Jɛhovaa Nyɛ́nɛ́ɔ̀—Kà Ɔ Jè Mɛ Nyu Ðɛ Kpaa Ðé À Gboɛ

1-2. Xwɛ̀ à nyuɛ dyí dyuòɛ̀ kà Jɛhovaa nyɛ́nɛ́ɔ̀ jè kpa ma ɖɛ mìɔ ɖé Jizɛ gboɛ́?

JƐHOVAA nyɛ́nɛ́ɔ̀ jè kpa ma ɖɛ mìɔ ɖé Jizɛ gbo. Ɔ vɔ̃ ɔ Ɓàà nyɛ́nɛ́ɔ̀ jè ké ɔ zi nyɔ séín ɖò dyí. Cɛ̃́ɛ́-ɖɛ̀ɔ̀ nyɔ zià kɛɛ tɛ̀mɛ̀ìn kà ɓɛ́ Jizɛ hwòɖò wɔ̃́ ma ɓɛ́ ɔ ké ma Jɛhovaa nyɛ́nɛ́ɔ̀ kè ɖɛ séín ɔ ɓá dyíɛɛ jè mɛ́ kɛ. (Máà 14:36; Híì. 10:​7-9) Ké Jizɛɛ Zɔ̃ Táázĩ̀ìnɔ̀ ɖà zi ní, ɔ hwòɖò mu wɔ̃́ùn ɓɛ́ ɔ ké kpé séín ɔ ɓéɖéɛɛ ɖe tò ɓó Jɛhovaa nyɛ́nɛ́ɔ̀ mú hwɛ̀ jè. (1 Kɔ̀. 15:​26-28) Ké ɖeɛɛ, kà Jizɛ nyuà Geɖepɔɔ nyɛ́nɛ́ɔ̀ mú ɖɛ̀ɓɛ̀ɛ̀ kɛɛ tɛ̀mɛ̀ìn ɖɛ pàɖà ɓá gbo-kpɔ̃ìn-kpɔ̃ìn nìà ɔ kè ɔ Ɓà pṹa kɛɛ jè dyí. Ɔ tɛ̀mɛ̀ìn wáɖáá kà ɓɛ́ Jizɛ ɖɛ̀ɓɛ̀ Nyɔ ɓéɖéà nyɛ́nɛ́ɔ̀ kɛɛ múɛ.

² Jizɛ dyi ma ɓóɖó-kpàà kɔ̃ ɖé ɔ Ɓàà nyɛ́nɛ́ɔ̀ mú. (Jɔ̃́ɔ́ 5:43; 12:13) Ɔ nyuɛ ké ɔ ɖeín-sí-nyɔ̀ ɓèɔ̀ dyuò ma ɔ Ɓàà nyɛ́nɛ́ɔ̀ dyí. (Jɔ̃́ɔ́ 17:​6, 26) Ɔ tɛ̀mɛ̀ìn ma ɖɛ, ké ɔ nyu ma zɛ̃̀ìn-ɖɛ̀ ɓè ɖé nyɛ́nɛ́ nìà wɛ mú. (Jɔ̃́ɔ́ 10:25) Ké ɓó kɔ̃in ɖeɛɛ, Jizɛ ɓaà ma Jɛhova ɓɛ́ ɔ ké ma ɔ ɖeín-nà-nyɔ̀ ɓèɔ̀ dyí gmɔ̀ ‘dyììn ɖé Ɔ nyɛ́nɛ́ɔ̀’ mú. (Jɔ̃́ɔ́ 17:11) Nìí, ɔ jù ké Jɛhovaa nyɛ́nɛ́ɔ̀ jè dyi ma kàa Jizɛ hwòɖò kpɔ̃ mìɔ ní, nìí xwɛ̀ nyɔ ɖò ɓɛ́ìn ɔ mìɔùn jàà Kɛ́ɖɛ́ì ɖeín-sí-nyɔ̀ ɖáìn ɓɛ́ ɔ ké se ɔ Ɓàà nyɛ́nɛ́ɔ̀ dyí dyuò, mɔɔ ɓɛ́ ɔ ké seɛ kũ̀à mú nyùìn nyɛ́?

3. Ðɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nìà kɛ múɛ́?

³ À mɔ̀ Kɛ́ɖɛ́ì ɖeín-sí-nyɔ̀ ɓè ɓɛ́ à vɔ̃à, ɓɛ́ à kéà Jizɛ ɓo-bɛ̃̀ìn síɛɛ, à ɖɛ̀ɓɛ̀ ɔ Ɓàà nyɛ́nɛ́ɔ̀ mú. (1 Píɖɛ̀ 2:21) Ðé cɛ̃́ɛ́-ɖɛ̀ nìà kɛ múɛɛ, à mu kà Jɛhovaa nyɛ́nɛ́ɔ̀ nyu nyɔ ɓè ɓɛ́ wa nìà “bɔ̃̀ nɔ̀mɔ̀ dyíin ɓá Geɖepɔɔ kã́á-ɓòɖòɔ̀ jè dyíɛɛ” zio mú pòɛ̀n nyɛ da zàà kɛɛ dyéìn. (Máf. 24:14) Ké ɖeɛɛ, à mu kà Jɛhovaa nyɛ́nɛ́ɔ̀ mɛ nyu ɖɛ kpaa ɖé à ɖò-ɖò séín gboɛɛ jè dɔ́ɔ́ kɔ̃in dèìn.

