ˈCƖƐCƖƐKÏBHË 27
Sɛɛ Zezwii ˈa ˈkwie ɲɩaɲɩ ɔ ˈpʋpʋɛ ˈnɩ?
Tɛkänɩkpa Adaa ˗ɲɛ Ɛɛvö ˈsɔ, sɛ wa ˗sɛɛ Lagɔ ˈklʋkpamö a za, nza ˗a ˗wʋä zɩˈɛ ˈɲiɲlolii ˗ɲɛ ˈkwie ˈsɔ a galɛ ˈmö, ˈn ˗a yɩɛ ˈklɩ.a ˗Maa mii ˈnɩɛ zɛmö ˗sɛ nɩɩ ˗aaa dlɩtɛɛnɩdɛ ˗kä. Zoova ˗kaɲɩ ˈɲiɲlolii ˗ɲɛ ˈkwie ˈsɔ a galɛ ˈmö ˗sɛ a za, ɔ Yowli Zezwii Kliisɩ ˈmö ɔ ghlɛnɩɛ ˈmö. Biblë lɛ nɩɩ Zezwii ˈa ˈkwie mɛɛ zetiɲɩɛ. Wa ˗kä zetina nʋʋ, ˗lu a ˗mu wa ˈwälaa nzɩ wa ˈkä nɩkpɛ ˗lu a galɛ ˈmö ˗sɛɛ, ˈmö wa laa ˗sɩbhä. Zezwii ˈkä zetina ˈwäla a dɔˈwʋ, ˈɔ zɩkpaa ˗a ˈnɩɛ ˈɲiɲlolii ˈmö ˗kä ˈmö ɔ ˈwlʋä ˈmö. (Zɛlɩ Matie 20:28 ˈmö.) Zezwii bhɛnɩ a˗a ɔ ˈkä ˈkwädlɩkwädlɩnɩ mäˈä dʋdʋ ˈwʋ ˗bhölɩnɩ. Maa sɛ ɔ ˈwlʋä ˈɔ zɩkpa ˈmö a za, ˗a bhɛnɩ ˗a ˈkä ˈsaa Adaa ˗ɲɛ Ɛɛvö ˈsɔ tɩɛ ghlɩ. Zezwii ˗ɲɛ Zoova ˈsɔ, sɛ wa ˗waɲɩɛ teɲii ˈmö Zezwii tulanɩɲɩɛ ˈylimö. ˈSaa Zezwii nʋä ˗aa za, sɛɛ ˗a ˈkää tula nɩɩ ˗a yɩbhlɩni ˗tiamö, ˈmö ˈcɩɛcɩɛkïbhë ˈlɛ ˗kaɲɩɛ sʋlʋnɩ.
1. Sɛɛ Zezwii ˈa ˈkwie ˗kaɲɩ ɔ zɩˈɛ ˗li a ˗lii ˈwlu nʋ ˈnɩ?
Sɛɛ ˗a kää ˈɲiɲlolii ˈmö a za, ˈtɛɲɩ ˗mɛmɛɛ ˈmö ˗a bhɛ ˗lii a ˗bɛ ˗yiɛ Zoova dlɩ yɔwʋ nɛnɩ. Maa ˗a ˗kä ˗aˈa ˈɲiɲlolii yɩbhlɩnɩ ˈn ˗a ˗kä yɩ za Zoova yɔwʋ bhibhee, ɔ yi yɩ gbʋ ˈyi ˈtatinɩ, Zezwii Klii a ˈŋlɩ ˈmö. ˈN ˗a ˗kä ˈyli yɔwʋ ˈtɛmanɩ, ˗a ˗kii kɛˈmö ˗sɛ ˈlɩlɩlɩ, ˗a ˗ɲɛ Lagɔ ˈsɔ, ˗a yi bhɛya ˈzʋ. (1 Zaa 2:1) Biblë lɛ nɩɩ: “Kliisɩ, ’wʋ ˗bhlʋ ˗kpöö ɔ ’kunɩɛ nɩkpa a ’ɲiɲloli a za. Ɔɲɩ, ˗ɔ zlɔnɩɛ ’möö, mɔɔ ’kuä ˗waaa ’mö zlɔnɩ a ’wlumö, nzɩɩ ˗a ˗ɲɛ Lagɔ ’kä ’wʋ ˗wʋnɩ.”—1 Piɛlɩ 3:18.
