ˈCƖƐCƖƐKÏBHË 16
Dɛɛ Zezwii ˗wʋ a˗a mäˈä dʋdʋ ˈwʋ ˈsaa ɔ nʋ a˗a bhä ˈnɩ?
Nɩkpa a ˗bɛ pä dlɩ nɩɩ Zezwii, ˈyu ˈpʋpɔ a ˗mɔ ˈnɩɛ bhɛnɩ ɔ ˈkä ɔɲɩ ˈwʋ gwɩɩ, lagɔnɩkpɛ a ˗mɔ ˈnɛɛ, ɛ ˗käˈɛ nɩkpɛ a ˗mɔ ˗wʋä ˈku dɔˈwʋ a sɛ wa yiloo ˈwʋ. ˗A ˗kä ˈɔ zɩkpaa a wɛlɩɩ ˈmö zɛlɩ dɛɛ ɔ ˗wʋ a˗a mäˈä dʋdʋ ˈwʋ, ˗a yi ɔ ˗li ˗mimii a ˗bɛ ˈcɩɛ ˗a? ˗Mä ˈcɩɛcɩɛkïbhë ˈlɛ ˈmö, ˗lii ˗yɩ kää teɲii dɛsɛ Zezwii nʋ a˗a, ˈn sɛ yɩ bhɛnɩɛ yɩ ˗kaɲɩ kwänɩ, mö ˗a ˈkää ˈylɩmö.
1. Libho a ˗mu kä ɔ teɲii dɛsɛ Zezwii nʋ a˗a bhä ˈnɩ?
Libhoo ˗wʋ kää teɲii dɛsɛ Zezwii nʋ a˗a, muä ˗lɛ ‘Lagɔ ˈa ˈKämanɔɔ a ˈmänatɩtɩɩ a biabiu.’ (Zɛlɩ Lwiikö 4:43 ˈmö.) ˈTɩtɩ a ˗tɩtɩɩ ɔ bia a˗a miɛ nɩɩ, Lagɔ yi ˈkämanɔ sɛ ˈgïla ˗wʋ ˈkää mäˈä ˈpɩwʋ a yɔlɔylʋ ˈwuë ˈyli bhɩa.a Zezwii ˈyliyɔwʋtɛɛnɩsɛ ɔ biaa wɛlɩ ˈlɛ, ˗këë ˈylʋbö ta ˈkïbhë ˈmö.—Matie 9:35.
2. Zɩzɛli Zezwii nʋä ˈsaa yɩ tula ɔ ˈnɩ?
Biblë lɛ nɩɩ ‘Zezwii, Lagɔ ghälanɔɔ mäˈä a jijoˈwʋ zɩzɛli ˈkädɩ ˈmö, ˈn a yiɛ ˈɔ ˈghïlinɔɔ ˈylimö.’ (Nʋnʋlii 2:22) ˈMötɛɛnɔɔ Lagɔ ˈɲɔɔ a za, Zezwii bhɛnɩ a˗a mäˈä ˈpɩwʋ a ˗lii ˗gömö. Ɔ lia nɩkpa a ˗bɛ, ɔ yɛmanɩ guzuwa, ˈn ɔ yiˈɛ ˗wa yɛ ˈku ˈwë glu sɛ. (Matie 8:23-27; 14:15-21; Maakö 6:56; Lwiikö 7:11-17) Zɩzɛli ˈwuë Zezwii nʋä, yɩ tula a˗a nɩɩ, Lagɔ mɔ tioo mäˈä dʋdʋ ˈwʋ. Yɩ tulaˈɛ nɩɩ, Zoova bhɛnɩ ɔ ˈkä mäˈä ˈpɩwʋ a yɔlɔylʋ a kii ˈwuë ˈyli bhɩa.
3. ˈSaa Zezwii ˈa zɩkpaa a wɛlɩɩ ˈcɩaɲɩ ɔ ˈnɩ?
Zezwii ˈzʋ a˗a Zoova ˈklʋkpamö kii ˈwuë ˈmö. (Zaa 8:29) Nɩkpa a ˗bɛ ˗gblɩ a˗a Zezwii, ˗maa ˗lii ˈwuë ɔ Dɩba gbä a˗a ɔ nɩ nʋʋ, ɔ nwi ˗këë ˗mä ˈkwie ˈmö. Zezwii tulaˈɛ nɩɩ, nɩkpa yi ˈklɩ ˈyɩ dɔˈwʋ ˗wʋ aˈbhë ˗kë, wa bhɛnɩ wa ˈkä Lagɔ ˗gänɩ ˈyize. ˈGämö ˈyɛ, sɛ ɔ ˈzʋä, ‘˗a ˈkä ˗sɩbhä ˈwʋ yɩlɩ nzɩ ˗a ˈkä ˈɔ gbäpöö ˗gänɩ, ˈmö ɔ slʋnɩɲɩˈɛ.’—1 Piɛlɩ 2:21.
