˗ABHƲA KLƖTƖƐWAA SƐ ˗A ˗BHÖLƖƐ

˗N gïganɩ ɔ ˗naɲɩ ˈwlu moni a gbʋ ˗kä zɩkö ˈmö ˈtɛmanɩ a za ˗a?

Mäˈä pɩwʋ nɩ ˈwʋ, ˗lii ˗mimii ˗kä saa ˈwuë ˈwʋ ˈplɩ ˈn yɩ za moni a gbʋ ˗kä teɲii ˈmö ˈtɛmanɩ, yɩ ˗nɩɲɩɛ ŋli yɩa. ˗Yɩ kä ɔ ˈŋlɩ ˈnɩ? ˗Yɩ kää ˈŋlɩ miɛ nɩɩ ˗a ˗yi sɛ nɩɩ ˈpɩwʋ a ˈylibhɩɛtɛɲɩ ˈmö ˗a ˗bhölɩnɩɛ dɛˈɛ ˈmö nza ˗lii ˗wʋä ˗sɩbhä. ˈN Biblë ɲɩaɲɩˈɛ ˈdɩ ‘mäˈä ˈpɩwʋ a lɩɩ ˗yɩ glɩnɩ ˈplɩplɩlii,’ ˗a nɩ ti dlɩ ˈtɛɛnɩ. (1Ti 6:17; 2Ti 3:1) Moni a gbʋ ˗kä ˈmö ˈtɛmanɩɩ, sɛɛ ˗a ˈkää ˗aɲɩ ˈwlu gïganɩ a dɔˈwʋ, ˈsaa Zozafatɩ ˈa wɛlɩɩ ˈcɩaɲɩ ɔ ˈnɩ?

Dɛɛ Zozafatɩ ˈa ˗gblɩwaa yɩbhä a˗a wa ˈkɔ tʋ kwää, Zoova ˈmö ɔ ˈtɛɛnɩ a˗a ɔbhlɩ dlɩ. (2Ch 20:9-12) ˈN sɛ ɔ ˈkää ˈzʋ nzɩ ɔ ˈkä ɔɲɩ ˈwlu gïganɩ ɔ ˗ɲɛ ɔ ˗nʋä ˈsɔ, ˈmö ɔ tɛlɩɛ sɛ ˈn ɔ yiˈɛ ˗mä ˗gwlɩ ˈmö ˈslʋjazɩkpö sɛ ˈgïla. (2Ch 17:1, 2, 12, 13) Zozafatɩ a saa, ˗a nɩ ˈtɛɛnɩ Zoova dlɩ ˈn ˗a nɩ gïganɩ ˗aɲɩ ˈwlu, ˗lii ˗käa bhäla ˈmö ˈtɛmanɩ a za.

SƐƐ ˗A ˈKÄ Ɔ ˗BHLƐ ˗AƝƖ ˈWLU GÏGANƖ MONI A GBƲ ˗KÄ ˈMÖ ˈTƐMANƖ A ZA?

˗A nɩ ˈtumanɩ ˗a ˗ɲɛ Zoova ˈsɔ ˈa ˗wʋwʋnɛ ˈmö: ˈSaa ˗a kää nɩ ˗zunɩɲɩ kɛ. ˈN ˗a nɩ ˈtɛɛnɩ Zoova dlɩ nɩɩ ɔ bhɛnɩ ɔ ˗kaɲɩ zila ˈwuë ˈmö ˈsaa ˗a ˈkää ˗kä ˈɲɛ. (Mt 6:26; 1Ti 6:8) ˗A nɩ tɩ ˗zɩ Biblë ˈmö a ˈpäpägböö ˈklʋkpamö ˗sɛ, ˗a ˈkäa ˈsaa ˗a yɩbhä ghlɩ a za. (Gh 2:21) Wa ˗kä ˗mä ˗aˈa ˗budu ˈmö a kulaa ˈwʋ ˗dɩɩ, ˈn ɛtɛnɛtɩ ˈnɩˈɛ ˗bhölɩ, sɛɛ ˗a ˈkää ˈzʋ nzɩ ˗a ˈkä ˈkwädlɩ Biblë ˗ɲɛ lagɔbɔgwɩ ˈsɔ ˈmö zɛlɩ ˈyize, ˗a nɩ tɛlɩ ˗sɩbhä sɛ. Lagɔgwɩ ˗a ˈkää ˈmö zɛlɩ, ˗a nɩ gbäzii ˈmö nzɩ ˗a ˈkɩ ˗lɛ sɛ ˈzʋ. ˈN ˗a ˗käˈɛ bhɛnɩ, ˗yɩ ˈwlʋä ˈlili ˈwʋ, ˗a nɩ ˗sɩɩ ˗mä ɛtɛnɛtɩ ˈklʋ nzɩ ˗a ˈkɩ ˗bhlɛ ˗mä ˗aˈa tablɛtɩ a sɛ a ˗lii ˈmö ˈzʋ.

