CƐ̃́Ɛ́-ÐƐ̀ 17
Nyɛ́ Jízɛ̀ Jù Kɛ́?
À dyi ɖɛ ɓè Jízɛ̀ cɛ̃ ma kè ɖɛ ɓè ɔ nyu ma ɓóɖó-kpàà kɔ̃ɛɛ jè cɛ̃́ ní, à dyé kpeɖe ɓè ɓɛ́ ɔ nyu ké à xwɛ̃́ìn ɔ kè ɔ Ɓà Jɛhova bũ̀in nyɛ. Ðɛ́ mɔ̀ kpeɖe ɓè nìà kɛ ɖíɛ́ ɓè kɛ́? Ké xwɛ̀ à ɓɛ́ìn Jízɛ̀ kíɖíí síɛ ɖé à mìɔùn nììn cĩ́-cĩ́ɔ̀ múɛ́?
1. Hwìè ɓèɔ̀ nyɛ́ kɔ̃̀ mú Jízɛ̀ nì kà ɔ Ɓà nìà kɛ́?
Ðé dyɔún wɛ̃ɛ, Jízɛ̀ dè ma ɔ Ɓà kpeɖe ɓèɔ̀ dyéɖé gbo, ké ɔ cɛ̃́ ma ɔ ɖɛ xwaún ɓó zɔ̃ béɔ̀ùn ɓè xwíníín. Ɔ ná nì jèɛɛ, ɔ poìn hwìɖìi, ké ɔ nyu ɖɛ ɓè, ké ɔ hwòɖò nì kà ɔ Ɓà nìà kɛ. (Zà Jɔ̃́ɔ́ 5:19 wuɖuún.) Sepoɛɖe Jízɛ̀ sí ma ɔ Ɓà kpeɖe séín ɓèɔ̀ kíɖíí nɔ̀mɔ̀ dyíin jèɛɛ, ɔ cɛ̃ɛ ma, ké ɔ ɖá: “Nyɔ ɓè ɓɛ́ wa ɖà ḿ dyéɛɛ, wa ɖà Ɓàɔ̀ dyé.” (Jɔ̃́ɔ́ 14:9) Kà nì muà Jízɛ̀ɛ̀ kpeɖe ɓèɔ̀ jè cɛ̃́ìn nyɛɛ, kàà nì mu Jɛhova dyí dyuòùn mìɔ. Ɔ hwɔìn-kà, kà Jízɛ̀ nyu ma nyɔ ɓè wììn dyéɛ kɛɛ tɛ̀mɛ̀ìn kà ɓɛ́ Jɛhova kɔ̃̀ ɖé nì jè gboɛ.
2. Xwɛ̀ Jízɛ̀ nyuɛ ma tɛ̀mɛ̀ìn kà ɔ ɖɛ̀ɓɛ̀ Jɛhova múɛ́?
Jízɛ̀ cɛ̃ɛ ma, ké ɔ ɖá: “Ɓóɖó-kpàà nyɔ ɓè ɓéɖé ɓɛ́ wa kéɛ dyí dyuò kà ɓɛ́ ḿ ɖɛ̀ɓɛ̀ Ɓàɔ̀ múɛ. Ɔ jèɛɛ, kà ɔ nyu ma ḿ ɖɛ ɓè gbo cɛ̃ɛ kɛɛ, kàà ḿ nìà wa nyuɛń nyɛ̀.” (Jɔ̃́ɔ́ 14:31) Ti ɓɛ́ Jízɛ̀ nì ma ɓóɖó-kpàà kɔ̃ɛɛ, ɔ tɛ̀mɛ̀ìn ma kà ɔ ɖɛ̀ɓɛ̀ ɔ Ɓà mú mìɔ kɛ dyììn ɖé ɔ wuɖu nyu-nyu mú kɛbì ɔ náa nyu-nyu mɛ kàmà ma múɛ. Jízɛ̀ ɖɛ̀ɓɛ̀ɛ̀ ma mú ɓɛ́ ɔ ké ɔ Ɓà jè cɛ̃ ɖekè, kè ɓɛ́ ɔ ké ma nyɔ tɔ̀ɔ̀ ɓè gbo kpá, ɓɛ́ wa kè ɔ Ɓà ké ma ɓàto ɓè jù.—Jɔ̃́ɔ́ 14:23.