“NYƆ ƁÈ” ƁÉÐÉÀ Ɔ NYƐ́NƐ́Ɔ̀ KƐ

4. (a) Hwɛ̀ Jizɛ ké ma dyɔún ɖe muɛɛ, ɖɛ́ mɔ̀ kũ̀à ɓɛ́ ɔ nyí ma ɔ ɖeín-nà-nyɔ̀ ɓèɔ̀ kɛ́? (b) Ðɛ́ mɔ̀ dyi-diè-ɖɛ̀ ɖò ɓɛ́ ɔ nì ɓó ɓá kũ̀à nìà wɛ jè dyíɛ́?

⁴ Hwɛ̀ ɓɛ́ Jizɛ ké ma dyɔún ɖe muɛɛ, ɔ cɛ̃ɛ ma ɔ ɖeín-nà-nyɔ̀ ɓèɔ̀ gbo, ké ɔ ɖá: “Ti zùù hwɛ̀in-hwɛ̀inɔ̀ mu ɓè kɔ̃ dyiìn nyɛɛ, ɓè mu kpé ɓéɖéìn, ké ɓè mu ní zàse jùùn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kè ɖé Júɖìà-ɓòɖòɔ̀ kɔ̃ kè ɖé Sɛ̀mɛ́ɖìà-ɓòɖòɔ̀ kɔ̃ dà séín ɔ kè ɖéé ɖé ɓóɖó-kpàà sèìn-naín ɖekè.” (Àpɔ́. 1:8) Ɔ jèɛɛ, wa se ma bɔ̃̀ nɔ̀mɔ̀ dyíinɔ̀ zio mú pòɛ̀n mu ɖé Éézùɖùɛ̀-ɓòɖòɔ̀ kɔ̃ ɖòùn. Ti wè ɖà ma ziín, nyɔ ɓè nì ma ɓóɖó-kpàà dà séín nyɛɛ mu ma ti ɓéɖéìn, ɓɛ́ wa ké ma Jizɛɛ ɖeín-sí-nyɔ̀ ɓè jùɛ ɓɛ́ìn. (Máf. 28:​19, 20) Kɛɛ, Jizɛ cɛ̃ɛ ma, ké ɔ ɖá: “Ɓè mu ní zàse jùùn.” Ðeín-nà-nyɔ̀ ɖìè ɓè nìà kɛɛ kɔ̃̀ wa ké ma Jɛhovaa nyɛ́nɛ́ɔ̀ dyí dyuòò, mɔɔ wa mu ma Jizɛɛ zàse ɓè jùùn ɖòùn puù? Ðɛ kpá ma ɓɛ́ Àpɔ́sò wuɖu-kpà 15 dèà mɛ kɛɛ mu à gbo kpáùn, ɓɛ́ à ké dyi-diè-ɖɛ̀ nìà wɛ gɔ̃̀ jù.

5. Xwɛ̀ àpɔ́sò ɓèɔ̀ kè nyɔ vɛ̀nɛ̀ ɓè nì ma ɖé Jùɖúsɛ̀ɖɛ̀ìn nyɛɛ nyuɛ ma tɛ̀mɛ̀ìn kà nyɔ séín ɓè kɔ̃̀ wa ké Jɛhovaa nyɛ́nɛ́ɔ̀ dyí dyuò kɛ́? (Dyé dyi-dyé-ɖɛ̀ɔ̀ ɖekè.)