2. Sɛɛ ˗a ˈkä ɔ zɩkö Zezwii ˈa ˈkwie ˗li a ˗lii ˈmö ghlɩnɩ ˈnɩ?
Zezwii ˈkä ɔ zɩkpaa ˗a ˈnɩɛ ˈɲiɲlolii ˈmö ˗kä ˈwäla a za, nza Zoova tioo mäˈä dʋdʋ ˈwʋ, “nzɩɩ nɩkpɛ a ˗mɔɔ ˗kɔɔ dlɩ ˈtɛɛnɩɩ, ɔ tɩa ˈyli bhɩɛ, maa ˈpɩwʋ mää ˈnaa ˈkä ˈyli bhɩɛɛ, ɔ ˈkä ˗mä ghlɩ.” (Zaa 3:16) Sɛɛ Zezwii ˈkuä ˗aa ˈwlumö a za, ˗lii ˈwuë Adaa ɲimaa ˈɔ ˈklʋkpamösɛsʋ a za, Zoova yiaˈa ˗pa ˈwlu gïganɩ. Mii sɛɛ zɛmö nɩɩ, sɛɛ Zezwii bʋbɔnɩɛ ɔɲɩ Lagɔ, ˗a ˈkɩɩ dlɩ ˈtɛɛnɩ ˗a yi ˈkwädlɩkwädlɩnɩ ˗mä ˈbhlɩ a ˗bhlɩɩ ˈmö ˗bhölɩnɩ, mäˈä dʋdʋ ˈwʋ!—Isaïe 65:21-23.
ˈCƖƐ ˗LII ˗MIMII
˗Yɩ kää ˈŋlɩ ˈn Zezwii yiɛ ˈɔ zɩkpaa ˈmö ˈwlʋ, ˈn sɛ yɩ käˈɛ ˗aa ˗li a ˗lii ˈmö, ˗a nɩ ˈyiɛ ˗ka ˈylɩmö ˗a ˈkɩ sasɛ ˈmö ˈnʋ.
3. Zezwii ˈa ˈkwie mɛɛ ˗saɲɩɛ ˈɲiɲlolii ˗ɲɛ ˈkwie ˈsɔ a galɛ ˈmö
ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Adaa ˗sɛɛ Lagɔ ˈklʋkpamöö, ˗lii a ˗mi ɔ bɔ ɔ ˈmö ˈnɩ?
Zɛlɩ Ghlɔɔmö a ˗nʋa 5:12 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈSaa Adaa ˈa ˈɲiɲlolii nʋʋɲɩ ɔ bhʋlʋbhlʋ ˈwlu ˈnɩ?
Zɛlɩ Zaa 3:16 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Yɩ kä ɔ ˈŋlɩ ˈn Zoova yi bhä ɔ Yowli mäˈä dʋdʋ ˈwʋ tie ˈnɩ?
1. Adaa, nɩkpɛ a ˗mɔ ˈnɩɛ ˈɲiɲlolii ˈmö ˗kä ˈmö ɔ glɩnɩ a˗a. ˗Maa sɛ ɔ ˗sɛɛ Lagɔ ˈklʋkpamö a za, nza nɩkpa ˈwuë ˈzʋä ˈɲiɲlolinʋwa ˈn wa kuä.
2. Zezwii, nɩkpɛ a ˗mɔ ˈnɩɛ ˈɲiɲlolii ˈmö ˗kä ˈmö ɔ glɩnɩ a˗a. Sɛ ɔ ˈzʋä Lagɔ ˈklʋkpamö a za, ˗a bhɛnɩ ˗a ˈkä ˈɲiɲlolii a galɛ ˈmö ˈwlʋ ˈn ˗a bhɛnɩˈɛ ˗a ˈkä ˈkwädlɩkwädlɩnɩ ˗bhölɩ.
4. Nɩkpa ˈwuë bhɛnɩ wa ˈkä Zezwii ˈa ˈkwie ˗li a ˗lii ˈmö ghlɩnɩ
ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Sɛɛ nɩkpɛ ˗bhlʋ a ˈkwie bhɛnɩ bhä ɛ ˈkä nɩkpa ˈwuë ˗li a ˗lii ˈwlu nʋ ˈnɩ?
Zɛlɩ 1 Timotee 2:5, 6 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Adaa ˈnɩɛ a˗a ˈɲiɲlolii ˈmö ˗kä. Maa, ɔ ˈɲiɲlolii ɔ nʋä a za, nza nɩkpa ˈwuë kää zɩˈɛ ˈɲiɲlolii ˗ɲɛ ˈkwie ˈsɔ a gbʋ ˗gömö. Zezwii nɩkpɛ a ˗mɔ ˈnɩɛ a˗a ˈɲiɲlolii ˈmö ˗kä ˈmö ɔ glɩnɩˈɛ ɔbhlɩ. Zaa, sɛɛ Zezwii ˈkuä ˗aa ˈwlumö, sɛ yɩ ˗saɲɩ ɔ ˈɲiɲlolii ˗ɲɛ ˈkwie ˈsɔ a galɛ ˈmö ˈnɩ?