3. Xwɛ̀ Jízɛ̀ nyuɛ ma tɛ̀mɛ̀ìn kà ɔ ɖɛ̀ɓɛ̀ nyɔ ɓè múɛ́?
Baɓoɔ ɖá Jízɛ̀ “hwòɖò dèìn ma nyɔùn-dyù múin.” (Nɔ́ɔ́ 8:31) Ɔ tɛ̀mɛ̀ìn ma ɖɛ̀ɓɛ̀ìn-ɖɛ̀ɓɛ̀ìn nìà kɛ dyììn ɖé nyɔ ɓè kpéí-po-po kè ɔ mìɔùn tò-tò ɓó nyɔ ɓè gbo kpá jèɛɛ mú. Ɔ nyu ma zɛ̃̀ìn-ɖɛ̀ ɓè ɓɛ́ wa se ɔ kpéɔ̀ ɖòùn tɛ̀mɛ̀ìn nyɛ, kɛɛ wa tɛ̀mɛ̀ìn ɔ wìì-hwòɖò ɓéɖé-ɓéɖé ɖekè. (Máà 1:40-42) Ɔ kpɔ̃ ma nyɔ séín nɔ̀mɔ̀ dyíin, ké ɔ se ma nyɔùn múin mɔ́. Ɔ wuɖu ɓèɔ̀ nyí ma nyɔ séín ɓè ɓéɖé ma hwòɖò wáɖáá, ké wa tò ma ɔ ɖùù gboɛɛ hwòɖò-dyi-dè-dè kè hwòdò-kɔ̃-dè-ɖɛ̀. Jízɛ̀ hwòɖò wɔ̃́ ma ɓɛ́ ɔ ké ma gà dyé, kè ɓɛ́ ɔ ké ma mɛ́, sepoɛɖe ɔ ɖɛ̀ɓɛ̀ nyɔùn-dyù mú jè. Kɛɛ jɛ́ɛ́ kɛɛ, ɔ ɖɛ̀ɓɛ̀ nyɔ ɓè ɓɛ́ wa sí ɔ tɛ̀mɛ̀ìn-ɖɛ̀ ɓèɔ̀ kíɖííɛɛ mú.—Zà Jɔ̃́ɔ́ 15:13, 14 wuɖuún.
ÐE ÐƐ MÚIN CÁ
Cɛ̃́ ɖɛ pàɖà ɓá Jízɛ̀ɛ̀ kpeɖe ɓèɔ̀ jè dyí. Ké cɛ̃́ kà m̀ ké ɖɛ̀ɓɛ̀ìn-ɖɛ̀ɓɛ̀ìn kè hwòɖò-kɔ̃in-nɔ̀mɔ̀-nɔ̀mɔ̀ tɛ̀mɛ̀ìn nyu kà ɔ nyuɛ ma kà kɛ.
4. Jízɛ̀ ɖɛ̀ɓɛ̀ ɔ Ɓà mú
Jízɛ̀ɛ̀ nyuu-ɖɛ̀ ɓèɔ̀ tɛ̀mɛ̀ìn à kà à ké à ɖɛ̀ɓɛ̀ìn-ɖɛ̀ɓɛ̀ìn ɓó Geɖepɔɔ bììɛɛ tɛ̀mɛ̀ìn nyuɛ. Zà Ðúù 6:12 kè Jɔ̃́ɔ́ 15:10; 17:26 wuɖuún. Ɓè ɖà vɔ̀sì ɓèɔ̀ ɖò-ɖò wuɖuún zàà hwɔ ní, ɓè mɛ dèìn dyi-diè-ɖɛ̀ nìà kɛ dɔ́ɔ́ kɔ̃in:
Ðé Jízɛ̀ ɓo-bɛ̃̀ìn-sí-sí múɛɛ, xwɛ̀ à ɓɛ́ìn tɛ̀mɛ̀ìn kà à ɖɛ̀ɓɛ̀ Jɛhova múɛ́?
Jízɛ̀ ɖɛ̀ɓɛ̀ ma ɔ dyɔún Ɓàɔ̀ mú, ké ɔ wùɖù ma ɔ gbo kpɛ́-kpɛ́ ɖé ɓaà-ɓaà mú
5. Jízɛ̀ kɔ̃̀ nyɔ ɓè mɔ́ gbo-kpá-kpá kɛɛ jè gbo
Jízɛ̀ kɔ̃̀ ma nyɔ tɔ̀ɔ̀ ɓè jè gbo ké ɔ zi ɔ mìɔùn dyí. Kɛbì ɔ mɛ sa ma kɛɛ, ɔ nyùìn ma ɔ ti kè gana kũ̀à mú, ɓɛ́ ɔ ké ma nyɔ tɔ̀ɔ̀ ɓè gbo kpá. Zà Máà 6:30-44 wuɖuún, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn:
Ðé vɔ̀sì ɓè nìà kɛ múɛɛ, ɖɛ́ mɔ̀ hwìè ɖíɛ́ ɓè kɔ̃̀ mú ɓɛ́ Jízɛ̀ tɛ̀mɛ̀ìn ma kà ɔ kɔ̃̀ nyɔ tɔ̀ɔ̀ jè gboɛ́?—Dyé vɔ̀sì 31, 34, 41, ké 42.
Ðɛ́ po ma Jízɛ̀ kpéí, ɓɛ́ ɔ ké ma nyɔ tɔ̀ɔ̀ ɓè gbo kpá kɛ́?—Dyé vɔ̀sì 34.
Sepoɛɖe Jízɛ̀ sí ɔ Ɓà kpeɖe ɓèɔ̀ kíɖíí jèɛɛ, ɖɛ́ ɖɛ ɓè nìà kɛ séín tɛ̀mɛ̀ìn m̀ ɓá Jɛhova jè dyíɛ́?
