Sɛɛ a ˈkää ˈzʋ ˈa ˈligbëa ˈkä ˈmäna ˈmö -wʋ ˈyize, a nɩ ˈzʋ -sɩbhä

Kwäkwänɩkwäkwänɛ kä teɲii Zoova dlɩsɛ. Ɔ lɛ nɩɩ, ˈluwli -ɲɛ ˈɔ ŋlɔɔ ˈsɔ, wa nɩ -glɛglɛnɩ ˈwʋ. (Mt 19:5, 6) ˈLuwluwa -ɲɛ ˈŋwlɩ ˈsɔ -waɲɩ gbäpöö wa ˈkää -gänɩɩ, wa -wʋ -mä Zoova a -nʋa jijoˈwʋ. Maa -wa kwäkwänɩɛ, nɩkpa a -muë kää ˈɲiɲlolii ˈmö, ˈmö wa glɩnɩɛ. Zaa wɛlɩ bhɛnɩ yɩ ˈkʋa jijoˈwʋ yi. Pɩwʋ nɩ ˈwʋ a -nʋa a dɔˈwʋ, -sɩbhä a -li -kä ˈwʋ ˈplɩ, wa kä wa ˈkä ˈylimö -sɛnɩ. Maa -aaa -kä -a ˈkä -sɩbhä dlɩ ˈpä. Klɩtɩɛwaa -wa yɛɛ kwäkwänɩ ˈwë, sɛ wa ˈkä ɔ ˈzʋ ˈwa ˈligbëa ˈkä ˈmäna ˈmö -wʋ ˈnɩ?

A-a nɩ ˈyɩɛ -ka -lii a ˈki ngbï -yɩ kää dɛsɛ ˈylɩmö.

1. Sɛɛ -n ˈkää -naˈa dlɩ ˈwʋ gwɩɩ, miɛ nɩɩ, tɩ -ɔɔzʋkälii ˈwʋ dlɩ ˈpä, tɩˈɛ ŋlɔ -mɔmɔɔ ɛ -käˈɛ ɲɩbhɛlʋ -mɔmɔɔ ˈwʋ dlɩ ˈpä. -Sɩbhä a -lii bhɛnɩ yɩ ˈkä ˈa ˈligbëa ɲima.​—Mt 5:28; 2P 2:14.

2. Sɛɛ -n ˈkää ˈzʋ, -n -ɲɛ Lagɔ ˈsɔ a ˈwʋ -wʋnɛ ˈkä ˈmö ˈtumanɩɩ, tɛlɩ -sɩbhä sɛ, ˈn sɛɛ -n ˈkɔɔ dlɩ yɔwʋ nɛnɩ a ˈtʋ nɩ -zumö teɲii dlɩ zɛmö.​—Ps 97:10.

3. Nɛmö ˈkwädlɩ nɩkpɛlolo a sɛ. Nɛnɩ dlɩ zɛmö -naˈa -lɛglɩɲɔɔ a dɔˈwʋ. Ghlɛnɩ -lii ˈtikïyiea ˈwuë ˈmö, nzɩ -n ˈkɔ -naˈa dlɩzɛmönanɔɔ ˈylimö tulanɩ. -N -kä -sɩbhä ˈzʋʋ, ɔ yi ˈkwädlɩ ˈmäna ˈmö -wʋ.​—Kɔ 3:8-10, 12-14.

4. -Mä ˈa ˈdɩsɛsʋ ˈmö, ˈzo ˈkwädlɩ ˈklʋkpamö, ˈn -naˈa ŋli a wɛlɩ nɩ -wʋ -pälɛpälɛ ˈyize.​—Kɔ 4:6.

5. -N -ɲɛ -naˈa -lɛglɩɲɔɔ ˈsɔ ˈkä -lɛ -wʋ a dɔˈwʋ, ɛ nɩ glɩnɩ -wawʋ ˈmö.​—1Kɔ 7:3, 4; 10:24.

Klɩtɩɛwaa -kä kwäkwänɩkwäkwänɛ a ˈklʋkpa -kä, Zoova -ɔ ˈwälɛɛ, ˈmö wa zʋä daˈa ˈklʋkpamö.

A NƖ YƐLƐ VIDEO, “DƐ -A KÄÄ SƐ, A-A NƖ ŊƆNƲ -LƐ KƐ -KËË -A ˈKÄ -MÄ ˈGBË ˈWƲ GHLƐ”: GUËGUËTƲ -A -WƲÄ KWÄ DƆˈWƲƲ, -A NƖ -GÄNƖ WƲ -LƆ, ˈN A NƖ YƖLƖ NIMÏYƖBHÄKÏBHÏ ˈLƐ YƆWƲ:

• 

  ˈŊlɔ -ɲɛ ɲɩbhɛlʋ ˈsɔ wa -kä kwäkwänɩ cuu, -lii bhɛnɩ yɩ ˈkä sasɛ ˈwʋ ˈplɩ, maa bhäla ˈsaa bhɛnɩ ɔ yɩ ˈkʋa kɛˈmö ˈtɛɛnɩ ˈnɩ?

• 

  ˈŊlɔ -ɲɛ ɲɩbhɛlʋ ˈsɔ -kä dlɩ ˈpä nɩɩ, waˈaa -tiawʋ -wawanɩɩ, sɛɛ Biblë a ˈpäpägböö bhɛnɩ ɔ yɩ ˈkʋa kwänɩ ˈnɩ?

• 

  Kwäkwänɩkwäkwänɛ a dɔˈwʋ, -lɔ a -mu Zoova ˈgïla ɔ sɛ ˈnɩ?

• -Wa yɛɛ kwäkwänɩ ˈwë ˈkä ˈmäna ˈmö -wʋ a dɔˈwʋ, wa ˈsɔ -kpɔ sɛɛ wa kä ɔ wa ˈkä ˈzʋ ˈnɩ?