ˈCƖƐCƖƐKÏBHË 08
˗N bhɛnɩ ˗n ˈkä Zoova a bheyi ˈzʋ
Zoova yɩbhä nɩɩ, yɩbhlɩnɔɔ sasɛ. ˗Yɩ kä ɔ ˈŋlɩ ˈnɩ? Ɔ yɩbhä nɩɩ ˈcɩɛ ˈɔ ˗wʋwʋsaa a kii, sɛɛ ɔ ˗suä nɩkpaa, ˈn ˈsaa ɔ yɩbhää ˗na dɔˈwʋ. ˗N ˗kɩɩ ˈcɩɛ ˈyize, mii ˈkää gbä ˈn ˈkä ɔ bheyi ˈzʋ. ˗Na dɔˈwʋ, ˗n bhɛnɩ ɔ ˗n ˈkä ˗tiamö Lagɔ a bheyi ˈzʋ ˗a? (Zɛlɩ Psaume 25:14 ˈmö.) Sɛɛ ˗n ˈkä ɔ ˈzʋ, nzɩ ˗n ˈkä Zoova a bheyi ˈzʋ ˈnɩ? Nimïyɩbhäkïbhï ˈlɛ a zɛmösɛna ˗wʋ ˗mä Biblë ˈmö. ˈN ˗n ˗ɲɛ Zoova ˈsɔ, a ˗kä bhɛya glɩnɩ, sɛɛ yɩ kää teɲii dɛsɛ ˗wʋˈɛ ˗mä Biblë ˈmö.
1. Sɛɛ Zoova yɩbhä ɔ ˗n nɩ ˈzʋ ˈnɩ?
“A nɩ ˈdio Lagɔ yɔwʋ, ˗lɛ a dɔˈwʋ ɔ yeaɲɩˈɛ ɔbhlɩ yɔwʋ ˈdiomö.” (Zaakö 4:8) Sɛɛ yɩ sɛ ɔ zɛmö ˈnɩ? Zoova yɩbhä nɩɩ, ˈzʋ ɔ bheyi. Nɩkpa a ˗bɛ pä dlɩ nɩɩ, waˈaa bhɛnɩ wa ˈkä Lagɔ ˈylɩmö zaa, waˈaa bhɛnɩ wa ˈkä ɔ bheyi ˈzʋ. ˗Maa ˗mä Biblë ˈmö, Zoova sʋlʋnɩɲɩ ˈsaa ˈwuë ˗a kää ˗a ˈkä ˗yi ˈɔ ˗wʋwʋsaa a kii a dɔˈwʋ, nzɩ ˗a ˈkɔ yɔwʋ ˈdionɩ. Lagɔ ˈa wɛlɩɩ wa ˈcɛlɩɛ ˗aa za ˗mä Biblë ˈmö, ˗a ˗kɩɩ ˈmö zɛlɩɩ, ˗a ˈnɔ aˈbhë ˈwʋ yɩlɩ ˗kë, ˗a ˗ɲɔɔ ˈsɔ ˗a yi bhɛya ˈzʋ.
2. ˗Yɩ kä ɔ ˈŋlɩ ˈn Zoova ˗lɛ ɔ bheyi a ˗nɔ a ˗nɔ ˈnɩ?
Zoova ˗wamö teɲii ɔ zi nɩkpaa ˈwuë ˈwʋ. Ɔ yɩbhä nɩɩ, ˗wʋ ˈmäna ˈmö, ɔ yɩbhäˈɛ nɩɩ, ˗lu a gbʋ ˗kamö plɛnɩɩ, bhibheo ɔ ˗kamö kwänɩ. “Lagɔ aˈbhë mɔɔ ˈzʋnaɲɩɛ ˈkwädlɩ ˈyli zaa, ˗lii ˈwuë ˗yɩ ˈtɛɛnaɲɩɛ kɛˈmöö, a nɩ ˈɲɔɲɩ yowʋ.” (1 Piɛlɩ 5:7) Zoova ˗bhɩɔ ˈkwädlɩ ˈmö ɔ ˈkä ˈɔ bhɛya kwänɩ, ɔ ˈkʋa swɩ ɲɛmʋ ˈmö ˈpä ˈn ɔ ˈkʋa ˈyukwli ˗pʋnɩ.—Zɛlɩ Psaume 94:18, 19 ˈmö.
3. ˈSaa Zoova yɩbhä ɔ ˈɔ bhɛya nɩ nʋ ˈnɩ?