5. Zetinaa ˗lɛ ˈɲɛɲɛlu a ˗mu Zoova ɲɩaɲɩɛ
˗Lu a ˗mu Zoova ˈɲɛɛ bhʋlʋbhlʋ ˈɔ bhɛya, ˈmö zetinaa glɩnɩɛ. Zɛlɩ Galatii a ˗nʋa 2:20 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Zezwii a tietieɲɔ Pɔɔlʋ, sɛɛ ɔ tula ɔ nɩɩ ˗lu a ˗mu Lagɔ ˈɲɔɔ ˈmö zetina glɩnɩɛ ˈnɩ?
Adaa ˈa ˈɲiɲlolii ɔ nʋä a za, ɔ ˗ɲɛ ˈɔ yuëa ˈsɔ ˈkwie a gbʋ wa käa ˗gömö. Maa, sɛɛ Zoova tiee ɔ Yowli ˈn ɔ yiɛ ˗aˈa ˈwlumö ˈku a za, ˗a bhɛnɩaˈa ˗a ˈkä ˈkwädlɩkwädlɩnɩ ˗bhölɩ.
˗N ˗kä Biblë a gbɛlɩ ˈlɛ ˈmö zɛlɩ dɔˈwʋ ˗wʋʋ, dɛ wa ˗wʋ a˗a Zoova a Yowli ˈklɩ ˈyɩa dɔˈwʋʋ, ˈsaa yɩ nʋä Zoova ˈwlu, ˈpäni dlɩ kɛ. Zɛlɩ Zaa 19:1-7, 16-18 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈSaa Zoova ˗ɲɛ Zezwii ˈsɔ nʋä, ˗n ˗kɩɩ dlɩ kɛ ˈpänɩ, ˈsaa yɩ nʋmö ɔ ˈwlu ˈnɩ?
˗MƆMƆƆ ˗KAMÖ NIMÏ ˈYƖBHÄ NƖƖ: “Sɛɛ nɩkpɛ ˗bhlʋ a ˈkwie bhɛnɩ bhä ɛ ˈkä nɩkpa ˈwuë puë ˈnɩ?”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
Zezwii ˈa ˈkwie a za, Zoova bhɛnɩaˈa ˗sɩkaa ɔ ˈkä ˗aˈa ˈɲiɲlolii a gbʋʋ ˈyi ˈtatinɩ ˈn ˗a bhɛnɩˈɛ ˗a ˈkä ˈkwädlɩkwädlɩnɩ ˗bhölɩ.
ˈWʋligbanɩkïbhï
˗Yɩ kä ɔ ˈŋlɩ ˈn Zezwii yi ɔ ˈku ˈnɩ?
˗Yɩ kä ɔ ˈŋlɩ ˈn ˗a nʋ ɔ nɩɩ Zezwii mɔɔ ˗lɛ zetina ˈnɩ?
Sɛɛ Zezwii ˈa ˈkwie kä ɔ ˗aa ˗li a ˗lii ˈmö ˈnɩ?
YILII YƆWƲ
˗Yɩ kää ˈŋlɩ ˈn ˗a nʋä nɩɩ Zezwii ˈa zɩkpaa ˗a ˈnɩɛ ˈɲiɲlolii ˈmö ˗kä, ma˗a ˗lɛ zetinaa, ˈyi ˈylɩmö.
Sɛɛ ˗a ˈkää ˈzʋ nzɩ ˗a ˈkä ˈɲiɲlolii ˗ɲɛ ˈkwie ˈsɔ a galɛ ˈmö ˈwlʋ, ˈyi ˈylɩmö.
˗A ˗kä ˈɲiɲlolii ˈkädɩ nʋʋ, Zoova bhɛnɩ bhä ɔ ˈkä yɩ gbʋʋ ˈyi ˈtatinɩ ˗a?
Sɛɛ Zezwii ˈkuä ˗aa ˈwlumö, nɩkpɛ ˗bhlʋ ˈcɩɛɛ yɩ wɛlɩɩ, yɩ kwänɔɔ ˈn ɔ yiɛ ˈɔ -wʋwʋsaa ˈmö zigbanɩ.
« Je ne suis plus esclave de la violence » (Ɛtɛnɛtɩ ˈklʋ a ˈcɩɛcɩɛkïbhë)
a ˗Lizokuu a ˈyize a nʋnwɛ ˈmö wa ˈnɩɛ ˈɲiɲlolii la. ˗Maa, sɛɛ ˗a kää ˗maa yɔwʋ Adaa ˗ɲɛ Ɛɛvö ˈsɔ a za, ˈmö wa laˈɛ ˗sɩbhä.