Dʋdʋkpäta yi ˈbhlɩ a -bhlɩɩ ˈzʋ

-Lizoku ˈwuë Sataa -lɛmöä mäˈä ˈpɩwʋ, Zoova yi sɛ -sɛ. Zezwii ˈmö ɔ zʋa ˈKämanɩɲɔ ˈwʋ nzɩ ɔ ˈkä dʋdʋkpäta ˈwuë -gömö ˈkämanɩ. ˈƆ ˈKämanɔɔ ˈla mʋʋ ˈkää dʋdʋkpäta ˈbhlɩ a -bhlɩɩ ˈwʋ zʋa.—Daniel 7:13, 14; Lwiikö 23:43.

-Lii Zoova gbää ɔ ˈkä nʋ miɛ dɛˈɛ:

• LILE YI ˈKWÄDLƖ -BHÖLƖ: “Dʋdʋkpäta ˈklʋ a glʋglʋlii yi ˈpʋ, yɩ yi nɛnɩmanɩ klɩpaa. Lagɔ, -aˈa Lagɔ, -yiɲɩ ˈɲu ˈpä.” “Mäˈä dʋdʋ ˈwʋ, lilea yi -bhölɩ ˈyize; -mä -gägö ˈwlu, glʋglʋlii yi nɛnɩmanɩ, lilea yi teɲii zumanɩ.”—Psaume 67:6; 72:16.

• TƲ ˈNAA ˈKÄA -BHÖLƖ: “A nɩ yi a ˈkä Zoova ˈa nʋnʋlii ˈylɩmö, sɛ ɔ nʋä zɩzɛlii mäˈä dʋdʋkpäta ˈwuë ˈwʋ a za. -Mä dʋdʋ a këtiea ˈwuë ˈwʋ, mɔɔ bhɩa tʋgwɩgwɩɛ ˈyli.”—Psaume 46:8, 9.

• NƖKPAZOKU ˈNAA ˈKÄA -BHÖLƖ: “Ɛˈɛ -bhö ɲɩasɛ, maa wa yi ˈkpʋkpʋwa mäˈä dʋdʋkpäta ˈklʋ -sɛ [...] -Lɩbhä ˈnaa ˈkäa ˈmö gwälɛ, ˈɲiɲlolinʋɲɔ -bhlʋ aˈbhë ˈnaa ˈkäa -bholɩ. Nn, -n -kä dɛ ɔ -wʋ a-a yɩlɩɩ, ɔˈɔ a -lɛ -wʋ.”—Psaume 37:9, 10.

• 

  ˈLƖBHÄGU, DLƖYLIYILE -ƝƐ ˈKWIE ˈSƆ ˈNAA ˈKÄA -BHÖLƖ: “-Lɛ a ˈtɛɲɩ ˈla ˈmö, ˈkukwlekäwaa ˈa yila yi do, ˈyukwïlagbägbakäwa a ˈyukwïla yi do. ˈTɛɲɩ ˈla ˈmö, kpälɛkpälɛɲɔ yi ˈlwɩɩ a sɛ guëë, ˈn -ɔɔ wɛlɩ -kä, ɔ wɛlɩ yi do, ˈmäna a za ɔ yi ˈmö ˈkpa.”—Isaïe 35:5, 6.

  “-Mä nɩkpa a jijoˈwʋ -mä wa -lowli Lagɔ aˈbhë ˈkäaˈaa glɩ. Mɔɔ ˈkʋää ˈyli yɔwʋ sɩɔ ˈtɩɩ. -Mä -glɔ ˈla ˈmö, ˈkwie ˈnaa ˈkä -mä -wʋ zaa, ˈlɩgbʋ ˈnaa ˈkä -mä -wʋ, dlɩyliyile ˈnaa ˈkä -mä -wʋ, ˈklɩyɩyɛ a ˈke -bhlʋ aˈbhë ˈnaa ˈkä -mä -wʋ ˈlɩlɩlɩ. Ɛˈɛ -bhö ɲɩasɛ, maa mäˈä ˈpɩwʋ a -lii ˈwuë ˈyli yɩ ˈkää bhɩɛ, yɩ ˈnaa ˈkä -mä -wʋ.”—ˈKlʋkälɩwɛlɩɩ 21:3, 4.

Sɛɛ Sataa -ɲɛ ˈɔ zuzukuzoku ˈsɔ kää ˈkwädlɩ ylʋ, Zoova ˈnɩɛ ɔbhlɩ -sɩbhä -wʋ, gbëaa ɔ kää ˈkwädlɩ ŋli. ˈSaa ɔ gbää ɔ ˈkä nʋ, yli ɔ ˈwälaniɛ klɩpaa. (Lwiikö 1:36, 37) Zoova -wamö teɲii, ˈn ɔ yɩbhä -n ˈkä -mä ˈbhlɩ a -bhlɩɩ ɔ ˈkää -lɛmö ˈmö -bhölɩnɩ. -Mä Biblë ˈmö a gbëawɛlɩɩ -yɩɛ -sɩbhä a sɛ -wʋ, -yɩ -lɛ Lagɔ a wɛlɩɩ mii, a -kä a ˈki sasɛ yɩbhlɩnɩɩ, a tɛlɩ sɛ a ˈkä Zoova ˈa Bhlɩnɩwaa ˈylɩmö. -Mä ˈa zɩkpa ˈmö, a -kä gbëawɛlɩɩ -gänɩɩ, widɩ, ˈpäpägböö a -gänɩgänɛ, ˈn sɛ aˈaa -li -mimii ˈmö -ŋö, a yi yɩ galɛ ˈmö ˈwlʋ. ˈTɛɲɩ -kä ˈplɩ, -n ˈnaa ˈkä aˈbhë ˈkwie -ɲɛ ˈɲiɲlolii ˈsɔ a gbʋ -gömö -kä ˈlɩlɩlɩ. Zezwii -lɛ naa: “Lagɔ ˈa wɛlɩɩ ˈwuë sɛ yɩ -wʋä ˈtɩɩ, a yi -sɩbhä yɩbhlɩnɩ. A -kɩɩ yɩbhlɩnɩɩ, yɩ yeaɲɩ galɛ ˈmö -sɛ.”—Zaah 8:32.