ˈSaa Lagɔ yɩbhä ɔ dʋdʋkpäta a dɔˈwʋ ˈnɩ?

1. ˈSaa kä ɔ ˈŋlɩ ˈn Lagɔ yi ɔ dʋdʋkpäta ˈwäla ˈnɩ?

Dʋdʋkpäta ˈmö Zoova ˈɲɛɛ ˈŋwlɩ -ɲɛ ɲɩbhɛlɩ ˈsɔ. -Aˈa glɩda ma-a. Zaa, tɛkänɩkpɛ Adaa -ɲɛ ɔ ˈlɛŋlɛ Ɛɛvö ˈsɔ, wa ˈkä -mä zlɩ ˈmö -bhölɩnɩ a za Lagɔ ˈnʋa -bhɛ. Lagɔ -bhɛ a-a lagɔzuzuku yɩ ˈkä -mä zlɩ ˈmö -bhölɩnɩ. (Job 38:4, 7) Maa tɛkänɩkpɛ, -mä ˈbhlɩ a -bhlɩɩ wa laa Edɛɛnɩ a ˈlagblɛ ˈmö -mä Zoova ˈzoo. (Genèse 2:15-17) Zoova yɩbhä nɩɩ, Adaa -ɲɛ ˈɔ yuëa ɔ ˈkää gwälɩ ˈsɔ, nɩ -bhölɩnɩ ˈkwädlɩnɩ mäˈä dʋdʋ ˈwʋ.—-A zɛlɩ Psaume 37:29 -ɲɛ Psaume 115:16 ˈsɔ ˈmö.

Tɛtɛɛdɔˈwʋ, Edɛɛnɩ a ˈlagblɛ a ˈyize, mɛɛ glɩnɩ a-a ˈbhlɩ a -bhlɩɩ. Tɛkänɩkpɛ -ɲɛ ˈɔ ŋlɔɔ ˈsɔ käa wa ˈkä ˈyuë gwälɩ nzɩ wa ˈkä dʋdʋkpäta ˈwuë ˈwʋ yie. Wa ˈka -gömö ˈkämanɩ, wa ˈka ˈbhlɩ a -bhlɩɩ ˈwʋ ˈzʋa. (Genèse 1:28) Dʋdʋkpäta ˈnaa ˈkä ˈyli bhɩɛ ˈlɩlɩlɩ. A yi ˈkwädlɩnɩ nɩkpa a glɩdɛ glɩnɩ.—-A zɛlɩ Psaume 104:5 ˈmö.

A nɩ ylɛ video ˈSaa kä ɔ ˈŋlɩ ˈn Lagɔ yi ɔ dʋdʋkpäta ˈwäla ˈnɩ?

2. Sɛ yɩ -wʋ ɔ ˈmö ˈn dʋdʋkpäta ˈnɩ ɔ zɩˈɛ ˈbhlɩ a -bhlɩɩ glɩnɩ ˈnɩ?

Adaa -ɲɛ Ɛɛvö ˈsɔ, Lagɔ ˈmö wa -sɛɛ ˈklʋkpamö, nza Zoova kpëtuëë -mä Edɛɛnɩ a ˈlagblɛ ˈmö. Nza ˈbhlɩ a -bhlɩɩ ylɛɛ sɛ. Nɩkpɛ ˈnɩɛ bhɛnɩ ɔ ˈkɛ ˈwʋ ˈsɔ -lɛmö. Biblë lɛ nɩɩ: “Mäˈä ˈpɩwʋ a nɩkpa ˈwuë zuzukuzoku a ˈkifii mɔɔ ˈkämanuëë -gömö.”—Job 9:24.—-A zɛlɩ Genèse 3:23, 24 ˈmö.

ˈSaa Zoova yɩbhä a-a ɔ ˈkä nɩkpaa ˈwlu nʋʋ, ɔ kɩ ɔ ˈwʋ dlʋ -a? Nˈnn! ˈƆ ˈmötɛɛnɔɔ ˈnɩɛ -sɩbhä a sɛ -wʋ. Ɔ bhɛnɩ ɔ ˈkɩ nʋ. (Isaïe 45:18) ˈSaa ɔ gbä a-a ɔ ˈkä nɩkpaa ˈɲɛ, ɔ yuaɲɩ -tiamö ˈɲɛ.—-A zɛlɩ Psaume 37:11, 34 ˈmö.