Nɩkpaa ˈwuë ˈmö Zoova ˗waa, “˗maa ˗wa ˗wʋä ˗kpöö ˈwʋ, mʋa zʋä ɔ dlɩ a bhɛya.” (Proverbes 3:32) Zoova yɩbhä nɩɩ, ˗yɩ ˗lɛ ˗li a ˗lii ɔ ˈyila ˈklʋ a dɔˈwʋ, ˈmö ˈɔ bhɛya nɩ nʋ. ˈN ˗yɩ ˗lɛ ˗lizokuu ɔ ˈyila ˈklʋ a dɔˈwʋ, wa nɩ ˈdionii gwë. Nɩkpa ˗mumuë pä dlɩ nɩɩ, ˈsaa nɛnɩɛ ˗ɲɛ ˈsaa ˈnɩɛ nɛnɩ ˈsɔ a dɔˈwʋ, waˈaa bhɛnɩ wa ˈkä Zoova ˈa ˈpäpägböö ˗gänɩ. ˗Maa ˈlɩlɩlɩ a dɔˈwʋ, Zoova ŋäzɩdlɩ ɔ kää. Nɩkpaa ˈwuë ˗wa ˗wɔɔ ˗tiamö, ˈn ˗wa ˈtɛmanɩɛ ˈyli yɔwʋ wa ˈkɔ dlɩ yɔwʋ nɛnɩɩ, ˈmö ɔ ˗waa.—Psaume 147:11; Nʋnʋlii 10:34, 35
ˈCƖƐ ˗LII ˗MIMII
Sɛɛ ˗n ˈkää Zoova a bheyi ˈzʋʋ, ˈn ˗yɩ kää ˈŋlɩ ˈn Zoova ˗lɛ bheyi a ˗nɔ a ˗nɔ, ˈyi ˈylɩmö.
4. Ablaamö, Zoova a bheyi ɔ glɩnɩ a˗a
Ablaamö (wa laˈɛ Ablamö) ˈa wɛlɩɩ ˗yɩ ˗wʋä ˗mä Biblë ˈmö, mii kwänɩɲɩɛ ˈn ˗a ˗yiɛ ˈsaa wa laa nɩkpɛ ˈkä Lagɔ a bheyi glɩnɩ. Zɛlɩ Ablaamö ˈa wɛlɩɩ ˈmö ˗mä Genèse 12:1-4 ˈmö. ˈN a nɩ yɩlɩ nimïyɩbhäkïbhï ˈlɛ yɔwʋ:
ˈSaa Zoova gbä ɔ Ablaamö nɩ nʋ ˈnɩ?
ˈSaa Zoova gbä ɔ ɔ ˈkä Ablaamö ˈɲɛ ˈnɩ?
ˈN sɛɛ Ablaamö ˈzʋ ɔ ˈnɩ?
5. Sɛɛ Zoova yɩbhä ɔ ˈɔ bhɛya nɩ ˗wʋ ˈnɩ?
˗Lii ˗mimii ˗wʋ ˗lɛ, ˗a yɩbhää ˗aa bhɛya nɩ nʋ.
˗Lii a ˗mi ˗n yɩbhä ɔ ˗na bhɛya nɩ nʋ ˗na za ˈnɩ?
Zɛlɩ 1 Zaa 5:3 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈSaa Zoova yɩbhä ɔ ɔ bhɛya nɩ nʋ ˈnɩ?
˗A ˈkäa Zoova ˈklʋkpamö ˈzʋ a za, ˗a kä ˗a ˈkä ˗aˈa nɛmönɛmösaa ˈmö zigbanɩ, ˗a käˈɛ ˗a ˈkä ˗aˈa ˗wʋwʋsaa ˈmö zigbanɩ. Zɛlɩ Isaïe 48:17, 18 ˈmö ˈn a nɩ yɩlɩ nimïyɩbhäkïbhë ˈlɛ yɔwʋ:
˗Yɩ kä ɔ ˈŋlɩ ˈn Zoova yɩbhä ɔ nɩɩ, ˈɔ bhɛya nɩ zigbonɩ ˈmö ˈnɩ?
˗Lii a ˗mi bhɛnɩɛ yɩ ˗kaɲɩ ˗li a ˗lii ˈwlu nʋ, ˈmö ˗tiamö a bheyi ligbanɩɲɩɛ ˈwʋ. ˗Sɩbhä Zoova zʋä ˈɔ bhɛya a dɔˈwʋ.
6. Sɛɛ Zoova kwänɩɛ ˈɔ bhɛya
Zoova ˈa bhɛya ˗kä ˈklɩyɩyɛ ˈmö ˗wʋʋ, kwänɩ ɔ kwänuëë. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö, ŋlɔ swɩ ˈkunɩ a˗a yɔwʋ, sɛɛ Zoova kwänɔ bhä ˈn ɔ yi bhä ˈɔ dlɩpäsazokwëa ˈwlu ˈplɩ ˈnɩ?
