ˈCɩɛcɩɛ-kïbhëa 10

Nʋnʋlii yɩ nyuä Lagɔ dlɩ yɔwʋ

-Lizoku yɩ ˈnɩɛ Lagɔ ˈyila ˈklʋ ngwa, sɛ -a ˈlibhï bhä ˈwʋ ˈnɩ? (1)

Nyɩbhɛlʋ -nyɛ nglɔ ˈsɔ a glɩglɩsɛ a -mii nɩ bhä nɛnɩ ˈnɩ? (2)

Sɛ Klɩtiɛ ˈlibhï bhä: yio ˈwʋ ˈnɩ? (3) ˈbhlibhlie ɛ kää moni gwë ˈwʋ ˈnɩ? (3) ˈwi ˈwʋ ˈnɩ? (3) yɔwʋ kälɩkälɛ ˈwʋ ˈnɩ? (4) gukäkʋ ˈwʋ ˈnɩ? (5) nʋnɩmänɩmʋ ˈwʋ ˈnɩ? (6)

Sɛ nɩkpɛ ˈkä bhä ɔ nʋnʋlizoku kɛˈmö -sɛ nɩ? (7)

1. Yɩ nɛnɩɛ, ˈmö Lagɔ a -nʋa -waa. Maa -lizoku ˈwuë a -gömö panɩ panɛ, ˈmö wa kää wa ˈkä ˈcɩɛ. (Psaume 97:10) Mɩɩ sɛ zɛmö nɩɩ, wa nɩ tɩɩ nʋnʋlii yɩ ˈnɩɛ Lagɔ dlɩ yɔwʋ nɛnɩ kɛ zɩ. Nʋnʋli a -mii bhä ˈnɩ?

2. Nyɩbhɛlɩɩ -nyɛ ngwlɩɩ ˈsɔ a sɛsɛnɩ sɛsɛnɛ: -Mumuë ˈnɩɛ -bhlɛ kwäkwänɩ ˈn wa -wʋä ˈnglɔ -nyɛ ˈluwli ˈsɔ ˈmö. Nglʋsɛtɛlɩtɛlɛ -nyɛ gbɩsɛtɛlɩtɛlɛ ˈsɔ, nɩkpa -wa -nyɛ nɩma pöä nɩkpa a sɛ sɛɛ, -wa -nyɛ wanyɩ a -daayuë pöä sɛ, -wa -nyɛ wa ˈbhɩanyɩbhɛlɩ pöä ˈngwlɩ a sɛ sɛ, yɩ ˈwuë ˈnyinylolii a kädɩ yɩ glɩnɩɛ -mä Lagɔ a yila ˈklʋ a dɔˈwʋ. (Lévitique 18:6; Ghlɔɔmö a -nʋa1:26, 27; 1 Kɔlɛɛtɩ a -nʋa 6:9, 10) Nɩkpa ˈsɔ -kä ˈnglɔ -nyɛ ˈluwli ˈsɔ ˈmö -wʋ, ˈn wa nɩ -bhlɛ kwäkwänɩ, wa kä wa ˈkä yɔwʋ ˈbhöö bhöönɩ. Wa käˈɛ wa ˈkä ˈwʋ glɩnɩ nʋʋ, -mä ˈbhlɩlowluwaa dlɩ ˈmö, -mä wa kää wa ˈkä kwäkwänɩɛ mö.—Ebleewaa 13:4.

3. Yio, ˈBhlibhlie ɛ kää moni gwë -nyɛ ˈWi ˈsɔ: Lagɔ Zoova gbëa ɔ kää nglii. (Tiitɩ 1:2) Nɩkpa -kä wa ˈkä Lagɔ dlɩ yɔˈwʋ nɛnɩmanɩ nʋʋ, waˈaa wa ˈkä yio -kä. (Proverbes 6:16-19; Kɔlɔɔsɩ a -nʋa 3:9, 10) ˈBhlibhlie ˈwuë ɛ kää moni gwë, -lii ˈwuë a ˈtʋzokwëa ɛ kää gwë. Nza Klɩtiɛwaa nɩ ˈpä möä ˈbhlibhlie ɛ kää moni gwë, miɛ nɩɩ, lotolii, PMU, -nyɛ Bigoo ˈsɔ. (Ɛfɛɛzɩ a -nʋa 5:3-5) Klɩtiɛwaa nɩ ghli ˈwi. Wa pɩamöˈɛ -lii wa yiɛ sɛ nɩɩ ˈwi ghli -lii yɩ glɩnɩɛ ˈn wa ˈlibhïˈɛ ˈwi ˈmö käbönɩkpɛ a -lu ˈwʋ.—Exode 20:15; Ɛfɛɛzɩ a -nʋa 4:28.