ˈCƖƐ ˗LII ˗MIMII
Sɛɛ Zezwii ˈɲɛɛ nɩkpaa Lagɔ ˈa ˈtɩtɩ a ˗tɩtɩɩ ˈn ɔ yiˈɛ zɩzɛli ˗bhɛ, ˗a nɩ yɩlɩ yɩ wɛlɩɩ yɔwʋ.
4. Zezwii bia a˗a Lagɔ ˈa ˈtɩtɩ a ˗tɩtɩɩ
Zezwii bia a˗a Lagɔ ˈa ˈtɩtɩ a ˗tɩtɩɩ. Zezwii ˈkä nɩkpa a ˗bɛ lagɔwɛlɩɩ ˈɲɛ a dɔˈwʋ, ˈyioo a ˈkwili a ˗bɛ ˈmö ɔ bhlinɩ a˗a kplɩ ˈyli. Zɛlɩ Lwiikö 8:1 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Nɩkpaa ˗wa yiɛ Zezwii ˈyukwli ˗pʋnɩɛ, wa ˈyize ˈmö ɔ ɲɛ a˗a bhä lagɔwɛlɩɩ ˗a?
Sɛɛ Zezwii ˈtɛmanɩ a˗a bhä ˈyli yɔwʋ ɔ ˈkä nɩkpa lagɔwɛlɩɩ ˈɲɛ ˈnɩ?
Lagɔ nʋ a˗a ˗pa nɩɩ, ˗ɔ sa˗a ˗lɛ yia Lagɔ ˈa ˈtɩtɩ a ˗tɩtɩɩ bia. Zɛlɩ Isaïe 61:1, 2 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Zezwii ˈwälanɩ ɔ wɛlɩ ˈlɛ ˈyli ˈnɩ?
˗Na dɔˈwʋ, nɩkpa kä ɔ wa ˈkä zɩˈɛ Lagɔ ˈa ˈtɩtɩ a ˗tɩtɩɩ ˈnʋ ˗a?
5. Zezwii ˈcɩa a˗a ˗lii a ˗mi kää teɲii dɛsɛ.
Zezwii bia a˗a Lagɔ ˈa ˈKämanɔɔ a ˈtɩtɩ a ˗tɩtɩɩ abhlɩ, ˗maa ɔ ˈcɩa ˈyɛ nɩkpa ˗lii a ˗mi ˈkʋa kwänɩ ˗mä ˈwa zɩkpaa ˈmö. ˈƆ lagɔwɛlɩɩ ɔ bhïlanɩ a˗a ˗mä ˗gäga ˗bhlʋ ˈwluu, ˗a nɩ ˈyɩɛ ˗ka yɩ glaˈmö ˗a nɩ ˈylɩmö. Zɛlɩ Matie 6:14, 34 ˈn 7:12 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Mä Biblë a gbɛlɩ ˈlɛ ˈmö, ˈdɩmözʋwɛlɩ a ˗mi Zezwii ˈɲɛ ɔ ˈnɩ?
˗Na dɔˈwʋ, ˈdɩmözʋwɛlɩ ˈlɛ kä ɔ ˗bhlɛ zɩˈɛ dɛsɛ ˈyize ˗a?
6. Zezwii nʋ a˗a zɩzɛli a ˗bɛ
Zoova ˈɲɛ Zezwii ˈmötɛɛnɔ ɔ ˈkä zɩzɛli a ˗bɛ nʋ. A ˈkä yɩ glaˈmö a ˗nʋ ˗bhlʋ ˈylɩmö a dɔˈwʋ, a nɩ zɛlɩ Maakö 5:25-34 ˈmö, a ˗käˈɛ ˈyɩbhä a nɩ ˈzʋ ˗lɛ VIDEO. ˈN a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈmö, ŋlɔɔ gu lɩbhä a˗a, ˈsaa ɔ kä a˗a ɔ dlɩ ˈwʋ ˈnɩ?
Zɩzɛ ˈla Zezwii ˈpää a dɔˈwʋ, ˈsaa zɩ ɔ ˗naˈa dlɩ kɛ ˈnɩ?
Zɛlɩ Zaa 5:36 ˈmö ˈn a nɩ yɩlɩ nimïyɩbhäkïbhë ˈlɛ yɔwʋ:
Zezwii ˈa zɩzɛlii, ˈsaa yɩ tula bhä ɔ dɛ ˈnɩ?
˗N ˗yi a˗a bhä sɛ ˗a?
Zezwii a ˗gömö a wɛlɩɩ ˗a ˗yiɛ, Biblë a ˈbɔgwɩɩ ˗mʋäna ˗kpɔ wa laa vazi, ˗mä yɩ ˈbhöönɩɛ. Mii ˗lɛ: Matie, Maakö, Lwiikö ˈn Zaah. ˈBɔgwɩ ˈlɛ a ˈcɛlɩcɛlɩwaa, Zezwii ˈa wɛlɩɩ ˗yɩɲɩ dɛ wa ˈyɩɛ, ˈmö wa ˈcɛlɩɛ bhʋlʋbhlʋ. Zaa ˗a ˗kä ˈbɔgwɩɩ ˗mʋäna ˗kpɔ ˈlɛ ˈmö zɛlɩ, Zezwii ˈa zɩkpaa a wɛlɩɩ a sɛ yɩ ˗bhöä ˈmäna ˈwʋ, ˗a yi yɩbhlɩnɩ.