⁵ Ðé 49 C.E. xwíníín nyɛɛ, àpɔ́sò ɓèɔ̀ kè nyɔ vɛ̀nɛ̀ ɓè nì ma ɖé Jùɖúsɛ̀ɖɛ̀ìn nyɛɛ poìn ma dyí, ɓɛ́ wa ké ma ɖɛ ɓóɖó-dù kà kò ɖòɛ̀ nyɔ ɓè ɓɛ́ wa se ma sàà mɛ́ kɛ kɔ̃̀ wa ké ma nyu ɓɛ́ wa ké ma Kɛ́ɖɛ́ì ɖeín-sí-nyɔ̀ ɓè jùɛɛ jè cɛ̃. Ðé dɔ́ɔ́ɔ̀ mánáín nyɛɛ, Jĩ́ìn mɔ̀ ma kà Jizɛɛ ɖíí-gàà kɛɛ, cɛ̃ɛ ma, ké ɔ ɖá: “[Píɖɛ̀] ɖàa máa à gbo cɛ̃ kà ɓɛ́ Geɖepɔɔ nyu ma ɓóɖó-dù kà kò ɖò ɓèɛ̀ nyɔ ɓèɔ̀ jè kpéí poɛ kĩ́ín, ɓɛ́ ɔ ké nyɔ ɓè ké ɔ nyɔ ɓè jù kɛɛ ɖé wa hwìɛ̀ gã kɛ.” Nyɛ́ kɔ̃̀ nyɔ jù jè ɓɛ́ Jĩ́ìn nì ma kà jè cɛ̃iń nyɛ́? Dyììn ɖé kpáá-ɖɛ̀-cɛ̃-nyɔ̀ Emɔ́ɛ̀ wuɖu ɓèɔ̀ kɔ̃in-kpa-kpa múɛɛ, ɔ cɛ̃ɛ ma ɖe, ké ɔ ɖá: “Ɓɛ́ nyɔ tɔ̀ɔ̀ ɓèɔ̀ ké ḿ dyi mɔ́. Wa mɔ̀ ɓóɖó-dù kà kò ɖò ɓèɛ̀ nyɔ séín ɓɛ́ wa mùìn ní nyɛ́nɛ́ín nyɛ. Mɔ [Jɛhova] . . . mɔ̀ nyɔ cɛ̃à kɛ.” (Àpɔ́. 15:​14-18) Ðeín-nà-nyɔ̀ ɖìè ɓè nìà kɛɛ se ma Jɛhova jè cɛ̃́ɛ mu ɖòùn pu, kɛɛ wa mu ma ‘ɔ nyɛ́nɛ́ín mùìn’ ɖekè. Ɔ xwíníín mɔ̀, Geɖepɔɔ nyɛ́nɛ́ɔ̀ mu ma wa kɔ̃ nììn, ké nyɛ́nɛ́ nìà wɛ mu ma wa dyí-dyuòìn-bɛ̃̀ jùùn.

6-7. (a) Xwíníínɔ̀ nyɛ́ kɔ̃̀ jè Jizɛ dyi ma ɓóɖó-kpàà kɔ̃ kɛ́? (b) Ðɛ́ mɔ̀ xwíníín kpa ɖɛ kà kò ɖò kɔ̃̀ jè ɔ dyi ma kɛ́?

⁶ Jizɛ mìɔùn nììn nyɛ́nɛ́ɔ̀ xwíníín mɔ̀, “Jɛhova Mɔ̀ Nyɔ-Póìn-Nyɔ̀,” ké Jɛhova nyùìn ma ɔ kũ̀à mú, ɓɛ́ Ɔ ké nyɔ ɓè ɓɛ́ wa ɓéɖé hwìɖìi-taɓa-taɓa kɛɛ póìn. Jizɛ dyi ma ɓóɖó-kpàà kɔ̃ ɓɛ́ ɔ ké ma mɛ́ ɓó nyɔùn bìì. (Máf. 20:28) Dyììn ɖé mú-gbààìn-ɖɛ̀ɔ̀ múɛɛ, ɔ nyuɛ ké nyɔùn ɓɛ́ìn póɛ, ké wa ɓɛ́ìn sè-ná-sèɛ̀ fɛ̀ɛ̀ ɓéɖéɛ.—Jɔ̃́ɔ́ 3:16.

⁷ Kɛɛ, xwíníínɔ̀ nyɛ́ kɔ̃̀ jè nyɔùn-dyù kɔ̃̀ wa kéà pó kɛ́? Ɔ mɔ̀ sepoɛɖe ɖɛ kpá ma kà ɖé Ídɛ̃̀ìn-ɓàà-ɖɛ̀-gbàɔ̀ múɛɛ jè. Kà wa nyuà cɛ̃ɛ ɖé cɛ̃́ɛ́-ɖɛ̀ nyɔ zià kɛ múɛɛ, à wóɖóìn-nyɔ̀ kĩ́ín-kĩ́ín ɓè mɔ̀ ma Áɖɔ̀ùn kè Íì kɛɛ zà ma Jɛhova wuɖu ɖùù dyi, ké wa sè ma sè-ná-sèɛ̀ fɛ̀ɛ̀ xwáɖáún. (Jɛ́n. 3:​6, 24) Kɛɛ, ɔ ɓá ma ɖɛ zi ɖɛ kpauń ɖò ɓɛ́ ɔ zi nyɔùn-dyùɛ̀ pó jè dyíɛɛ dyí. Ɔ mɔ̀ Jɛhovaa nyɛ́nɛ́ɔ̀ kɔ́-kɔ́. (Jɛ́n. 3:​4, 5) Ɔ jèɛɛ, Áɖɔ̀ùn kè Íìɛ̀ xwíníín-dyù ɓèɔ̀ pó jè ɓá ma ɖɛ zi ɖɛ kpauń ɖò dyí—Jɛhovaa nyɛ́nɛ́ɔ̀ mú-hwɛ̀-hwɛ̀. Sepoɛɖe Jizɛ ɓaɖa ma Jɛhova kɛ́, ké Jɛhovaa nyɛ́nɛ́ɔ̀ nì ma ɔ kɔ̃ jèɛɛ, ɔ mɔ̀ ma nyɔ jɛ́ɛ́ ɓɛ́ ɔ hwɔ ma Jɛhovaa nyɛ́nɛ́ɔ̀ múɛ.

