Sɛɛ Zezwii ˈkuä -aa ˈwlumö a za​Glusɛsʋ yi zɩkö -bhölɩ

Zezwii ˈkuä -aa ˈwlumö, sɛ yɩ -kaɲɩɛ zɩkö -li a -lii ˈɲɛ, Zezwii ˈa ˈkwie a ˈwʋligbanɩzlɩ -yiɲɩ kwänɩɲɩ -a ˈkɩ dlɩ kɛ ˈpänɩ. -Li a -lii -a ˈkää ghlɩ a glaˈmö, glusɛsʋ -wʋ -mä. Zoova ˈnɩ a-a yɩbhä nɩɩ, nɩkpa nɩ ˈku. Nza, -aa nɩkpɛ -kä ˈkuu, ˈn yɩ kälɩɲɩɛ teɲii yɔwʋ. (1Kɔ 15:26) Dɛɛ Lazaa ˈkuä, Zezwii ˈyɩɛ ˈɔ ˈwʋ-bhlinɩwaa ˈylɩmö wa -wʋä ˈwi dɔˈwʋ, ŋäzɩ yɩ ˈlɩbhɔɔ teɲii. (Zh 11:33-35) Sɛɛ Zezwii -wʋä ˈtɩɩ, -sɩbhä ɔ Dɩba -wʋä zaa, -a nɩ kɩ dlɩ ˈwʋ nɩɩ, -aa nɩkpɛ -a -wa -kä ˈku, sɛ yɩ kälɩɲɩɛ yɔwʋ, -sɩbhä yɩ kälɩmöˈɛ Zoova yɔwʋ. (Zh 14:7) Zoova yɩbhä nɩɩ, ˈtɛɲɩ -ɛɲɩ ˈmö ɔ ˈkää ˈwʋ -päpanɩsɛ ˈɔ bʋbɔwaa -wa ˈkuä glu -sɛ nɩ ghlɛ cuu, ˈmö -a yɩbhämöˈɛ -abhlɩ.—Job 14:14, 15.

Zoova, Lagɔ -mɔɲɩ nʋnʋlii ˈnɩɛ bidibidi -wʋ, ˈmö ɔ glɩnɩɛ zaa, -a kɩ dlɩ ˈwʋ nɩɩ, ˈtɛɲɩ ɔ -dɩɛ -kä ghlɛɛ, ɔ yi libho ˈla ˈtɩɩ nʋ. (1Kɔ 14:Z33, 40) ˈLɩgbʋ ˈnaa ˈkäa -bhölɩ, maa -aɲɩ -a ˈkäa ˈwlu gïganɩ nzɩ -wa ˈkää glu ˈwlʋ, -a ˈkʋa päla. -Na nɩkpɛ -kä ˈku, -lɛ a ˈyize -n ˈpänɩ ɔ glusɛsʋ a wɛlɩɩ dlɩ kɛ -a? (2Kɔ 4:17, 18) Sɛɛ Lagɔ -ɲɩaɲɩɛ ˈɔ -Yowli ɔ ˈkä -aa ˈwlumö ˈku, ˈn sɛɛ Biblë nʋä nɩɩ, -wa yɛɛ ˈku ˈwë yi ˈwʋ ˈsɔ -bhölɩnɩɩ, -n yɛ ɔ yɩ ˈwlumö Lagɔ bhälɩ ˈwë -a?—Kɔ 3:15.

• -Na -lowluwa -wa yɛɛ ˈku ˈwë, ɛ -käˈɛ -na bhɛya, wa glaˈmö a -nɔ -mɔ -n yɩbhä ɔ -n ˈkä ylɩmö cuu ˈnɩ?

• Biblë ˈmö a nɩkpa -muë -n yɩbhä ɔ -n ˈkä ylɩmö nzɩ -n -ɲʋa ˈkä ˈdɩ -sɛ ˈnɩ?