4. ˈKlɛkäkʋ, -nyɛ Yɔwʋ Kälɩkälɛ ˈsɔ: Nɩkpɛ nɩ ɔ klɛ dʋdʋ ˈwʋ -lɛmö, ɔ yi ˈku ˈlɩbhä. (Genèse 4:5-8) Nɩkpɛ -kä yɔwʋ kälɩnyɔ glɩnɩ, ɔˈɔɔ bhɛnɩ ɔ ˈkä Lagɔ a bheyi zʋ. (Psaume 11:5; Proverbes 22:24, 25) Kpa -sɛsʋ ˈnɩɛ nɛnɩ, -sɩbhä a za ˈn nɩkpɛ -kanyɩ -lizoku ˈwlu nʋʋ, -a nɩ tɩ yɩ kpa -sɛ.—Proverbes 24:29; Ghlɔɔmö a -nʋa 12:17-21.

5. Gukäkʋ: Göpögöpöwaa -mumuë -wʋ -lɛ, ˈwʋ wa yɩbhää ˈn wa göpöä gwii. -Mumuë ˈlɩbhäˈɛ wa -gblɩwa gu ˈmö, nzɩ gu ˈkʋä ˈlɩbhä wa ˈkä ˈku. Sataa mɔɔ -wʋä -lizoku ˈla ˈwuë nimï. Nza Klɩtiɛwaa ˈnɩɛ -kä wa ˈkä gukäkʋ a kii ˈwuë kɛ zɩ. (Deutéronome 18:9-13) ˈN wa -kanyɩ gu ˈmö ˈlɩbhää, Zoova a ˈyize -kpöö ˈmö -a ˈkää yɔwʋ glɩ, mɔɔ -lɛ -aˈa ˈwʋ yinyɔ kɔdɔ mɔ.—Proverbes 18:10.

6. Nʋnɩmänɩmʋ: Waˈaa nʋ nɩɩ -a nɩ tɩ nʋ ˈnɩmä nʋ, maa -a bhɛnɩ -a ˈkä duvɛɛ yie, biɛlɩ yie, -nyɛ nwɩɩ -mimii ˈsɔ ˈnɩmä (Psaume 104:15; 1 Timotee 5:23). Maa -a ˈkä tenyii nʋ ˈnɩmä -këë wʋ -kanyɩ lɩbhä, mɩɩ ˈnɩɛ Lagɔ dlɩ yɔwʋ nɛnɩ. (1 Kɔlɛɛtɩ a -nʋa 5:11-13; 1 Timotee 3:8) -A -kä tenyii nʋ ˈnɩmää, wʋ bhɛnɩ wʋ -kanyɩ gu ˈlɩbhää, wʋ yi -aˈa ligbëa nyima. Wʋ bhɛnɩˈɛ wʋ -kanyɩ -mä ˈsunɩ -a ˈkä -lizoku ˈmö bhlinɩ.—Proverbes 23:20, 21, 29-35.

7. Nɩkpa wa -nʋä ˈsaa ˈnɩɛ Lagɔ dlɩ yɔwʋ nɛnɩ, waˈaa -mä “Lagɔ ˈa ˈpɩwʋlelea ˈwʋ ˈbhle -kä.” (Galatii a -nʋa 5:19-21) A -kä Lagɔ a -waa -tiasɛ nʋʋ, a -käˈɛ a ˈkɔ dlɩ yɔwʋ nɛnɩmanɩ nʋʋ, a kä a ˈkä -lizoku ˈla kɛˈmö -sɛ. (1 Zaah 5:3) -Lizoku -mii ˈnɩɛ Lagɔ dlɩ yɔwʋ nɛnɩ a gömö panɩ panɛ, ˈmö a nɩ ˈcɩɛ. (Ghlɔɔmö 12:9) Nɩkpa wanyɩ nɛmönɛmösaa nɛnɩɛ Lagɔ dlɩ yɔwʋ, ˈmö a kää a -nyɛ ˈkä wʋ-bhlinɩ. (Proverbes 13:20) -Mä Lagɔ a -nʋa glaˈmö, wa ˈnɛɛnɩɛ lagɔwɛlɩɩ a dɔˈwʋ ˈylimö, wa bhɛnɩ wa kanyɩ kwänɩ. (Zaakö 5:14) -Lii ˈla ˈwuë ˈmö a dɔˈwʋ, a nɩ tɛɛnɩ Lagɔ a kwänɩkwänɛ dlɩ -mä bhibhebhibhiu ˈmö.—Filiipö a -nʋa 4:6, 7, 13.

[ˈFoto yɔwʋ ˈa wɛlɩkïbhëa, kpʋ 20, 21]

Nʋnɩmänɩmʋ, yɔwʋ kälɩkälɛ, ˈbhlibhlie ɛ kää moni gwë -nyɛ ˈWi ˈsɔ ˈnɩɛ Lagɔ dlɩ yɔwʋ nɛnɩ.