Zuzukuzokuu mii ˈsunɩɛ -mä nɩkpa ˈn wa -sɛɛ Lagɔ ˈklʋkpamö

-Yɩ kä ɔ ˈŋlɩ aˈbhë ˈn Sataa -ɲɛ ˈɔ zuzukuzoku ˈsɔ kä ɔ saˈa nɩkpa a dula dula libho ˈnɩ? Ɛˈɛ -bhö ɲɩasɛ, maa sɛ yɩ -sɛɛ Lagɔ ˈklʋkpamö ˈn yɩ yiɛ ɔ ˈylimökänɩwaa ˈzʋʋ, yɩ yɩbhä nɩɩ nɩkpa ˈwuë nɩ ˈzʋmö -sɩbhä, -a nɩ bʋbʋa. Yɩ yɩbhäˈɛ nɩɩ, -a nɩ kä ˈyɩ yiowɛlɩ dlɩ ˈwʋ nzɩ -a ˈkä ˈsaa -ɲuä Zoova dlɩ yɔwʋ nʋ. Yɩ glaˈmö a -nii -mimii mii -lɛ, nɩkpɛ -kä ˈku a sɛ wa zʋä.

-Na dlɩsɛkänɩkpɛ -kä ˈkuu, dlɩ ˈmlɩ yɩ yilanɩɛ teɲii. Yɩ -kamö ŋäzɩ ˈlibhää, -n -kä ˈwii, ɛˈɛ -bhö -lizoku. Zezwii aˈbhë, ˈɔ bheyi Lazaa ˈkuä, ˈn “ˈmɩɔ yoo ˈylimö ghlɛ.”—Zaah 11:35.

Nɩkpɛ -kä ˈkuu, -mä -gwlɩ ˈwuë -gömö bhʋlʋbhlʋ gböö -wʋä ˈn yɩɛ muënɩ. -Mimii ˈnɩɛ Biblë ˈmö a ˈpäpägböö ˈklʋkpamö -sɛ. ˈWa nʋnʋlii a ˈsaa yɩ -glɛɛ ˈwʋ mɩɛ nɩɩ, -wa yɛɛ ˈku ˈwë -bhölɩ -bhlɛ, ˈn wa yɩluë ˈwʋ. -Sɩbhä a za, ˈlɩgbʋ -kä bhli, wa gʋʋ jlu ˈwʋ, wa wi teɲii, ˈn wa -bhɛ ˈlɩgbʋ ˈkɔdʋ aˈbhë. Wa dɔˈwʋ wa ˈnɩ nʋʋ, wa ˈnaa ˈkä -wa ˈkuä a zuzuku dlɩ yɔwʋ nɛnɩ. Maa -ɔ ˈkuä, “ɔˈɔ a -lu a sɛ -yi.” Zaa, ˈlɩgbʋ -kä bhli a sɛ wa zʋä tula nɩɩ, Sataa ˈa yiodɩ ˈmö wa kää dlɩ ˈwʋ ˈn yɩ ˈsunɩɛ -mä -mumuë wa ˈkɩɛ wabhlɩ dlɩ ˈwʋ -kämö.—Ecclésiaste 9:5.

Gböö wa -gänɩɛ ˈn -lii -mimii wa nʋä nɩkpɛ -kä ˈku, ˈfʋ waˈaa -sɩbhä ˈzʋ, maa wa dɔˈwʋ, wa ˈnuë kwänɩ, -wa yɛɛ ˈku ˈwë, yʋa -lizoku ˈwlu nʋ. -Mä -gwlɩ -mimii -gömö a dɔˈwʋ, nɩkpɛ -kä ˈku, ˈylɩ a 40 -kä ˈplɩ, ɛ -käˈɛ ˈylʋba -bhlʋ, ˈfɛtɩa wa sɛɛ ˈn wa bʋbɔ. ˈFɛtɩ -ɲɛ bʋbɔbʋbʋ ˈla ˈsɔ wa -bhɛɛ, yɩ ˈkäa -ɔ ˈkuä kwänɩ nzɩ ɔ ˈkäa “ˈyio ghlɩ”, ɔ ˈkäa -mä zuzuku a ˈbhlɩɩ ˈmö plɛ. -Mumuë wabhlɩ, -wa ˈkuä ˈmö wa ɲɛɛ lile -ɲɛ nʋ ˈsɔ wa ˈkä ˈnɩmä.

-Sɩbhä a -lii ˈla ˈnɩɛ nɛnɩ ˈlɩlɩlɩ. Ɛˈɛ -bhö ɲɩasɛ, maa Sataa ˈa ylʋ ɔ plɛ a-a -wa yɛɛ ˈku ˈwë a dɔˈwʋ, ˈmö wa -gänɩɛ, ˈmö wa pälaa swɩ yɔwʋ. Nʋnʋlii -yɩ -glɛ zuzukuzoku a ˈcɩacɩalii ˈwʋ, -sɩbhä a -lii ˈmö Zoova yɩbhä ɔ -a nɩ -gänɩ -a? ˈLɩlɩlɩ!—2 Kɔlɛɛtɩ 6:14-18.

-Tiamö a Lagɔ ˈa -gänɩgänɩwaa ˈnɩ nʋ tɛkäsɛ aˈbhë -lii -yɩ ˈbhöönɩɛ Sataa a yiodɩ ˈmö. Maa -mä -wawʋ ˈmö, wa kwänɩ nɩkpa -wa -bhölɩɛ ˈn wa pʋa dlɩ ˈmö. Wa -yi sɛ nɩɩ, Zoova a ˈyize mɔɔ bhɛnɩɛ ɔ ˈkä nɩkpɛ -ɔ ˈkuä kwänɩ.—Job 14:14, 15.