˗A nɩ gïganɩ ˗aɲɩ ˈwlu ˗mä ˗lii ˗mimii ˈmö: ˗A ˗kä gɔgbʋ ˗kä ˗a nɩ ˗sʋʋ, ˈn ˗a nɩ tɩ ˈfʋ moni ɲima ˗lii ˗yɩɩɛ dɛsɛ ˗kä a za. (Pr 22:7) ˗A ˗käˈɛ bhɛnɩɩ, ˗a nɩ ˈzʋ ˗lɛ lile sɛ ˈn ˗lii ˗mimii ˗yɩ kää dɛsɛ, ˗yɩ ˗kaɲɩɛ bhäla kwänɩ. ˈN ˗a bhɛnɩˈɛ ˗a ˈkä ˗lii ˈtikïtikïyie glʋ: ˈYɩbhɛ, ˗tɛlɩ, tomatɩ ˈn ˗sɩbhä a ˗lii ˗mimii, ˈn ˗a nɩ ˈzʋ ˗sɩbhä ˈkwädlɩ, ˗a ˈkäa moni käˈmö ˗kä ˈyize.

A NƖ YLƐ VIDEO ˗WƲ NƲÄ, DƲDƲ ˗KÄ TƖTLƐNƖ, Ɛ ˗KÄˈƐ ˈVUU ˈKƆDƲ, ˗N ˗BHƖƆ BHÄ ˈMÖ ˗A? ˈN A NƖ YƖLƖ NIMÏYƖBHÄKÏBHÏ ˈLƐ YƆWƲ:

Video, “Dʋdʋ ˗kä tɩtlɛnɩ, ɛ ˗käˈɛ ˈvuu ˈkɔdʋ, ˗n ˗bhɩɔ bhä ˈmö ˗a?” wʋ ˈmö a ˗lii. Wa yɛ Biblë tula, ˗kotoku ˗wʋ ˗lɛ, ˗ŋöŋöyukwli, ˈn ˗bïdisɩbhäwaa.

Sɛɛ ˗a ˈkä ɔ bhʋlʋbhlʋ ˗aɲɩ ˈwlu gïganɩ ˗lizoku ˗käa ˈwʋ ˈplɩ a za?

Your answer

Video, “Dʋdʋ ˗kä tɩtlɛnɩ, ɛ ˗käˈɛ ˈvuu ˈkɔdʋ, ˗n ˗bhɩɔ bhä ˈmö ˗a?” wʋ ˈmö a ˗lii. Lagɔdaayuëa ˗wʋ ˗mä ˗lizoku ˈwlʋnɩɛ ˈyli a a ˗nʋa a ˗bïdi ˈsɩbhä dɔˈwʋ, ˈn ˗wʋ ˗lii ˗mä tobi ˈmö ˗sɛ dɔˈwʋ.

Sɛɛ ˗a ˈkä ɔ ˗aɲɩ ˈwlu gïganɩ nzɩ ˗a ˈkä ˗mumuë kwänɩ ˈnɩ?

Your answer