8. Ðɛ́ Kɛ́ɖɛ́ì ɖeín-sí-nyɔ̀ séín kɔ̃̀ wa ké múin wɔ̃́ kɛ́?

⁸ Nyɔ séín ɓè ɓɛ́ wa mu ma Jizɛ hwìɖìi taɓaùn, kɛbì wa mɛ mɔ̀ ma Júù-nyɔ̀ ɓè mɔɔ ɓóɖó-dù kà kò ɖòɛ̀ nyɔ ɓèɛɛ, wa kɔ̃̀ wa ké ma Dɛ̀ waà pó-póɔ̀ sɔ̀ìn ma kɛɛ dyí dyuò. Ɔ sɔ̀ìn ma ɖé Jizɛ Ɓà mɔ̀à Jɛhova kɛɛ gbo. (Jɔ̃́ɔ́ 17:3) Ɓó kɔ̃in ɖeɛɛ, Jɛhovaa nyɛ́nɛ́ɔ̀ mu ma wa kɔ̃ nììn kà ɔ nì ma kà Jizɛ kɔ̃ɛ. Wa kɔ̃̀ wa kéɛ ma dyí dyuò ɖekè kà ɓɛ́ nyɛ́nɛ́ nìà wɛ mú hwɛ̀ jè kpa ma ɖɛ mìɔ kɛ. Waà pó-póɔ̀ ɓá ma ɖɛ nìà wɛ dyí. (Àpɔ́. 2:​21, 22) Ɔ jèɛɛ, jàà Kɛ́ɖɛ́ì ɖeín-sí-nyɔ̀ séín kɔ̃̀ wa ké ma Jɛhova kè Jizɛ jè cɛ̃́. Xwíníínà kɔ̃̀ jè ɖé Jizɛ hwɔ ma kà ɔ ɓaà-wùɖùɔ̀ mánáín ɖé Jɔ̃́ɔ́ 17 mú, ɖé wuɖu ɓè nìà kɛ múɛ̀. Ɔ ɖá: “Ḿ nyuɛ ké wa ɖà [nì nyɛ́nɛ́ɔ̀] dyí dyuò, ké ní muɛ náa nyuùn kánáá pu, ɓɛ́ ɖɛ̀ɓɛ̀ìn-ɖɛ̀ɓɛ̀ìn ɓɛ́ m̀ ɓéɖéà ḿ bììɛɛ ké ɖé wa mú nì, ɔ kè ɓɛ́ ḿ ké ɖé wa mú nì.”—Jɔ̃́ɔ́ 17:26.

“ƁÈ MƆ̀ NÍ ZÀSE” ƁÈ

9. Xwɛ̀ à ɓɛ́ìn tɛ̀mɛ̀ìn kà Jɛhovaa nyɛ́nɛ́ɔ̀ jè kpa ɖɛ mìɔ ɖé à gbo kɛ́?

⁹ Jɛhovaa nyɛ́nɛ́ɔ̀ mú hwɛ̀ jè kɔ̃̀ ɔ ké jàà Kɛ́ɖɛ́ì ɖeín-sí-nyɔ̀ séín ɓè hwòɖò kpɔ̃. (Máf. 6:​9, 10) Wa ɓéɖé ɓɛ́ wa ké Jɛhovaa nyɛ́nɛ́ɔ̀ dya gmɔ̀ ɓɛ́ ɔ ké ɖɛ kpa mìɔ ɓɛ́ ɔ ké ɖɛ séín ɖò dyí zi. Ɔ xwíníín mɔ̀, wa kɔ̃̀ wa ké ɖɛ ɖò nyu. Kɛɛ, ɖɛ́ à ɓɛ́ìn nyuɛ ɓɛ́ Jɛhovaa nyɛ́nɛ́ɔ̀ ké mú hwɛ̀, mɔɔ ɓɛ́ se vɛ̀nɛ̀ ɓɛ́ Sétɔ̃̀ tɔ́mɔ́àìn Jɛhova wĩin nyɛɛ ké ɓó dyi sámá kɛ́?

10. Ðɛ́ mɔ̀ zaa ɓɛ́ wa cɛ̃à jè ɖé Àzédyà-cèè-ɖɛ̀ɔ̀ wuɖu-kpà 42 muà 44 gboɛɛ múɛ́? (Àzédyà 43:9; 44:​7-9) (Dyé dyi-dyé-ɖɛ̀ɔ̀ ɖekè.)

