NIMÏYƖBHÄKÏBHÏ 5

-Mä -suku ˈmö na ˈbhɩa -kaa ˈzwɩ zia, sɛ n ˈkä ɔ zʋ ˈnɩ?

-YƖ KÄÄ ˈŊLƖ ˈN YƖ KÄÄ DƐSƐ

-Naˈa sɛ -n ˈkää ˈzʋ, -sɩbhä bhɛnɩ a ˈkä ˈŋlɩ -kä nzɩ -lii ˈkä ˈwlu gïganɔɔ, ɛ -käˈɛ yɩ ˈkä ˈmö ˈtɛmanɩ.

ˈSAA -N ˈKÄ Ɔ NƲ ˈNƖ?

ˈPänɩɛ -ka wɛlɩ ˈlɛ dlɩ kɛ: Tomaa ˈnɩɛ yɩbhä ɔ ˈkä zɩˈɛ -suku ˈmö mö. Ɛ yiˈɛ ˈzɩgblɛ aˈbhë -kë. Ɔˈɔ a ˈyɩbhä ɔ ˈkä plɛ aˈbhë. Ɛˈɛ -bhö ɲɩasɛ, maa ɔ ˈbhɩa mʋa ˈlibhïnɔɔ widɩ ˈwʋ -mä -suku ˈmö -lɛ a ˈcwɩ taa dɛˈɛ. Wa yoo aˈbhë ˈŋlɩ ˈpä. Zlɩ -mɛmɛɛ ˈmö, -mumuë; ˈɔ ˈbɔgwɩ ˈmö wa sluä sɛ, ˈn wa nʋä nɩɩ waˈa -sɩbhä -blipäsɛ zʋ. -mɔmɔɔ ghlɛnɔˈɛ nimï ˈn ɔ ˈsunɔ -mä. ɔ -kä ˈmö bhɛlɔ, ɔˈɔ ˈyɩ -ɔ zʋä -sɩbhä ˈylɩmö. -Kido ˈwʋ a -nɩɩ aˈbhë ˈmö yɩ ˈtɛmanɩɛ teɲii. ˈBɔgʋ wa ˈpɔɔ ˈwʋ -mä ɛtɛnɛtɩ ˈklʋ, wʋ ˈmö, sɛˈɛ wa gbää nɩɩ, wa ˈkɔɔ -mä -suku ˈmö ˈylɩmö, ˈlɩbhä wa ˈkɔɔ ˈlɩbhä.

ˈN -nmö -käa Tomaa a ˈbhle ˈmö -wʋ, sɛ -n ˈkäa ɔ zʋ ˈnɩ?

ˈPÄÄ -KA ˈTIKÏYIE ˈWƲ DLƖ!

-N ˈnaa ˈkä yɩ nɩɩ -nn-ä bhɛnɩ -n ˈkä -naɲɩ ˈwʋ gwɩ nʋ! -Ɔ yɔlɔamöä, -n ˈnaa ˈkɔ -kätlɩɩ ˈmö ˈlibhä maa -n yo ˈwlu ˈplɩ. Sɛɛ -n ˈkä bhä ˈzʋ ˈnɩ?