Zɛlɩ Isaïe 41:10, 13 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
ˈSaa Zoova gbä ɔ ɔ ˈkä ˈɔ bhɛya a za nʋ ˈnɩ?
˗Na dɔˈwʋ, Zoova bhɛnɩ bhä ɔ ˈkä bheyi a ˗nɔ a ˗nɔ glɩnɩ ˗a? ˗Yɩ kä ɔ ˈŋlɩ ˈnɩ?
˗N ˗kä ˈki ˈmö ˗wʋʋ, sɛɛ ˗naˈa ˗tiamö a bhɛya kwänɩmöä, ˗sɩbhä Zoova ˈzʋmöä.
7. Sɛɛ ˗n ˗ɲɛ Zoova ˈsɔ glɩnɩɛ bhɛya a za, a kä a ˈkä ˈdɩ ˗sɛ
˗A ˗ɲɛ ˗aa bheyi ˈsɔ, ˗a ˗kä ˈdɩ ˗sɛ ˈyize, mii ˈkää gbä ˗aˈa bheyi ˈkä ˈmö ˈtumanɩ. Zɛlɩ Psaume 86:6, 11 ˈmö ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ ˗a bhɛnɩ ɔ ˗a ˗ɲɛ Zoova ˈsɔ ˈkä bhïla ˈnɩ?
Sɛɛ Zoova ˗ɲɛ ˗abhʋa bhïla ɔ ˈnɩ?
Bhibhebhibhiuu ˈmö ˗a ghlɛnɩɛ ˈmö ˈn ˗a ˗ɲɛ Zoova ˈsɔ bhïlaa. Biblë ˈmö Zoova ghlɛnɩɛ ˈmö ˈn ɔ ˗ɲɛ ˗abhʋa bhïlaa.
NƖKPA ˗MUMUË LƐ NƖƖ: “Nɩkpɛ ˈnɩɛ bhɛnɩ ɔ ˈkä Lagɔ a bheyi ˈzʋ.”
Biblë a gbɛlʋ ˗mu ˗n bhɛnɩ ɔ ˗n ˈkä ˈmö ghlɛnɩ, nzɩ ˗n ˈkä tula nɩɩ nɩkpɛ bhɛnɩ ɔ ˈkä Zoova a bheyi ˈzʋ ˈnɩ?
DƐSƐKÄKÏBHÏ
Zoova yɩbhä ɔ ˈkä ˗na bheyi ˈzʋ, ˈn ɔ ˗yimö kwänɩ nzɩ ˗n ˈkɔ yɔwʋ ˈdionɩ.
ˈWʋligbanɩkïbhï
Sɛɛ Zoova kwänɩ bhä ˈɔ bhɛya ˈnɩ?
˗Yɩ kä ɔ ˈŋlɩ ˈn Zoova ɲɛ bhä ˈɔ bhɛya ˈdɩ nɩɩ, wa nɩ zigbonɩ ˈmö ˈnɩ?
˗Nɩkpɛ ˈkä Zoova a bheyi ˈzʋ a dɔˈwʋʋ, ˈmö yɩ ˈtɛɛ bhä ˗a? ˗Yɩ kä ɔ ˈŋlɩ ˈnɩ?
YILII YƆWƲ
˗N ˗ɲɛ Zoova ˗sɔ, a ˗kä bhɛya glɩnɩ, sɛ yɩ bhɛnɩ ɔ yɩ ˈkä ˗naˈa zɩkpaa nɛnɩmanɩ ˈnɩ?
« Jéhovah : un Dieu qui mérite d’être connu » (La Tour de Garde, 15 février 2003)
Sɛɛ ˗n bhɛnɩɛ ˗n ˈkä Zoova a bheyi ˈzʋʋ, yɩbhlɩnɩ ˗sɩbhä.
ˈSaa kää ˈŋlɩ ˈn ˈŋlɔ ˗bhlʋ gbää nɩɩ, ɔ ˗ɲɛ Zoova ˈsɔ ˈzʋä bhɛya mii nɛnɩmanɩɛ ˈɔ zɩkpaa, ˈyi ˈylɩmö.
˗A nɩ ˗pʋnɩ ˗dɩgbö ˈyukwli, sɛ wa pää Zoova a dɔˈwʋ dlɩɩ, wa ˈkä yɩ wɛlɩɩ bhïla.