ ɓèɔ̀ gboɛɛ jè.