TƖ GBƲ -DƖ. Biblë lɛ nɩɩ: “Nɩkpɛ a -mɔ ˈnɩɛ ˈnɛɛ, ˈsaa bhlinɔɔ ˈwlumö cuu ˈmö ɔ nʋä, maa -ɔ ˈnɛɛ ɔbhlɩ, dlɩ ˈwʋ ɔ pɩɛnɩɛ ˈn ɔ -wʋä -vlɩɩ -këë -mä ˈgbë ˈwʋ.” (Proverbes 29:11) ˈN -n -kä -vlɩɩ -wʋ, wa -kɩɩ -sɩbhä ˈylɩmö, -wa ziamöä ˈzwɩ, swɩ yʋa yɔwʋ ˈkunɩ zaa wa -yimö kɛ yɔwʋ -sɛ.
TƖ -NAˈA KPA -SƐ. Biblë lɛ nɩɩ: “Nɩkpɛ -kaaɲɩ -lizoku ˈwlu nʋʋ, a nɩ to -lizoku ˈwlu nʋmö.” (Ghlɔɔmö 12:17) Nɩkpɛ -kä ɔɲɩ a kpa -sɛ, -lii bhɛnɩ yɩ ˈkä teɲii ˈmö ˈtɛmanɩ.
ˈNƐMANƖ -NAƝƖ ˈWƲ. Biblë lɛ nɩɩ: “Nɩkpɛ a -mɔ -yiɛ sɛ nɩɩ, ˈɲiɲlolu -wʋ -mä yi dɔˈwʋ ˈn ɔ zizoo, -sɩbhä a -nɔ ˈla ˈnɛɛ ɔ ˈnɛɛ.” (Proverbes 22:3) -Wa bhɛnɩɛ wa -kamö -lizoku ˈwlu nʋ, ˈtɛmanɩ ˈyli yɔwʋ n ˈkʋa gwë dionɩ ˈn -lii a -mi bhɛnɩˈɛ yɩ -kamöä wɛlɩ ghïla, ˈnɛmanii ˈwʋ.
PLƲNƖ SASƐ. Biblë lɛ nɩɩ: “Wɛlɩ a -mi -wʋä -pälɛpälɛ, yɩ bhɛnɩ yɩ ˈkä nɩkpɛ a ˈklɛ -dɔˈwʋ -lɛ.” (Proverbes 15:1) -N bhɛnɩˈɛ -n ˈkä glaɲɩɛli nʋ. Yɩɛ, wa -kä nɩɩ teɲii -n ˈghïliɛ nʋʋ, ziazianɩ -naˈa -këpï ˈwʋ nzɩ -n ˈkä nɩɩ “n yi kamä zɩla ˈwʋ -sɛnɩ!”
ˈBHÖÖ -LƐ. Nolaa -ɔ kää ˈylʋbö 19 lɛ nɩɩ: ‘-N ˈnɩ gbʋ -dɩ, mii tulaa nɩɩ -n ˈnɛɛ ˈn -n ˈtɛɛ ˈmö -n ˈkä -ɔ yɔlɔamöa ˈwʋ zi. Yɩ tulaˈɛ nɩɩ, -naˈa dlɩɩ ˈmö -n pɩɛnɩɛ ˈwʋ. -Lu a -mu -ɔ ziamöä ˈzwɩ ˈnɩɛ bhɛnɩ.’—2 Timotee 2:24.
ˈTƐMANƖ ˈYLI YƆWƲ -N ˈKÄ -NAƝƖ DLƖ ˈTƐƐNƖ. -Wa ziaa wa ˈbhɩa ˈzwɩ ˈn nɩkpɛ ˈnɩ ɔɲɩ dlɩ ˈtɛɛnɩ, -pa wa yɩbhlɩnɩɛ sɛ cuu. ˈN wa yɩɛ ˈylɩmö nɩɩ, wa -kɔɔ ˈzwɩ zia, ɔˈɔ bhɛnɩ -n ɔ ˈkʋa -lu nʋ. Maa wa -kamö yɔlɔa ˈn -n ˈnʋa swɩ yɔwʋ päla, swɩɩ ˈkʋaˈaa yɔwʋ ˈkunɩ ˈn wa -kamöä ˈyi ˈtatinɩ.
ˈƝƐ KÄBÖNƖKPƐ ˈDƖ. -Sukumasɩ -bhlʋ -lɛ nɩɩ: “ˈN wa -kamö ˈzwɩ zia dɔˈwʋ -wʋ, ˈpäpänɩ ˈwʋ -n ˈkä käbönɩkpɛ ˈdɩ ˈɲɛ. -Sɩbhä -n kää -n ˈkä ˈzʋ. Yɩ yi gbä ˈn wa ˈnaa ˈkä -sɩbhä -mɔmɔɔ zʋmö.”

Ɲɛgbayu -bhlʋ, ˈyli yɔwʋ ɔ ˈtɛmanɩɛ ˈn ɔ yiɛ -wa zia wa ˈbhɩa ˈzwɩ ɔɲɩ gwë ˈdionɩ. — ˈN -n -kä -naɲɩ dlɩ ˈtɛɛn, yɩ -yimö ˈmötɛɛnɔɔ a -mu -wa ziamöä ˈzwɩ ˈnɩɛ -kä ˈɲɛ.

-N -YI A-A BHÄ SƐ -A?

-Wa ziamöä ˈzwɩ bhɛnɩˈɛ wa -kamö -lii -mimii a -bɛ ˈwlu nʋ:

Wa -yimö wɛlɩzoku bhïlanɩ. Selinɩ -ɔ kää ˈylʋbö 20 lɛ nɩɩ: “N ˈnaa ˈkä -zɩ ŋlɩɩ wa lanɩɩ a-a ˈmö ˈn wɛlɩzoku wa bhïlanɩ a-a ˈwʋ dlʋ. Sɛ wa ˈzʋʋ a-a a za, n -kä naɲɩ ˈwʋ yɩlɩ, na dɔˈwʋ nˈn-ä dɛsɛ -kä, nˈn-ä -lu aˈbhë glɩnɩ ˈlɩlɩlɩ. Wa -ka a-a ˈkukusɛ ˈlɩbhä aˈbhë, yɩ -gä a-a kɛ.”
-Bɛ nɩ ˈsibhämö yɔwʋ. Alee -ɔ kää ˈylʋbö 18 lɛ nɩɩ: “-Mä -suku ˈmö, na ˈbhɩa ˈnɩ ˈsibhaa yɔwʋ. -A -kä lili -bɛyɩ möä yi, ylʋ wa plɛ nɩɩ ˈbhle ˈnɩɛ -mä -wʋ, -lɛ a dɔˈwʋ n -ɲʋa tia ˈtebhle -bhlʋ ˈklʋ glɩ. Zila ˈwuë ˈmö, ˈwi a yize n wi a-a la ˈn n li a-a ˈkwädlɩ na ˈyize, saˈa -këë ˈn ˈylʋba yiɛ bhɩɛ.”
Nɩkpa a ˈŋlɩ a fɩ pälaplʋ -mä ɛtɛnɛtɩ ˈklʋ. Daniɛlɩ -ɔ kää ˈylʋbö 14 lɛ nɩɩ: “Ɛtɛnɛtɩ ˈklʋ, nɩkpɛ ˈkä -mä mö, ɔ ˈkä -mɔmɔɔ a ˈŋlɩ ɲima a dɔˈwʋ yɩɛ ˈmö ˈtɛɛ, ɔ yiˈɛ ˈɔ zɩkpaa aˈbhë ɲima. -N ˈnaa ˈki -kamö dlɩ ˈwʋ -kä, maa -sɩbhä a -lii -bhölɩ -tiamö!”

**-WA ZIA ˈWA ˈBHƖA ˈZWƖ A -GÖMÖ A NIMÏYƖBHÄKÏBHÏ**
-TIAWƐLƖƐ Ɛ -KÄˈƐ YIOWƐLƖƐ	ZƐMÖSƐNA
1 Sɛɛ -mumuë yɔlɔa wa ˈbhɩa ˈn wa ˈlɩbhʋa ŋanɔ a -lii, zɩˈɛ yɩˈɩɛ tɛɛ.	1 -TIAWƐLƖƐ. A yɩɛ -ka. Biblë bhïla nɩkpa wa laa Nefilimö a wɛlɩ. Sɛˈɛ ˈwa ŋlɩɩ sɛɛ zɛmö nɩɩ, “-Wa bhlɩɛ wa ˈbhɩa sɛ.”—Genèse 6:4.
2 -Wa zia wa ˈbhɩa ˈzwɩ, wa ˈkʋa ŋanɔ ˈlɩbha a za-a. Wa dɔˈwʋ ˈbhlibhïlee.	2 YIOWƐLƖƐ. ˈZwɩziaziʋ ˈla kä ˈŋlɩ ˈn -dɩgbö a -bɛ lɩbhää waɲɩ.
3 Sɛ -n ˈkää zʋ nzɩ wa -kamö kɛ yɔwʋ -sɛ, mɩɛ nɩɩ -n -ɲʋa nɩ gwɩ.	3 YIOWƐLƖƐ. -Wa zia wa ˈbhɩa ˈzwɩ, -wa tɛɛ ˈmö wa ˈkʋa ˈwʋ zi. Zaa, -muë wa yɔlɔa a kpasɛsʋ ˈnɩ ghlɛ de.
4 -N -kä -sɩbhä a -lii ˈylɩmö, tɩ nɩkpɛ ˈdɩ ˈɲɛ.	4 YIOWƐLƖƐ. Nɩkpɛ a -mɔ ˈyɩɛ -lu a dɛ ˈnaa ˈkä nɩɩ ɔˈɔ sɛ -yi nʋ. Wa -kä -mɔmɔɔ ˈzwɩ zia dɔˈwʋ -wʋ, ˈn -n ˈnɩ gbʋ -dɩɩ, -n ˈniɛ ˈwlu gïganɩ maa ˈmö -n ˈtɛmaniɛ daˈa.
5 -Wa zia saˈa ˈwa ˈbhɩa ˈzwɩ, wabhï waˈaa waɲɩ dlɩ ˈtɛɛnɩ.	5 -TIAWƐLƖƐ. -Wa zia wa ˈbhɩa ˈzwɩ, waɲɩgäsɛ waˈaa waɲɩ dlɩ ˈtɛɛnɩ maa ˈfʋ wa nʋä ˈyli yɔwʋ -tɛɛn -lii.
6 -Wa zia wa ˈbhɩa ˈzwɩ, wa bhɛnɩ wa ˈkä ˈmö zigbonɩ.	6 -TIAWƐLƖƐ. Wa -kuë kwänɩ, wa yi ˈmö zigbonɩ -mä ˈwa nʋnʋlii -ɲɛ ˈwa dlɩpäsaa ˈsɔ ˈmö.