ˈMözlɔmanɩzlɔmanɛ tula nɩɩ, Zoova -waɲɩ

Wa -kä nɩɩ wa yɛ nɩkpɛ ˈmö zlɔmanɩ nʋʋ, miɛ nɩɩ wa kɔ ˈdɩ ˈmö ˈzʋ, ˈn wa kɔ sɛ ɔ ˈkää nɛmö slʋnɩ. Maa mii sɛ ˈyɛɛ zɛmö nɩɩ, wa kɔ pinɩ. Zoova -kaɲɩ ˈmö zlɔmanɩɩ, -a ˈkɔ sɛ ɔ yɩbhää bʋbɔ nza-a ɔ zlɔmanɩɲɩɛ ˈmö. (Gh 12:1; Eb 12:10, 11) Dɛ -mämaa a dɔˈwʋ, wa -kä nɩkpɛ ˈmö zlɔmanɩɩ, yɩ bhɛnɩ yɩ ˈkɔ yɔwʋ kälɩ. Maa mii ˈkää ˈŋlɩ -kä ɔ ˈkä ˈsaa nɛnɩɛ Lagɔ dlɩ yɔwʋ nʋ, ˈn ɔ ˈkä ˈɲupälɩ ghlɩ. (Pr 10:7) -Mɔ zlɔmanɩɛ nɩkpɛ ˈmö, ˈn -mɔ wa zlɔmanɩˈɛɛ ˈmö, wa ˈsɔ -kpɔ, ˈsaa waˈaa bhä -kä wa ˈkä ˈwʋ dlʋ ˈnɩ?

-Mɔ zlɔmanɩɛ nɩkpɛ ˈmö. Sɛɛ Zoova zlɔmanɩɲɩɛ ˈmö dlɩzɛmönanɩsɛ ˈn -wawʋ ˈmö, ˈyukugänɩwaa muë, ˈyuëlowluwaa muë ˈn -mumuë, ˈyli yɔwʋ wa ˈtɛmanɩɛ wa ˈkä -sɩbhä ˈzʋmö. (Jr 46:28) Wa yi nɩkpɛ teɲii ˈmö zlɔmanɩɛ yi aˈbhë -kë, waˈaa -kä wa ˈkä -lɛ ˈwʋ ˈmɩɛ, ˈn wa käˈɛ wa ˈkä -sɩbhä -wawʋ ˈmö ˈzʋnɩ.—Ti 1:13.

-Mɔ wa zlɔmanɩɛ. Sɛ wa -yiɲɩ ˈmö zlɔmanɩ aˈbhë -kë, -a nɩ tɩ nimï -sɛ, ˈn -a nɩ ˈzwi ˈklʋkpamö cuu. (Pr 3:11, 12) Sɛɛ -a -gwälɩnɩɛ ˈɲiɲlolii ˈmö a za, wa kä wa -kaɲɩ ˈmö zlɔmanɩ. ˈN ˈmözlɔmanɩzlɔmanɛ kä ˈki a -bɛ. ˈSaa -a zɛlɩɛ ˈmö -mä Biblë ˈmö, ˈn ˈsaa -a ˈcɩɛɛ -mä ˈwluyɩbhäyɩbhɩ ˈwʋ, yɩ bhɛnɩ yɩ -kaɲɩ ˈmö zlɔmanɩ. Dɛ -mämaa a dɔˈwʋ, ˈyukugänɩwaa mʋa kää wa -kaɲɩ ˈmö zlɔmanɩ. -A -kä ˈwʋ ŋlu wa -kaɲɩ ˈmö zlɔmanɩɩ, ˈn sɛ wa ɲɩaɲɩɛ ˈdɩ -a -kɩɩ ˈklʋkpamö zʋʋ, -aˈa zɩkpaa yi nɛnɩmanɩ, ˈn -a yi ˈkwädlɩkwädlɩnɩ -bhölɩ.—Pr 10:17.

A NƖ YLƐ VIDEO, “NƖKPA ˈWUË LAGƆ -WAA, ˈMÖ Ɔ ZLƆMANUËË,” ˈN A NƖ YƖLƖ NIMÏYƖBHÄKÏBHÏ ˈLƐ YƆWƲ:

• 

  Kanɔ a ˈyuënɔ sɛ ɔ -wʋ a-a bhä ˈnɩ? ˈN sɛɛ ˈɔ zɩkpaa zigbonɩ ɔ ˈmö ˈnɩ?

• 

  Sɛɛ Zoova zlɔmanɔ bhä ˈmö, -wawʋ ˈmö ˈnɩ?

• 

  ˈSaa ˈɔ wɛlɩɩ ˈcɩaɲɩ ɔ ˈnɩ?