ˈSaa -wʋä -kpö ˈwʋ, ˈmö Samiɛlɩ nʋ a-a ˈyize

Tɛɛnɩ ˈtɛɲɩ -ɛɲɩ ˈmö Samiɛlɩ glɩnɩ a-a -bhlɛ ˈyu, -mä Lagɔ ˈa -budu -wʋɲɩ ˈmö nɩkpa mö a-a Lagɔ bʋbɔɔ, -mä ɔ -bhölɩnɩ a-a, ˈn ɔ nʋnɩ a-a -mä libho. -N -yi ɔ sɛɛ yɩ -wʋ ˈmö ˈn Samiɛlɩ -bhölɩnɩ a-a bhä -mä Lagɔ a -budu ˈmö -a? -A ˈkää -ka Samiɛlɩ ˈa -da Aanɩ yɩbhlɩnɩ.

-Lɛ yɛ ˈmö gwälɛ ˈn Aanɩ yɩbhä a-a ɔ ˈkä ˈyu gwälɩ. Maa ɔˈɔ a-a bhɛnɩ. ˈN ɔ yɩ a-a Lagɔ bhibhe teɲii, Lagɔ ˈkɔ kwänɩ a za. Ɔ yi a-a zligo, ɔ lɛ naa, ˈn ɔ -kä ˈyu gwälɩ, yuu ˈlaa -mä lagɔbudu ˈmö ɔ ˈkɔɔ kwä, ɔ ˈkä -mä -bhölɩnɩ nzɩ ɔ ˈkä -mä libho nʋnɩ. Zoova yi a-a ˈɔ bhibhebhibhiu ˈwʋ ŋlu, ˈn ɔ yi a-a ˈyu gwälɩ. Ɔ yi a-a ˈyu Samiɛlɩ a ˈŋlɩ ˈpä. Sɛɛ Aanɩ gbä a-a, -sɩbhä ɔ zʋä ˈtɩɩ. Samiɛlɩ kä a-a ˈylʋbö -mʋäna a sɛ, ɔ ˈlibhoo ˈwʋ, -mä Lagɔ ˈa -budu ˈmö -mä ɔ kwɔ, ɔ ˈkä -mä glɩ, ɔ ˈkä -mä Lagɔ bʋbɔnɩ.

Eli mɔ glɩnɩ a-a lagɔbʋbɔɲɔ ˈkɔdɔɔ -mä Lagɔ ˈa -budu ˈmö. ˈƆ yuëa ˈsɔ -kpɔ, -mä Lagɔ ˈa -budu ˈmö -mä wa nʋ a-a ˈgämö libho. Tɩ dlʋ nɩɩ, -mä Lagɔ ˈa -budu ˈmö, -mä wa bʋbɔnɩɛ Lagɔ zaa, nɩkpa kä wa ˈkä -mä -li a -lii a ˈyize nʋ. Maa Eli ˈa yuëa, -lizokuu wa nʋ a-a teɲii. Samiɛlɩ -yi a-a ˈsaa wa nʋ. Eli ˈa yuëa a sa, Samiɛlɩ nʋ ˈmö a-a bhä -lizokuu -a?— Nˈnn -lii ˈɔ -lowluwa ˈcɩɔ a-a -yɩ -wʋä -kpö ˈwʋ, ˈmö ɔ nʋ a-a ˈyize.

-Na dɔˈwʋ, ˈsaa Eli kä a-a bhä ɔ ˈkä nʋ ˈɔ yuëa ˈsɔ -kpɔ a dɔˈwʋ ˈnɩ?— Ɔ kä a-a ɔ ˈkʋä pinɩ nzɩ ɔ ˈkʋä mä Lagɔ ˈa -budu ˈmö kpëti. Maa -sɩbhä Eli ˈnɩ a-a zʋ. Nza ɔ -ɲɛ ˈɔ yuëa ˈsɔ, Zoova ˈpänuëë ˈklɛ yɔwʋ. Zoova yi a-a nɩɩ, pinɩ ɔ ˈkʋää pinɩ.

ˈYlɩ -bhlʋ ˈmö Samiɛlɩ -wʋ a-a sabʋsɛ ŋämö dɔˈwʋ, ˈn ɔ yiɛ nɩkpɛ a wäzɩwɛlɩɩ ˈnʋ: yɩ lɛ ‘Samiɛlɩ’ ˈn Samiɛlɩ yiɛ guë ˈn ɔ yiɛ -mä Eli ghlɩ. Maa, Eli lɛ naa: ‘n ˈnɩ mö a-a wäzɩ’. Yɩ yiɛ -sɩbhä ˈwʋ ˈsɔ ˈwʋ plɩnɩ. Yɩ ˈplɩɛ -sɩbhä tanadɔˈwʋ ˈwʋ, ˈn Eli yi a-a Samiɛlɩ ˈdɩ ˈɲɛɛ nɩɩ, -n -kä wäzɩwɛlɩɩ ˈnʋä, nʋ nɩɩ ‘-Yayaya, Zoova, bhïla maa n -pʋnɩmö ˈyukwli.’ Zaa sɛ wa ˈɲɔɔ ˈdɩ, -sɩbhä Samiɛlɩ zʋä. ˈN Zoova yi a-a Samiɛlɩ ˈdɩ ˈɲɛɛ: ‘ˈƝɛ Eli ˈdɩ, ˈɔ ˈligbë ˈmö a -nʋa a -lizoku wa nʋä a za, pinɩ n ˈkʋää pinɩ.’ -N ˈpä ɔ -na dlɩ nɩɩ, Samiɛlɩ ˈkä Eli ˈdɩ ˈɲɛ a dɔˈwʋ yɩ ˈna ˈkɔ bhä daˈa kɛˈmö ˈtɛɛnɩ -a?— Nn yɩ ˈtɛɛnɔ a-a kɛˈmö. Samiɛlɩ ŋänɩ a-a abhlɩ, maa ˈsɛɛ Zoova ˈɲɔ a-a ˈdɩ, -sɩbhä ɔ zʋä. Sɛ Zoova gbä a-a, -sɩbhä yɩ ˈwlʋnɩɛ ˈyli. Eli ˈa yuëa ˈsɔ -kpɔ yi a-a ˈku, Eli aˈbhë yi a-a ˈkumö.

-A kä -a ˈkä Samiɛlɩ ˈa gbäpöö -gänɩ. Ɔ -wʋ a-a -mä nɩkpa -wa nʋä -lizoku a jijoˈwʋ maa, -li a -lii Samiɛlɩ nʋ a-a. ˈN -nmö ˈna? -N yi bhä ˈkwädlɩ Samiɛlɩ a sa -li a -lii nʋ ˈyize -a? -N -kä -sɩbhä zʋä, n yi Zoova -ɲɛ -na -lowluwaa ˈsɔ ˈmäna dlɩ zɛmö ˈzʋ.