¹⁰ Wa nɛ́ìn pá à ɓéɖé ɖé Jɛhovaa nyɛ́nɛ́ɔ̀ mú-hwɛ̀-hwɛ̀ múɛ jìì kɔ̃ ɖé Àzédyà-cèè-ɖɛ̀ɔ̀ wuɖu-kpà 42 muà 44 gboɛ mú. Wuɖu-kpà ɓèà cɛ̃ zaa ɖò ɓɛ́ ɔ ɓá geɖepɔɔ jù jè dyíɛɛ jè. Jɛhova po nyɔ séín ɓè ɓɛ́ wa ɖáìn wa mìɔùn geɖepɔɔ ɓèɛɛ sóɖó, ɓɛ́ wa kéɛ tɛ̀mɛ̀ìn kà wa mɔ̀ geɖepɔɔ jɛ́ɛ́ ɓèɛ. Ké ɖeɛɛ, ɔ ɖá zàse ɓè jè ɓɛ́ wa ké dyi, ɓɛ́ wa ké zàse nyu ɓá geɖepɔɔ ɓèa jè dyí. Kɛɛ, ɔ nyu-nyɔ̀ ɖò se nì fɔɔ!—Zà Àzédyà 43:9; 44:​7-9 wuɖuún.

11. Ðɛ́ Jɛhova cɛ̃ ma ɔ nyɔ ɓèɔ̀ gbo ɖé Àzédyà 43:​10-12 múɛ́?

¹¹ Zà Àzédyà 43:​10-12 wuɖuún. Jɛhova cɛ̃ɛ ma ɓá ɔ nyɔ ɓèɔ̀ jè dyí, ké ɔ ɖá: “Ɓè mɔ̀ ní zàse, . . . [ké] mɔ̀ ɖòùn mɔ̀ Geɖepɔɔ.” Jɛhova diè ma wa dyi, ké ɔ ɖá: “Geɖepɔɔ kà kò ɖò nì ní ɖe ɓó ḿ wáúne?” Ɔ mɔ́ ɓɛ́ wa ké ma dyi-diè-ɖɛ̀ nìà wɛ gɔ̃̀ jù. (Àzé. 44:8) Ɔ jèɛɛ, ɔ mɔ̀ dya-dè-dè ɓó à bìì, ɓɛ́ à ké dyi-diè-ɖɛ̀ nìà wɛ gɔ̃̀ jù. Dyììn ɖé à wĩín-wùɖù kè à nyuu-ɖɛ̀ ɓè múɛɛ, à ɓɛ́ìn jè zàse nyuɛ kà ɓɛ́ Jɛhova ɖòùn mɔ̀ jàà Geɖepɔɔ kɛ. Ɔ nyɛ́nɛ́ɔ̀ kpa ɖɛ ké ɔ zi nyɛ́nɛ́ tɔ̀ɔ̀ séín dyí. Dyììn ɖé à cĩ́-cĩ́ɔ̀ múɛɛ, à ɓɛ́ìn tɛ̀mɛ̀ìn kà à ɖɛ̀ɓɛ̀ Jɛhova mú, ké à kpɔ̃ ɔ jè gboi kánáá pu—kɛbì Sétɔ̃̀ mɛ dyà à fũ̀à-fṹá séín ɖò kɔ̃ɛ. À dyiɛ náa nyu ní, nìí, à nì gbo-kpá-sɔ̃̀ tòɛ̀n ɓó Ɔ nyɛ́nɛ́ɔ̀ mú hwɛ̀ jè.

12. Xwɛ̀ kpáá-ɖɛ̀ nìà ɖé Àzédyà 40:​3, 5 múɛɛ nyu ma jàà kpáa kɛ́?

¹² À dyi Jɛhovaa nyɛ́nɛ́ɔ̀ dya dè ní, nìí, à mu Jizɛ Kɛ́ɖɛ́ì ɓo-bɛ̃̀ìn síɛń nì. Àzédyà cɛ̃ zɔ̃̀ɔ̀ ɖɛ kíá ɖò mu ma nyuùn wɛ̃ɛ jè, ké ɔ ɖá, “Ɓè nyu hwìè ɖò ɓó [Jɛhova] bìì.” (Àzé. 40:3) Xwɛ̀ ɖɛa nyu ma jàà kpáa kɛ́? Jɔ̃́ɔ́ Nyɔ-níɔ-po-nyɔ̀ɔ̀ nyu ma hwìèɔ̀ ɓó Jizɛ ɓɛ́ ɔ dyi ma ɖé Jɛhovaa nyɛ́nɛ́ɔ̀ mú, ké ɔ wùɖù ma ɖé Jɛhovaa nyɛ́nɛ́ɔ̀ múɛɛ bìì. (Máf. 3:3; Máà 1:​2-4; Ðúù 3:​3-6) Kpáá-ɖɛ̀ dyúáɖòɔ̀ ɖá: “[Jɛhovaa] dĩ́ín-dĩ̀ìnɔ̀ mu xwáɖáún wóɖóùn.” (Àzé. 40:5) Xwɛ̀ ɔ nyu ma ná kpáa kɛ́? Ti Jizɛ dyi ma ɓóɖó-kpàà kɔ̃ɛɛ, ɔ ɓaɖa ma Jɛhova kɛ́ nɔ̀mɔ̀ dyíin cá, ké ɔ nì ma pu kà Jɛhova mìɔùn mɔ̀ nyɔ dyi maà ɓóɖó-kpàà kɔ̃ɛ̀.—Jɔ̃́ɔ́ 12:45.