MATIE
mɔ ˈcɛlɩɛ ˈɔ ˈbɔgʋʋ tɛɛ, wa ˗mʋäna ˗kpɔ a dɔˈwʋ. ˈSaa Zezwii ˈcɩaa yɩ wɛlɩɩ ˈmö ɔ bhïla, ˈn sɛ ɔ gbä a˗a Lagɔ ˈa Kämanɔɔ a dɔˈwʋ, yɩ wɛlɩɩ ˈmö ɔ pɩɛnɩɛ teɲii ˈwʋ.
MAAKÖ
ˈa ˈbɔgʋʋ ˈnɩɛ ˈmö ˈbhʋɔ, ˈbɔgwɩ ˗miˈla ˈwuë a dɔˈwʋ. Ɔ ˗sɛnɩ ˗lii a ˗bɛ a wɛlɩɩ ˈmö ˗yɩ ˗bhöä ˈmäna ˈwʋ.
LWIIKÖ
ˈa ˈbɔgʋʋ ˈmö, sɛɛ bhibhebhibhiu kää dɛsɛ Zezwii a dɔˈwʋ ˈn sɛ ɔ nɛnɩˈɛ dlɩ zɛmö ˗mä ŋwlɩɩ ˗gömö, ˈmö ɔ pɩɛnɩɛ ˈwʋ.
ZAA
˗lii a ˗bɛ ˗yɩɲɩ wɛlɩ Zezwii bhïla, ɔ ˗ɲɛ ɔ ˈtuawa ˈsɔ ˈn nɩkpaa ˗mumuë, yɩ wɛlɩɩ ˈmö ɔ ˈcɛlɩɛ. Yɩ kwänɩɲɩ ˈn ˗a yiɛ nɩkpɛ a ˗mɔ Zezwii glɩnɩ a˗a yɩbhlɩnɩ.
NƖKPAA ˗MUMUË LƐ NƖƖ: “Zezwii, nɩkpɛ a ˗nɩkpɛ ɔ glɩnɩ a˗a. ˗Maa, mɔɔ ˈnɩɛ ˗ɔ sa˗a ˗lɛ glɩnɩ.”
Sɛɛ ˗n pä ɔ ˗naa dlɩ ˈnɩ?
DƐSƐKÄKÏBHÏ
Zezwii bia a˗a Lagɔ ˈa ˈKämanɔɔ a wɛlɩɩ, ɔ ˗bhɛ a˗a zɩzɛli ˈn ɔ ˈzʋ a˗a Zoova ˈklʋkpamö kii ˈwuë ˈmö.
ˈWʋligbanɩkïbhï
Dɛɛ Zezwii ˗wʋa a˗a mäˈä dʋdʋ ˈwʋ, ˈsaa kä a˗a bhä teɲii dɛsɛ ɔ dɔˈwʋ ˈnɩ?
Zɩzɛli Zezwii nʋ a˗a, ˈsaa yɩ tula ɔ ˈnɩ?
˗Li a ˗mi Zezwii ˈcɩa ɔ nɩkpa ˈnɩ?
YƖLII YƆWƲ
˗Lu ˗muɲɩ wɛlɩ Zezwii bhïla ɔ teɲii ˈnɩ?
« Le Royaume de Dieu : son importance pour Jésus » (La Tour de Garde, 1er octobre 2014)
˗Yɩ kää ˈŋlɩ ˈn ˗a bhɛnɩɛ ˗a ˈkɩ dlɩ ˈwʋ ˗kä nɩɩ Zezwii nʋ a˗a ˗tiamö zɩzɛlii, ˗a nɩ ˈyi ˈylɩmö.
« Les miracles de Jésus : que vous enseignent˗ils ? » (La Tour de Garde, 15 juillet 2004)
Sɛɛ Zezwii ˈzʋnɩɛ nɩkpa ˈylii, nɩkpɛ ˗bhlʋ ˈyiɛ ˈylɩmö a sɛ yɩ zigbanɩɛ ˈɔ zɩkpa ˈmöö, zeli ˈmö.
« Je ne vivais que pour moi » (La Tour de Garde, 1er octobre 2004)
˗Lii ˈwuë ˗yɩ kää dɛsɛ Zezwii nʋ a˗a, sɛ yɩ ˗glɛglɛnɩɛ ˈwʋ, miɛ dɛˈɛ.
a ˈCɩɛcɩɛkïbhï 31-33 ˗yiɲɩ ˗lii ˗mimii a ˗bɛ ˈcɩa Lagɔ ˈa ˈKämanɔɔ a dɛ.