3. Sɛɛ Lagɔ ˈkä ɔ ˈbhlɩ a -bhlɩɩ ˈwʋ ˈsɔ -lɛmö ˈnɩ?

Zezwii, Lagɔ ˈzʋaa ˈKämanɩɲɔ ˈwʋ, ˈɔ ˈKämanɔɔ a ˈtɛɲɩ ˈmö, dʋdʋkpäta yi ˈwʋ ˈsɔ ˈbhlɩ a -bhlɩɩ ˈzʋ. -Mä tʋ wa laa Amagedɔɔ ˈmö, -mä Zezwii ˈkää lagɔzuzuku ˈyuku -gänɩ. Wa ˈkä -wa -ɲɛ Zoova ˈsɔ -känɩɛ ˈylimö, ˈyli bhɩa. -Miˈla -kä ˈplɩ ˈwë, Zezwii yi Sataa ˈylʋbö a 1.000 a -jie ˈmö ˈpä. Lagɔ a -nʋa yi tʋ ˈla ŋli ˈpʋ, Zezwii yʋa -su, ɔ yʋa ˈwʋ -kʋ. Mäˈä dʋdʋ ˈwʋ -mä wa ˈkää ˈkwädlɩnɩ -bhölɩnɩ, -mä ˈbhlɩ a -bhlɩɩ ˈmö.—-A zɛlɩ ˈKlʋkälɩwɛlɩɩ 20:1-3 -ɲɛ ˈKlʋkälɩwɛlɩɩ 21:3, 4 ˈsɔ ˈmö.

4. -Zlɩmɛ ˈklɩyɩyɛ ˈkä ɔ bhɩɛ ˈnɩ?

-Zlɩmɛ Lagɔ ˈkä ɔ -lizokuu -yɩ -wʋä mäˈä dʋdʋ ˈwʋ ˈyli bhɩa ˈnɩ? -Lii -yɩ ˈkää tula nɩɩ, ˈpɩwʋ a ˈylibhɩɛtɛɲɩ yɛ ghlɛ ˈwë, Zezwii bhïla a-a yɩ wɛlɩ. -Sɩkaa a -lizokuu ˈwuë -yɩ plɩɛ -mä -gwlɩ ˈwuë -gömö, -yɩ bhɩaa nɩkpaa ˈyli, mii tula nɩɩ, “ˈpɩwʋ a ˈylibhɩɛdaa” a ˈtɛɲɩ ˈmö -a -wʋä.—-A zɛlɩ Matie 24:3, 7-14, 21, 22 ˈmö.

Zezwii, -mä ɔ ˈkää Lagɔ yɔwʋ glɩ ɔ ˈkä dʋdʋ -gömö ˈkämanɩ, ˈylʋbö a 1.000 ˈmö. ˈKämanɔ ˈla yi ˈklɩyɩyɛ a kii ˈwuë ˈyli bhɩa. (Isaïe 9:6, 7; 11:9) Zezwii -lɛ ˈKämanɩɲɔ, ɔ -lɛˈɛɛ Lagɔbʋbɔɲɔ ˈKɔdɔ. -Muë -waa Lagɔ, mɔɔ ˈkää ˈwa ˈɲiɲloli ˈwʋ ˈtitli. Zaa, Zezwii ˈmö Lagɔ ˈkää ˈmö ghlɛnɩ ɔ ˈkä gu, gɔgʋ -ɲɛ ˈkwie ˈsɔ ˈyli bhɩa.—-A zɛlɩ Isaïe 25:8 -ɲɛ Isaïe 33:24 ˈsɔ ˈmö.

5. -Mɔ ˈkä ɔ zɩkö -mä ˈbhlɩ a -bhlɩɩ ˈmö -bhölɩnɩ ˈnɩ?

Nɩkpaa -wa zʋä Lagɔ ˈklʋkpamö, mʋa ˈkää -mä ˈbhlɩ a -bhlɩɩ ˈmö -bhölɩnɩ. (1 Zaah 2:17) Zezwii tie a-a ˈɔ -gänɩwaa, ɔ -lɛ nɩɩ, wa nɩ tɛlɩ -waɲɩ dilaa yɔnɩɛ ˈwʋ sɛ. Wa ˈkʋa sɛ wa ˈkää ˈzʋ nzɩ wa ˈkä Lagɔ dlɩ yɔwʋ nɛmanɩ ˈcɩa. Zɩˈɛ a dɔˈwʋ, Zoova -wʋ nɩkpa a miniɲwɩ ˈcɩa dɔˈwʋ, wa ˈkä -mä ˈbhlɩ a -bhlɩɩ -ɛ ˈkää mäˈä dʋdʋ ˈwʋ yi ˈmö -bhölɩnɩ. (Sophonie 2:3) -Mä Zoova ˈa ˈKämanɔɔ ˈa -bïdii ˈmö, wa ˈcɩa nɩkpa. Ɲɩbhɛlɩ ˈkä -tiamö ˈa ˈluwluwa -ɲɛ dɩbawa ˈsɔ ˈzʋ. Ŋwlɩɩ ˈkä ˈŋwlɩ a ŋwlɩ ˈn -tiamö a -dawa ˈzʋ. Yuëa -ɲɛ wa -lowluwa ˈsɔ bhibhenɩ Lagɔ ˈgämö. Wa ˈcɩɛ sɛɛ ˈtɩtɩ a -tɩtɩɩ ˈkʋaa -li a -lii ˈwlu nʋ.—-A zɛlɩ Michée 4:1-4 ˈmö.