13. Xwɛ̀ à ɓɛ́ìn Jizɛ ɓo-bɛ̃̀ìn síɛ kɛ́?

¹³ À mɔ̀ Jɛhovaa zàse ɓè kà Jizɛ nì ma kà kɛ. Jɛhovaa nyɛ́nɛ́ɔ̀ nì à kɔ̃, ké à cɛ̃ ɔ dĩ́ín-dĩ̀ìn-kpèɖè ɓèɔ̀ jè nyɔ séín à dyé kɛɛ gbo. Ɓɛ́ à kéɛ náa nyu nɔ̀mɔ̀ dyíin ní, à ɓéɖé ɓɛ́ à kéɛ nyu ɓɛ́ nyɔ ɓè ké kũ̀à ɓɛ́ Jizɛ ɓéɖé ɖé Jɛhovaa nyɛ́nɛ́ɔ̀ mú-hwɛ̀-hwɛ̀ múɛɛ dyí dyuò. (Àpɔ́. 1:8) Jizɛ mɔ̀ Jɛhovaa Zàse jɛ́ɛ́ɔ̀, ké à nà ɔ ɓo-bɛ̃̀ìnɔ̀ mú. (Wɛ̀ɖ. 1:5) Kɛɛ, xwɛ̀ Jɛhovaa nyɛ́nɛ́ɔ̀ jè mɛ nyu ɖɛ kpaa ɖé à ɖò-ɖò séín gbo kɛ́?

KÀ JƐHOVAA NYƐ́NƐ́Ɔ̀ JÈ NYU ÐƐ KPAA ÐÉ À GBOƐ

14. Kà wa nyuà mɛ dèɛ̀ ɖé Wɛ́ɖɛ́ 105:3 múɛɛ, xwɛ̀ à hwòɖò nyu nìɛ̀ ɓá Jɛhovaa nyɛ́nɛ́ɔ̀ jè dyíɛ́?

¹⁴ À kpáìn Jɛhovaa nyɛ́nɛ́ɔ̀ jè múàùn dyi. (Zà Wɛ́ɖɛ́ 105:3 wuɖuún.) Ɔ po Jɛhova múàùn mìɔ ɔ jù ké à dyi ɔ nyɛ́nɛ́ɔ̀ jè ɓɔ́ɖɔ́ ní. (Jɛ̀ɖ. 9:​23, 24; 1 Kɔ̀. 1:31; 2 Kɔ̀. 10:17) Jɛhova jè ɓɔ́ɖɔ́-ɓɔ́ɖɔ́ xwíníín mɔ̀, ɓɛ́ à ké Jɛhova jè múàùn dyi kpáìn. Ɔ mɔ̀ mana vɛ̀nɛ̀ ɖò cá ɓó à bìì ɓɛ́ à ké ɔ nyɛ́nɛ́ɔ̀ dya dè, kè ɓɛ́ à kéɛ nyu ɓɛ́ ɔ ké nyɛ́nɛ́ín-nyɛ̀nɛ̀ ɓéɖéɛ. À mɛ ɓɔ́ dɛ̃ peɖeɛ fɔɔ ɓɛ́ à kéɛ à mùè kũ̀à-nyu-nyɔ̀ ɓè kè à mùè ɖɛ-cɛ̃́-nyɔ̀ ɓè kè nyɔ ɓè nì ɖé à gbɛ̀ɔ̀ múɛ ɔ kè nyɔ tɔ̀ɔ̀ ɓè gbo cɛ̃ kà à mɔ̀ Jɛhova Zàse ɓèɛ! Nɔɔ́-nàmàùn se mɔ́ ɓɛ́ à ké Jɛhovaa nyɛ́nɛ́ɔ̀ jè nyɔ tɔ̀ɔ̀ ɓè gbo cɛ̃. (Jɛ̀ɖ. 11:21; Wɛ̀ɖ. 12:17) Jɛ́ɛ́ kɛɛ, Sétɔ̃̀ kè ɔ kpáá-ɖɛ̀-cɛ̃-nyɔ̀ ɓèɔ̀ mɔ́ ɓɛ́ Jɛhovaa nyɛ́nɛ́ɔ̀ jè ké nyɔ ɓè hwìɖìi sɔ̀. (Jɛ̀ɖ. 23:​26, 27) Kɛɛ, sepoɛɖe à ɖɛ̀ɓɛ̀ Jɛhovaa nyɛ́nɛ́ɔ̀ mú jèɛɛ, à kpá múàùn “wé séín” ɓóɛ jè.—Wɛ́ɖɛ́ 5:11; 89:16.

