ˈCƖƐCƖƐKÏBHË 14

Pɩɛnɩ dɛsɛkäkïbhï ˈwʋ

Ebleewaa 8:1

ˈSAA -N ˈKÄÄ NƲ: Kwänɩ ˈyukwlipʋnɩwaa wa ˈkä sasɛ -naˈa bhïlabhuluu ˈyukwli -pʋnɩ. ˈN sɛɛ dɛsɛkäkïbhï -ɲɛ wäzɩna ˈsɔ mönɩɛ yɔwʋ, kwänuë wa ˈkä -sɩbhä ˈylɩmö.

SƐƐ -N ˈKÄÄ ˈZƲ:

ˈSaa -n tɛlɩɛ sɛ. -N -kä bhïlabhuluu -bhɛɛ yi, -mä bhïlabhuluu ˈla ˈmö, -n ˈkä ˈyukwlipʋnɩwaa ˈtɩtɩ ˈɲɛɛ, -n ˈkʋa -mä ˈsunɩ wa ˈkä ˈsaa -n kää dlɩ ˈwʋ ˈwʋ ŋlu, ɛ -käˈɛ wa ˈkä -lu nʋ, -naɲɩgäsɛ -n kä -n ˈkɩ -yi ˈwë nzɩ -n ˈkʋ -bhɛ. Dɛsɛkäkïbhï -n ˈkää -gömö -sɛsɛnɩ, -bhɛ yɩ -kamö kwänɩ, nzɩ -n yɩbhää ˈkäa ˈyli ˈwlʋnɩ.

ˈYɩbhä -naɲɩ nimï: ‘Bhïlabhuluu ˈlɛ n ˈkää -bhɛɛ, ˈkïbhï a -mi ˈyukwlipʋnɩwaa bhɛnɩ ɔ wa ˈkä waɲɩ ˈwʋ ˈyɩbhänɩ ˈnɩ? ˈN wa -kä yɩ zɛmösɛnaa yɩbhlɩnɩ ˈwë, ˈkïbhï a -mi wa ˈkä ɔ waɲɩ ˈwʋ ˈyɩbhänɩˈɛ ˈnɩ?’ Sɛɛ -n ˈkää bhïla ˈn ˈyukwlipʋnɩwaa ˈkää -naˈa wɛlɩɩ ˈyukwli -pʋnɩ, wa ˈki ˈmö ˈnʋ ˈn wa ˈki ˈmö -wanɩ, bhïla -sɩbhä.
Pɩɛnɩ -naˈa bhïlabhuluu a wäzɩna ˈwʋ. -Naˈa bhïlabhuluu a wäzɩna a dɛsɛkäkïbhï ˈmö -n nɩ -dɩ ˈŋlɩ ˈyize, -mä bhïlabhuluu ˈwuë ˈmö.
Wa nɩ ˈnʋ sasɛ -naˈa dɛsɛkäkïbhï ˈmö. Wɛlɩkïbhï -yɩ kää dɛsɛ, -yɩ -glɛ -naˈa bhïlabhuluu a wäzɩna ˈwʋ, -yɩ -kamöä kwänɩ ˈn -n ˈkää sasɛ ˈcɩa, ˈn -n ˈnaa ˈkää ˈtɛɲɩ ˈwʋ ˈmɩɛɛ, sɩbhä a wɛlɩkïbhï ˈmö -n nɩ -sɛ -lɛ. Tɩ dɛsɛkäkïbhï a -bɛ ˈwʋ ˈlibhï, -sɛsɛnɩ sasɛ wɛlɩkïbhï dlɩ -gömö. -N -kä dɛsɛkäkïbhë -bhlʋ a wɛlɩɩ bhïla ˈwë, ˈlɩbhänɩ ˈmö, nzɩ -n ˈkä bhäla kïbhë -mämaa a wɛlɩɩ bhïla.

-Mä -naˈa ˈwʋtɛɛnɩwɛlɩɩ ˈmö, -n bhɛnɩ -n ˈkä -naˈa bhïlabhuluu a dɛsɛkäkïbhï a wɛlɩɩ bhïla. -Lɛ a dɔˈwʋ, ˈyukwlipʋnɩwaa -kamö sasɛ ˈyukwli -pʋnɩ. -N -käˈɛ -waa, -n -kä zɛmö bhɩɛ yi, ligbanuë dɛsɛkäkïbhï ˈwʋ, wa ˈtia ˈwʋ dlʋ.