Tɛlɩ sɛ -n -ɲɛ -na -daayu ˈkä -wamanɩ: Sɛ -n ˈkä ɔ ˈzʋ?

ˈPää -ka dlɩ nɩɩ, -mä Galilee -mä -n -bhölɩnɩ a-a -kamä, Zezwii a ˈtɛɲɩ ˈmö. ˈN -n yiɛ -mä Zeluzalɛɛmö mö, -n ˈkä ˈfɛtɩ -bhlʋ -sɛ, wa laa -gligbïzɛmöglɩfɛtɩɩ. -Glɔ ˈwuë yie nɩkpa ˈwʋ, -wa yiɛ Lagɔ bʋbɔɔ, wa ˈbhöönɩ saa ˈwuë. -N yɩbhä -n ˈkä Lagɔ -lu bʋbɔnɩ. Zaa, -n -su wli. Maa nɩkpa -zu teɲii zaa,-n ˈkä -mä lagɔligbëa ˈmö plɛ a dɔˈwʋ, ˈmö yɩ ˈtɛɛ teɲii. ˈN -n yiɛ ˈyli yɔwʋ ˈtɛmanɩ, ˈn -n yiɛ -mä plɛ. -N ghlɛɛ -mä, -wa möä Lagɔ -lii bʋbɔnɩɛ ˈnɩɛ muënɩ. Saˈa -këë, -naˈa ˈtɛɲɩ yiɛ ghlɛ, -n ˈkäaˈa -sɩkaa lagɔbʋbɔwaa wli -n -suä yɔwʋ ˈɲɛ. ˈN -n yiɛ ligba nɩɩ, -na -daayu kä -na ˈklɛ ˈmlɩ. Ɔ yi -kamä käbödɛ -wʋ, ɔ yiˈɛ -kamä nɩkpa a -bʋbʋ ˈla jijoˈwʋ -wʋ. Sɛ -n ˈkää zʋʋ, Zezwii -sɛsɛnii ˈmö. (Zɛlɩ Matie 5:24 ˈmö.) Sɛɛ Zezwii gbää a dɔˈwʋ, -na -daayu -ɔ kää -na ˈkibhë ˈmlɩ, sɛɛ -n ˈkä ɔ ˈzʋ, a ˈkä -wamanɩ ˈnɩ? Kïbhï wa ˈzʋä dɛˈɛ zɛmö, kibhëa -a nɛnɩɛ, ˈcɛlɩ -lɛ a yɔwʋ.

-N ˈKÄÄ NƲ ...

• -na -daayu -kä -na ˈklɛ ˈmlɩ -kä, ˈn ˈɔ wɛlɩ -kä nɛnɩ, -lɛ a ˈyize -n ˈkɔɔ -mä ghlɩ, a ˈki ˈmö -sɛnɩ.

• -n -kä dlɩ ˈpä nɩɩ, -pa ɔ pää ˈklɛ, ɛ -käˈɛ nɩɩ a ˈsɔ -kpɔ, ˈsaa a nʋä ˈnɩɛ nɛnɩ, tɛlɩ sɛ -n ˈkä ˈɔ dlɩpäsaa ˈmö zlɔmanɩ.

• -pʋnɔ ˈyukwli ˈtɩɩ. Sɛɛ ɔ gbää, -n ˈni sasɛ ˈmö ˈnʋ aˈbhë -kë, ˈsaa -n nɔɔ ˈwlu, sɛ yɩ kälɔɔ yɔwʋ a za, bhibheo -tiasɛ yɔwʋ.

-NA -DAAYU ˈKÄÄ NƲ ...

• ˈsaa -n nɔɔ ˈwlu, ɔ nɩ ˈɲɩ lagɔzɩkpa ˈmö a -nʋa -mumuë, wa ˈkɔ nimï -wʋ.

• ɔ nɩ nʋ nɩɩ -nn-ä zugo -kä, ˈn -lii ˈtikïyiea ˈwuë -n nʋä, ɔ nɩ -sɛnii ˈmö, nzɩ -n ˈki yɩbhlɩnɩ klɩpaa.

• sɛ -n -lɛmöä -naɲɩ dʋdʋ ˈwʋ, ˈn -n yiɛ ˈyli yɔwʋ ˈtɛmanɩ ˈn -n yoo ˈylɩmöä mö, ɔ nɩ yɩbhlɩnii, ɔ ˈkä -naˈa -lizoku a gbʋ ˈyi ˈtatinɩ.

Zɩˈɛ a dɔˈwʋ, -aaa nɩma ˈmö ghlɛnɩ, -a ˈkä Lagɔ bʋbɔ. Zaa, Zezwii -kä nɩɩ, -a -ɲɛ -aa -daayu nɩ -wanɩ, Lagɔ ˈkä -aˈa bʋbɔbʋbʋ ˈwʋ ŋlu, ˈsaa yɩ ˈcɩaɲɩ ɔ ˈnɩ?