15. Ðɛ́ mɔ̀ Jɛhovaa nyɛ́nɛ́ɔ̀ ɖá-ɖá xwíníín nyɛ́?

¹⁵ À ɖá Jɛhovaa nyɛ́nɛ́ɔ̀ tee. (Jóɛ̀ 2:32; Wóɖ. 10:​13, 14) Jɛhovaa nyɛ́nɛ́ɔ̀ ɖá-ɖá se nyɛ́nɛ́ɔ̀ dyí-dyuò-dyuò kèɛ̀ kũ̀à-mú-nyùìn-nyùìn ɖòùn pu. Kɛɛ, ɔ xwíníín tɔ̀ɔ̀ ɓè mɔ̀, à dyuò Geɖepɔɔ dyí kà ɔ mɔ̀ Nyɔ jɛ́ɛ́ ɖòɛ̀, ké à dè ɔ hwòɖò kɔ̃, ké à gmɔ̀ìn ɖé ɔ gbo ɓó à gbo kpá jè kè à hwìè da zàìn jè. (Wɛ́ɖɛ́ 20:7; 99:6; 116:4; 145:18) Ké ɖeɛɛ, à cɛ̃ ɔ nyɛ́nɛ́ɔ̀ kè ɔ kpeɖe ɓèɔ̀ jè nyɔ tɔ̀ɔ̀ ɓè gbo, ké à po wa kpéí ɓɛ́ wa ké waà nàmàùn ɓèɔ̀ dyi táà, kè ɓɛ́ wa ké ɖɛ ɖò nyu ɓɛ́ Jɛhova ké wa hwòɖò múin dèìn.—Àzé. 12:4; Àpɔ́. 2:​21, 38.

16. Xwɛ̀ à ɓɛ́ìn tɛ̀mɛ̀ìn kà Sétɔ̃̀ mɔ̀ se-tɔ́mɔ́-nyɔ̀ kɛ́?

¹⁶ À hwòɖò wɔ̃́ ɓɛ́ à ké gà dyé ɓó Jɛhovaa nyɛ́nɛ́ɔ̀ jè. (Jĩ́ìn 5:​10, 11) À dyi Jɛhova gboi kpɔ̃ tee ɖé gà-dyé-dyé xwaún ní, à muɛ tɛ̀mɛ̀ìn kà Sétɔ̃̀ mɔ̀ se-tɔ́mɔ́-nyɔ̀ kɛ. Ðé Jóɓò tiín nyɛɛ, Sétɔ̃̀ cɛ̃ɛ ma ɓá nyɔ séín ɓè ɓɛ́ wa nì Jɛhova ɓièɛ̀n nyɛɛ jè dyí, ké ɔ ɖá: “Nyɔùn-dyù ɓɛ́ìn waà kɔ̃̀ɔ̀-ɖɛ̀ séín hwòɖò gbo zàà ɓó waà fɛ̀ɛ̀ póìn jè.” (Jóɓò 2:4) Sétɔ̃̀ cɛ̃ɛ ma kà ɓɛ́ nyɔ ɓè mu Jɛhova ɓièìn ɖé ti nɔ̀mɔ̀ dyíin ɓè mú ɖòùn wɛ̃. Kɛɛ, ɔ jù ké wa dyi ti-kàmàùn-kàmàùn dyí dyé ní, wa mu Jɛhova kɔ̃ín pòìn. Jóɓò tɛ̀mɛ̀ìn ma kà ɓɛ́ ɖɛ nìà wɛ se ma jàà kɛ. À mɔ̀ùn ɓɛ́ìn tɛ̀mɛ̀ìn ɖekè kà kɛbì Sétɔ̃̀ mɛ po à ɖɛ séín ɖò dúún wɛ̃ɛ, à se Jɛhova kɔ̃ín pòɛ̀n mu fɔɔ kɛ. À ɓɛ́ìn hwòɖò kɔ̃ dèɛ̀ gàná cá kà ɓɛ́ Jɛhova mu à dyí gmɔ̀ùn ɓó ɔ nyɛ́nɛ́ɔ̀ jèɛ.—Jɔ̃́ɔ́ 17:11.