Ðɛ́ mɔ̀ hwìè ɖíɛ́ ɓè kɔ̃̀ mú ɓɛ́ à ɓɛ́ìn Jízɛ̀ ɓo bɛ̃̀ìn síɛ ɖé nyɔ tɔ̀ɔ̀ ɓè jè gbo-kɔ̃̀-kɔ̃̀ múɛ́?
6. Jízɛ̀ nɔ̀mɔ̀ kpeɖeín
Jízɛ̀ se ma kɔ̃̀ɔ̀-ɖɛ̀ pàɖà ɓéɖé dyɛo, kɛɛ ɔ nɔ̀mɔ̀ ma kpeɖeín, ké ɔ po à kpéí ɓɛ́ à ké kpeɖeín nɔ̀mɔ̀. Zà Àpɔ́sò 20:35 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Kà Jízɛ̀ nyuà cɛ̃ɛ kɛɛ, xwɛ̀ à ɓɛ́ìn múà ɓéɖéɛ kɛ́?
Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn.
Hwìè nyɛ́ ɓè kɔ̃̀ mú à ɓɛ́ìn nyɔ ɓè ɖɛ nyíɛ kɛbì à mɛ se kɔ̃̀ɔ̀-ɖɛ̀ pàɖà ɓéɖéɛ́?
M̀ dyuòɛ̀ ma dyíì,
kà Baɓoɔ tɛ̀mɛ̀ìn kà ɓɛ́ à mɛ ɓaà Jɛhova ɖé Jízɛ̀ɛ̀ nyɛ́nɛ́ɔ̀ múɛɛ̀? (Zà Jɔ̃́ɔ́ 16:23, 24 wuɖuún.) À dyi kàà ɓaà ní, à tɛ̀mɛ̀ìn kà ɓɛ́ à ɓéɖé zùo-po-hwòɖò ɓó ɖɛ Jízɛ̀ ɖàà nyu ɓɛ́ à ké Jɛhovaa ɓàto ɓè jùɛɛ jè.
NYƆ ÐÍƐ́ ƁÈ ÐÁ: “Geɖepɔɔ se à gà-dyé-dyéɔ̀ jè gbo kɔ̃̀.”
Kà Jízɛ̀ sí ma kà ɔ Ɓà kpeɖe ɓèɔ̀ kíɖííɛɛ, xwɛ̀ ɔ nyuu-ɖɛ̀ ɓèɔ̀ nyuɛ tɛ̀mɛ̀ìn kà Jɛhova kɔ̃̀ ɖé à jè gboɛ́?
SṸÌN-XWÍNÍÍN
Jízɛ̀ ɖɛ̀ɓɛ̀ Jɛhova mú, ké ɔ ɖɛ̀ɓɛ̀ nyɔ ɓè mú. Jízɛ̀ nì kà ɔ Ɓà nìà kɛ. Ɔ jèɛɛ, kà nì muà Jízɛ̀ dyí dyuòùn mìɔ kɛɛ kàà nì mu Jɛhova dyí dyuòùn mìɔ.
Ðɛ-kɔ̃in-kpa-kpa
Xwɛ̀ m̀ ɓɛ́ìn Jɛhova ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn, kà Jízɛ̀ nyuɛ ma kà kɛ́?
Xwɛ̀ à ɓɛ́ìn nyɔ ɓè ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn, kà Jízɛ̀ nyuɛ ma kà kɛ́?
Jízɛ̀ɛ̀ kpeɖe ɓèɔ̀ nyɛ́ m̀ ɖɛ̀ɓɛ̀ mú cá kɛ́?
CƐ̃́ ÐƐ PÀÐÀ
Dyé Jízɛ̀ɛ̀ kpeɖe ɓèɔ̀ ɖíɛ́ ɓè ɓɛ́ à ɓɛ́ìn kíɖíí síɛ kɛ.
“Ɓɛ́ M̀ Ké Jízɛ̀ Ɓo Bɛ̃̀ìn Sí Ní, M̀ Mɛ . . .” (Jízɛ̀—Mɔ̀ Hwìɔ̀ Kè Jààɔ̀ Ɔ Kè Fɛ̀ɛ̀ɔ̀, mí 317)
Cɛ̃́ xwíníín kɔ̃̀ jè à kɔ̃̀ à kéà ɓaà ɖé Jízɛ̀ɛ̀ nyɛ́nɛ́ɔ̀ múɛ.
Baɓoɔ cɛ̃ kà Jízɛ̀ nyu nìɛ̀ kɛɛ jèè?
Ðɛ́ à ɓɛ́ìn cɛ̃́ɛ sɔ̀ìn kà Jízɛ̀ nyu ma màa ɓè kpɔ̃ɔ kɛɛ múɛ́?
“Geɖepɔɔ Gmɔ̀ Màa Ɓè Dya Ðé Kpéín-Dyé-Dyé Kè Dya-Dè-Dè Mú” (Dyí-Gmɔ̀ìn-Gbò-Cèè-Ðɛ̀ɔ̀, Dìù 1, 2012)