Daviidɩ ˈnɩ a-a ŋänɩ

ˈN ŋanɔ -käˈmö ˈlɩbhää, ˈsaa -n nʋ bhä ˈnɩ?— -Na -da -ɲɛ -na dɩba ˈsɔ ˈmö -n ghlɩɛ -mä nzɩ wa -kaˈmö kwänɩ. Maa nɩkpɛ -mɔmɔ -bhölɩ, -ɔ bhɛnɩˈɛ ɔ -käˈmö kwänɩ. Ɔ ˈtɛɛ ˈmö ɔ zi nɩkpa ˈwuë ˈwʋ. -N -yoo bhä -a?— Nn, Lagɔ Zoova mɔɔ. Biblë ˈmö a ɲɛgbayu -bhlʋ wa ˈlaa Daviidɩ, ˈɔ wɛlɩɩ ˈmö -a ˈkää ˈmö sɛnɩ. Ɔ -yi a-a sɛ nɩɩ, Zoova yɔ a-a ˈkwädlɩnɩ kwänɩ zaa, ɔˈɔ a-a ŋänɩ.

Tɛɛnɩ ɔ ˈyuë dɔˈwʋ, Daviidɩ ˈa -lowluwaa ˈcɩɔ a-a sɛ ɔ ˈkää Zoova -wa. Mɩ kwänɩ a-a Daviidɩ ˈn ɔˈɔ a-a -lii -yɩ -bhöä ŋanɔ ˈwʋ -gu. Ɔ -yi a-a sɛ nɩɩ, Zoova, ˈɔ bheyiɛ zaa ɔ yɔ a-a kwänɩ. ˈYlɩ -bhlʋ ˈmö, Daviidɩ -wʋ a-a ˈɔ wïlaa ˈwʋ -kʋ dɔˈwʋ ˈn -suluku ˈkɔdʋ yiɛ ˈɔ ˈwli köbhä. -N -yi bhä ˈsaa Daviidɩ nʋ bhä -a? ˈBɩwʋ ɔ kpëtʋä, ɔ yuë köbhä. Ɔˈɔ a-a -lu käˈmö -su ɔ yuë ˈlɩbhä. ˈN gbi yiˈɛ wïla a ˈlɩbhälɩbhä -bɛyi yi, ˈn Daviidɩ yɛˈɛ ˈlɩbhämö. -Na dɔˈwʋ -mɔ kwänɩ a-a Daviidɩ ˈnɩ?— Nn, Zoova mɔ a-a.

ˈTɛɲɩ -mɛmɛ ˈmö ˈn Daviidɩ yi a-a tula nɩɩ, ɔ kälɩ ˈmö. Yizlaɛlɩ a -nʋa -ɲɛ filitɩɛwa ˈsɔ -wʋ a-a gwɩ dɔˈwʋ. Filitɩɛwa a glaˈmö a slʋjeyi -bhlʋ, ˈwʋ ɔ ˈbhʋɔ a dɔˈwʋ, -ɔˈɔ -sɩbhä a sɛ -wʋ! Ɔ ˈŋlɩ a-a Goliatɩ. Nɩkpɛ ˈla nɛpɔ a-a Yizlaɛlɩ ˈa slʋja -ɲɛ Zoova ˈsɔ. Goliatɩ lɛ nɩɩ, Yizlaɛlɩ ˈa slʋja -kä bhɛnɩɛ, wa nɩ yi wa -ɲɔɔ ˈkä gwɩ. Maa Yizlaɛlɩ ˈa slʋja ŋänɩ wa ŋänɩ a-a teɲii zaa, ˈwa a-a ˈyɩbhä wa -ɲɔɔ ˈkä gwɩ. Zaa Daviidɩ ˈnʋ a-a cuu, ɔ yiɛ Goliatɩ ˈdɩ ˈɲɛ nɩɩ: ‘N -ɲɛmö yi na gwɩ! Zoova yii kwänɩ, n -yimö ˈwlu ˈplɩ!’ -Na dɔˈwʋ Daviidɩ kälɩɩ bhä ˈmö -a?— Nn, ɔ kälɩ ˈmö. -N yɩbhä ɔ -n ˈkä ˈsaa ˈplɩɛ bhäla ˈwʋ -yi -a?

Daviidɩ yi a-a ˈkpɩya ngbï -ɲɛ ˈɔ -kpata ˈsɔ ˈwʋ ˈlibhï. ˈN ɔ -ɲɛ Goliatɩ yi a-a gwɩɛ mö. Goliatɩ yɩ a-a ˈylɩmö nɩɩ, Daviidɩ ɲɛgbayu -ce ɔ glɩnɩ a-a, nɛpɔ ɔ -nɛpɔɔ. ˈN Daviidɩ yɔ a-a ˈdɩ ˈɲɛ, ɔ lɛ naa: ‘-gbälɛɛ -n -suä ˈn -n yinɩɛ, maa amö naˈa, Zoova a ˈŋlɩ ˈmö n -kamöä yinɩ.’ ˈN Daviidɩ yiɛ -mä ˈɔ -kpata ˈmö kpiyi ˈzʋ, ɔ yiɛ guë, ɔ yɔɔ mönɩ ˈn ɔ yiɛ kpiyi ˈpä. ˈN ɛ yɔɔ ˈklʋtɩkpa ˈmö köbhä! ˈN Goliatɩ yɩɛ zɛmö -bhli, ɔ yɩɛ ˈku. Ŋanɔ yiɛ Filitɩɛwa ˈlɩbhä ˈn wa yiɛ futo. Sɛ yɩ -wʋ ɔ ˈmö ˈn Daviidɩ -ɔ glɩnɩ a-a ɲɛgbayu -ce yi bhä nɩkpɛ vʋkwa la ˈlɩbhä ˈnɩ?— Zoova mɔ kwänɔɔ, mɔɔ ˈtɛɛ ˈmö, mɔɔ ziɛ Goliatɩ ˈwʋ.

ˈSaa -n ˈcɩɛ bhä Daviidɩ a dɛ ˈnɩ?— Zoova ˈtɛɛ ˈmö ɔ zi nɩkpa ˈwuë ˈwʋ. ˈN ɔ glɩnɩˈɛ -na bheyi. Zaa -zlɩ ŋanɔ -kamö ˈlɩbhä, ligba nɩɩ, Zoova bhɛnɩ ɔ -kamö kwänɩ -n ˈkä ˈyli yɔwʋ ˈtɛmanɩ!