17. Hwìè kà kò ɖò nyɛ́ kɔ̃̀ mú à ɓɛ́ìn Jɛhovaa nyɛ́nɛ́ɔ̀ dya dèɛ̀ kà 1 Píɖɛ̀ 2:12 nyuà cɛ̃ɛ kɛ́?

¹⁷ À dyé Jɛhovaa nyɛ́nɛ́ɔ̀ kpéín. (Nɔ́ɔ́ 30:9; Jɛ̀ɖ. 7:​8-11) Sepoɛɖe à ɓaɖa Jɛhova kɛ́, ké ɔ nyɛ́nɛ́ɔ̀ nì à kɔ̃ jèɛɛ, à ɓɛ́ìn Jɛhovaa nyɛ́nɛ́ɔ̀ ɓàìn mɔɔ à ɓɛ́ìn kɔ́ìn. (Zà 1 Píɖɛ̀ 2:12 wuɖuún.) Ɔ jèɛɛ, à mɔ́ ɓɛ́ à ké ɖɛ séín à ɓɛ́ìn nyuɛ kɛɛ nyu, ɓɛ́ à ké Jɛhova ɓàìn dyììn ɖé à wĩín-wùɖù kè à nyuu-ɖɛ̀ ɓè mú. À dyiɛ náa nyu ní, à mu Jɛhovaa nyɛ́nɛ́ɔ̀ dya dèìn ɓó kà à mɔ̀ nyɔ ɓè se mú hwɛ̀ kɛɛ ɓɛ́ìn nyuɛ kɛ.

18. Ðɛ́ mɔ̀ hwìè kà kò ɖò kɔ̃̀ mú ɓɛ́ à ɓɛ́ìn tɛ̀mɛ̀ìn kà Jɛhovaa nyɛ́nɛ́ɔ̀ jè kpa ɖɛ ɖé à gboɛ́? (Dyé gmɔ̀-ɓíɖíi-bɛ̃̀ɔ̀ ɖekè.)

¹⁸ À kɔ̃̀ ɖé Jɛhovaa nyɛ́nɛ́ɔ̀ jè gbo mìɔ, ké ɔ zi à mìɔùn nììn nyɛ́nɛ́ jè dyí. (Wɛ́ɖɛ́ 138:2) Xwíníínɔ̀ nyɛ́ kɔ̃̀ jè ɔ nìà ná kɛ́? Ɔ mɔ̀ sepoɛɖe Jɛhovaa nyɛ́nɛ́ɔ̀ mú-ɖɛ̀ɓɛ̀-ɖɛ̀ɓɛ̀ ɓɛ́ìn nyuɛ ɓɛ́ nyɔ ɓè nì à ɖeiɛɛ ké à nyɛ́nɛ́ dyíin nyìnììn.a Jizɛ hwòɖò wɔ̃́ ma ɓɛ́ ɔ ké ma mɛ́ dɛ̃-kà kà ɖɛ-gbà-nyu-nyɔ̀ ɖò nìà kɛ, ɓɛ́ ɔ ké ma Jɛhovaa nyɛ́nɛ́ɔ̀ dya dè. Ɔ ‘se ma dɛ̃-ɖɛ̀ ɖɛ ɖá,’ sepoɛɖe ɔ se ma hwòɖò dyií gbaìn mìɔ ɓá kà nyɔ tɔ̀ɔ̀ ɓè nyu ma ɔ jè hwìɖìi poɛ̀n nyɛɛ jè dyí. (Híì. 12:​2-4) Geɖepɔɔ mɔ́ɔ́-ɖɛ̀ nyu-nyu ɖé ɔ hwòɖò nì ma gbo.—Máf. 26:39.

19. Xwɛ̀ nì hwòɖò nyu nìɛ̀ ɓá Jɛhovaa nyɛ́nɛ́ɔ̀ jè dyíɛ́, ké xwíníínɔ̀ nyɛ́ kɔ̃̀ jèɛ́?

¹⁹ À kpáìn Jɛhovaa nyɛ́nɛ́ɔ̀ jè múàùn dyi, ké ɔ mɔ̀ dya-dè-dè ɓó à bìì ɓɛ́ wa ké à Jɛhova Zàse ɓè ɖáìn nyɛ. Ɔ ná nì jèɛɛ, à hwòɖò wɔ̃́ ɓɛ́ à ké zùùn-zàìn-zàìn séín ɖò ɓɛ́ ɔ mu à kɔ̃ dyiìn nyɛɛ mú zĩ̀ìn. Jɛhovaa nyɛ́nɛ́ɔ̀ jè kpa ɖɛ mìɔ ɖé à gbo, ké ɔ zi kà nyɔ ɓè nyu à dya gmɔ̀ɔ̀ kɛɛ dyí. Ɔ jèɛɛ, à mɛ jìɖìɛ̀n kɔ̃ ɓɛ́ à ké Jɛhovaa nyɛ́nɛ́ɔ̀ ɓàìn tee, kɛbì Sétɔ̃̀ mɛ dyà à fũ̀à-fṹá séín ɖò kɔ̃ɛ. À dyiɛ náa nyu ní, à muɛ tɛ̀mɛ̀ìn kà Jɛhovaa nyɛ́nɛ́ɔ̀ jè kpa ɖɛ mìɔ ɖé à gbo kà ɔ nyuà nìɛ̀ ɖé Jizɛ Kɛ́ɖɛ́ì gboɛ.