Gukäkʋ ˈnɩɛ Lagɔ dlɩ yɔwʋ nɛnɩ ˈlɩlɩlɩ

Nɩkpa a -bɛ -ɲɛ zuzukuzoku ˈsɔ bhïlaa. -Mumuë wabhlɩ ˈwʋyɩbhäɲɔɔ ˈmö wa ghlɛnɩɛ ˈmö ˈn wa -ɲii bhïlaa. ˈMö wa laa gukäkʋ. Wa laa voduu, ˈgbizigu a ˈpäpʋʋ, -damina, ˈwʋyɩbhäyɩbhʋʋ ˈn nɩkpɛ -kä ˈku, -wa -bhɛɛ ˈn -gäzɛ yɩɛ nzɩ ɔ ˈkä wa ˈlɩbhɔ ˈsɩbhänɩ. Gukäkʋ a ˈke -mämaa.

-Lii ˈla ˈwuë ˈnɩɛ Lagɔ dlɩ yɔwʋ nɛnɩ ˈlɩlɩlɩ. Sɛɛ Biblë gbää, -sɩbhä ma-a dɛˈɛ: “-Mä -naˈa mäa, nɩkpɛ [...] a -mɔ yɩbhää ˈwʋ, -ɔ kää -damina ˈwʋ, -ɔ nʋä -zɛlɩ a libho, -ɔ glɩnɩɛ guɲɔ, -ɔ lɩbhää ɔ ˈbhɩa gu ˈmö, -ɔ ghlɛnɩɛ zuzukuzoku a ˈmötɛɛnɔɔ ˈmö ˈn ɔ bhïlaa -lii -yɩ ˈkää zɩkö ˈwʋ plɩ a wɛlɩ, -ɔ yɩbhää ɔ -ɲɛ -muë yɛɛ ˈku ˈwë ˈkä bhïlaa, -sɩbhä a -nɔ ˈnɩɛ -kä ɔ ˈkä -mä -naˈa ˈligbëa ˈmö -wʋ. Ɛˈɛ -bhö ɲɩasɛ, maa -ɔ nʋä -sɩbhä a -lii, dlɩ yɔwʋ ɔ -ɲuä Zoova.”—Deutéronome 18:10-12.

-Sɩbhä a -lii ˈla, -yɩ kä ɔ ˈŋlɩ ˈn Zoova -yiɲɩ ɔ ˈdɩ ˈɲɛ nɩɩ -a nɩ ti nʋ ˈnɩ?

Ɛˈɛ -bhö ɲɩasɛ, maa -aa -li a -lii yɩ kää ˈmö. Nza ɔ zʋʋɲɩɛ ˈdɩ ˈmö -a ˈkäa gukäkʋ a ki ˈwuë ˈwʋ ˈnɛnɩ. Ɔ -wa nɩkpa ˈn ɔ ˈzʋnʋa ˈyli. Ɔ -yi sɛ nɩɩ, -wa -ɲɛ zuzukuzoku -wʋnɩɛ ˈwʋ, ˈklɩ wa ˈkää teɲii ˈyɩ.

Nilɩda -ɔ glɩnɩ a-a ˈwʋyɩbhäŋlɔ -mä Blezilɩ, -sɩbhä yɩ ˈyɩɔ a-a ˈklɩ. Ɔ lɛ nɩɩ: “zuzukuzoku [...] n kä a-a -gömö, sɛ yɩ yɩbhää -sɩbhä yɩ -suu a-a. ˈTɛɲɩ -mɛmɛɛ ˈmö, n -wʋ ˈtɩɩ, ˈn ˈtɛɲɩ -mɛmɛɛ ˈmö, nˈn-ä ˈsaa n nʋ -yi. ˈWlumö ɲimosɛ n -wʋ a-a ˈla, -sɩbhä a za nɩkpa ˈwlumö ɲimoo a -dʋtagbë ˈmö -mä wa zʋʋä. Sɛɛ zuzukuzoku zia a-a teɲii ˈzwɩ a za ˈna twila ˈwuë -gbapö yɩ -gbapöä, -sɩbhä a za, ŋakpɩ n nɩmä a-a ˈyize gbapögbapɛ ˈkäa donɩ. N nɩma a-a teɲii nʋ ˈn n ˈbhua a-a -bɛ ˈwʋ. Saˈa -sɩbhä n -bhölɩ a-a -këë ˈylʋbö a bɔbɔtɛ.”

Maa, Zoova -ɲɛ ˈɔ Bhlɩnɩwaa -wa -wʋä mäˈä dʋdʋ ˈwʋ ˈsɔ, mʋa kwänɔɔ, ˈn zuzukuzoku ˈla yoo -gömö ˈbhöö. Zɩˈɛ a dɔˈwʋ, ɔ nɛnɩ ˈmö ˈtɩɩ, ˈɔ zɩkpa yɛˈa -sɩkaa nɛnɩmanɩ. Ɔ lɛ nɩɩ: “A ˈwuë, abhʋa n ɲɛɛ ˈdɩ, a nɩ tɩ tɛkäsɛ aˈbhë zuzukuzoku aɲɩ ˈwʋ jlinɩ, a nɩ ti ˈtɛɲɩ aˈbhë ˈɲɛ.”